گشتیگوتار

فرە قەیرانى ؛ ژ هەڤکێشا مەزهەبى بو پرسا نەتەوەیى

هێرش شاکر

 

2012-09-12
فرە مەزهەبی و فرە نەتەوەیی و نەژادى و فرە ئایینى سروشتێ دەولەتا عیراقی پێک دئینن و پشتى نەمانا ڕژێما بەعس ژى فرە کوتلە ژى بوویە خۆهەک و سروشتەکێ دى ژى ژبو ڤى وەڵاتى.
هەر کوتلەکێ مەزهەبەکێ ئایینى یێ مەزن ژبو مانەڤا خۆ بخوڤە گرێدایە، بو نمونە کوتلا سیاسی یا نورى مالکى یێ سەروک وەزیرێ نها یێ عیراقێ مەزهەبێ شیعى بخوڤەگرێدایە یانکو ژبەر سێبەرا ڤى مەزهەبی گەشێ ب مانەڤا خو ددەتن و کوتلا عیراقیە ژى هەردوو مەزهەبێن سوننى و شیعى بخۆ ڤە گرێدایینە و ئوسامە نوجێفى یێ سەروکێ پەرلەمانێ نها یێ عیراقێ مەزهەبێ سوننى بخۆ ڤە گرێدایە و موقتەدا ێەدر وەک کەسایەتیەکێ شیعى دەولەتەکا سەربەخوەیە و کوردا ژى ژبلى مەزهەبێ سوننى نەتەوا دوویێ نە ل عیراقێ و ئەڤ یەکە ژى ددەستورێ وەڵاتیدا هاتیە جێگیرکرن و ل سەر ڤی شەنگستى ژى پوستێن سیادى یێن وەڵاتى، بێ ل بەرچاڤگرتنا کەسێن هەژى ژبو جهێن هەژى هاتینە بارڤەکرن، لێ یا ژ هەمیا حیبەتى تر ئەڤەیە کو هەر ئێک ژ ڤان ئالییان ب ئالیێ دەولەتەکا ئەقلیمى یان دەڤەرێ ڤە دهێنە پشتەڤانیکرن.
ل ڤان دوماهییان ژى گرژى و ئاریشە دناڤبەرا تەڤایا ئالیێن عیراقی دئێک تەوقیتدا دەرکەفتن! ب تاییەتى ژى دناڤبەرا هەرێما کوردستانێ و حکومەتا ناوەندى و تا نوکە ژى ئەو گرژى یا بەردەوامە، ئەگەر ئەم بەرێخوەدانەکێ ژبو داخویانیێن بەرپرسێن عیراقێ و هەرێما کوردستانێ بکەین ب دیتنا من یا خویایە کو ئەڤ گرژى و ئاڵوزیە ژى بارا پتر دکەسی نە نەک لڤێ یەکێ کو دنەتەوەیی و مەزهەبی بن و هەروەسا سیناریوکە ژبو وێ یەکێ کو خەلکى ل ڤێرە و خارێ بڤان ئاریشێن خویێن کەسی و بێ بنەما مژویل بکەن چونکى هەم ل هەرێما کوردستانێ و هەم ل ژێرى و ناڤەراستا عیراقێ ژى خەلکى گازندە ل کێمیا خزمەتگوزارییان هەنە، و بەڵگەه ژبو ڤێ چەندێ کو -ئاریشە دکەسی و بێ بنەمانە- دوماهیک داخویانییا نورى مالکى یێ سەروک وەزیرێن عیراقی یە دەما کو گوتى: ئەز داخازا بەستنا کونگرێ نیشتمانى دکەم و دێ ئاریشێن حکومەتا ناوەندى و حکومەتا هەرێمێ بێ پەقاندنا ئێک گوللە هێنە چارەسەرکرن! ئەرێ پا ئەو داخویانیێن دژوارێن بەرى هنگى چ لێ هاتن کیڤە چوون؟!
