ئه‌م دژین یان ئه‌م هه‌ینه‌؟

د. شه‌عبان مزوری
پرسا هه‌بون و ژیانێ براستی بو من ڤه‌دگه‌ریت بو سه‌ره‌تا هاتنا من بو ئه‌وروپا. گه‌له‌ك جاران من پرس ژ خوه‌ دكر ئایا راسته‌ ئه‌م دژین یانژی ئه‌م هه‌ینه‌؟ بێگومان سه‌راتا ڤێ پرسێ پتر ژ سیمایێن جودایێن ل ناڤبه‌را ئه‌وێن ئه‌م بناڤ دكه‌ین باژار، گوند، ژێرخانه‌، پیشه‌سازی، جوتیاری…هتد، هه‌روه‌سا خوه‌شگوزه‌رانی، پێداویستیێن سه‌ره‌كیێن جڤاتێ هه‌یا دگه‌هیته‌ پرسا خوه‌ندنا دوهی، ئه‌ڤرو و پێشه‌رۆژا گه‌ردونی بگشتی و پلانێتا ئه‌م لسه‌ر بتایبه‌تی. بكه‌فتنا تێكه‌لیێ لگه‌ل خه‌لكێ ئه‌وروپا رۆژ بو رۆژێ بو من پتر باوه‌ری دوروست دبو كو ئه‌وا خه‌لكێ مه‌ بژیان ناڤدكه‌ نه‌ پتره‌ ژ هه‌بونێ.
ئه‌گه‌ر ئه‌م ژیانێ ته‌ماشه‌كه‌ین وه‌ك هه‌ڤ دژی مرنێ وێ ده‌مێ راسته‌ ئه‌م دژین، ئه‌م دوزانین كو ژین تایبه‌تمه‌ندیه‌كه‌ هه‌ڤپشكه‌ بو هه‌می ئورگانیسما. لێ لڤێره‌ پێویسته‌ بێژم لگۆر پێزانینێن من هه‌یا رۆژا ئه‌ڤرو پێناسه‌ك لسه‌ر هه‌ڤكری نینه‌ ژبو په‌یڤا ژین. تشتێ بو من گرنگ، لسه‌ر رادوه‌ستم و هزرێ تێدا دكه‌م ته‌نها ژیانا مروڤایه‌ نه‌ پتر، ئانكو تێكه‌لی بئورگانیسمێن دی نینه‌. پرسه‌ك دن تێ پێش ئه‌وژی بوچی ئه‌م دژین؟ ئایا ژیان ته‌نها تێ واتا هندێ ئه‌م مرنێ دره‌نگ بخین؟ یانژی ژیان ئه‌وه‌ ئه‌م بكارین پرانیا حه‌ز و خواسته‌كێن خوه‌ێین كه‌ساتی بده‌ست بینین بده‌مه‌ك كورت و بێی كو حه‌ز و داخوازێن هه‌ڤشێوه‌یێن خوه‌ لبه‌ر چاڤ بگرین؟ لێ دیسان پرسا من نه‌ئه‌ڤه‌یه‌.
پرسا من لسه‌ر تێگه‌هشتنا ژیانێ لناڤبه‌را كه‌سێ ئه‌وروپی و كه‌سێ مه‌یه‌. تێروانینا مه‌ بو ئه‌وا ژێرا دبێژن پێداویستیێن ژیانێ؟ چه‌ند مه‌ هه‌ولدایه‌ خوه‌ لسه‌ر سروشتی بسه‌پینین، شوینا خوه‌ بده‌ستڤه‌ به‌رده‌ین و بێژین ئه‌ڤه‌ قه‌ده‌را مه‌یه‌؟ فه‌یله‌سوفێ ناڤدار فره‌نسیس بیكون دبێژه‌ مه‌رم ژ خوه‌ندنێ دڤێت ته‌نها و ته‌نها سه‌پاندنا ده‌ستهه‌لاتا مروڤی بیت لسه‌ر سروشتی، لێ ئه‌م دبینین پێچه‌وانه‌ ژبو مه‌، ئه‌گه‌ر نه‌هه‌میا لێ پرانیا هه‌را زۆر ژ خه‌لكێ مه‌ خواندن ته‌نها ژبو په‌یداكرنا پاره‌یه‌. ژبه‌ر ڤێ چه‌ندێژی ئه‌م پاشكه‌فتینه‌ د هه‌ر بواره‌كیدا.
