مه‌سعود بارزانی ژ سه‌روكێ هه‌رێمێ بو سه‌روكێ سه‌روكا

د.شه‌عبان مزوری
براستی بو من خه‌م نه ‌بو كانێ چه‌وا رێوره‌سمێن سه‌روكێ هه‌رێمێ دێ برێڤه‌ چن، چه‌ند كه‌س دێ به‌شدار بن، ئاستێ نوینه‌راتیا وان، پێگه‌ و كارێ وان، یانژی چه‌وانیا خه‌ملاندنا هۆلێ و به‌لاڤ كرنا كورسیكا، هه‌یا كی دبیته‌ سه‌روك بو من خه‌م نه ‌بو، ژبو من پر گرنگ بو ئه‌و جه‌ده‌لا لگه‌ل گه‌له‌ك لایه‌نێن دن یێن باشورێ كوردستانێ لسه‌ر پێگه‌ و پاشه‌رۆژا مه‌سعود بارزانی لرۆژ و سالێن بهێتدا ل باشورێ‌ كوردستانێ بتایبه‌ت و سه‌رتا سه‌ری كوردستان بگشتی، كو هه‌می بره‌نگه‌ك گشتی دكارم بێژم یه‌ك ده‌نگ بون كو مه‌سعود بارزانی كارتێكرنه‌ك نامینیت ژ ده‌رڤه‌ی پارتا خوه‌، كور و برازایێ خوه‌. هه‌رچه‌نده‌ من پێجاوانه‌ دگوت كو لرێوره‌سمێن هه‌لبژارتنا سه‌روكێ هه‌رێمێ نه‌راسته‌وخوه‌ وێ مه‌سعود بكه‌نه‌ مه‌رجه‌عێ هه‌رێما كوردستانا عیراقێ، كو لده‌ف من به‌شه‌ك ژ باشوڕێ كوردستانێ یه‌.
ئه‌ڤ گه‌نگه‌شا ئه‌ز باسدكه‌م هه‌ر ژ ده‌ست به‌ردانا مه‌سعود بارزانی ژ پوستێ سه‌روكێ هه‌رێمێ ده‌ستپێ كریه‌ و هه‌یا به‌ریا چه‌ند رۆژا. گرنگ نینه‌ هنده‌ك كه‌س لمالا خوه‌ چدبێژن گرنگه‌ ل جهێ په‌یوه‌ندیدار دكارن هه‌مان گوتنێ بكه‌ن یان نه‌؟ ئه‌ڤه‌ پرسه‌. جاره‌ك لگه‌ل موحه‌مه‌د سالح نزاركی كو جهێ وی به‌هشته‌،‌ مێڤانێ عه‌لی خه‌لیل بوم پشتی گه‌نگه‌شه‌ك كویر و درێژ گوت مامو بوته‌ بێژم ( لهه‌می كومبونا ئه‌ز ژ پێشمه‌رگێن خوه‌را دبێژم ئه‌گه‌ر وه‌ گازنده‌ك هه‌بیت هون دكارن نوها ژمنژا بێژن، عه‌لی خه‌لیل دگوت ژسالێن شێستا هه‌یا رۆژا ئه‌ڤرۆ كو ناڤه‌راستا سالێن هه‌شتێیایه‌ رۆژه‌كێ كه‌سێ لده‌ف من پێشنیاره‌ك، ره‌خنه‌ك و گازنده‌ك نه‌كریه‌، له‌وما منژی هه‌رده‌م ژوانرا دگوت ژ بو من خه‌منینه‌ لپشت من هون چبێژن چونكه‌ جهێ بریارا نه‌ پشت دیوار و بن لحێفكن ). جاره‌ك من گوت سه‌ركرده‌ك پارته‌كا باشور باشه‌ ژبو پێك ئانینا هوكمه‌تێ‌ نێچیرڤان كومبونا لگه‌ل وه‌ دكه‌ لێ چما لگه‌ل مه‌سعود بارزانی ناكه‌؟ یانژی نوچی مه‌سعود بارزانی بخوه‌ ئه‌گه‌ر ته‌نها سه‌روكێ په‌ده‌كێ بیت لگه‌ل وه‌ لسه‌ر دوروستكرنا هوكمه‌تێ دیالوگێ ناكه‌. چونكه‌ مه‌سعود بارزانی مه‌رجه‌عێ هه‌رێما كوردستانا عیراقه‌ یه‌، ئینا به‌رسڤ دا گوت وه‌نینه‌، ئه‌و دێ بو وی خه‌ون بیت. من ژی به‌رسڤدا و گوت هه‌ره‌ ژێرا بێژه‌ تو مه‌رجه‌ع نینی. سه‌ره‌ده‌ریا بێژه‌ هه‌ما هه‌می سه‌روك و سه‌ركردێن باشورێ كوردستانێ و به‌شه‌ك ژ پارچێن دن لگه‌ل مه‌سعود بارزانی هه‌مان ره‌وشا عه‌لیێ خه‌لیل لگه‌ل پێشمه‌رگێن وی تینه‌ بیرا مروڤی.
