نڤێژا مریا و مریێن نڤێژكه‌ر

د.شه‌عبان مزوری
نڤێژا مریا یا ئیخوان موسلمینێن كوردستانێ و هه‌ڤسوزێن وان لسه‌ر موهه‌ممه‌د مورسی سه‌روكێ لابری یێ مسرێ كو ئه‌ڤه‌ نه‌جارا یه‌كه‌مینه‌ به‌لكو كێماسی یا ئه‌ز دوزانم بو ئه‌همه‌د یاسین ژی هه‌مان كار كربون، نوزانم بوچی ڤی كاری ئه‌ز ڤه‌گه‌راندم سه‌ره‌تا سالێن هه‌شتیا ل دهوك ده‌ما خوه‌ندنا رومان و هنده‌ك ژ ژێده‌رێن فه‌لسه‌فا به‌رده‌ست ژبلی خاندنا سه‌ره‌كی به‌شه‌ك باش ژ یانا گه‌نجێن وێ سه‌رده‌مێ گرتبو كو ئه‌ز یه‌ك ژوان بوم. نڤێژا ڤان جامێرێن ئیخوانا رومانا نیكۆلای گۆگۆل یا بناڤێ گیانێن مری ئانی بیرا من، پرسا بو من ده‌ركه‌تی گه‌لو كێ پێویستی بنڤێژ و لاڤێن كێ هه‌نه‌؟
هه‌ڤخه‌می، ڤیان، پشتگیری و هه‌تا داوی ژ پیڤه‌رێن مروڤاتی تشته‌ك جوانه‌ و دڤێت ئه‌م بگشتی پشتگیریێ لكارێن جوامێرانه‌ و ڤیان به‌خش بكین. لڤێره‌ دیسان ئه‌م هه‌می دوزانین كو دڤێت هه‌مو ئه‌ڤ پیڤه‌ره‌ دولایه‌ن بن ژبو مروڤ نه‌ كه‌فته‌ خانا ساویلكیێ دا. بێگومان مه‌رج نینه‌ كه‌سانه‌كی قه‌نجیه‌ك لگه‌ل ته‌ كربیت ژبو توژی قه‌نجیا پێرا بكه‌ی لێ كێماسی دڤێت زیان نه‌گه‌هان دبیت ته‌، یانژی هه‌ڤخه‌میا خوه‌ بوته‌ دیاكربیت ده‌ما تو كه‌فتبی ئالۆزیه‌كێ یانژی خه‌مه‌ك بسه‌ر ته‌دا هاتبیت.
جاردن دبێژم ژبه‌ر باوه‌ریا من بمافێ مروڤی و ئازادیا راده‌ربرینێ ئه‌ز لگور بیروباوه‌رێن ئولێ ئیسلامێ ڤی كارێ ئیخوانچیێن باشورێ كوردستانێ و هه‌ڤسوزێن وان نه‌كو بشاش نابینم به‌لكو بكاره‌ك جوان دبینم، لێ لڤێره‌ ئه‌ز نه‌شێم لسه‌ر هنده‌ك دیسان پیڤه‌رێن مروڤاتیێ را ده‌رباس بم كو ئه‌وژی دهه‌می فه‌لسه‌فه‌ و ئولادا هاتیه‌ بدرێژیا جانشین بونا مروڤا، په‌یدابونا كومه‌لگه‌ و سنورا كو تێ ناسكرن نیشتیمان و نه‌ته‌وه‌. ئه‌م كورد هه‌رده‌م دبێژین مافێ دراوسێ لسه‌ر دراوسێ یه، یانژی دبێژین لێڤ ژ ددانا پێشترن له‌وما بو من دا زۆر زۆر ئاسایی بیت ئه‌گه‌ر هه‌مان ئه‌ڤ هه‌ڤخه‌میه‌ بوهاوزمان و هاونیشتیمانێ خوه‌ هه‌با.‌‌
