روره‌شبن كه‌سێن خه‌لكێ تالاندكه‌ن و به‌خشینا بهه‌مان خه‌لكێ دكه‌ن

د. شه‌عبان مزوری
رۆژانه‌ گه‌له‌ك تشت لسه‌ر مه‌ هه‌میا را ده‌رباسدبن لێ هنده‌ك ژوان مروڤ نكاره‌ بئاسانی تێپه‌رینه‌ ژبو كو بڤی ئاوای یان ئاوایه‌ك دن كارتێكرنه‌ك لمه‌ دكه‌ كو بێكارڤه‌دان نه‌مینین. بێ هه‌لویست بون بباوه‌ریا به‌رامبه‌ر هه‌ر كاره‌كی یانژی بوچونه‌كێ ره‌هه‌ندا نیشتیمانی هه‌بیت وایه‌ په‌ژراندن، له‌وما ژبونا كو ژینگه‌هه‌ك بێ دوروستكرن ژبو هنده‌ك گورانكاری بێن كرن دڤێت هه‌ركه‌س ژمه‌ لگور پێچێبونێن خوه‌ هه‌لویست هه‌بین. هه‌لویست بو من خوه‌ندا كه‌سایه‌تیا مروڤی بو رویدان، بابه‌ت یانژی ره‌وش یێن تێنه‌ پێش دسه‌رده‌مێن جودایێن ته‌مه‌نێ هه‌ركه‌سی.
من به‌ری ده‌مه‌ك نه‌ زۆر بابه‌ته‌ك به‌لاڤ لسه‌ر به‌خشینا، ئارمانج من ژ بابه‌تی ئه‌وبو كو خه‌لكێ مه‌ مرنا خوه‌ هه‌لبژێریت لجهێ كرێتكرنا خوه‌، مرنه‌كا ئازا و ئازاد گه‌له‌ك شكودارتره‌ ژ ژیانه‌ك ملكه‌چی. به‌خشین كه‌سانه‌ك دكه‌ن كو سامانه‌ك بره‌نج و كارێ خوه‌ ئینای لێ هه‌ستا هه‌ڤپاركرنا هنده‌ك گرفتاریێن ژینێ لگه‌ل كه‌سێن كێله‌كا وی و زۆرجاران خه‌لكانه‌ك دور، ئه‌و هه‌ستا به‌رپرسیاره‌تیێ وه‌لێ دكه‌ت ساماندار ده‌رڤه‌ی هه‌مو تشته‌كێ ژێرا دبێژن ترس یان شه‌رم ده‌ستبه‌رداری به‌شه‌ك ژ سامانا خوه‌ بیت د به‌رژه‌وه‌ندیا گشتی دا.
ئه‌ڤ بابه‌ته‌ خواسته‌كا من هه‌بو به‌ری هه‌فتیه‌كێ به‌لاڤ كه‌م لێ ژبه‌ر هنده‌ك كارێن هاتین پێش من گیروبو.
لگه‌ل ده‌ستپێكا سالا خوه‌ندنا تازه‌ ل هه‌رێما كوردستانا عیراقێ چه‌ند ره‌فتاره‌كا بالا من كێشێ، لێ لڤێره‌ ته‌نها ئه‌ز دێ لسه‌ر یه‌ك ژوانا راوه‌ستم كو بمن گرنگه‌. من بخوه‌ بابه‌تێن كه‌سوكی لگه‌ل كه‌سێ نینن، ناڤدار نه‌كن نایێ رامانا هندێ كو ژترسا گه‌فه‌كێ یه‌ یانژی دادگایه‌كی یه‌ به‌لكو ره‌فتارێن ره‌هه‌نده‌گ گشتی هه‌بیت دڤێت دهه‌مان ره‌هه‌ند دا سه‌ره‌ده‌ری لگه‌ل بكه‌ین. گڕه‌دانا كێشێن گشتی بهنده‌ك كه‌سانڤه‌ بابه‌تی ژ ناڤه‌روكا و ئارمانجێ دویر دخه‌.
