جەمیل محو .. (سکرتێرێ گشتى یێ پارتا دیموکراتییا کوردى ل لبنانێ) چار سال د زیندانا بارزانیدا

باشور

04-06-2011
بیرهاتیێن من دناڤ زیندانێن شورشا کوردى؛ ئەڤە ناڤ ونیشانێن پەرتوکەکێنە کو نێزیک بیست وحەفت سالە هاتیە وەشاندن و ل کوردستانێ ژى هاتیە قەدەغە کرن.
نڤیسەرێ ڤێ پەرتوکێ چیروکا گرتنا خۆ ب هەمى هویریاتى و کوریاتى ڤەدگێریت، جەمیل محو رێبەر ودامەزرێنەرێ پارتیا دیموکراتییا کوردى یە ل ولاتێ لبنانێ روژەکێ هزرنەدکر کو دێ بدەستێ خوشتڤى ترین کەس (مەلا مستەفا بارزانى) ژئالیێ وى هێتە دەستبسەرکرن بو دەمێ چارسالا.
مەلا مستەفا بارزانى ل سالا 1971 هەیا سالا 1975 ئەمرێ دەستبسەرگرتنا جەمیل محو ددەت، وپشتى چار ساڵ زیندانى دەرگەهێ زیندانێ ب رویێ ویدا ڤەدکەن ودان ب شاشیا خو دنێن کو ب نەدروست لێ تێگەهشتینە.
سکرتێرێ گشتى یێ پارتا دیموکراتییا کوردێن لبنانێ پشتى کو چار جاران سەرەدانا باشورێ کوردستانێ دکەت وب مەرەما خورتکرنا پەیوەندییان دگەل رێبەرێن شورشێ وتێکەلیێ دگەل مەلا مستەفایێ بارزانى، بو سەرەدانا چارێ چارەنڤیسێ خۆ دزیندانێن بارزانیدا دبینیت، بێ کو ئەو توهمەتا بو دروستکرین ل سەر ساخ ببیت.
ل سالا 1971 جەمیل محو ل دەڤەرا ناڤ پردان نێزیک حاجى ئومەران کو وى دەمى بارەگایێ سەرەکى یێ مەکتەبا سیاسى یا پارتى دیموکراتى کوردستان ب سەروکاتیا مەلا مسەفا بارزانى ل ور بوو، بو ئێکەم جار هاتە دەستبسەر گرتن، ئێدى ل وێرێ بەرەف زیندانێن خەلان و رایات، چار سال ژ ژیێ خۆ بوراندن دگەل هەمى جورێن ئەزیەت ولێدانان بدەستێن کادرێن دەزگەهێ پاراستنا پارتى.
ئێکەم هەڤرکى دکونگرێ هەشتدا
محو دپەرتوکا خۆدا ئیماژێ ب وێ چەندێ دکەت کو ئێکەم ناکوکى چاوا دروست بوو دناڤبەرا خۆدا دگەل قیادا مەکتەب سیاسیا پارتى ودبێژیت “پشتى من دو جارا سەرەدانا باشورێ کوردستانێ کر وچومە دەف مەلا مستەفا بارزانى من دیت کو هندەک کەسێن نەهەژى ل دور مەلا مستەفا کومبوینە، وشورشا کوردى بو مەرەما خۆ یا کەسەکى بکاردینن، من بریاردا هەلویستى وەرگرم، هەتا ئەوبو کو کونگرا هەشتێ یا پارتى دیموکراتى کوردستان هاتیە بەستن ل ناڤپردان و ئەز ژى وەکى کەسایەتیەکێ سیاسى ونونەرێ کوردێن لبنانێ داخازکربیم ودرێورەسماندا من گوتارا خو خواند ومن تێدا هێرش کرە سەر هندەک رێبەرێن شورشێ نەخاسمە ێن مەکتەبا سیاسى، کو دڤێت بهێنە دویرئێخستن دناڤ رێزێن شورشێدا، لێ ئەڤێ گوتارێ کاریگەریا خۆ هەبوو ژبوى دروستکرنا پلانەکێ ژئالیێ چەند ئەندامەکێن مەکتەبا سیاسى دژى من ژوانا(حەبیب کریم، محمود عسمان، سامى محمود، دارا توفیق، عزیز عقراوى،…هتد) ودئەنجامدا پلانا وان سەرگرت وئەز هاتمە زیندانیکرن بو چار سالان”.
