مانێ مەدزانی فیشەکا مەیا چریکە، بوچی مە ئاشکرا کر؟

IMG_0546

 

د. شه‌عبان مزوری

 

بێگومان پرسا دەولەت بونێ پرسا هەرا هەستیارە لەوما دڤێت هەلس و کەفتن بڤێ پرسێرا پر بهشیاری بیت. ئەز بخوە نە مێژو نڤیسم و نە شارەزایێ مێژویێ مە، لێ هندی ئاگادارم هەر ژ نەمانا میدیا هەیا شەرێ جیهانیێ دووەم هەمی سەرهەلدان و پێکولێنێن کوردا ژبو کوردستانەک سەربخوە بویە. لڤێرە پرسەک تێ پێش ئەوژی گەلو ئەگەر چبو کورد ددەمەکیدا دەست ژ ئارمانجا سەرخوەبونێ بەرددەت کو پرانیا گەلێن کو داخوازا سەرخوەبونێ نە دکرن بونە دەولەت، وەک گەلەک وەلاتێن ئاسیا، ئەفریقیا و ئەمریکا لاتینی؟

دەست بەردان ژڤێ ئارمانجێ سەر ل گەلێ کورد شێواند، هەر ئەڤە بدیتنا من بو هوکارا سەرەکی ژبو نەبونا هەلویستەکێ یەکگرتی د ناڤبەرا هێزێن کوردی ل پارچێن جودایێن کوردستانێ، ئارمانجێن کوردا جودا بون ل پارچێن جودا و دهەر پارچەکێ دا. هەر ژ لامەرکەزیەتێ هەیا فێدرالیزمێ. ژبلی ڤێ چەندێ ئەڤ هێزێن پەیدا بوین قەت زەلال نەبون د داخوازێن خوەدا، یەک ژ ئاریشێن هەرێن هەرێن بەرچاڤ کو گەلێ کورد بەری دوژمنێن خوە نەدزانی کانێ ئەڤ هێزە چ دخوازن. ب نەبونا ئارمانجێن زەلال و ستراتیجیەتەکا درێژخایەن روژ بو روژێ هەستا نەتەوی لدەف گەلێ کوردا وەک نەتەوەک یەکگرتی و خوەدان نشتیمانەک کو ژێرا دبێژن کوردستان لاواز بو. ئافاتا ئەم ژێرا دبێژین هەرێم چاتی ب ڤان هێزارا هات کو پشتی کۆمارا کوردستان ل مەهاباد هاتین، ل هەر پارچەکێ دەست ب گوهارتنا ناڤێ خوەکرن بزێدەکرنا ڤێ – خیچێ و ناڤێ داگیرکەری. کوردستان ژ وەلاتەکێ یەکگرتیێ کوردا کرن کوردستانا-عیراقێ-ئیرانێ-تورکی- سوریێ و بڤی رەنگی کورد مانە بێ ئاخ.

ئەڤ هێزە بونە ئەگەرا بتەنێ مانا کوردا دناڤ قادا نێڤنەتەوی دا، لەوما هەیا ئەڤرو ئەگەر هندەک جارا پشتگیریەک هەبیت بو گەلێ کورد تەنها وەک کێشەک مروڤاتی تێت وەرگرتن. لڤێرە نابیت ئەم گازندێ ژ خەلکی بکەین چونکی ڤان هێزا بخوە پرسا مە ژ پرسا نەتەوە و خاک کرە پرسەک ناڤخوەیێ ددەستێ داگیرکەرێن وەلاتێ مەدا.

