بایكوتا به‌رهه‌مێ نه‌یارا سه‌رخوه‌بونه‌

د. شه‌عبان مزوری
بهێرشكرنا ده‌وله‌تا تورك و هه‌ڤالبه‌ندێن وێ ژ هه‌می رێكخستنێن ته‌روریستیێن ئیسلامی بپێشه‌نگیا بزاڤا برایێن موسلمان بو سه‌ر ڕۆژئاڤایێ كوردستانێ جیهان بو دو به‌ش، به‌شه‌ك پر كێم هه‌ڤسوزی و پالپشتیا خوه‌ بو ده‌وله‌تا تورك راگه‌هاند كو نابیته‌ ٢% ژ هه‌ژمارا مروڤێن سه‌ر رویێ دونیایێ، به‌شێ دن د ئاستێن جودا و كارڤه‌دانێن جودا دا پشگرتیا خوه‌ بو رۆژ ئاڤا راگه‌هاند. بڤی ره‌نگێ ده‌وله‌تا تورك لسه‌ر ئاستێ جیهانی ڤان رۆژا هاتی رسواكرن بێ نمونه‌یه‌، هه‌یا رژێما ئه‌پارتاید لباشورێ ئه‌فریقا بڤی ره‌نگی نه‌هات بو رسواكرن. دده‌مه‌كیدا ئه‌ڤ كارڤه‌دانێن جودا ل جیهانێ كورد نه‌چار كرن كو دڤێت پتر ژ هه‌ركه‌سه‌ك دن لخوه‌ خوه‌دان ده‌ركه‌ڤن.
بموخابنیڤه‌ دبێژم سالانه‌ ئه‌م كورد داخواز ژ خه‌لكێ بیانی دكین كو بایكوتا توریسما توركی بكه‌ن لێ ژمارا توریستێن كورد بو توركی ژ دیاسپورا و ناڤا كوردستانێ به‌ر بزۆریێ دچو. دده‌مه‌كیدا مه‌ داخواز ژ خه‌لكێ بیانی دكر بایكوتا كالایێن توركی بكه‌ن. ژمارا بازرگانێن كورد یێن كرین و فروتن بكالایێن توركی دكرن لدیاسپورا و كوردستانێ ( مه‌به‌ستا من هه‌ر چوار پارچه‌نه‌ ) به‌ره‌ف زۆربون دچون. بمن ئه‌ڤه‌ بخوه‌ سه‌رئه‌نجاما ساویلكاتیا مه‌یه‌ نه ‌دورویا مه‌یه‌، چونكه‌ گه‌له‌ك جاران دورویاتی نیشانا ژیریێ یه‌.
هه‌ر ژ راگه‌هاندنا هه‌لمه‌تا بایكوتا كالایێن توركی هه‌یا رۆژا ئه‌ڤرۆ مه‌ خه‌لكانه‌ك هه‌یه‌ كو دارده‌ستێن نه‌یارانه‌ هه‌می پێكول و هه‌ولێن خوه‌ دده‌ن ژبو خه‌لكی بێ ئومێد بكه‌ن، لژێر ناڤێ بایكوت بێ ئه‌نجامه‌. به‌رسڤ بو ڤان توخمه‌ كه‌سان ئاسانه‌، ئه‌گه‌ر بایكوت بێ ئه‌نجام بیت بو هون لسه‌ر دئاخڤن، بلا بو وه‌ خه‌منه‌بیت، خوه‌ مالا خوه‌ بێ ده‌نگكه‌ن. ژ خوه‌ كارتێكرن یان كارتێنه‌كرن وێ دده‌مه‌ك زودا زه‌لال به‌. ئه‌م دێ بینین دناڤا دو مه‌هان دا كانێ ژمارا ده‌رفه‌تێن كاری ل توركی وێ بده‌یان هه‌زارا پتر به‌ یانژی وێ بده‌یان هه‌زارا خه‌لكێ توركی بێكار بمینه‌ و سه‌رئه‌نجام وێ ببه‌ كریسه‌ك ئابوری. ئه‌گه‌ر ته‌نها كوردێن لده‌رڤه‌ی كوردستانێ دژین بایكوتا كالایێن توركی بكه‌ن وێ بهه‌زارا فابریكێن توركا ژ كاربێخن و ملله‌تێ تورك ملكه‌چ كه‌ن كو فشارێ بینه‌ سه‌ر ده‌وله‌تا خوه‌ ژبو بدوماهیك ئینانا دژاتیا تورك و ده‌وله‌تا توركا بو مروڤێ كورد.
