ناوشێروان ژ گۆران بو دۆران

د.شه‌عبان مزوری

دوه‌مین سالڤه‌گه‌را مرنا ناوشێروان ڤان رۆژا و هه‌لویستێ ئه‌ندامێن بزاڤا گۆران هه‌مبه‌ر ڤێ بیره‌وه‌ریێ بو من نیشاندده‌ت كو بزاڤا گۆران وه‌ك هه‌می رێكخستنێن باشورێ كوردستانێ پێنگاڤه‌ك بو پێش بو و بده‌هان گاڤ به‌ره‌ف پاشڤه‌ بو. رێكخستنێن گۆران بێژه‌ هه‌ما لهه‌می وه‌لاتا ئه‌ڤ بیره‌وه‌ریه‌ پر پیته‌ پێ كریه‌، لتورێن كومه‌لایه‌تی بوێنێن ناوشێروان داگیركرینه‌، سه‌ره‌دانا مه‌زارێ ناوشێروان و سوندخوارن یانژی دوباره‌ كرنا هه‌ڤبه‌ندیا خوه‌ برێبازا ناوشێروان ڤه‌، هه‌مان رێو ره‌سمێن سه‌ره‌دانا مه‌زارێ مه‌لا مسته‌فای تینه‌ بیرامه‌. لڤێره‌ گه‌لو وه‌ گۆرانخوازا و لپێشیا هه‌میا ناوشێروان بخوه‌ لومه‌ ل په‌ده‌كێ دكر لسه‌ر وی ره‌وشتی و دگوتن ئه‌ڤه‌ دیارده‌گ پر كرێته‌، باشه‌ پرس لڤێره‌ تشتێ دوهی كرێت ئه‌ڤرو چه‌وا جوان بو؟ له‌وما دڤێت هه‌می ئه‌ندامێن گۆران و پێشیا هه‌میا سه‌ركردایه‌تیا وان دخوازا لێبورینێ ژ مالا مه‌لا مسته‌فا بارزانی بكه‌ن.

پرسه‌ك بو من چێدبیت ئه‌وژی گه‌لو چ تایبه‌تمه‌ندیه‌ك كه‌سایه‌تیا ناوشێروان هه‌بویه كو هه‌ژی هندێ بیت مه‌زارگه‌هه‌ك هه‌بیت؟‌ ناوشێروان كاری چ خزمه‌ت بو خه‌لكێ باشورێ كوردستانێ بكه‌ت‌ كو خوه‌دان مه‌زارێن دن نه‌ كربیت؟ ناوشێروان چ گوهارتن خسته‌ شێوێ رێڤه‌به‌ریێ جودا ژ خوه‌دان مه‌زارێن دن؟ باشه‌ وه‌ك خوه‌دان مه‌زارێن دن ناوشێروان ژی هه‌می مال و ملكێن گۆران لسه‌ر ناڤێ خوه‌ خستن سه‌ر ناڤێ زاروكێن خوه‌؟ هیڤیدارم به‌رسڤا ڤان پرسا بده‌ن.

بباوه‌ریا من ناوشێروان گومان نینه‌ تێزێن جودا ژ سه‌ركردێن دن یێن باشور هه‌بون، لێ هه‌لسوكه‌وت هه‌مان بو. ناوشێڕوان وه‌ك هه‌لگرێ په‌یاما گۆرانكاری د پراكتیكدا‌ كاره‌ك نیشان نه‌دا كو گۆرانكاریه‌ك تێدا بیت یانژی كارتێكرنه‌ك هه‌بیت لسه‌ر مێژیێ هاولاتیێن باشور. ناوشێروان ٩ سالا رێبه‌رتیا گۆران كر لێ ٩ جاران ده‌رنه‌كه‌فت ناف خه‌لكێ، به‌رده‌وام لگری خوه‌ حه‌شاردابو و پول پول خه‌لك دچون لایێ وی. 