دڤان رێزێن سەری دا من دخواست بێژم کو بومن وەک کوردەک هەر ئاخفتنەک ل سەر دەولەت بونا کوردی ب سەرکێشیا هێزێن ئەڤرو هەین تەنها ئاخفتنە ژبو خاپاندنا گەلێ کورد، لێ سەرەرای ڤێ چەندێ نابیت یاری بێنە کرن ب پیروزترین و بلندترین ئارمانجا گەلێ کورد. پشتی ڤێ هەلو مەرجا دوماهیێ ل باشورێ کوردستانێ ئەوا هندەک ژێرا دبێژن کێشا هەولێر- بەغدا سەرکردێن باشورێ کوردستانێ چ مایە ددەست دا بکار بینن پشتی فیشەکا دەولەتێ چریک دەرکەفتی. ئەرێ گەلو مادەم مە بخوە دزانی فیشەکا مەیا چریکە بوچی مە ئاشکرا کر؟ ئەم هەمی دزانین کو ئەڤرو ل باشورێ کوردستانێ یەکگرتنەک و یەک کارکرنەک لسەر چ پرسا نینە لناڤبەرا چ هێزێن کوردیدا، سەروکاتیا هەرێمێ، حوکمەت، پەرلەمان، ئوپوزسیۆن، پەرلەمانتارێن بەغدا، ئەندامێن حوکمەتا بەغدا، سەرۆک کومارێ عیراقێ کو کوردە، چ جارا د چپرسادا دوو لایەنا یەک هەلویست نەبویە، هەر یەک ئاوازەکی دخوینیت، هندەک جارا مروڤ دکەڤیتە گومانێ کو ئەڤە هەمی ل وەلاتەکی دژین.

یەک ژ گرفتاریێن هەرێن بەرچاڤ بو هەر تاکە کەسێ کورد، ڤەگەراندنا نەچارەسەرکرنا پرسێن هەلاویستی ببەغدارا بو هەلویستێ کەسێ سەرۆک وەزیر. کوردا گەلەک هەولدان و دڤان هەولدانادا گەلەک تشت ژ دەست دان هەیا ئیبراهیم جەعفەری گوهارتین ب مالکی یێ ئەڤرو. سەرکردایەتیا کوردی ب رەنگەکێ گشتی ئەڤە ب سەرکەفتنەک مەزن بو خوە نیشادا و جارەک دی هەولدا نیشا بدەت کو هێشتا خوەدی کارتێکرنەک مەزنە لسەر بریارا ناڤەندێ ل بەغدا. گومان تێدا نینە کو کارین جەعفەری بگهورن لێ ڤا ئەم کەتینە سالا هەفتێ ژ دانانا مالکی بێی کو ئەم پێنگاڤەکێ د چارەسەرکرنا پرسەکێ دا بچینە پێش. ئەڤ پێشوازییا ل موقتەدا سەدر هاتی کرن هەمان دیمەنێن سەردەمێ جەعفەری ببیرتینە، جارەک پرسا روژەڤێ ، کەنگی سەرکردایەتیا کوردی دێ تێگەهیت کو پرسا مە نە بکەسا رایە بەلکو پرسا بەری لگەل خەلکێ دی بیت لگەل نەبونا زەلال بونا مەیە د داخوازێن مەدا. پر گرەنگە ئەم د زەلال بین د داخوازێن خوەدا، خەلکێ مە ئاگاهداربیت ل سەر هەمی رێکەفتنا، گەنگەشە هەبیت ل سەر هەمی پرس و رێکەفتنا لگەل هەمی لایەنێن عیراقی و نێڤنەتەوی. گرنگە چ کەس یان هێز چ هەلویستا نیشانەدەن ب سەرێ خوە ل سەر پرسێن چارەنوس ساز چونکی هەیا ئەڤرو مە چ دەستور نینن کو رەنگەکێ ئاشکرا کارێ تایێن جودایێن دەستهەلاتێ نیشان بدەت، لەوما دڤێت هەر کارەک ب ئاگادریا هەمی لایەنێن پەیوەندیدار را بێتە گەنگەشە کرن.

‎لدور Malame

Check Also

ئه‌م دژین یان ئه‌م هه‌ینه‌؟

د. شه‌عبان مزوری پرسا هه‌بون و ژیانێ براستی بو من ڤه‌دگه‌ریت بو سه‌ره‌تا هاتنا من …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.