رۆژئاڤا دكه‌ڤیت، داگیر دبیت لێ ناره‌ڤیت

د. شه‌عبان مزوری
هێرشا تورانیا و پانتورانیسمێ ڤا هه‌فتیه‌كا خوه‌ ده‌رباس دكه لسه‌ر به‌شێ رۆژهه‌لاتا فورات ژ رۆژااڤایێ كوردستانێ بێ ئه‌نجامه‌ك زۆر به‌رچاڤ. دو ساله‌ ئه‌ردوگان و هه‌ڤالبه‌ندێن خوه‌یێن كورد به‌ری موسلمانێن رێكخستنا جیهانیا ته‌روریستیا برایێن موسلمان دشه‌ره‌ك سیكولۆژی بێ بێنڤه‌دان دا بون لگه‌ل كوردێن رۆژئاڤا و كوردێن نه‌ته‌وی لهه‌ر دره‌كا جیهانێ ژبو روخاندنا وره‌یا گه‌لێ كوردێ ئاپوچی و پشتگیرێن ئاپوچیا. دو ساله‌ گه‌فێن بن ئاخكرنێ، سوتنێ، قه‌لاندنێ، مشه‌ختكرنێ لمه‌ دكه‌ن، دگوتن پرانیا جاران عه‌فرین ژبومه‌ وێ دیلان بیت هه‌مبه‌ر ئه‌ڤا ئه‌م ببینین ل رۆژهه‌لاتێ فورات. زۆرنابێژ و ده‌هولقوتێن هه‌رێن پیس وه‌ك هه‌رده‌م هنده‌ك كورد بون. پانتورانیێن جامێر دگوتن ئه‌گه‌ر ئاپوچیا كاریبیت به‌رخوه‌دانه‌ك بكه‌ن ل ئه‌فرینێ سه‌ده‌م هه‌بونا ژماره‌ك چیا بو، لێ لرۆژهه‌لاتێ فورات چیا نینن و دێ بچه‌ند كاتژمێرا خوه‌ راده‌ستكه‌ن و پێشمه‌رگێ رۆژ وێ بهاریكاریا تورانیا جهێ قه‌سه‌دێ بگرن. هه‌یا رۆژا ئه‌ڤرۆژی كه‌سانه‌ك هه‌نه‌ پێشمه‌رگێن رۆژ وه‌ك به‌ره‌ڤانێن رۆژئاڤا ناسدكه‌ن، لێ پێویسته‌ بزانن ئه‌ڤه‌ لسه‌ر هه‌مو كه‌سه‌كی ده‌رباس نابیت. دیمه‌نێن سه‌ره‌دانا به‌رپرسێن تورك بو پێشمه‌رگێ رۆژ ل بیرامه‌ ماینه‌، گوتنێن به‌ر‌پرسێن ئه‌نه‌كه‌سێ ده‌ما دگوتن ( ئێدی په‌یه‌ده‌ نكاره‌ رێ لمه‌ بگره‌ ڤه‌گه‌رین رۆژئاڤا چونكه ئه‌م هه‌ڤپه‌یمانین لگه‌ل توركا، تورك به‌شه‌كن ژ هه‌ڤپه‌یمانا نێڤنه‌ته‌وی و بڤی ئاوای درێكا توركاندا پێشمه‌رگێ رۆژ دبیته‌ به‌شه‌ك ژ هه‌ڤپه‌یمانا نێڤنه‌ته‌وی.
ئالا هه‌ر ئالایه‌ لێ سۆر و سپی ژهه‌ڤ جودایه
ئه‌ز بخوه‌ لایه‌نگرێ فه‌لسه‌فا دژبه‌ریا له‌یزتك بپه‌یڤا كرن ژبو ڤالاكرنا په‌یڤێ ژ رامانا دوروست، وه‌ك چه‌وا ئه‌م دبێژین هه‌ر به‌ره‌ك لجهێ خوه‌ بوهایه‌، وه‌ساژی په‌یڤ برامانا خوه‌یا سروشتی جوانه‌، هه‌ر په‌یڤا پتر ژ یه‌ك رامان بو هاتن دیتن وێ ده‌مێ بێ رامان دبه‌. به‌شه‌ك مه‌زن ژمه‌ كوردێن خوه‌ندڤان و ره‌وشه‌نبیر كوردستان وه‌ك وه‌لاته‌ك داگیركری بناڤكریه‌. پرسه‌ ئه‌ڤه‌ به‌رێزان داگیر كرن نایێ رامانا سه‌پاندنا ده‌ستهه‌لاته‌كێ ژلایێ كۆمه‌له‌ك مروڤان ڤه‌ بو سه‌ر كومه‌له‌ك مروڤێن دن بێ به‌رخوه‌دان، سه‌پاندنا هه‌ر جوره‌ ئیدولوژی یانژی ده‌ستهه‌لاتداریا گه‌له‌كی لسه‌ر گه‌له‌ك دن بێ به‌رخوه‌دان تێ واتا خوه ‌بده‌ستڤه‌به‌ردان ( ته‌سلیم بون ) ئانكو هه‌لدانا ئالاسپی یانی قایل بون بده‌ستبه‌ردان ژ ئیدولوژی و ده‌ستهه‌لاتداریا خوه‌، ملكه‌چبون و تێكه‌ل بون لگه‌ل ده‌ستهه‌لاتدارێن تازه‌. ژهه‌میێ وێرانتر كورد گه‌له‌ك جاران دبێژن نوی هاتن كه‌ڤن خه‌لاتن، ئه‌ڤ رسته‌ بگشتی كورد بو هه‌مابێژه‌ هه‌می تشته‌كی دبێژن، وێرانیا ڤێ رستێ دوێ یه‌كێدایه‌ كو مێژویا خوه‌ ژبیر دكه‌ی و به‌رده‌وام كراسێ خوه‌ دگوهوری لژێر دوریشما پاراستنا خوه‌ وه‌ك تاكه‌ كه‌س، لێ سه‌رئه‌نجام تایبه‌تمه‌ندیا خوه‌ ژ ده‌ست ددی و پاراستیژی نامینی ژبه‌ر گه‌فا ده‌ستهه‌لاتداریا تازه‌. له‌وما خه‌لكێ وه‌لاتێ خوه‌ بێ به‌رخوه‌دان بده‌ست كه‌سه‌ك دنڤه‌ به‌رده‌ت نابه‌ بێژیت وه‌لاتێ من داگیركریه‌.
هه‌ر خه‌لكه‌كێ به‌رخوه‌دان لهه‌مبه‌ر هه‌ر زۆرداریه‌كا ده‌رڤه‌ی سنورێن خوه‌ بكه‌ت كو گه‌له‌ك دن دخوازه‌ بزۆرێ ده‌ستهه‌لاتداریا خوه‌ لسه‌ر بسه‌پینه‌، لێ ئه‌‌نجامێ وێ به‌رخوه‌دانێ بشكێت هه‌مبه‌ر دوژمنێن خوه‌، وێ ده‌مێ وارێ وی هاتیه‌ داگیركرن. له‌وما ئه‌گه‌ر بو نمونه‌ ئه‌م دانپێدانانێ بوێ یه‌كێ بكه‌ی كو كورد بێ به‌رخوه‌دان بوینه‌ موسلمان واته‌ كوردا وه‌لاتێ وان نه‌هاتیه‌ داگیركرن به‌لكو كوردا بخوه‌ پێشكه‌شی عه‌ره‌با كریه‌ كو ئه‌ز بخوه‌ هیچ باوه‌ریێ بڤێ گوتنێ ناكه‌م. لێ ئه‌گه‌ر راست بیت ئه‌ڤ چه‌نده‌ واته‌ بمن ئه‌فرین یه‌كه‌مین هرێمه‌ ژ ئاخا مه‌ هاتیه‌ داگیركرن.
بكورتی و بكوردی دهه‌می جوره‌ جه‌نگه‌كیدا سه‌ركه‌فتن و شكه‌ستن هه‌یه‌ لێ ره‌ڤ نابیت هه‌بیت، له‌وما رۆژئاڤا دكه‌ڤیت، داگیر دبیت لێ ناره‌ڤیت.

‎لدور Malame

Check Also

بایكوتا به‌رهه‌مێ نه‌یارا سه‌رخوه‌بونه‌

د. شه‌عبان مزوری بهێرشكرنا ده‌وله‌تا تورك و هه‌ڤالبه‌ندێن وێ ژ هه‌می رێكخستنێن ته‌روریستیێن ئیسلامی بپێشه‌نگیا …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.