بایكوتا نڤێژا ئه‌ینیێ نه‌ نڤێژ نه‌ كرنه‌؟

د. شه‌عبان مزوری
دوهی من پوسته‌ك ل مالپه‌رێ خوه‌ لفه‌یسبوكێ ئانی خوار لژێر ناڤنیشانێن ( بایكوتا نڤێژا ئه‌ینیێ ئه‌ركه‌ك نه‌ته‌وی یه‌ )، هه‌لبه‌ت وه‌ك گه‌له‌ك جاران هنده‌ك كارڤه‌دان لێ ده‌رچون كو بدیتنا من تێگه‌هشتنا شاشا وان كه‌سانه‌ ژبو په‌یاما من. لڤێره‌ بئاشكرا دبێژم ئه‌گه‌ر مه‌به‌ستا من ده‌ستبه‌ردان ژ نڤێژێ با، ئه‌‌ز دا ئه‌شكه‌ره‌ نڤیسم. لێ بمن ئه‌ركه‌ك مروڤاتیه‌ به‌ری هه‌ڤخه‌مه‌ك نه‌ته‌وی گه‌لێ كورد و بتایبه‌تی كوردێن موسلمان دڤێت هه‌لویستێ خوه‌ دژی ده‌وله‌تا داگیركه‌را تورك راگه‌هینن لسه‌ر هێرشا تورانیا بو سه‌ر رۆژئاڤایێ كوردستانێ.
به‌ری ڤی پوستی من بانگه‌وازه‌ك دن به‌لاڤ كربو ل فه‌یسبوكێ و داخواز ژ كوردا كر بو كو ئه‌ڤرو رۆژا پێنجشه‌مبی ١٠.١٠.٢٠١٩ بایكوتا كارێن خوه‌ بكه‌ن و وه‌ك هه‌ڤسوزی لگه‌ل خه‌لكێ رۆژئاڤای كوردستانێ. بمن بێ ده‌نگی و بێ هه‌لویستیا گه‌لێ كورد بویه‌ سه‌ده‌ما ڤێ ره‌وشا ئه‌م گه‌هشتینێ ئه‌ڤرۆ. هه‌ر كه‌س ژمه‌ ئه‌ركه‌ لسه‌ر وی بشێوێ بكاره‌ هه‌لویستێ خوه‌ نیشان بده‌ ژبو سوبه‌ ژخوه‌ شه‌رم نه‌كه‌.
زانایه‌ بو مه‌ هه‌میان كو بملیونا كوردێن باوه‌ری ب ئولا ئیسلامێ هه‌ی قه‌ستا مزگه‌فتێ دكه‌ن ژ بو نڤێژا ئه‌ینیێ، من نه‌ دخواست ڤان مروڤا بێخمه‌ كراسێ شه‌رمێ و داخوازه‌ك مه‌ستر ژێ بكه‌م وه‌ك بو نمونه‌، بلا گوتارا مه‌لای لسه‌ر پشتگیریا روژئاڤا بیت و دژاتیا ده‌وله‌تا تورك بیت، یانژی من خه‌لك هاندابا خوه‌پیشاندانا دژی ده‌وله‌تا تورك به‌ری یان پشتی نڤێژێ. من دخواست وه‌ك پێغه‌مبه‌رێ موسلمانا دبێژیت‌ ( ئه‌گه‌ر ته‌ چه‌وتیه‌ك دیت بزۆرێ سه‌ره‌راستكه‌، ئه‌گه‌ر نكاری بگوتنێن خوه‌ و ئه‌گه‌ر نكاری د دلێ خوه‌دا كو ئه‌وژی لاوازترین باوه‌ری یه‌ ) هیڤیدارم سه‌ركه‌فتی بم د وه‌رگه‌را خوه‌دا.
من رێز بو هه‌می ئوله‌كی و باوه‌ریه‌كێ‌ هه‌یه تا راددا كو نه‌بیته‌ هه‌ره‌شه‌ لسه‌ر مروڤایه‌تیێ، ژبه‌ر ڤێ چه‌ندێژی بانگه‌وازا من نه‌ ژبو ده‌ستبه‌ردان ژ نڤێژێ یه‌ به‌لكو بایكوتا مزگه‌فتێ و ته‌نها سوبه‌هی ژبو ئه‌وكه‌سێن لژێر ناڤێ ئیسلامێ هێرشا دكه‌ن سه‌ر رۆژئاڤایێ كوردستانێ بزانن كو كوردێن موسلمان وان روره‌ش دكه‌ن و كارێ وان بكاره‌ك دژه‌ مروڤاتی دوزانن، پێچه‌وانه‌ بباوه‌ریا من چونا مزگه‌فتێ ئه‌گه‌ر نه‌ ئاشكرا بو دژاتیا تورانیا بیت بسه‌ركێشیا ئه‌ردوگان و هه‌ڤالبه‌ندێن ویێن رێكخستنا جیهانیا برایێن موسلمان و بو پشتگیریا رۆژئاڤایێ وه‌لاتێ مه‌بیت، تێ رامانا هندێ كو بچونا وه‌یا مزگه‌فتێ هون ده‌سته‌كێ دده‌ن داگیركه‌رێن نیشتیمانێ گه‌لێ كورد.
بكورتی و بكوردی هه‌ركه‌س دڤێت به‌رێ خوه‌ هه‌لبژێره‌، كێر گه‌هشتیه‌ هه‌ستی، ئێدی بو كه‌سێ ناچیت سه‌ری نیڤا وه‌ریسی بگریت‌.

‎لدور Malame

Check Also

رۆژئاڤا دكه‌ڤیت، داگیر دبیت لێ ناره‌ڤیت

د. شه‌عبان مزوری هێرشا تورانیا و پانتورانیسمێ ڤا هه‌فتیه‌كا خوه‌ ده‌رباس دكه لسه‌ر به‌شێ رۆژهه‌لاتا …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.