ئه‌م ئه‌گه‌ر ته‌ماشا خوه‌یا ئه‌ڤروژی بكه‌ین پر جودانینه‌ ژ مه‌ژیێ به‌ری سه‌د، دو سه‌د یانژی هزار سالا دهه‌می واره‌كیدا. ئه‌م گوندا ئاڤادكه‌ین كارێ كشتوكالی دكه‌ین لێ هزرا نڤشێن لدوف مه‌دا تێن ناكه‌ین، ئه‌م باژارا به‌رفره‌ دكه‌ین، هنده‌ك پیشه‌سازیا سه‌ره‌تایێ دكه‌ین لێ هزرا خوه‌ د ژینگه‌هێ دا ناكه‌ین. به‌ره‌ڤاژی ڤێ چه‌ندێ ئه‌و داخوازێن مه‌هه‌ین پرانیا وه‌لاتێن ئه‌وروپی ژمێژدا هه‌نه‌.
ئه‌س بخوه‌ پر هه‌ڤبیرم لگه‌ل گوتنا فیله‌سوفێ ئه‌لمانی فورباخ كو دبێژه‌ ( مروڤێ رۆژئاڤا چاڤێ وی ل زه‌مینی یه و تم هزر دكه‌ چه‌وا بگهوره‌ د به‌رژه‌وه‌ندیا خوه‌دا، مروڤێ رۆژهه‌لات چاڤێ وی ل ئه‌سمانیه‌ بهیڤیا هاتنا مزگینیه‌كا خوه‌ش ژ بو گوهارتنا ره‌وشا وی یا ئالۆز ) هیڤیدارم سه‌ركه‌فتی بم د گه‌هاندنا په‌یاما فورباخ دا. ئه‌ڤ جوره‌ سه‌ره‌ده‌ریه‌ لگه‌ل سروشتی وا دكه‌ت كو مروڤێ روژهه‌لات ژ هزر و كار بكه‌ڤیت. مروڤ دكاره‌ مێژی وه‌ك خوه‌دیكه‌ك‌ بینه‌ به‌رچاڤ، ئه‌گه‌ر باش نه‌یێت پاككرن ژ توزوگه‌مارێ‌ وێ ده‌مێ دیمه‌نێ راست ده‌رناخه‌ به‌لكو دێ دیمه‌نه‌ك شێلی شانیكه‌ت و دێ بیته‌ ئه‌گه‌را شاش هه‌لسه‌نگاندن و تێگه‌هشتنا دیمه‌نی. به‌رده‌وام بونا مه‌ لسه‌ر شاشیا وێ راستیێ شانی دده‌ت كو مه‌ژیێ مه‌ پر توزوگه‌مارێ گرتیه‌ ژ ئیلوسیونا ( اوهام ) وه‌ك بیكون دبێژه‌.
یه‌كه‌مین ئیلوسیون كومه‌لاتی، كو مه‌ ژ خێلا خوه‌ وه‌رگرتیه‌، بو نمونه‌ جاره‌كێ گالیلو دبێژته‌ قه‌شه‌كی كه‌ره‌مكه‌ ته‌ماشه‌ی گه‌ردونی بكه‌ ژبو ببینی كو هه‌مو پلانێت بازنه‌یی نه، قه‌شه‌ دبێژیت بو من نه‌گرنگه‌ تلسكوپا ته‌ چ نیشان دده‌ بو من گرنگه‌ ئنجیل چه‌وا دبینه‌. لڤێره دیار دبه‌ كو ئه‌م پێگیریێ ب گه‌له‌ك تشتا دكه‌ین كو راستی ژبو نینه‌.