و بەڵگەهەکا دى ژى ئەڤەیە کو تا نوکە لدویڤ ئەو زانیاریێن ڤان هەیاما ل سازیێن ڕاگەهاندنێ دهێنە بەحسکرن کوردا هند پێداگرى ل سەر مافێن نەتەوەیی نەکریە هندى کو پێداگرى ل مافێن حیزبی و کەسی کرى، و دەمێ بوورى دیدەڤانەکێ باشێ ڤێ ڕاستیێ یە دەمێ کو کوردا وەسا خو نیشاددا کو ئەو بەشەک نینە ل ئاریشێن عیراقێ و شانازى ژى بڤێ یەکێ دکر، ڕەنگە هنگى بەشەک نەبووینە ل ئاریشێن عیراقێ و ئەڤە بو هنگى ڕاست بیت بەلێ ژبیرنەکەین کوردا ل پشتى نەمانا ڕژێما بەعس پتر رولێ ناڤگێریێ دناڤبەرا ئالیێن عیراقی دیتیە ئەڤە ژى ل سەر حسابا بەرژەوەندیێن تایبەتێن کوردا بووینە وەکى مللەت ب ڕامانەکا دى چونکى کوردا ناڤگێرى دناڤبەرا ئالیێن عیراقیدا دکر بەردەوام تەنازول ژ مافێن خو کرینە، بەڵگەه ژى ژبو ڤێ ئاخفتنێ تا نوکە چ ژ مافێن سەرەکى یێن کوردا بدەستڤەنەهاتینە ماددێ 140 ژى یا هەواردکەت.
لێ نوکە کورد یێن بووینە پشکەک ژ ئاریشەیان بەلێ نەک ژبو پێداگرى کرن ل سەر مافێن خو یێ ڕەوا بەلکى ژبو دروستکرنا دووبەرەکیێ دناڤبەرا ئالیێن عیراقی ژبو بدەستڤەئینانا هندەک مافێن کەسی بو نمونە؛ حەواندنا تارق هاشمی یێ جێگرێ سەروک کومارێ عیراقێ ل سەر چ بنەما ل هەمبێز بگرت؟ چونکى چ پێکوڵ ژ ئالیێ حکومەتا ناوەندى ژبو تیرورکرنا هاشمى نەهاتینە کرن بەلکى رێکێن یاسایی ل هەمبەر هاتینە گرتن ئەگەر راستە ئەو یێ بێ گونەهە بلا بەرهەڤى دادگەهێ ببیت، چونکى ل ڤێرە و وێراهە بەحسێ سەروەریا یاسایێ دهێتە کرن، ئەڤە ژبلى نە روونیا بادەکێن دى یێن کوردا دگەل حکومەتا ناوەندى مینا بادەکا نەفت و گازێ.
یا فەرە ئەم درەوا دگەل خو نەکەین وەکى وەڵاتیێن هەرێما کوردستانێ چونکى روژ نینە بیرەکا نوى یا –نەفتێ- ل هەرێما کوردستانێ دەرنەکەڤیت و تا نوکە کەس ژ مە دزانیت چ ل پارێ ڤێ نەفتێ دهێت؟ ئەرێ ئەو جهێ نەفت لێ دەرکەفتى جێڤانێت وێ دەڤەرێ چ ببەر کەفتیە ژ پارێ وێ نەفتێ؟ هێشتا بو مە وەکى وەڵاتیێن هەرێمێ دیار نینە چ لڤێ نەفتێ و پارێ وێ دهێت؟! ڤێجا خەلک و حکومەتا ناوەندى چەوا بزانن؟ و ل خارێ ژى وەکى چاڤدێر بەحس دکەن سازیێن حکومەتا عیراقی هەر ئێک ژبو خو دەولەتەکە و کەس ب کەسی نینە و بێ سەروبەری و گەندەڵییەکا زور پێڤە دهێتە دیتن، کو ڤێ یەکێ ژى ئێکا وەکریە بودجە و سولفە و … هتد بهێنە گیروکرن و کاروبارێن وەڵاتیێن هەژارو بەلەنگازێن عیراقێ و هەتا هەرێما کوردستانێ ژى وەکى پێدڤى برێڤەنەچن.

بابه‌تێن په‌یوه‌ندی دار

زر الذهاب إلى الأعلى
إغلاق