گشتیگوتار

دزو مالخێ مالێ یێن بووینە هەڤاڵ

 

هێرش شاكر
رۆژانە ل هەرێما کوردستانێ بەحسێ دیاردا گەندەڵیێ دهێتە کرن و هەمی ئالی ب دەسهەڵات و ئۆپۆزسیون ژی دان پێ نایە، تا گەهشتە وی ئاستی نێچیرڤان بارزانی سەروکێ راسپاردی ژبو پێکئینانا کابینا نو یا حکومەتا هەرێمێ دبێژیت گەندەڵی یا بوویە کلتور!
دزانستێ کومەڵناسیدا ژیدا هاتیە ئەگەر کریارەکا نە هەژی ل جەم هەر کەس و ئالیەکێ هەبوو و وی و کەس و ئالی دەست ل وێ کریارێ بەرنەدا دێ بیتە عەدەت و دیاردە و کو بوو دیاردە ژی یا ب زەحمەتە بهێلیت. کو دوماهیک جار وەکی کابرای گوتی دێ بیتە کلتور!!! بەلێ ئەرێ کێ وەکر کو گەندەڵی ببیتە کلتور کی دەسپێشخەربوو کو ببیتە کلتور ئه‌ڤه‌ پرسه‌كه‌ وبه‌رسڤه‌كا هویر دڤێت؟
ئەگەر ئاڤرییەکێ ژبو کەناڵێن ڕاگەهاندنێ ب هەمی هۆکارێن وێڤە ڤەدەین یان بەرێ خو بدەینە توڕا جڤاکی یا فەیسبووکێ رۆژانە سەدان بابەت لدور دزی و گەندەڵیا دەزگەه و بەرپرسێن حکومەتا هەرێمێ ب بەڵگەه و دیکیۆمێنتڤە دهێنە وه‌شاندن یان ئیفلاسبوونا فلان کۆمپانی و فلان بازرگانی لێ ئەرێ تا نوکە چ دیفچوون وپێرابوونێن جددی بو ڤێ یەکێ هاتیە کرن؟ ب نه‌رینا من نه‌خێر.
ڤێجا ب کورت و کرمانجی ئەز دبێژم وەسا باشترە کو چەمکێ (دز) لجهێ چەمکێ گەندەڵیێ بێتە بکارئینان چونکی پتریا بەرپرسان یێن بووینە دز و دزەکێن زاڵم ژی و کەفتینە مژینا خوینا هەژارێن وەڵاتی. وەرن بەرێ خوبدەنە خەلکێ هەرێما کوردستانێ ل پشتی سەرهلدانا بوهارا 1991 تا نوکە دێ بینی هەژار یێ هەژارتربووی و زەنگین ژی یێن زەنگین تربووین! ئەگەرێ ڤێ یەکێ چیە؟ .. ئەز بێژم پێتڤی ب تەحلیلا ناکەت چونکی یا دیارە.
دهێتە ڤەگێران کو زەنگینەکێ زاڵم و فەقیرەک هەبوون ، زەنگینێ زالم ماهین هەبوو و فەقیری چێلەک هەبوو ، چێلا فەقیری زا و گولەک لێ پەیدابوو ، زەنگینێ زالم گوتە فەقیری ئەو گولک جانیا ماهینا منە (کێشکێ ماهینێ) ، فەقیری گوتێ ئەڤە گولکە نەک جانیا ماهینێ یە چێلا من یا زای و گولکا وێ یە، زاڵمێ زەنگین یێ رژدبوو کو ئەڤە جانیا ماهینا وی یە و پشتی گەنگەشەکا زور ، زاڵمی گوتە فەقیری دێ ئاریشا خو بەینە دادگەهێ و پشتی چووینە دادگەهێ حاکمی گولک ب جانیا ماهینا زالمَی ل قەلەمدا و گوت ئەڤە یا زاڵمی یە. لێ فەقیر ما مەندەهوش و گوت حاکمێ هێژا ئەڤە دێ چەوا چێبیت ئەڤە گولکە نەک جانی حاکمی گوت جانیا ماهینێ دوو دەست و دوو پێ یێن پێڤە ئەڤە ژی هەر یا وەسایە جانیا ماهینێ دوو چاڤ و دوو گوه یێن هەین ئەڤە ژی هەر یا وەسایە واتە هەمی ئەندامێن وێ ئێکن … هنگی فەقیری گوت مادەم حاکم و زەنگینێ زاڵم بوونە ئێک خودێ هاریکاربیت. هەروەسا کورد ژی دبێژن (ئەگەر دزو مالخێ مالێ بوونە هەڤال دێ گای دکولینکا بانیدا بەنە دەر ) ڤێجا ل هەرێما کوردستانێ ژی دادگەه و ئالیێن دەسهەڵاتێ یێن بووینە هەڤئاڵ و هەر چ سەروەت و سامان و نەفتا هەی دکولینکا بانیدا برە دەرڤە و فروت و دبەلیکا خونا و هەژارێن بەلەنگاز ژی دبێژن خودێ هاریکاربیت … بەلێ خودێ هاریکاربیت.

بابه‌تێن په‌یوه‌ندی دار

زر الذهاب إلى الأعلى
إغلاق