دویه‌مین ئیلوسیونا شكه‌فتێ، لڤێره‌ مه‌به‌ست شكه‌فتا ئه‌فلاتونه‌، بیكون ڤێ ئیلوسیونێ ژ هه‌میا مه‌ترسیدار تر دبینه‌، چونكه‌ دو مه‌ژی وه‌ك هه‌ڤ نینن، دو كه‌س هه‌مان تشتی وه‌ك هه‌ڤ نابینن، دو كه‌س وه‌ك هه‌ڤ بیرناكه‌ن. مه‌ترسیا ژ به‌ر پێگیریا هه‌ركه‌سی لسه‌ر راستیا خوه‌ بێی گوهداریا كه‌سه‌ك دن بكه‌ت، لێ هه‌رده‌ما ئه‌و كه‌س ژ شكه‌فتا خوه‌ ده‌ركه‌فت كو مه‌به‌ست گوهێت خوه‌ ڤه‌كرن، تازه‌ دێ زانیت كو هه‌می راستی نه‌ لده‌ف ویه‌. هه‌رده‌م ئه‌ڤ جوره‌ مروڤه‌ دبنه‌ ئه‌گه‌را دوروسكرنا ئالوزیا و رێگر دپێشكه‌فتنا جڤاكێ دا، ژ ره‌وشا مه ‌دیاره‌ كو ئه‌ڤ جوره‌ مروڤه‌ لده‌ف مه‌ پر زۆر هه‌نه‌.‌
سێیه‌م ئیلوسیونا بازارێ یه‌، ئانكو زمانی. مه‌به‌ست بكارئانینا په‌یڤا بره‌نگه‌كی كو لده‌ف هنده‌كا ببیت ئه‌گه‌را په‌یدابونا، یانژی مه‌زنكرنا ئاریشه‌كا هه‌ی. بو نمونه‌ ئه‌گه‌ر دوكه‌س ل سوویكا دهوك ئالۆزیه‌ك بكه‌ڤیت ناڤبه‌را وان دێ بینی كه‌سه‌كی گوت فلان بنه‌مال و فلان بنه‌ مال، فلان گوند و فلان گوند، فلان عه‌شیره‌ت و فلان عه‌شیره‌ت، سوران و به‌هدینی بشه‌ر چوینه‌، لڤێره‌ بو مه‌ ئاشكرا دبیت لگور هه‌لبژارتنا په‌یڤێ سه‌ره‌ده‌ری لگه‌ل ئالۆزیێ تێ كرن. بو ڤێ ژی ژخوه‌ ئه‌م بێ ركابه‌رین.
چواره‌م ئیلوسیونا تیاترێ ( مه‌سره‌ح ) بو نمونه‌ پر كه‌س هه‌نه‌ ئه‌م دوزانین كو راست نائخڤن، فێلبازن، دره‌وینن لێ ژبه‌ر ئه‌گه‌رێن جودا مه‌نه‌ڤێت راستیا وان گوهلێ ببیت، ئه‌ڤه‌ژی وا دكه‌ت كو مروڤ د چه‌ندكه‌سیێ دا بژیت و لهه‌مان ده‌م چو كه‌س نه‌بیت.
وه‌ك ئه‌م دوزانین ژ هنده‌ك فه‌لسه‌فا را دبێژن فه‌لسه‌فا سه‌ربوری، ئانكو سه‌ربوره‌ قوتابخانا مه‌، فه‌لسه‌فه‌ك دن دبێژه‌ عه‌قله‌ قوتابخانا مه‌، لێ بیكون هات و گوت سه‌ربور و عه‌قل بهه‌ڤرا. بیكون ڤان هه‌ر سێ بوچونا بڤی ئاوای شروڤه‌ دكه‌ت
قوتابخانا سه‌ربورێ وه‌ك مێریێ یه‌، قیتێ خوه‌ تێرا خوه‌ رادكه‌ و كه‌س دن سودی ژێ نابینه‌، ئانكو ژ مێریا به‌ری خوه‌ فێربویه‌ و گوهارتن بسه‌ردا نه‌كریه‌.
