دناڤبه‌را ئازادیا راده‌ربرینێ و ترورا ئازاد، هزر نامینیت

د. شه‌عبان مزوری
د كومه‌لگه‌ها توته‌لیتار و ترور بالاده‌ست راسته‌ كو مروڤ ئازاده‌ هه‌ر تشته‌كی بێژیت، لێ لكومه‌لگه‌ها ئازاد و دیموكرات مروڤ ئازاده‌ پشتی هه‌می تشته‌ك گوتی. گه‌له‌ك جارێن دنژی من ئاماژه‌ بڤێ چه‌ندێ كریه‌ لێ من بپێویست زانی دوباره‌ بكه‌م ژبو خوه‌نده‌ڤانێ هێژا بزانیت كو كلیلكا پێشكه‌فتنا هه‌می زانست و جڤاكێ ئه‌ڤا من لسه‌ری نڤیسی ئه‌وه‌. گوتن و نڤیسین به‌رهه‌مێن هزركرنێنه‌ لده‌ف هه‌ر مروڤه‌كی، هزر به‌رهه‌مێ گومانێ یه‌، گومان به‌رهه‌مێ تێروانین ،خوه‌ندن و هه‌لسه‌نگادنه‌ك ره‌خنه‌یی یه‌ لسه‌ر هه‌می بوارێن گرێدای ژیانا هه‌ر مروڤه‌كی ، دبه‌ كه‌رستێن ژیانێ بن یانژی باوه‌ریێن جڤاكی بن.
بباوه‌ریا من ئه‌ڤ پێشڤه‌چونا ئابوری ل وه‌لاتێن ڕۆژئاڤا و وه‌لاتێن دیموكرات، هه‌روه‌سا سیسته‌ما خوه‌شگوزه‌رانی كو ئه‌ڤ خه‌ونا میلیاردا مروڤانه‌ به‌رهه‌مێ دو تێروانین زۆر ژ هه‌ڤ جودانه‌. یه‌كه‌مین بپێشه‌نگیا ئابوریناسێ سكوتله‌ندیه‌ ئاده‌م سمیت كو به‌رێ بناغێ یێ سیسته‌ما ئابوری دانای یا كو هه‌یا رۆژا ئه‌ڤرو ژ روژه‌ڤێ ده‌رنه‌كه‌فتیه‌ و تێ ناسكرن ببابێ كاپیتالیزمێ، دویه‌مین فه‌یله‌سوفێ ئه‌لمانی كارل ماركسه‌ كو بهه‌می شیانا خوه‌ ره‌خنه‌ ل ئاده‌م سمیت گرتیه‌ و بنه‌یارێ چینا هه‌ژار بناڤكریه. د مێژویا مروڤاتیێ كه‌سه‌ك نه‌هاتیه‌ وه‌ك ڤان بكاره‌ هنده‌ ژماره‌ك زۆر دده‌مه‌ك كورتدا لخوه‌ كومكه‌، هه‌یا هه‌می پێغه‌مبه‌رێن ئولێن جودا. هه‌ڤركیا ڤان هزرێن جودا كاری به‌لانسه‌ك په‌یداكه‌ لناڤبه‌را چینا كاپیتال و چینا كاركه‌ر كو هه‌ردو بهه‌ڤرا بئارامی بژین و داخوازێن هه‌ڤدو بپه‌ژرینن.‌
پیروزی و رێز
یه‌ك ژ گرفتاریێن كومه‌لگه‌ها مه‌یا كوردی بباوه‌ریا نه‌راوه‌ستانه‌ لسه‌ر رامانا په‌یڤا و نه‌ دوروست بكارئینانه‌. پرانیا جارا دیالوگێن كوردی هوزانڤانا تینه‌ بیرا من، ئانكو چه‌وا هوزانڤان یاریا بپه‌یڤا دكه‌ ژبو كرێته‌كی، كرێتتركه‌ یانژی جوانكه‌، هنده‌ك جارانژی جوانی جوانتر دكه‌ یانژی كرێت دكه‌ بهونه‌را له‌یستن بپه‌یڤا. ده‌ما مروڤ لگه‌ل كه‌سه‌كی دكه‌فته‌ دیبه‌یتێ دڤێت بزانیت مروڤ لدویف مه‌ژیێ خوه‌ وێ باخڤه‌ و كه‌سێ هه‌مبه‌رژی وێ بمه‌ژیێ خوه‌ بپه‌یڤه‌، د دیبه‌یتێدا ته‌نها رێزگرتن گوهداری كرنا كه‌سێ هه‌مبه‌ره‌ و تشته‌ك دن نینه‌. دبه‌ هنده‌ك بێژن باشه‌ مروڤ دكاره‌ هنده‌ك گوتنێن نه‌ شیاو بكار ببه‌. به‌رسڤ به‌لێ و نه‌یه‌. به‌لێ ئه‌گه‌ر ئه‌ڤ په‌یڤا ژێرا دبێژن نه‌شیاو ته‌نها لجه‌م كومه‌ك جڤاتێ هه‌بیت، نه‌خێر ئه‌گه‌ر ئه‌ڤ په‌یڤه‌ لده‌ف جڤاكێ بره‌نكه‌كێ گشتی نه‌شیاو بیت.