تشتێ بالكێش ئه‌وه‌ كو كورد هه‌می كه‌سه‌ و هه‌می تشته‌ به‌س كورد نینه‌. ئه‌ڤا ئه‌م لده‌ف ئیخوانچیا دبینین نه‌ تشته‌ك تازه‌یه‌ بو ئولدارێن مه‌یێن موسلمان، بدرێژیا مێژویێ باشترین نوكه‌رێ بیانیا بوینه‌، بتایبه‌ت نوكه‌ریا عه‌ره‌ب، فارس و تورك، نوكه‌راتیا كوردا دخوینێ دا یه‌ و نوكه‌راتیا هه‌ركه‌سی بشانازیڤه‌ دكه‌ن ژبو ژبن برنا خوه‌، لڤێره‌ چه‌ند نمونێن كه‌ڤن‌ و نوی ئه‌زێ باسكه‌م. سه‌رده‌ما كه‌ڤن كوردان هه‌رده‌م ده‌سته‌كی بو هێرشبه‌رێن وه‌لاتێ خوه‌ هه‌بویه‌ هه‌ر ژ یونانا هه‌یا هند و فارسا، ڤێ سه‌رده‌ما تازه‌ بێ وێنانه‌ كوردا جاشاتی كریه‌ ژبو داگیركه‌رێن وه‌لاتێ خوه‌. جاره‌كێ ده‌ما توركا گازنده‌ ژ هه‌رێمێ دكرن هوشیار زێباری گوتی ئه‌م نوزانین توركیا چ ژمه‌دڤێت وه‌ك هه‌رێما كوردستانا عوراقێ مه‌ چه‌ندین بنگه‌هێن میتێ بجی كرینه‌، چه‌ندین بنگه‌هێن له‌شكه‌ری توركی لده‌ف مه‌ هه‌نه‌ ژبو لێدانا په‌كه‌كێ. كوردێن كومونیست من باش ببیرتێت بو خوه‌ بشه‌رم دوزانی لسه‌ر پرسا كوردی ئاخفتبان، یانژی هه‌ڤخه‌میا خوه‌ بو كورده‌كی راگه‌هاندبا چونكه‌ دترسیان هه‌ڤالێن وان یێن كومونیستێن عه‌ره‌ب، تورك و فارس وانا ب نه‌ته‌ویێن شوفینی لقه‌له‌م بده‌ن. لڤێره ئه‌ز بفر دبینم ببیر بێخم كو پارتا كومونیستا عیراقێ سالێن هه‌شتیا تیپه‌ك موسیقی هه‌بو بناڤێ فرقه‌ت ته‌ریق، هه‌رچه‌نده‌ په‌نا كومونیستێن عیراقێ باشورێ‌ كوردستانێ بو لێ ڤێ تیپێ سترانه‌ك هه‌بو كو بو ئه‌گه‌را نه‌فره‌تا من ژ كومونیستێن عیراقێ بكورد و عه‌ره‌ب ڤه‌ ئه‌وژی سترانا ئازادی، دڤێ سترانێ دا باسا ئه‌نگولا، كۆلومبیا و گه‌له‌ك ده‌ڤه‌رێن دن دكر و لدوماهیكا هه‌رپارچه‌كێ دابێژن لسه‌ر ره‌ملا بیبانا عه‌ره‌بی دێ نڤیسم ناڤێ ته‌ ئازادی. باشه‌ چه‌ند بێوژدانیه‌، په‌نا بو چیایێ كوردا تینی، نانێ كوردا دخوی، ژبه‌ر هه‌بونا ته‌ گوندێن كوردا وێران دبن لێ سترانا خوه‌ بره‌ملا بیابانێ دبێژی؟؟؟؟؟؟؟؟
هه‌مان ترس به‌رده‌وام لجه‌م ئیسلامیێن كورد هه‌یه‌ نه‌كه‌‌ بكافر بێن لقه‌له‌م دان. نه‌ گوننه‌هه‌ و نه‌ ‌شه‌رمه‌‌ بو توركا بێژێن زمانێ خوه‌دێ توركی یه‌، یانژی عه‌ره‌ب بێژن عه‌ره‌بیه‌، یانژی كه‌سانه‌ك وه‌ك عه‌لی قه‌ره‌داغی بو خوه‌ داكه‌فتنا بوهایێ لێرێ توركی كربیت كێشه‌ لێ داگیركرنا ئه‌فرینێ كاره‌ك ئاسایی بیت یانژی بێ موچه‌یا خه‌لكێ به‌شه‌ك ژباشورێ كوردستانێ كاره‌ك ره‌وابیت. كوردێ مه‌ به‌رده‌وامه‌ لسه‌ر زهنیه‌تا كوله‌تیێ كو ژ خه‌لكێ را دبێژه‌ تو بو خوه‌ بكه‌ و ئه‌ز ژی دێ بوته‌ كه‌م. كورد نه‌پتره‌ ژ خاتینا قه‌ره‌چ، ده‌ما دگوتن ماقیله‌كی بو خوه‌ كه‌چه‌ك قه‌ره‌چ خواست لێ ده‌ما خوارن تینا، قه‌ره‌چخاتین دا رابیت هنده‌ك خوارنێ كه‌ته‌ سێنیكا خوه‌ و چیته‌ به‌رپه‌نجه‌رێ و دا ده‌ست بخازوكیێ كه‌ت. ئه‌م كوردژی مینا وێینه‌ له‌وما هه‌یا ده‌ما هنده‌ك وه‌لاتێ بومه‌ به‌شه‌ك ژ باشور پاراستی مه‌ بخوه‌ داگیركه‌ر بانگهێشتكرن، وه‌ك دبێژن به‌فر فێلا خوه‌ ناهێلیت.
ئه‌م ڤه‌گه‌رن سه‌ر نڤێژا مریا، بمن نڤێژ لساخا دكه‌ڤیت، كورد گه‌له‌ك مرینه‌ له‌وما ژ ئالیه‌كی نابیت نڤێژێ لكه‌سه‌كی بكه‌ن و ژ ئالیێ دنڤه‌ دڤێت نڤێژێن هه‌می ئولا لوان بێن كرن، وه‌ك رومانا كه‌له‌خێن بێ گیان یانژی گیانێن مری یا نیكولای گوگول، یانژی وه‌ك به‌ری چه‌ند رۆژا من نڤیسی ئه‌م كورد یێت هه‌ین لێ ئه‌م ناژین.چه‌ند پرسه‌ك لو دوماهیكێ بو ئیخوانچیا و هه‌ڤبیرێن وان لباشورێ كوردستانێ ، باشه‌ گه‌لو بوچی مه‌ نه‌ بیست جاره‌كێ وه‌ نڤێژا مریا لسه‌ر كورده‌كی كربیت كو بده‌ستێ داگیكه‌رێن كوردستانێ هاتبیت ژناڤبرن؟ باشه‌ گه‌لو رۆژا هه‌له‌بچه‌ بوچی نڤێژا مریێ نه‌ ئاماده‌ ناكه‌ن؟ یانژی بو گوندێ سۆریا و خورتوده‌كان، شه‌هیده‌ن گه‌لیێ زیلان، قارنه‌ و قه‌لاتان، سینه‌ما عامودێ، سێ برایێن لدژی داعش ، كورێ هه‌مید شه‌ریف سندی و كورێ دوكتور نوره‌ددین و هه‌لالێن وان یێن كو هه‌یا رۆژا ئه‌ڤرو بێ سه‌روشوینن، قوربانیێن شه‌نگال لڤێره‌ مه‌ خوه‌ ل تێلا كوفرێ دا، ئه‌ڤێ خوه‌ دسه‌را پاڤێژن. یان بوچی نه‌بو خه‌لكێ ل روبوسكێ هاتی كوشتن، یانژی لبن دیوارێن سورا ئامه‌دێ، نوسێبین، جزیرێ، شه‌رنه‌خ، لیستا بێ دوماهی یه‌، بكوردی و بكورتی سه‌رێ بێ زاده‌ هه‌ر بگره‌ و پێداده‌.

‎لدور Malame

Check Also

ئه‌گه‌ر تویێ باشورێ كوردستانێ عیراقی نه‌بی تو چیی؟

د.شه‌عبان مزوری هه‌ر تاكه‌ كه‌سه‌ك بخواسته‌كا خوه‌ به‌ یان نه‌ هه‌لگرێ هنده‌ك پێناسایه‌، یه‌ك ژوان …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.