قوتابخانا عه‌قلی وه‌ك ته‌ڤنه‌پیركێ دبینه‌. ته‌ڤنه‌پیرك ته‌ڤنێ خوه‌ بخوه‌ دوروستدكه‌، ژده‌ڤێ‌ خوه‌ ده‌ردخه‌ و توره‌كا پر جوانا بێ مفا دوروست دكه‌.
قوتابخانا عه‌قل و سه‌ربور وه‌ك مێشا هونگڤینی ته‌ماشا دكه‌ت. مێشا هونگڤینی مادێ سه‌رچاوه‌ ژ گولا وه‌ردگره‌ و پاشان بپروسێسه‌ك ئالوز ڤه‌دگوهێزه‌ بو هنگڤین كو ئه‌و بخوه‌ سود ژ دبینه‌ و هه‌نده‌كێن دنژی. لڤێره‌ بو مه‌ ئاشكرا دبه‌ بێی دو دلی كو كارێ ته‌ندوروست ئه‌و كاره‌ یێ سود بگه‌هینه‌ ئه‌نجامده‌ری و هنده‌ك دن و زیان به‌خش نه‌بیت بو هنده‌ك دن بزانابون.
هنده‌ك به‌راوردی بو تێروانینێن ئه‌وروپی و مه‌
ئه‌م دبێژین ئه‌وروپی پر قه‌لسن چونكی وه‌ك مه‌ مالێ خوه‌ لتشتێن به‌رنه‌كه‌فتی خه‌رج ناكه‌ن
ئه‌م دبێژین مروڤێن ئه‌وروپی خوارنێ پر دخون ده‌ما به‌لاش بیت و ئه‌گه‌ر مێڤانكه‌ین چه‌ندان جارا دێ سوپاسیا ته‌ كه‌ت، ئه‌وروپی هه‌می دبێژن خوارنا مفت یا خوه‌شه‌، لێ خه‌لكێ‌ مه‌ پشتی لسه‌ر سفرێ رابو هه‌یا چه‌ند جاراژی خوه‌دیێ مالێ ببینه‌ شوینا سوپاسیا دێ لكێماسیا گه‌ریێت.
ئه‌گه‌ر ئه‌وروپیه‌ك پرچا خوه‌ چێكه‌ت یان جلكه‌كی بو خوه‌ بكریت، ده‌وروبه‌را وی یان ده‌نگ ناكه‌ن یانژی هه‌ری زۆر دێ بێژن چه‌ند جوان لته‌ دكه‌ڤیت. لده‌ف مه‌ ئه‌گه‌ر مروڤی شانسێ هه‌رێ باش هه‌بیت دێ بێژن ته‌ چ بسه‌رێ خوه‌ ئینایه‌، ما ئه‌ڤه‌ مه‌سریمی ته‌یه‌
ئه‌گه‌ر كه‌سه‌ك ئه‌وروپی كه‌فت وێ ده‌یان ده‌ست بچن بو راكرنا وی، لده‌ف مه‌ ئه‌گه‌ر كه‌سه‌ك رابو سه‌رپیا وێ ده‌یان گوپال بچنێ ژبو بێخن.
ئه‌گه‌ر گه‌فا مرنێ كه‌ته‌ سه‌ر ئه‌وروپیه‌كی وێ ده‌مێ بهه‌زاران كه‌س دێ ئالیكاربن ژبو ژیانا خوه‌ ژده‌ست نه‌ده‌. لده‌ف مه‌ هه‌یا رۆژا ئه‌ڤرو كوشتنا كه‌سه‌كی وه‌ك هاڤێتنا كه‌چكه‌ك یان په‌رداخه‌ك كه‌ڤن بو ناڤ گیفكی.
