سەرهەلدانا ١٧ شواتێ ل ناڤبەرا گورزێ دەسهەلاتا میلیشیا و ئوپوزسیونەکا ترسۆنەک

17 shubat

د. شه‌عبان مزوری

بایێ گۆهارتنا هەرچەندە ئەو چەند سال بو لدەڤەرێن جودایێن جیهانێ دەستپێکربو و ڤان سەرهەلدانێن گەلێری هەرچەندە سەلماندبو کو چکەس هندی هێز و سەرما هەبیت خوە لبەر پێلێن گەل ناراگریت. ئەڤا ئەم دبێژینێ شەپولێن گوهارتنێ ژ وەلاتێن کەڤنە سوڤیەتێ دەستپێکرن، ئوکرانیا، جورجیا، قرقیزیا. تایبەت مەندیەک مەزن یا ڤان وەلاتا هەیە ئەوژی.. رێبەرێن ڤان وەلاتا میراتگرێن سامان، لەشکەر و مافیایێن پارتا کومونیستا سوڤیەت بون، بکورتی دکتاتورێن ژخوە باوەر بون چجارا نەدکەتە هزرا وان کو کەس هەبن خوە بەر هێزا وان بگرن، لێ وەک هەرکەسەکێ ترسینوک مێرخاسیا خوە د پاتەخورێن لدەور و بەرا خوە ددیتن. پشتی هەرفاندنا ڤان سەنەما و دچەرخێ گلوبالیزمێ دا، تازا فەلسەفا هێزا گەل هێزا هەرا مەزنە کەفتە دقادێدا. ئەڤ شەپولە هێدی بەرەڤ رۆژهەلاتا ناڤین و ئەفریقیا چو، دەرکرنا لەشکەرێ سوری ژ لوبنان سەرئەنجاما سەرهەلدانا پرانیا گەلێ لوبنان بو.

دەما بن عەلیکێ تونس رەڤی من نڤیسیبو کو ئەڤە دەستپێکا هەرفاندن و نەما هەمی بن عەلیکایە ل هەرێمێ. نە موبارەکێ مسرێ مەدیت چەوا بکورێن خوەڤە کەفتە بەر دادگەهێ. قەزافی یێ خوەدانێ تیئوریا کەسک چەوا رەزیل هات کوشتن. عەلیکێ یەمەنێ نیف مری بویە و بەشارێ کورێ ریڤێی کورە برێدایە.

لڤێرە پرس بوچی لڤان هەمی دەڤەرا بوهارێ بەرهەم دا لێ لدەف مە بوهارا مە زوی بەهی و بو پیش و پەلەخ و باێی پاهیزێ بەرزەکر. گرنگە بومە ئەم لسەر ڤێ چەندێ راوەستین، ئەگەرێن وێ چبون؟ گەلو خەلکێ مە ژ ڤان وەلاتێن دەور و بەر چ جودایێ هەیە؟ یانژی کێشێن مە چ ژیێن وان کێمترن؟ ىێ دادپەروەری و زوری سیمایێ هەڤپشکێ ڤان دەستهەلادارا هەمیایە.

چەوا هیچ کەس ل ئوکرانیا، جورجیا، قرقیزیا، تونس، مسر، لیبیا، یەمەن، بەهرەین، سوریا هتد، لهیڤیا هندێ نەبو کو دەستهەلات ب گولان پێشوازیا خەلکی بکەت، یانژی خەلکی سەربەست بهێلیت داخوازێت خوە ب شێوەک شارستانی بگەهینیت، وەسا دڤێت خەلکێ مە بزانیت خوەدی دەستهەلاتێن باشورێ کوردستانێ چجارا د خەونێداژی ناهێلن خەلکەک خوە نەرازی نیشان بدەت.