جەمیل محو رەخنێ ل ئیدریس بارزانى دگریت کو مەرج بو گوتارا وى دانابوون بو گونگرا هەشتا پارتى، دڤێ دەربارێدا دنڤیسیت “بەرى کو ئەز بچمە دهولا کونگریڤە ئدریس بارزانى هاتە دەف من و گوت؛ نابیت تو هێرشێ بکەیە سەر حزبا بەعس چونکى مە شاندێ وان دگونگرێدا مێڤان کرینە، لێ من قەناعەت پێ نەهات ومن یا خۆ کر یا من باوەرى پێ دهات “.
ئەڤە دەستپێکا هەڤرکیا من بو دگەل سەرێن شورشا کوردى بەلێ هەر دیسان دەستپێکەک ژى بو بو کێمکرنا هەیبەتا من وبکارئینان پارتا من ل لبنانێ بو مەرەمێن خۆ”.
سکرتێرێ پارتا دیموکراتا کوردێن لبنانێ، ب ئاشکەرایى وراشکاوى باسى تورەبونا مەلا مستەفایێ بارزانى و هەردوو کورێن وى (مسعود و ئیدریس) ى دکەت ژبەرکو وى نەڤیایە ببیتە بەشەک ژئەجندا بو پلانێن کەسوکیێن وان، هەر دڤێ ئێکێدا دنڤیسیت “مەلا مستەفا بارزانى پشتى کو زانى من قەناعەتەکا مەزن پێ هەیە دڤییا دەستێن خۆ دکاروبارێن حزبا مە ل لبنانێ وەردەت بیێ کو گوه بدەتە تایبەتمەندیێن شورشا کوردى ژلبنانێ، بو ڤى َ چەندێ ژى دڤیا دوو سێ کوردێن سوریایێ بکەتە ئەندامێن جڤاتا سەرکردایەتیا پارتا دیموکراتییا کوردێن لبنانێ ددەمەکیدا کو دەستورێ لبنانێ رێ نادەت کەسێن ژلبنانێ نەبن ریڤەبەراتیا سیاسەتا حزبێن وێ بکەت”
ناڤبرى د پەرتوکا خۆدا برونى باسى ماندى بوونا خۆ دکەت دسەخمەراتى شورشا کوردیدا، بتایبەت کو پردەک بویە دناڤبەرا دەولەتێن ئەوروپى ومەلا مستەفا بارزانیدا، هەر ژبەر ڤێ یەکێ جارەکێ ل سالا 1962هاتیە گرتن و لێدان.
د لاپەرێن دیتردا نڤیسەر باسى ململانا دناڤبەرا مەلا مستەفا بارزانى دگەل بالێ ژێک ڤەبوویێ پارتا وى دکەت کو پێک هاتبوون ژ ئیبراهیم ئەحمەد ومام جەلال و…هتد کو ئەڤێن دوویێ نەرینەکا مارکسى هەبویە وبالێ مەلا مستەفاى ژى نەرینەکا ناسونالستى، کو هەر ئێکى دخواست کوردێن پارچێن دیێن کوردستانێ ژبوى مەرامێن خۆ بکاربینن.
ل باکورێ کوردستانێ سەعید ئالتى ژناڤبرن وشونا وى دکتور شڤان دانا ول روژئاڤایێ کوردستانێ دەهام میرو دانا وسەلاح بەدرەدین وموحەمەد نایو وجگەر خوین گرتن وهەر کەس ل گور سیاسەتا وان نە لڤیبا ژناڤ دبرن ویان دور دئێخستن.
ململانا مەلا مستەفا وعوبەیدوللایێ کور
جەمیل محو سکرتێرێ پارتیا کوردى ل لبنانێ ب رونى باسى پلانا سەرکردایەتیا پارتى دیموکراتى کوردستان دکەت کو چاوا هاتیە گرتن ول سەر چ هاتیە گرتن.
دنڤیسیت” پشتى کو داخازنامەک ژ ئالیێ مەلا مستەفا بارزانى بو دهێت کو بو کارەکێ پێدڤى سەرەدانا باشورێ کوردستانێ بکەت ل عیراقێ، من خۆ بەرهەڤکر و بریێا بەغدادێ هاتمە کوردستانێ، لێ پێشوازى مینا بەرێ بگەرمى ژمن نەهاتەکرن و من نەزانى سەدەم چنە!؟.. پشتى دوو سێ روژا چاڤەرێ بووم هەتا روژەکێ مەسعود بارزانى وئیدریسێ برایێ وى هاتنە دەف من گوتنە من تە چ پەیوەندى ببرایێ مەیێ مەزن ڤە هەنە (عوبەیدوللا) ى ..!؟
من ژى دبەرسڤدا گوت چاوا من پەیوەندى بوەرا هەنا وەسا ژى من پەیوەندى ب عوبەیدولایێ برایێ وەهەنە لێ زێدەتر پەیوەندیێن مە دکەسەکینە نەک سیاسى..