ناوشێروان به‌رده‌وام دگوت نابیت هه‌می چه‌مكێن ده‌ستهه‌لاتێ دده‌ستێ ئه‌ندام و لایه‌نگرێن پارتا دا بن، به‌لكو دڤێت پێچه‌وانه‌ ئه‌ڤ كاره‌ لسه‌ر بنگه‌هێ پێچێبونا بێنه‌ پر كرن، لێ دپراكتیكێ دا گۆران بو به‌رده‌وام بونا پارتێن دن و به‌شێ خوه‌ ژ پله‌ و پوستێن خوه‌ ته‌نها لسه‌ر خه‌لكێ خوه‌ به‌لاڤكرن.

ناوشێروان دگوت نابیت كه‌سێن پوستێن فه‌رمی نه‌بن مایێ خوه‌ دكارێ حوكمه‌تێدا بكه‌ن ئه‌ڤه‌ژی یه‌ك ژ هیڤیێن من و گه‌له‌ك كه‌سان بو كو ناوشێروان جودا ژ سه‌ركردێن دن یه‌كه‌مین پوستێ گوران بده‌ست بینه‌ ناوشێروان بخوه‌ پركه‌ و لدوفدا هه‌ڤالێن دن یێن وی ل خانا راپه‌راندنێ كو دبیته‌ مه‌كته‌ب سیاسی لناڤ پارتێن دندا. لێ وه‌ك مه‌دیت هه‌مان سه‌ربورا پارتێن دن یێن باشور دوباره‌ كر، نه‌ ناوشێروان نه‌كه‌سه‌ك دن ژ سه‌ركردایه‌تیا بلند چونه‌ په‌رله‌مانی، ده‌ورا دوێ ٢٠١٣ كه‌فتنه‌ ناڤێ حوكمه‌تێ و دیسان ژبلی مستافا سه‌ید قادر كه‌سه‌ك دن ژ سه‌ركردایه‌تیا وی به‌شداری ده‌ستهه‌لاتێ نه‌كر نه‌ ل هه‌ولێر نه‌ لبه‌غداد.   لێ ناوشێروان و هه‌ڤالێن خوه‌ كه‌سێن راسپاردی پوست و پلا وه‌ك په‌ده‌كێ و یه‌نه‌كێ‌ ژدورڤه‌ كونترل دكرن كو ئه‌ڤه‌ بخوه‌ بباوه‌ریا من ئه‌گه‌را هه‌را سه‌ره‌كی یه‌ دشكه‌ستنا سیاسه‌تا كوردێن باشور لسه‌ر هه‌می ئاسته‌كی ، چونكه‌ بریارده‌را لخوه‌ نه‌ ددانا هه‌ر پوسته‌كێ هه‌بیت پركه‌ن به‌لكو هه‌میا دخواست سه‌روك بن ژ هێزه‌كا دو ده‌نگ تا هێزه‌كا ٤٥ كورسی .

ده‌ردور و ده‌روێشێن ناوشێروان دابێژن نه‌ به‌شدار بونا راسته‌وخوه‌یا ناوشێروان دده‌ستهه‌لاتێ دا ڤه‌دگه‌ریت بو خواسته‌كا وی ژبو پێشخستنا نفشه‌ك نوی لێ ئه‌ز ڤێ یه‌كێ پتر ژ دره‌وه‌ك شاخدار نابینم. ئه‌گه‌ر ناوشێروان یوسف موهه‌ممه‌د یانژی ئارام شێخ هنده‌ ژیر و ژێهاتی دیتبان بلا یه‌ك ژوان كربا رێكخه‌رێ گشتی و پێشیا هه‌میا ناوشێروان ل دویف وان چوبا. مه‌ وه‌ك كورد باشترین نمونه‌ لباكور هه‌نه‌، ئوسمان بایده‌مر ده‌ما بوی سه‌روكێ به‌له‌دیا ئامه‌دێ نه‌ كڤه‌نترین سیاسی بو به‌لێ ژێهاتیترین بو وێ ده‌مێ، ده‌ما سه‌لاهه‌ددین ده‌میرتاش بوی سه‌روكێ هه‌ده‌په‌ یێن وه‌كی ئه‌همه‌د تورك، خه‌تیب دوجله‌، له‌یلا زانا كو ته‌مه‌ت ته‌مه‌نێ ده‌میرتاش دزیندانا راكه‌فت بون هه‌می ل په‌ی ده‌میرتاش چون و لسه‌ر هه‌مو ئاسته‌كی و لهه‌می جهه‌كی ل پێشیا هه‌میا بو. 