ل ئه‌وروپا كه‌س مننه‌تكار، قه‌ردار و لهیڤیا هاریكاریا كه‌سێ نینه‌ و ئه‌گه‌ر هاریكاریا كه‌سه‌كی بكه‌ت مه‌رج نینن، ژدلێ خوه‌ دكه‌ت، خوه‌ مه‌جبور نابینه‌، لێ لهه‌مان ده‌مێ هاریكاری و ڤیانا خه‌لكێ بو خوه‌ پر بنرخ دبینه‌. به‌ره‌ڤاژی لده‌ف مه‌ هه‌می ته‌ مه‌جبورێن خوه‌ دبینن، ده‌ما به‌رده‌ستێ وی فره‌ بو دێ هه‌ولده‌ت زیانێ بگه‌هینته‌ وی كه‌سێ هاریكاریا وی كری بهیڤیا هندێ كو مێژویا خوه‌ بده‌ت ژبیر كرن.
ل ئه‌وروپا پرانیا هه‌را زۆرا خه‌لكێ باوه‌ری بهه‌ڤدو هه‌یه‌، لده‌ف مه‌ باوه‌ری لهیچ ئاسته‌كی نه‌مایه‌ له‌وما خه‌لكه‌ك بو خوه‌ بده‌رفه‌ت دوزانیت كو خیانه‌تێ لوی كه‌سی بكه‌ت یێ باوه‌ری دایێ و جڤاكا مه‌ ڤان جوره‌ نه‌مروڤا بشاره‌زا بناڤ دكه‌. ئه‌ڤرو بو نمونه‌ لبازارا هه‌رێما كوردستانا عیراقێ تو ده‌ستێ خوه‌ بو هه‌ر كاله‌یه‌ك ببه‌ی دێ بێژیت ( ته‌ یێ ئورگینال دڤێت یان كوپی، ته‌ یێ باش دڤێت یان خراب ) لسه‌ر ڤێ یه‌كێ ئه‌ز دبێژم ته‌نها یا مای ده‌ما زاروكه‌ك بێژیت دایكا كانێ بابێ من، دایك ژێرا بێژه‌ كویژان یێ دوروست یانژی یێ لسه‌ر ناسنامێ؟‌
مروڤێ ئه‌وروپی بره‌نگه‌ك گشتی رێنجبه‌ره‌، په‌یداكرنا نانێ خوه‌ بكه‌دا خوه‌ وه‌ك ئه‌ركه‌ك مروڤاتی دبینه‌، بكورتی سیسته‌ما خوه‌شگوزه‌رانیا ڤان وه‌لاته‌ پێكهاتیه‌ لسه‌ر بنه‌مایێ ئه‌ركێ هه‌ر تاكه‌ كه‌سیه‌ هه‌می هه‌ول و كوششێن خوه‌ بكه‌ت ژبو په‌یدا كرنا نانێ خوه‌ بده‌ستێ خوه‌، لهه‌مان ده‌ما هه‌ر تاكه‌س دڤێت بزانه‌ كو ئه‌ف ده‌رفه‌ته‌ ژ بو هه‌می كه‌سی و هه‌رده‌م بده‌ست ناكه‌ڤه‌، له‌وما ئه‌ركه‌ لسه‌ر جڤاتێ بره‌نگه‌ك گشتی هاریكاریا وان كه‌سا بكه‌ن یێن ئه‌ف ده‌رفه‌ته‌ بده‌ست نه‌كه‌فتی ژبه‌ر ئه‌گه‌ره‌ك ده‌مكی یانژی هه‌رده‌می. لێ ده‌ف مه‌ بو ئه‌رك لسه‌ر هه‌ر تاكه‌ كه‌سی هه‌می هه‌ول و كوششێ خوه‌ بده‌ت ژ بو بكاره‌ بێكار نانه‌ك به‌تران په‌یدا كهت‌ و لهه‌مان ده‌م ئه‌ركه‌ ئه‌ڤێن كار دكن كرێت و برسی بكن.