وه‌ك مه‌ دیت د رێوره‌سمێن سوندخوارنا سه‌روكێ نویێ هه‌رێمێ هه‌می دانشتی چاڤه‌رێی هاتنا مه‌سعود بارزانی بون له‌وما رابون سه‌رپێیا لده‌ما بارزانی مه‌سعود و به‌رهه‌م سالح سه‌روك كومارێ عیراقێ بژوركه‌تین. ئه‌گه‌ر كه‌سه‌ك بێژیت ئه‌ڤ مروڤه‌ نه‌ ته‌نها ژبو مه‌سعود رابون سه‌رپێ به‌لكو ژبو به‌رهه‌م ژی رابون سه‌رپێ، ئه‌ڤ جوره‌ كه‌سه‌ بخوه‌ دوزانن كو ده‌ره‌وا لخوه‌ دكه‌ن به‌ری لمه بكه‌ن‌، چونكی ئه‌م دوزانین ژشه‌رما پرۆتۆكۆلی نه‌بیت هه‌ڤالێن هه‌رێن نێزیكی به‌رهه‌م ژبو وی نارابن سه‌رپێ. به‌رهه‌م سالح بخوه‌ دبێژه‌ مه‌سعود بارزانی فه‌رمو پێشیا من بكه‌ڤه‌ و مه‌سعود بارزانی دادنیشه‌ بێی كو گرنگی بده‌ت هندێ كانێ به‌رهه‌م دانیشت یان نه‌. ژ هه‌می سه‌روكێن پارتا ته‌نها مه‌سعود بارزانی گوتار خوه‌ند. سه‌روكا كاتیا په‌رله‌مانی بخێرهاتنا مه‌سعود بارزانی كر پێشیا هه‌ركه‌سه‌كی. ده‌ركه‌فتنا پاڤل تاله‌بانی ژبه‌ر جهێ ده‌ستنیشانكری نه‌ بدلێ وی بو تشته‌ك ژ پێگه‌ها مه‌سعود بارزانی داناخیت به‌لكو به‌ره‌ڤاژی لاوازیا پاڤل تاله‌بانی نیشاندده‌ت چونكی خوه‌ برایێ وی قوباد یانژی كوسره‌ت و به‌رهه‌م هۆل چولنه‌كرن ژبو پشتگیریا پاڤل تاله‌بانی.
دڤێ فیستیڤالێ دا قه‌هره‌مانێ بێ ركا به‌ر مه‌سعود بارزانی بو و ژ گوتارا به‌رهه‌م سالح ئه‌ڤه‌ پر ئاشكرا بو له‌وما دبێژم هه‌یا به‌ریا چه‌ند رۆژا ترسا من هه‌بو باشورێ وه‌لات بێ بریارده‌ر بمینیت لێ ئه‌ڤرو ب هه‌لبژارتنا مه‌سعود بارزانی وه‌ك مه‌رجه‌عێ سیاسی یێ هه‌رێما كوردستانا عیراقێ وێ هه‌رێمێ‌ بهێز بكه‌ و هه‌رێم بێ بریارده‌ر نامینه‌، ژبو من بخوه‌ و ئه‌ز باوه‌ر دكه‌م بو پرانیا خه‌لكێ‌ هه‌رێما كوردستانا عیراقێ باره‌گایێ بارزانی جهێ بریارێ یه‌ و بلا قه‌ت بو وه‌ خه‌منه‌بیت روداو و هه‌ڤبیرێن وێ چ دبێژن لپشت دیوار و بن لحێفكا سه‌روك ته‌نها یه‌كه‌ ئه‌وژی مه‌سعود بارزانیه‌، له‌وما ژدل پیرۆزبایا ته‌ دكه‌م بابێ مه‌سرور، ته‌نها هیڤی دكه‌م ڤێ سه‌رده‌ما بهێت به‌رده‌وام بی لسه‌ر هه‌مان رێیا ته‌ هه‌لبژارتی، هه‌یا نه‌گه‌هی باوه‌ریێ كو ته‌ پێویست بگوهارتنێ هه‌یه‌.

‎لدور Malame

Check Also

ئه‌م دژین یان ئه‌م هه‌ینه‌؟

د. شه‌عبان مزوری پرسا هه‌بون و ژیانێ براستی بو من ڤه‌دگه‌ریت بو سه‌ره‌تا هاتنا من …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.