كوردینی رێبازا جوان یانژی رێبازا دره‌وین، دز و تالانكه‌را

د. شه‌عبان مزوری
ئه‌م بێژیت به‌نگه‌ك ساده‌ هه‌ر په‌یڤه‌كێ بسه‌رێ خوه‌ واته‌ك یانژی پێناسه‌ك دده‌ گوهداری یانژی خوه‌نده‌ڤانی، له‌وما گه‌له‌ك كه‌سێن بسپور، زانا و فیله‌سوف كاره‌ك مه‌زن كرینه‌ ژبو گرنگیا بكارئینانا په‌یڤا. گه‌له‌ك جاران ئه‌م دبینین كو هنده‌ك په‌یڤ دبه‌ پیرۆزبن لێ ژبه‌ر شێوێ چه‌وتێ بكارئینانا وان یانژی هاتینه‌ گرێدان بهنده‌ك ره‌وشتێن نه‌ مروڤاتیڤه‌ كو سه‌رده‌مه‌كی خه‌لكه‌كی هیڤیا دن هه‌بو لێ پێجه‌وانه‌ی هیڤیێن وان ره‌فتار هاتینه‌ كرن، وه‌ك نمونه‌ بو یه‌كه‌مین كوردینی و بو دویه‌مین میلیشیات.
ئه‌ز بكورتی دێ لسه‌ر په‌یڤا دویه‌مین راوه‌ستێم چونكه‌ په‌یڤا یه‌كه‌مین بابه‌تێ منه‌. لڤێ سه‌رده‌ما مه‌ ئه‌گه‌ر مروڤ ژهه‌ر گروپپه‌ك چه‌كدار را بێژه‌ میلیشیات وێ فه‌رمانا كوشتنا مروڤی بده‌ و وێ بێخه‌ وارێ پراكتیكێ ئه‌گه‌ر بكاره‌، لێ راستیا واتا ڤێ په‌یڤێ نه‌ كرێته‌ به‌لكو جوان و پیرۆزه‌. میلیشیات گروپپه‌ك چه‌كداره‌ كو نیشتیمان په‌روه‌ریا خوه‌ ژ رێبه‌ر و ئیدولوژیا رێكخستنا خوه‌ دگره‌، له‌وما ژبو ڤان چه‌كدارا نیشتیمان سه‌روكه‌ و رێكخستنا ویه‌. لقویناغا شه‌رێ دژی داگیركه‌را، بێ دادپه‌روه‌را، دكتاتورا ئه‌ڤ گروپێن چه‌كدار بپیرۆز تێن ناسكرن. بهاتنا ڤان گروپێن چه‌كدار بو ده‌ستهه‌لاتێ هه‌ر ژ ئه‌مریكا لاتینی هه‌یا ئاسیا ب رۆژهه‌لاتا ناڤینڤه‌ كارێ هه‌رێن كرێت و دوروندانه‌ ئه‌نجام دان هه‌مبه‌ر خه‌لكێ نه‌ هه‌ڤبیر لگه‌ل وان، چونكه‌ به‌رده‌وام مان لسه‌ر هه‌مان بوچونێ ( سه‌روك وه‌لاته‌، وه‌لات سه‌روكه‌).
په‌یڤا كوردینی بباوه‌ریا من په‌یڤه‌ك لسه‌راتا بكارئینانا وێ ئارمانجه‌ك پیرۆز بخوه‌ڤه‌ دگرت لێ هێدی هێدی بده‌رباسبونا ده‌می كه‌فتیه‌ هه‌مان ره‌وشا په‌یڤا میلیشیات. ژ ناڤه‌راستا سالێن هه‌فتیا ژ سه‌دلا ده‌رباسبوی هه‌یا رۆژا ئه‌ڤرو من بسه‌دان جاران ژ مروڤێن ئاستێن جودایێن به‌رپرسیاره‌تیا رێكخستنی، میری و هه‌یا كه‌سێن ئاستێن جودایێن خوه‌ندنێ هه‌رده‌ما كاره‌ك چه‌وت، كاره‌ك نه‌ جێگیر، تاوانه‌ك، دزیه‌ك، تالانه‌ك ….هتد ژ كار و ره‌وشتێن كرێت هاتبان ئه‌نجام دان دابێژن خه‌منینه‌، گوهدار نه‌به‌، ژبیركه‌، چاڤێن خوه‌ ڤه‌نه‌كه‌، گوهێن خوه‌ بگره‌، ئه‌زمانێ خوه‌ ببره‌… ئه‌ڤه‌ كوردینیه‌. لێ براستی هه‌یا رۆژا ئه‌ڤرو من نه‌ بهیستیه‌ ژ كه‌سه‌كی كو كاره‌ك قه‌نج بكوردینی بناڤكربیت. واته‌ لڤێره‌ كوردینی یه‌كسانیه‌ لگه‌ل بێ ره‌وشتیێ.
گومان نینه‌ گه‌له‌ك كه‌سان و گه‌له‌ك جاران په‌سنێن خوه‌داینه‌ و گوتینه‌ مه‌ كوردایه‌تی كریه‌، كریه‌ ژ كریار هاتیه‌ واته‌ كاركریه‌، لێ پرس ئه‌ڤه‌یه‌ چما وانا كارێن خوه‌ بناڤ نه‌دكرن ژبو مروڤی زانیبا كوردینی چ بخوه‌ڤه‌ دگره‌، ئایا مروڤه‌ك بكوژی، ژنه‌كێ بره‌ڤێی، مالێ كه‌سه‌كی بخوی، دزیا كه‌سه‌كی بكه‌ی…..هتد، پاشان بچی چیای و تڤه‌نگێ هه‌لگری كوردینی یه‌؟ رێكخستنه‌كێ چێكه‌ی و گروپپه‌ك چه‌كدار پێكبینی، گومركا ده‌ینی، پارا ژ هه‌ژاران كومكی، هنده‌كا ژبه‌ر خاترا هنده‌ك دن بكوژی، هه‌ر ‌لایێ پاره‌ زۆر لوی لای بی، ببی ملیونێر‌ …. هتد، ئه‌ڤه‌ژی كوردینی یه‌؟ لڤێره‌ گومان نینه‌ كو خه‌لكه‌ك هه‌بویه‌ ژ دل و جان لده‌ستپێكێ خوه‌سته‌كا پاراستن، ئازادی و خوه‌شگوزه‌رانیا تاكه‌سێ كورد بو وان ئارمانج بویه‌ لێ پشتی كه‌فتنا وان بو ناڤ گۆلا گه‌نی خه‌لكێ مه‌یێ ئاسایی ره‌به‌ن و په‌ریشان كرن، سه‌رێ وان خوار هندی باسا قاره‌مانیێن خوه‌ دكه‌ن، هه‌ر چه‌نده‌ ئه‌م هه‌می دوزانین رۆژێن ته‌نگاڤ ژ مه‌یدانا جه‌نگێ وه‌ك ریڤیا ره‌ڤینه‌. بكوردی و بكورتی بو من په‌یڤا كوردینی یانی دره‌و، دزی، تالان، ……هتد.

‎لدور Malame

Check Also

ئه‌نفالێ كاردڤێت نه‌ كارڤه‌دان، خوه‌دان وژدان دڤێن نه‌ تالانكه‌ر

د. شه‌عبان مزوری دیسان ره‌وشه‌نك… و تاریك بیرێن مه‌ مالپه‌رێن خوه‌ لتورێن كۆمه‌لایه‌تی دا ره‌شكرن …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.