ناوشێروان گوهارتنا شێوێ هه‌لبژارتنا سه‌روكێ هه‌رێمێ كره‌ ئارمانجه‌ خوه‌یا سه‌ره‌كی كو بدیتنا من ئه‌ڤ پرسه‌ هه‌ژی هندێ نینه‌ یه‌ك خوله‌ك ژ ده‌مێ خوه‌ ژبو ته‌رخانكه‌ی، خه‌لكێ مه‌ بسه‌دا گرفت و پرس هه‌نه‌ كو پێویستی به‌رسڤ و چاره‌سه‌ریا نه‌‌. لڤێره‌ پێكولیا ناوشێروان لسه‌ر بابه‌تێ سه‌روكاتیا هه‌رێمێ بدیتنا من كالفامیه‌. ده‌ما تو دكه‌ڤی پروسێسه‌ك سیاسی دڤێت تو رێز ل یاسایێن له‌یزكێ بكه‌ی و د هه‌مان ده‌مدا ئازادی پروپاگاندێ بو به‌رنامێ خوه‌یێ كورت خایه‌ن و درێژ خایه‌ن بكه‌ی، ئه‌ڤ پرسه‌ ب چه‌ند رستا د پرۆگرامێ خوه‌دا ناوشێروان دكاری بو چاره‌سه‌ر كه‌ت ئه‌و‌ ژی بو نمونه‌ ( ئه‌گه‌ر گۆران زۆرینه‌یا كورسیكا لپه‌رله‌مانی ببه‌ت یه‌كه‌مین كار بو گۆران وێ گۆهارتنا شێوێ هه‌لبژارتنا سه‌روكێ هه‌رێمێ بیت )، لڤێره‌ دڤێت ئێدی بابه‌تێ سه‌روكێ هه‌رێمێ هاتبا گرتن. بو مێژو دبێژم ل هه‌لبژارتنێن ٢٠٠٩ من گوته‌ ناوشێروان بلا وه‌ كه‌ندیدێ خوه‌ هه‌بیت بو سه‌روكێ هه‌رێمێ، لمن ڤه‌گه‌را و  گوت مالا بارزان پوستێ سه‌روكاتیا هه‌رێمه‌ راده‌ستی كه‌سێ‌ دن ناكه‌ن، ئه‌ڤه‌ بخوه‌ به‌رسڤ بو بو وی بخوه‌ به‌ری بو من.

هاڤینا ٢٠١٤ لگه‌ل به‌رفره‌ بونا هێرشا داعش بو هه‌رێما كوردستانا عیراقێ و كاره‌ساتا هه‌را مه‌زنا بسه‌رێ كوردێن شه‌نگالێ هاتی، كوشتن، بریندار بون و وندابونا بهه‌زان كه‌سان نه‌كاری بو چه‌ند ده‌م ژمێرا هه‌لگرێ دروشمێ گۆرانێ ژ گری بینته‌ خوارێ. كانونا دووێ ٢٠١٥ بئامه‌ده‌بونا هه‌ڤاله‌كی بابه‌تێ شنگال من لگه‌ل ناوشه‌روان ڤه‌كر، گوت ( بلا شنگالیا به‌ره‌ڤانی ژ خوه‌ كربا). پرسا دووێ مه‌ گه‌نگه‌شه‌كری ره‌وشا له‌شكه‌ری بو، من گوت ئه‌ز بخوه‌ نیگه‌رانم لسه‌ر چونیه‌تیا سه‌ره‌ده‌ریا شه‌ری لگه‌ل داعش، لڤان شه‌ش مه‌ها ب سه‌دان زابتێن توزوبا دوروست بوینه‌ و وه‌زیرێ پێشمه‌رگه‌ی گورانه‌، ڤێ به‌ره‌للایێ خه‌لك وه‌  به‌رپرس دبینه‌،  هه‌روه‌سا سه‌روكێن كارتێكه‌رێن پرانیا به‌رێن شه‌ری ژ خانه‌قین هه‌یا شنگال نه‌ گرێدای وه‌زاره‌تا پێشمه‌رگه‌نه‌ به‌لكو ئه‌ندام مه‌كته‌ب سیاسیێن په‌ده‌كێ و یه‌نه‌كێ نه‌. به‌رسڤا وی ( ئه‌گه‌ر ئه‌ڤه‌ نه‌بانه‌ و بتایبه‌تی زارۆكێن مالا بارزان نوها هه‌می به‌رێن شه‌ری دا چولبن؟؟؟؟؟؟؟؟). پرسا من یا داوی من گوت تو رێبه‌رێ دویه‌مین هێزی ل هه‌رێمێ لێ خه‌لك پرس دكه‌ت چما هه‌یا رۆژا ئه‌ڤرو ته‌ سه‌ره‌دانا یه‌ك كه‌مپا قۆربانیێت شه‌رێ داعش نه‌كریه‌،  سه‌ره‌دانا یه‌ك به‌ریێ شه‌ری نه‌كریه‌، ته‌ سه‌ره‌دانا یه‌ك بریندار نه‌كریه‌، تو به‌شداری به‌هیا شه‌هیده‌كێ ڤی شه‌ری نه‌بوی، به‌رسڤاناوشێڕوان ( ئه‌ڤه‌ ئه‌ركێ‌ هوكمه‌تێ یه‌ ئالیكاریا قوربانیا بكه‌ت، لشه‌هید و بریندارا خوه‌دی ده‌ركه‌ڤیت، به‌رده‌وام كر و گوت دوكتور تو په‌كه‌كه‌ی بكه‌نیڤه‌، منژی ده‌ملده‌ست گوت په‌كه‌كه‌ بون بو من نه‌ تاوانه‌ به‌لكو شانازیه‌، لێ موخابن مه‌رجێن په‌كه‌كه‌ بونێ لده‌ف من نینن، بكه‌نیڤه‌ ئاخفتنا من بری و گوت په‌كه‌كه‌ هێزه‌ك شوره‌شگێرا كوردیه‌ ). لڤێره‌ دیتنامه‌ بدوماهی هات و ده‌ما ده‌ركه‌فتیم نه‌ ئه‌ز دلخوه‌ش بوم و نه‌ ناوشێروان.

لدوماهیكێ دبێژم ئه‌ڤ ده‌نگێن گۆران بده‌ست خستین ده‌ر ئه‌نجاما كارێ‌ ناوشێروانه به‌ری هه‌ر كه‌سه‌ك دن، به‌ره‌ڤاژی بوچونا ده‌روێشێن ناوشێروان، ئه‌گه‌ر ناوشێروان دژیاندا با وێ كورسیێن وان كێمتر بان، ناوشێروانێ ببه‌شداری كرنا هوكمه‌تا ٢٠١٤ دخواست ملێ یه‌نه‌كێ بشكێنیت، پشتی سه‌رنه‌گرتی خواست بپه‌یمانا ستراتیجی و ب پشتگیریا یه‌نه‌كێ ملێ پارتی بشكێنیت، له‌وما یه‌نه‌كێ و په‌ده‌كێ بهه‌ڤرا ملێ وی شكاند و گۆرانا ناوشێروان كره‌ دوران. ‌ 

‎لدور Malame

Check Also

رۆژئاڤا دكه‌ڤیت، داگیر دبیت لێ ناره‌ڤیت

د. شه‌عبان مزوری هێرشا تورانیا و پانتورانیسمێ ڤا هه‌فتیه‌كا خوه‌ ده‌رباس دكه لسه‌ر به‌شێ رۆژهه‌لاتا …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.