دیبه‌یت تم لناڤبه‌را دو كه‌سێن خوه‌دی تێروانینێن جودا تێ كرن لسه‌ر هه‌مان پرس و بابه‌ت، لڤێره‌ دڤێت ئاشكرا بیت بو ئه‌و كه‌سێ به‌شداری دیبه‌یتێ دبه كو ئه‌وێ تێروانینێن خوه‌ لگه‌ل كه‌سێ هه‌مبه‌ر ئالوگۆر كه‌ت و نه‌ زۆرتر، دیبه‌یت نه‌چه‌سپاندنا هزره‌كێ یه‌، به‌لكو ناساندنا خوه‌ندنه‌كێ یه‌ بو پرسه‌كێ یانژی بابه‌ته‌كی كو ئارمانج ژێ ئه‌وه‌ هه‌ركه‌س تێروانینا خوه‌ وه‌ك كالایه‌ك دانیت سه‌ر مێزێ و خه‌لك ئازاده‌ كویژان هه‌لبژێره‌. هه‌ركه‌س لهه‌مبه‌ری كه‌سه‌ك خوه‌دی تێروانینه‌ك دژ تێروانینا وی بیت دڤێت پێشوه‌خت بزانیت ئه‌و تشتێن ئه‌و بو خوه‌ بپیرۆز دوزانیت بو هه‌مبه‌رێ وی پیرۆز نینن. له‌وما هه‌ر هه‌ره‌شه‌كرن ژ لایێ هه‌ر تاكه‌كسی یان گروپپه‌كی لسه‌ر كه‌سه‌ك دن لژێرناڤێ بێرێزیكرن بپیرۆزیێن وان بێ ره‌وشتیه‌ك بێ سنوره‌، چونكه‌ ئه‌و تاكه‌كه‌س یانژی گروپپێ دڤێت گازندێ یانژی هه‌ره‌شێ لهه‌ڤبیرێ خوه‌ بكه‌ت كو ئه‌وێن ئه‌و بو خوه‌ بپیرۆزی دوزانن خستینه‌ به‌ر گه‌نگه‌شێ. وه‌ك نمونه‌ كه‌سێن عه‌بدال نوری عه‌بدال ببێرێزیێ هه‌مبه‌ر خوه تاوانباردكه‌ن دڤیابا كه‌سێ هه‌مبه‌ر عه‌بدال نوری عه‌بدال رونشتی تاوانباركربا كو خوه‌ بنونه‌رێ پیرۆزیێن وان ناسكری.
ژبو مروڤه‌ك ئازاد كو لده‌مه‌كی تشته‌ك ژ مروڤی پیرۆزتر نینه‌، لهه‌مان ده‌م هه‌می مروڤ جهێ ره‌خنێ و هه‌لسه‌نگاندنێ نه‌. پیرۆزی و ئازادی دو چه‌مكێن ژیانێ یێن دژ هه‌ڤن. پیرۆزی بو من قه‌ید و زنجیرن، چه‌ندین پیرۆزی كه‌سه‌كی هه‌بن، هنده‌‌‌ قه‌یدا لزنجیرا دلنگێ خوه‌دا‌ زۆرتر دكه‌. پێچه‌وانه‌ چه‌ندین كێمتر پیرۆزی مروڤی هه‌بن ئه‌وقا په‌رێن مروڤی زۆرتر دبن تاكو وه‌ك سیمه‌رخا بفریت و هه‌می سنورا بێچاڤ ترسانه‌ ده‌رباس كه‌ت. لدوماهیێ ئه‌نجام بباوه‌ریا من سفر پیرۆزی یه‌كسانه‌ لگه‌ل ١٠٠% ئازادی.
لژینگه‌ها گه‌ف و گورا مرنێ هه‌بیت لسه‌ر خوه‌دی هزرێن جودا، ترورا هزری هه‌بیت لژێر پاساوێن چه‌په‌‌لێن جودا، بكارئینانا هنده‌ك به‌ربانكێن گشتی بو مه‌ره‌مێن كه‌ساتی وێ خه‌لكێ بكه‌ كویله‌ و بونه‌ره‌ك خرش ژ هه‌میلایڤه‌ ژ ده‌رڤه‌ی هنده‌ك حه‌زێن كو هه‌ڤشێوه‌نه‌ لگه‌ل گیانه‌وه‌رێن دن. بكورتی و بكوردی ئه‌گه‌ر شه‌قامێ وه‌لاتێ من به‌رده‌وام بێ هزركرن لدویف هنده‌ك كه‌سێن لژێر ناڤێ ئولی كو بنانێ چاڤشوریێ دژین بچیت وێ سوبا مه‌ ژ ئه‌ڤرو پر تاریكتر و وێرانتر بیت.

‎لدور Malame

Check Also

رۆژئاڤا دكه‌ڤیت، داگیر دبیت لێ ناره‌ڤیت

د. شه‌عبان مزوری هێرشا تورانیا و پانتورانیسمێ ڤا هه‌فتیه‌كا خوه‌ ده‌رباس دكه لسه‌ر به‌شێ رۆژهه‌لاتا …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.