مرۆڤێ ئه‌وروپی ژدایك بونا خوه‌ ئازاده‌، مروڤێ كورد ژ دایكبونا خوه‌ كوله‌ی دایبابا، بنه‌ مالێ، موختاری، ئاغای، …سه‌روكی یه‌. سه‌ره‌رای كو ئه‌م لكومه‌لگه‌هه‌ك ئولداردا هاتینه‌ دونیایێ لێ ژبه‌ر كو هه‌یا ئه‌م دگه‌هینه‌ ئه‌وا ژێرا دبێژن په‌ره‌ستگه‌ها خوه‌دێ نه‌ هێز مایه‌ و نه‌ ڤیان وه‌ك دبێژن لكوپكا ڤیانێ نه‌ڤیان ده‌ستپێ دكه‌ت، له‌وما لناڤا په‌رستگه‌هێ ئه‌م نفره‌تێ لخوه‌دێ و رۆژا لێ بوین دكه‌ین.
ژوارێ ئولیڤه‌ وه‌ك ئه‌م دوزانین پرانیا ئه‌وروپا فه‌له‌نه‌، گوهارتنێن پر مه‌زن هاتینه‌ كرن دناڤ ئولیدا، قه‌شه‌ ئێدی باسا جه‌هنه‌مێ ناكه‌ت، باسا ڤیانێ، خوه‌شیێ، هاریكاریێ دكه‌ت، قه‌شێن هومو هه‌نه‌، قه‌شێن ژن هه‌نه‌. قه‌شان دانپێدان كر لسه‌ر پێدوفیلیا ناڤا دێرێ. مه‌لێ كورد هه‌یا رۆژا ئه‌ڤرو مه بشكه‌نجێن جودایێن دوزه‌خێ دترسینه، هه‌رچه‌نده‌ لسه‌ر زه‌مینی ژیانا مه‌ هه‌می دوزه‌خ بو دیسان یێ مژویلا پرسه‌كا له‌چه‌ وه‌ك شكه‌نجا گۆرێ یه‌ ( قه‌بری ). مه‌لێ‌ مه‌ قه‌شه‌ی تینه‌ بیرا من لچیروكا قه‌شه‌ و ئبلیسی یا نڤیسه‌رێ روس دوستوڤسكی‌ كو لزیندانا سیبیریا سالا ١٨٤٩ نڤیسیه‌ ( ده‌ما شه‌یتان دبێژته‌ قه‌شه‌ی تو ده‌ستبه‌رداری ڤان گوتنێن خوه‌یێن چڤێل نه‌بوی‌ تو هنده‌ بو خه‌لكێ باسا دوزه‌خێ دكی، ما به‌س نینه‌ كو ژیانا وان بخوه‌ دوزه‌خه‌، تو و ده‌ستهه‌لات میری نوینه‌رێن منن لڤێره‌، فه‌رمو لگه‌ل من وه‌ره‌. شه‌یتان بپاتكا قه‌شه‌ی دگره‌، بلند دكه‌ و دبه‌ته‌ هنداف كارگه‌ها ئاسنی، لڤه‌ره‌ قه‌شه‌ دبینه‌ چه‌وا كاركه‌ر دناڤا توز و كادیێ دا كاردكه‌ن، هێدی هێدی بایێ گه‌رم بلند دبه‌ و قه‌شه‌ هه‌ستا مرنێ دكه‌ ژ گه‌رمێ، لاڤا ژ شه‌یتانی دكه‌ بچاڤێن روندكڤه‌ كو وی ژوێرێ ڤه‌گهوێزه‌ و دبێژیت من دوزه‌خ دیت، بهێله‌ بچم ژ دوزه‌خێ رزگاربم. شه‌یتان لێ ڤه‌دگه‌ریت و دبێژتێ هه‌ڤالێ خوه‌شتڤی دڤێت هنده‌ك جهێن دنژ شانی ته‌ بكه‌م. ژوێرێ قه‌شه‌ی دبه‌ت هنداڤ بێده‌ره‌ك مه‌زن و قه‌شه‌ دبینه‌ چه‌وا