ئینا گوتنە من تو دزانى برایێ مەیێ مەزن دژى مە کاردکەت بویە مەدەست بسەرکریە ..؟! ..( ئەڤ پسیارە بو من یا حێبەتى بوو) من ژى دبەرسڤدا گوت من چ هاژ ڤێ سوحبەتێ نینە وئەڤێ پەیوەندى ب ململانا ناڤخۆیى هەیە ومن مایتێکرن نینە.
پشتى دانو ستاندنا مە مەلا مستەفا هات ب تورەیى گەف ژمن کرن کو دێ من گوژیت ژبەرکو من پەیوەندى بە عوبەیدولایێ کورێ وى هەبوونە .. من ژى ب ویژدان بەرسڤێن خودان و من نیەتا خۆ بو شروڤە کر لێ وى گوت ئەم ژتە قەبیل ناکەین تو بریارێن شورشا کوردى بن پێ دکەى.
پشتى دوو دەمژمێرا بریاردا من بکەتە زیندانێ ڤە وهەتا چار سالا ئەز زینانکرم ب سەدەما گومانا پەیوەندییا دناڤبەرا من و کورێ خۆ ،
بەلێ چەند روژەک نەبورین عوبەیدولا شیا هەڤسوزێن خو رازى بکەت دەرگەهێن زیندانێ بو ڤە بکەن وپلانا وى بسەر کەت ودگەل زەلام وهەڤسوزێن خۆ قەستا گوندێ بارزان کرن و خۆ ژدەستێ باڤێ خۆ رزگار کر و ئەز مام دزیندانێ ڤە”.
دناڤەروکا پەرتوکاخۆدا جەمیل محو دنڤیسیت؛ پشتى حزبا مە ل لبنانێ زانى کو ئەز ب ناهەقى هاتیمە گرتن د روژناما دەنگێ کوردان کو زمانحالا پارتا دیموکراتا کوردێن لبنانى بوو پروتەستویا ئەڤ کارێ مەلا مستەفاى کرن ودژى ڤێ چەندێ بەیاننامەک دەرئێخستن ، لێ وان نەزانى کو گڤاشتن وئەزییەتدان ل سەر من زێدەبوون.
هەیام هاتن وچوون ئەز مام دزیندانا بارزانى ڤە هەتا روژەکێ کور وبرایێ من ل دوف هەوارامن هاتن لێ بداخباریڤە ئەو هەردوو ژئالیێ مەسعود بارزانى ڤە هاتن دەست بسەر کرن ومەرجەک بو ئازادبوونا وان برویێ مندا دانان: ئەو ژى کو ئەز رونکرنەکێ ل سەر رونکرنا پارتا مە بدەم ل لبنانێ کو تێدا هەڤالێن مە ئیدانا گرتنا من کربوون ودڤێت ئەز ژى ئیدانا وى کارى بکم ودروژناما حزبا خوەدا بەلاڤبکم هەتا براو کورێ من ئازاد بکەن..!!
سەرهاتیێن زیندانێ
جەمیل محو کو کوردێ برەسەنێ لبنانێ یە دماوێ چار سالییا زیندان کرنا خۆدا ل دەڤەرا چومان وحاجى ئومەراندا باسى هویرکاریێن ئەززیەتدان وهەڤالێن خۆ دکەت کو ژئالیێ زەلامێن مەسعود وئدریسى روب بروى هەمى کارێن نەخاستى ولێدانا بویە، ژ زیندانێن خەلان وناڤپردان وقەسرێ وهەتا زیندانا رەش یا بەرنیاس ب رایات کو چ کەس ژێ ئازادنەبوینە، ڤەدگێریت “هەر کەسێ بوچونەکا نەوەکى سیاسەتا مەلا مستەفا وکورێن وى ومەکتەبا سیاسیا پارتى هەبانە خۆ دزیندانێ ڤە ددیت، میناک مالباتا حەمەد ئاغایێ مێرگەسورى وفاخرو برایێن وى بەرچاڤترین نمونەیێن ڤێ زوردارێ بوون، من جارا ئێکێ فاخر مێر گەسورى ل زیندانا رایات دیت بگرنژى گوتەمن: تو باوەردکەى قەترەکا دیموکراتیەتێ ل جەم ڤانا هەبیت..؟!!.
