بلا گاورێ دادپه‌روه‌ر بیت نه‌ بوسلمانێ سته‌مكار بیت

ردوان گولی ـ سوید

ئێك ژ بنه‌مایێت هه‌ره‌مه‌زن و گرنگ د ئایینێ ئیسلامێدا دادپه‌روه‌ریه‌. خودایێ مه‌زن و دلوڤان فه‌رمان یا ب ڤێ جه‌ندێ كری هه‌روه‌كی قورئانا پیروز ب چه‌ندین ئایه‌تان ئاماژه‌ ب ڤی بابه‌تی دای و هنارتنا قاسدان ژ ده‌ڤ خودێ بو خه‌لكی هه‌ر بو ڤێ مه‌ره‌مێ بوویه‌ (( ڵقَدْ أَرْسَلْنَا رُسُڵنَا بِالْبَیِّنَاتِ ۆأَنزَلْنَا مَعَهُمُ الْكِتَابَ ۆالْمِیزَانَ لِێقُومَ النَّاسُ بِالْقِسْط ۆأَنزَلْنَا الْحَدِیدَ فِیهِ بَأْسٌ شَدِیدٌ ۆمَنَافِعُ لِلنَّاسِ)). (( إِنَّ اللّهَ ێأْمُرُكُمْ أَن تُۆدُّواْ الأَمَانَاتِ إِڵى أَهْلِهَا ۆإِذا حَكَمْتُم بَیْنَ النَّاسِ أَن تَحْكُمُواْ بِالْعَدْلِ)). پێغه‌مبه‌رێ خوشتڤی (سلاڤێت خودێ ل سه‌ر بن) د گه‌له‌ك فه‌رمودێت خو دا ئاماژه‌ ب چه‌مكێ دادپه‌روه‌ریێ كریه‌: “سبعه‌ یظلهم الله فی ظله یوم لاظل إلا ظله: ئیمامێ دادپه‌روه‌ر ئێك ژ وان كه‌سانه‌ یێت ل روژا قیامه‌تێ بچیت بن سیبه‌را عه‌رشێ خودایێ مه‌زن. و ئه‌وێت دگه‌ل مروڤان دادیێ دكه‌ن دێ ل سه‌ر مینبه‌رێت روناهیێ بن ل قیامه‌تێ. به‌لێ جهێ داخێیه‌ ل ده‌ڤ مه‌ بوسولمانان یان خه‌لكێ ده‌ڤه‌را روژهه‌لاتا ناڤه‌راست ب شێوه‌كێ گشتی دوریشمێت جوان و قه‌شه‌نگ هه‌نه‌ ل سه‌ر دادپه‌روه‌ری و یاسایێ و مروڤایه‌تیێ، به‌لێ ئاریشه‌ ئه‌وه‌ ئه‌ڤ دوریشمه‌ نابنه‌ بریار و پاشی ببن كریار و بێنه‌ په‌یره‌وكرن د ناڤ جڤاكیدا، ل روژئاڤا دبیت زور دوریشمێت زیقزیقوك نه‌بن و خه‌لك پێ بێته‌ خاپاندن، به‌لێ په‌یره‌وكرنا ئه‌و زاراڤێت ئه‌م بكاردئینین یا به‌رچاڤه‌ د ناڤ جڤاكێ روژئاڤادا. بو نمونه‌: ده‌مێ ل سوید دبێژن یاسا سه‌روه‌ره‌، بو خه‌لكی هه‌میێ سه‌ره‌وره‌، نه‌ هنده‌ك كه‌س ژ یاسایێ زور مه‌زنتر و ب هێزترن، ده‌مێ مروڤ دچیت فه‌رمانگه‌هه‌كا میری هه‌می مروڤ وه‌كی دهێنه‌ گازیكرن و ل دویڤ ئێك بێى كو ئه‌ڤه‌ به‌رپرسه‌ یان كورێ ویه‌ یان ئاغایه‌ و…. هتد. به‌روڤاژی كوردستانێ ده‌مێ خه‌لك ژ ئه‌وروپا دهێت بو سه‌ره‌دانا كه‌س و كارێت خو دێ بێژنێ دێ وه‌رن هوین یێ ژ ناڤ كافران هاتین و ئه‌و نه‌ جهێ بوسلمانایه‌!
ب راستی ئه‌گه‌ر مروڤ نێرینه‌كێ ل سه‌ر ژیانا پێغه‌مبه‌رێ خوشتڤی (سلاڤێت خودێ ل سه‌ر بن) ئه‌ز باوه‌ر ناكه‌م هیج تشته‌ك مابیت بو مه‌ خویا نه‌كر بیت. ل سالا پێنجێ ژ پێغه‌مبه‌راتیێ ده‌مێ ئه‌شكه‌نجه‌دانا بوسلمانان زێده‌ بووی ل سه‌ر ده‌ستێ گاوران پێغه‌مبه‌ر (سلاڤێت خودێ ل سه‌ر بن) فه‌رمان ل وان كر كو مشه‌خت ببن و به‌رب وه‌لاتێ حه‌به‌شیێڤه‌ بچن و گوت: هه‌رن حه‌به‌شێ چونكى شاهێ وێ سته‌مكاریێ ل كه‌سێ ناكه‌ت. زانایێ كوردێ ناڤدار ئبن ته‌یمیه‌ ل سالا 661 مشه‌ختی هاتیه‌ سه‌ر دنیایێ و به‌رنیاسه‌ ب شیخێ ئیسلامێ، كه‌سه‌كی پسیاره‌ك ژێ كر كو ئه‌رێ باشتره‌ مروڤ ل بن سیبه‌را گاوره‌كێ دادپه‌روه‌ر بژیت، یان بوسلمانه‌كێ سته‌مكار؟! گوت: مروڤ ل بن سیبه‌را گاوره‌كێ دادپه‌روه‌ر بژیت باشتره‌، چونكى گاوری و بێدینیا وی هه‌ر بو ویه‌، به‌لێ دادپه‌روه‌ریا وی بو منه‌. و بوسلمانێ سته‌مكار سته‌م و زورداریا وی بو منه‌ و نڤێژ و په‌رستنا وی هه‌ر بو ویه‌.
ل كوردستانێ به‌ری بێم ئه‌وروپا چه‌ندین جاران هاتم گرتن و دگوت: نابیت تو ده‌رسان ل مزگه‌فتێ بێژیه‌ زاروكان، به‌لێ پشتی ئه‌ز هاتیم سوید ده‌مێ ئه‌ز ده‌رسان دبێژمه‌ زاروكان ل مزگه‌فتێ، پاره‌یان ژى دده‌ن و ئه‌و سوپاسیا من ژی دكه‌ن به‌روڤاژی وه‌لاتێ بوسلمانان! هه‌ر جهه‌كێ ل جیهانێ ئازادی و دادپه‌روه‌ری هه‌بیت ئه‌و باشترین نشتیمانه‌ و هه‌ژی ئاكنجیبوونێیه‌.

‎لدور مالا مه‌

Check Also

10: PIECES OF WISDOM FROM CUNFUCIUC ١٠ رستێن دێرین ژ فه‌لسه‌فا كونفویسمێ

  1- IT DOESNOT MATTER HOW SLOW YUO GO AS ALONG AS YOU NOT STOP. …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.