لژێر گه‌رمه‌كا دژوار، كایێ و تۆزێ خه‌لكه‌ك كار دكه‌ و هه‌رده‌ما یه‌ك كارێ خوه‌ ڤه‌ما هنده‌ك كه‌س بقامچیا لوان دده‌ن، دیسان قه‌شه‌ دبێژه‌ ما نه‌به‌سه‌. ژوێرێ شه‌یتان قه‌شه‌ی دبه‌ته‌ ناڤ هنده‌ك مالێن به‌له‌نگاز كو لناڤا كوخا دژین، كوخێن تاری، گه‌مار وه‌ك كولكا دژین، زاروكێن قرێژی، ترسیای و برسی. لڤێره‌ قه‌شه‌ دبێژته‌ شه‌یتانی من توبه‌یه‌ بلا به‌سبیت راسته‌ ئه‌ڤه‌ دوزه‌خه‌، شه‌یتان دبێژیت ئه‌ز نكارم ده‌ستبه‌رداری ته‌بم هه‌یا جهه‌ك دن شانی ته‌ نه‌كم. شه‌یتان قه‌شه‌ی بلند دكه‌ و دبه‌ ناڤا زیندانه‌كێ، قه‌شه‌ دبینه‌ خه‌لكه‌ك هه‌ما بێژه‌ چه‌رم و هه‌ستی مانه‌، ده‌ست و پێ قه‌ید كرینه‌، مشك، كمكمه‌، سیسرك و كرم پیاسێ لسه‌ر كه‌له‌خێ واندكه‌ن، لڤێره‌ شه‌یتان دبێژه‌ قه‌شه‌ی تو كه‌سێ چه‌په‌ل و دره‌وین، جلێن خوه‌ ژ خوه‌ بكه‌ و بو چه‌ند ده‌مژمێرا روت، قه‌یدكری و راكه‌فتی لسه‌ر ڤی عه‌ردێ سار راكه‌ڤه‌. قه‌شه‌ دیسان دكه‌ڤه‌ لاڤ لاڤێ و دبێژه‌ من هه‌می دوزه‌خا راسته‌قینه‌ دیت، شه‌یتان دبێژیت سه‌رسه‌ری تو بوڤان سالانه‌ باسا دوزه‌خێ دكی، مانێ ئه‌ڤه‌ به‌س كه‌له‌خ ماینه‌، هه‌می ژیێ وان دوزه‌خ تازه‌ تو وان بدوزه‌خێ ناترسینی. له‌وما بلا مه‌لێن زك مه‌شك و سه‌رڤالا بو خوه‌ مژویلی كاره‌ك دن بن، كه‌سێ دناڤا ئاگریدا بئاگری نایێت ترسان دن.
ئه‌ز باش دوزانم كو هه‌ر خاله‌ك ژڤان یێن سه‌ری هه‌ژی بابه‌ت و لێكولینێن تایبه‌ته‌ لێ لڤێره‌ من دخواست چه‌ند پرسێن گرێدای پرسا سه‌ره‌كی ئاراسته‌ی وه‌ بكه‌م كو هیڤیدارم هه‌ركه‌س ژ ئالیێ خوه‌ هزر بكه‌ت كانێ جودایا هه‌بون و ژینێ چیه‌؟ بكورتی و بكوردی ئه‌م ناژین، ئه‌م یێت هه‌ین. ژین و هه‌بون وه‌ك رۆژ و زه‌مینه‌.

‎لدور Malame

Check Also

مه‌سعود بارزانی ژ سه‌روكێ هه‌رێمێ بو سه‌روكێ سه‌روكا

د.شه‌عبان مزوری براستی بو من خه‌م نه ‌بو كانێ چه‌وا رێوره‌سمێن سه‌روكێ هه‌رێمێ دێ برێڤه‌ …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.