لسالا ١٩٢٠ رێبه‌رێ بزاڤا ئادیخوازا هندێ گاندی رستا خوه‌یا بناڤ و ده‌نگ گوت ( ته‌ڤن رێسێ خوه‌ راكه‌ و بده‌ دویف من )، وێ سه‌رده‌مێ‌ مونوپولا ئنگلیزا لسه‌ر هه‌می به‌رهه‌مێ په‌مبیێ هه‌ندێ هه‌بو، په‌مبی بئه‌رزانی ژ جوتیارێن هندی دكرین، ڤه‌دگوهاست بو ئنگلته‌را، پاشان دكه‌ره‌ جلوبه‌رگ و ب بوهایه‌ك گران دفروشته‌ هه‌مان خه‌لكێ هندێ. گاندی بریاردا بایكوتا جل و به‌رگێن ئنگلیزی بكه‌ت، بملیونا خه‌لكێ هندێ لسه‌ر رێكا وی چون، سه‌رئه‌نجام به‌رهه‌مهێنه‌رێن جلوبه‌رگا ل ئنگلیزی زیانه‌ك زۆر مه‌زن ڤێ كه‌فت. ل سالا ١٩٣١ گاندی ئنگلیز مه‌نده‌هوشكرن، لده‌مه‌كی ئنگلیزی خوێ ببوهایه‌ك پر گران دفروت خه‌لكێ هندێ، گاندی لگه‌ل ژماره‌ك ژ هه‌ڤالێن خوه‌ به‌رێ خوه‌دان ده‌ریایێ و بده‌ستێ خوه‌ خوێ ده‌رئانی. ئه‌ڤه بو گورزه‌ك دن ل ئنگلیزا وه‌شاندی پشتی جلوبه‌رگا‌. وه‌ك ئه‌م هه‌می دوزانین ل دوماهیێ گاندی بانگ لخه‌لكێ خوه‌كر كو بایكوتا هه‌می تشته‌كێ ئنگلیزی بكه‌ن، ئه‌ڤ هه‌لویسته‌ بو ئه‌گه‌را تێكدانا ئابوریا ئنگلیزی و پشتی ئنگلیز بوینه‌ قه‌ردارێن چه‌ند وه‌لاتا نه‌چار بون سالا ١٩٤٧ ژ هندێ ده‌ركه‌ڤن و خه‌لكێ هندێ گه‌هشت سه‌رخوه‌بونا خوه‌.
بمن بایكوت دڤێت سێ قوناغا بخوه‌ڤه‌ بگریت ژبو ئه‌م بگه‌هین ئارمانجا خوه‌.
یه‌كه‌مین قوناغ ئه‌ڤا نوكه‌ ئه‌م تێدا ده‌رباسدبین ئه‌وژی پێكهاتیه ژ بایكوتكرنا كالایێن توركی. ئانكو دڤێت ئه‌م هه‌ولدین خه‌لك كالایێن توركی نه‌كریت.
دویه‌مین دڤێت ئه‌م هه‌ولدین بایكوتا هه‌می جهێن كالایێن توركی‌ دفروشن یانژی بكار دبه‌ن ( وه‌ك خوارنگه‌ها، هوتێلا، سه‌رتراشا…… هتد).
سێیه‌مین قوناغ بایكوتكرنا وان كه‌سا بكین ئه‌وێن به‌رهه‌مێن توركی دكرن.
ئه‌گه‌ر١٠ ملیون كورد به‌شداری هه‌لمه‌ت بڤی ره‌نگی ببیت د سه‌رده‌ما گلوبالیزمێ دا ئه‌م بكێمتر ژ ١٠ سالێن دن وێ ده‌وله‌تا تورك نه‌چاركه‌ین ژ خاكا مه‌ ده‌ركه‌ڤیت.
بكورتی و بكوردی دبێژم رومه‌تا نیشتیمانپه‌روه‌ریێ ئه‌وه‌ مروڤ مرنێ لخوه‌ مێڤان كه‌ت لجهێ رۆژه‌ك ژ ژیێ خوه‌ درێژ كه‌ت‌ بخوارنه‌ك یان كالایه‌ك نه‌یارێ خوه‌.

‎لدور Malame

Check Also

ئەزموناروژئاڤایێ کوردستانێ مودێلەك خورێڤە برنا مودێرنە زور گرنگە

به‌ختیار عەلی. رومان نڤیس و نڤیسکارێ دیارێ باشورێ کوردستانێ دبێژیت ئەزموناروژئاڤایێ کوردستانێ مودێلەك خورێڤە برنا …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.