په‌رله‌منتاره‌كێ هه‌رێمێ شانازی دكه‌ت كو وه‌ك ئه‌و دبێژیت ل به‌له‌نگازترین تاخا دهوكێ، تاخا گژه‌به‌را رانویه‌ ب به‌خشینا توداره‌كا ٤٠٠ شاگردا لقوتابخانه‌كێ. تشتێ جهێ سه‌رسورمانێ یه‌ شوینا شه‌رمزاركرنێ خه‌لكێ مه‌ پرانیا وی ده‌ستخوه‌شی لڤی جامێری كر؟ كارێ په‌رله‌منتاری ئه‌ز بخوه‌ به‌لكی نه‌زانم لێ هه‌ركاره‌ك دبیت هه‌بیر یانژی ئه‌نجام بده‌ت لێ به‌خشین كاره‌ك بێ ره‌وشتیا ژبو په‌رله‌منتاره‌كی، چونكه‌ په‌رله‌منتار دڤێت خه‌باتا وی ئه‌و بیت كو كه‌س نه‌مینیت پێویستی ببه‌خشینا هه‌بیت.
هه‌بونا گه‌ره‌كێن به‌له‌نگاز جهێ شه‌رمزاریێ یه‌ بو ده‌ستهه‌لاتێ و ده‌ستهه‌لاتدارا، ئه‌گه‌ر ٤٠٠ شاگرده‌ خێزانێن وان نه‌كارن توداره‌كا خوه‌ندنا وان به‌رهه‌ڤ كه‌ن وێرانی یه‌؟ هه‌بونا ده‌ڤه‌رێن به‌له‌نگاز و پشتگوهخستی سه‌رئه‌نجاما سیتی باژار و سیتی خاتینایه‌، گوندێن ئه‌وروپیه‌، شارێن خه‌ونانه‌، كوچك و ته‌لارێن تالانكه‌رێن سه‌رێ گرانه‌، په‌رله‌منتارێن به‌لێ و ئه‌زبه‌نینه‌. خه‌لك نابیت چاڤه‌رێ به‌خشینا بیت، دڤێت خه‌لكی ژیانه‌ك ئاسوده‌ هه‌بیت، پێداویستیێن سه‌ره‌كی بو هه‌ركه‌سی دابین ببن. په‌رله‌منتار دڤێت سه‌ره‌دانا ڤان هه‌رێما هه‌میا بكه‌ت و بكه‌ته‌ رۆژه‌ڤ ل په‌رله‌مانی نه‌ك بهێت به‌خشینا بخه‌لكێ ڤان گه‌ره‌كا بكه‌ت.
دڤێت ئه‌م هه‌می ژخوه‌ بپرسین گه‌لو په‌رله‌منتاره‌ك داهاتێ ویێ سالانه‌ ژ سامانێ گشتی توداره‌كا ٩٦٠٠ شاگردێت قوتابخانێ بیت چه‌وا دێ به‌ره‌ڤانیێ ژ ده‌نگده‌رێ خوه‌كت؟ په‌رله‌منتارێن هه‌رێمێ ژ لایه‌كی خه‌لكێ دشه‌لینن ژ لایه‌ك دنژی به‌شه‌ك ژ وی سامانێ شه‌لاندنێ دكه‌نه‌ به‌خشینه‌ و لسه‌ر به‌له‌نگازێن خوه‌ به‌لاڤدكن ژبو رویێ خوه‌ سپیكه‌ن، لێ ژبیردكه‌ن كو روره‌شیا هه‌را مه‌زن ئه‌ڤه‌یه‌. هه‌ر لسه‌ر ڤی بابه‌تی وێنه‌ گرتنا كه‌سێن به‌خشینا وه‌ردگرن ماسترین بێ ره‌وشتیه‌.
بكورتی و بكوردی به‌خشین یه‌كسانه‌ لگه‌ل كوله‌تی

‎لدور Malame

Check Also

كێشه‌ نه‌ كورده‌، كوردبونه

شه‌عبان مزوری هه‌ر مروڤه‌ك لسه‌ر رویێ زه‌مینی هه‌لگرێ هنده‌ك ناسنامایه‌، واته‌ مروڤ تێ ناسین لناڤا …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.