عه‌ریزچی دڤێت نه‌مینن، نه‌ دڤێت گران نه‌بن

د.شه‌عبان مزوری
ئه‌سته‌مه‌ ئه‌ڤرو روژه‌ك لسه‌ر مه‌ ده‌رباس بیت بێی كریاره‌ك، هزره‌ك، دیتنه‌ك كومیدی، درامی، شێتكرنی، مه‌ژی ته‌ڤلهه‌ڤ نه‌كه‌ت. تشتێ بالكێش بو من ئه‌و بو كو هنده‌ك جامێرێن خوه‌ بناڤ ره‌وشه‌نبیر دكه‌ن و تارادده‌كه‌ ئینتلێكتوێل ژی دبیت خوه‌ ببینن ڤان رۆژا سه‌رقالێ بابه‌تێ عه‌ریزه‌ و عه‌ریزچیا بوینه‌.بو وان بویه‌ خه‌م و پرس كانێ بوچی عه‌ریزه‌ دێ گران بیت ژ ٣٠٠٠ دینارا بو ٢٥٠٠٠ دینارا، لێ وان كه‌سان گه‌لو چ ده‌ما هزرا خوه‌ كریه‌ كانێ هه‌بونا عه‌ریزچیا نیشانا چیه‌؟ ژ خوه‌ پرس ئه‌وه‌ كو لسه‌دا ٢١ ێ هه‌بونا عه‌ریزچی شه‌رمزاریه‌.
وه‌ك بو من زانایه‌ كو عه‌ریزچیه‌ك كارێ وی یارمه‌تیا خه‌لكه‌ك نه‌ خوه‌نده‌ڤان بده‌ت كو نامه‌ك، داخوازه‌ك، پرسه‌ك…..هتد ژ بابه‌تێن جودا بو ده‌زگاهه‌ك میری بنڤیسیت. عه‌ریزچی سه‌رده‌مه‌كی پێویستبون كو ژماره‌ك پر مه‌زن ژخه‌لكێ ده‌ڤه‌ره‌كێ، هه‌رێمه‌كێ یانژی ته‌ڤایا وه‌لاتی نه‌خوه‌نده‌ڤان بون. پیشا عه‌ریزچی لهه‌می جیهانێ هه‌بویه‌ لسه‌رده‌مه‌كی لێ ببه‌لاڤ بونا خوه‌ندنێ ئه‌ڤ پیشه‌ به‌ره‌ف نه‌مان ڤه‌چو دبیست سالێن داوی ژسه‌دا بیستا لپرانیا وه‌لاتێن جیهانێ. بباوه‌ریا من هه‌بونا ڤێ پیشێ لهه‌ر وه‌لاته‌كی نیشانا نه‌بونا خوه‌ندنێ یه‌ یانژی ساویلكی و لاوازیا خوه‌نده‌ڤانایه‌.
دسه‌رده‌مه‌كێ دا خوه‌ ئه‌م وه‌ك هاولاتیێن عیراقێ ئه‌گه‌ر ئه‌م پتر ژ یه‌ك هه‌یڤ ماباینه‌ لعیراقێ دڤێت مه‌ سه‌ره‌دانا باوه‌ردكه‌م ناڤێ وێ رێڤه‌به‌ریا ئاكنجیبونێ بو دكر. لهاڤینا ٢٠٠٦ ئه‌ز چوم دوهۆك و ژبه‌ر كو من پلان هه‌بو نێزیك دو مه‌ها بمینم من سه‌ره‌دانا وێ رێڤه‌به‌ریێ كر. ده‌ما چویمه‌ پرسگه‌هێ داخوازا عه‌ریزێ ژمن كر منژی كاغه‌ز و پێنوس لگه‌ل بون، له‌وما من ده‌ست بنڤیسینا عه‌ریزێ كر. ژمن وه‌رنه‌گرتن و گوتن دڤێت بچم ده‌ف عه‌ریزچی بینم، من گوت به‌رێز ئه‌ڤه‌ بێرێزیه‌ هون بمن دكه‌ن چونكی خوه‌ندنا من ژ یا عه‌ریزچی به‌رزتره‌ و كێماسیه‌ بو من و ماموستایێن من كو ئه‌ز بو نڤیسینا عه‌ریزێ داخوازا هاریكاریێ ژ كه‌سه‌كی بكه‌م كو ئاستێ خوه‌ندنا وی زۆر و زۆر ژ یێ من نزمتره‌. لوه‌ درێژ ناكه‌م ژ نیشكه‌كێڤه‌ رێڤه‌به‌ر ده‌ركه‌فت و گوت ئه‌ڤه‌ رانه‌مایێن مه‌نه‌ و ئه‌گه‌ر جه‌نابێ سه‌روكی ژی بێت بێ عه‌ریزا فه‌رمی ده‌رباس ناكه‌م، منژی گوتێ براستی ئه‌ز نوزانم كانێ جه‌نابێ سه‌روكی چه‌ند پێسیستی بهاریكاریا كه‌سه‌كی هه‌یه‌ ژبو نڤیسینا عه‌ریزه‌كێ لێ من بخوه‌ پێویست پێنینه‌ رێزدار، به‌رده‌وام كر و گوت: ئه‌گه‌ر تو دخوازی كارێ ته‌ بێت ئه‌نجامدان هه‌ره‌ عه‌ریزێ ژده‌ف عه‌ریزچی بینه‌، بێگومان نه‌چار بوم بخوهدان و شه‌رمكری چومه‌ ده‌ف عه‌ریزچی، هوستیێ خوه‌ لبه‌ر خواركر، پارێ خوه‌ دا و عه‌ریزا خوه‌ وه‌رگرت؟؟؟؟؟؟؟
بپێشڤه‌چونا ته‌كنیكێ ئه‌ڤرو دڤێت هه‌می رێڤه‌به‌ریا، داموده‌زگه‌هێن په‌یوه‌ندیدار فورمێن ئاماده‌ و چاپكری هه‌بن كو ته‌نها كه‌سێ پێویست پێهه‌بیت ناڤێ خوه‌ داگریت، ئادرسێ خوه‌، به‌روار، ئیمزا ….هتد بهیچ ره‌نگه‌ك نابیت پول یانژی پیل بمینن، چونكه‌ ده‌م ده‌مێ ته‌كنولوژیێ یه‌ و كات پاره‌یه‌ له‌وما دڤێت خه‌لك بڤان جوره‌ كارانڤه‌ گیرو نه‌بیت.
بو من زۆر جاران هاتیه‌ گوتن كو رێبه‌ر یان هنده‌ك كه‌س لپشت په‌ردێ شه‌ریكێن عه‌ریزچینه‌ و ئه‌و بیرویێن وان تێن كرین و فروتن. نوكه‌ ئه‌ز داخواز ناكه‌م كو ئه‌ڤ كاره‌ بپه‌روه‌ بیت، هه‌ر رێڤه‌به‌ریه‌ك ئازاده‌ بلا بدلێ خوه‌ بوهایێ خوه‌ دانیت، ئه‌و پاره‌ دچنه‌ به‌ریكا كێ دیسان بو من نه‌ كێشه‌یه‌. لێ بكورتی و بكوردی خه‌لكی بشه‌لینن لێ كرێتیێ پێ نه‌كن.

‎لدور Malame

Check Also

كێشه‌ نه‌ كورده‌، كوردبونه

شه‌عبان مزوری هه‌ر مروڤه‌ك لسه‌ر رویێ زه‌مینی هه‌لگرێ هنده‌ك ناسنامایه‌، واته‌ مروڤ تێ ناسین لناڤا …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.