جەمیل محو شاهەدییا مێرخاسیا مالباتا فاخر ئاغاى ددەت وبێژیت شەهید کرن وگولە بارانکرنا ڤێ مالباتێ پەلەکا رەش بوو بو رێبەرێن شورشا کوردى ل باشورێ کوردستانێ وباسى تیرورکرنا قەیسەرى دکەت ب دەستێن پاراستنێ کو سکرتێرێ عوبەیدولا بارزانى بوو.
ددرێژییا نڤیسیناخۆەدا دبینین” گەلەک سەیر بوو کەس هەبوون ل زیندانێ لسەر ا مەشروب ڤەخارنێ هاتبوون گرتن لێ بداخەکا زور ب شەڤێ من چەند جاران دیتییە رێبەرێن شورشێ بخۆ مەشروب ڤەخارینە ب کوم..؟؟!!”
پشتى ئازاد بووى
محو دبێژیت “من ب گونەهەکا مەزن دیت ئەز بیرهاتنێن خۆ بەلاڤنەکەم پشتى کو ئەز بن دەستێ ڤان مروڤان دەرکەتم، من بفەر زانى بیرهاتنێن خۆ ب ساهى بنڤیسم وبو نڤشێ داهاتى وپەردەى ل سەر فەزاحەتا رێبەرێن شورشا کوردى هەلدەم کو چەند بینە جهێ دەردەسەرییا مللەتێ کورد هەتا شکەستا شورشێ ل سالا 1975”.
دپەرتوکا خویا نێزیک ژ سێ سەد لاپەریدا جەمیل محو چەندین وێنێن شورشا کوردى وکەسایەتێن سیاسى بەلاڤکرینە کو ئەوژى بقاس خۆ سامانەکن بو بیرهاتى ونڤشێ نوى، دبەرپەرێن دوماهیکێدا جەمیل محو باسى رزگاربوونا خۆ پشتى چار سالان دکەت “ل سالا 1975 رێکەفتنناما جەزائیر هاتە مورکرن دناڤبەرا شاهێ ئیرانێ وسەدام حسێنى وشورشا کوردى شکەست ئینا، وى دەمى ئەز ل زیندانا رایات دەستبسەرگرتى بووم، من دیت هەمى زێرەڤانا چەکێ خۆ فرەدا وچوون بەرەف ئیرانێ وئەز ژى تا رەزایێ ژئالیێ زەلامێن مەسعود بارزانى ڤە دگەل هزاران مالباتێن کوردان کەفتینە رێ و من بخۆە دیت سەرکردایەتیا پارتى وهەمى پێشمەرگەى چاوا چەکێ خوە دانەڤ پاسدارێن ئیرانى وپشتى من مەسعود بارزانى دیتى داخازا لێبورینێ ژمن کر وگوت هندەکا پێزانینێن شاش دابونە مە لسەر تە بویە مە تو گرتى وگوت ؛هەرە مە تو ئازادکرى لێ ئەگەر مخابراتا ئیرانێ تو گرتى نەبێژێ مەلا مستەفاى ورێبەرێن شورشێ ئەز گرتبووم..؟!!
ئەز ژى بدەردەسەر ى گەهشتمە تارانێ هەتا من قونسلخانا لبنان دیت ولوێرێ بگەرمى پێشوازییا من کرن وئەز برێ کرم بو وەلاتێ خۆە ودئاهەنگەکا جەماوەرییا بەرفرەهدا ئەز گەهشتمە دناڤ رێزێن پارت وولات ومالباتا خۆە”.
ئەوا ژ هەمیا سەیر وحێبەتى تر ئەڤ پەرتوکە کو ژسالا 1982 هاتیە وەشاندن ول سالا 1975 ژى هاتیە نڤیسین لێ دبەرپەرێن داویێ دا ب چەند رێزەکا جەمیل محو دەربرینێ ژشورشا راستەقینا کوردى دکەت کو رێک دگەل کەتوارێ نها دگونجیت، ئەو ژى” ب باوەریا من چ شورشێن کوردى سەرناگرن هەتا کو ئەڤ تاخمێ مروڤان سەرکێشایا ئینسانێ کورد بکەن، و وى دەمى دێ شورشا سەرگریت کو؛ تەخەکا گەنجان دروست ببیت کو باوەرى ببنەمایێن دیموکراسیەتێ ودادپەروەریێ هەبیتن شورشێ ئێکەم جار دژى ڤان رێبەرێن شکەست خارى بکەن وژناڤ ببەن”.

‎لدور مالا مه‌

Check Also

10: PIECES OF WISDOM FROM CUNFUCIUC ١٠ رستێن دێرین ژ فه‌لسه‌فا كونفویسمێ

  1- IT DOESNOT MATTER HOW SLOW YUO GO AS ALONG AS YOU NOT STOP. …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.