بکار ئینانا دژواریێ ل هەمبەر خوەپیشاندەرا ل باشورێ کوردستانێ تشتەک هیڤیکری بو، بەرەڤاژی هندێ ئەگەر چەک بکار نەئینابا دا گەلەک جهێ سەرسورمانێ بیت. دەستهەلاتەکا بەرپرس ژ کۆشتن و بەرزەکرنا ب سەدا کورێن ڤی وەلاتی کو هەیا ئەڤرو سەرنڤشتێ گەلەکا ژوان نەدیارە و گەلەک ژوان داینە ژبیر کرن، ڤێ دەستهەلاتێ دێ چ هەلویست هەبیت ژبلی کوشتنێ؟ ئەز بخوە بهیچ رەنگەکی نابینم دەستهەلات بەرپرس ژ تێکدانا ڤێ سەرهەلدانێ، چونکی ژبن برنا سەرهەلدانێ ئەرکێ وێیە و براستی سەرکەفتی بو، چونکی تەنها دەسهەلاتا باشورێ کوردستانێ تشتێ کو شانازیێ پێ بکەت سەرکوت کرنا خەلکی یە.

بێگومان سەرهەلدانێن گەلێن وەلاتێن دن یێن ئەفریقا و رۆژهەلاتا ناڤین کارتێکرنەک مەزن هەبو د پەیداکرنا باوەری بخوە ئینانێ لناڤ گەلێ مەدا، لی نایێ رامانا هندێ کو کێشێن مە نە وەک خەلکێ وەلاتێن دی کەڤنار نە بون، بەلکو ئەڤە چەند سال بو پرانیا مە هەست دکر کو دێ پەقیت، لێ کیرێ و چەوا بێگومان کەسێ بەرسڤ نەبو، لهاڤینا ٢٠٠٦ هندەک دەنگو هەبون کو خوەپیشاندانێن سەرتاسەری دێ ل کوردستانێ دەست پێکەن، وێ دەمێ ئەز ل سلێمانیێ بوم و خوە پیشاندانەک هاتکرن، هەیا ئەڤرو من وێنێت وێ هەنە، باوەر دکەم چەند سەدەک بون، پشتی دەمەک کورت ڤەگەریام دهوک. برێدا ئەم د ئاکرێدا دەرباسبوین، بازارا بنی یا داگرتی بو ژ کەسێن چەکدار، هەمی سەرێن کولانێن مە برێدا دیتین کەسێن چەکدار تێدا بون، من پرسا کەسەکی ژوان چەکدارا کر کانێ گەلو چ قەومیە، گوت سەیدا دبێژن خەلک دێ موزاهەرا کەت؟؟؟ ئەم گەهشتین دهوک د ناڤا بەروشکێ دا دەرسبوین دیسان هەر وەکی ئاکرێ د سەرێ هەمی کۆلانادا کەسێن چەکدار هەبون، ل ناعورێ ئەم راوەستیاین دیسان ژ کەسەک چەکدار مە پرسکر گەلو ما ل دهوکێ چچێبویە؟ گۆتی سەیدا دبێژن خەلک دێ موزاهەرا کەت و بتایبەتی خەلکێ بەروشکێ، بەردەوام کر و گوت لێ ئەز بخوە خەلکێ بەروشکێ مە و من گۆهلێ نەبویە کەسەکێ ئنیەتا موزاهەرێ هەبیت. پشتی روژەکێ ژ ڤەگەرا من بو دهوک ئەز گەهشتم سەرئەنجامەکێ کو دبیت بەرپرسەکی د خەونێدا کابیسەک دیت بیت کو خەلکێ خوەپیشاندانا دکەت و سپێدێ شەڤ ترسکا لێڤێت وی گرت بن؟ بریارا بەلاڤ کرنا چەکدارا ل کولانا دابیت….

تشتێ بالکێش بومن د ١٧ شوباتێدا و هەیا ئەڤرو هەلویستێ ترسینوکێ سەرکردین پارتێن ئوپوزسیونێ یە. سیمایێ بەرچاڤێ راپەرین خەلکێن وەلاتێن دن بەشدار بونا ئوپوزسیونێ بویە و د ئاستێ هەرێ بلند دا، بەرەڤاژی ڤێ چەندێ مە چ سەرکردێن ئوپوزسیونێ نەدیتن دناڤ ڤی خەلکی دا سەرەرای قوربانی و خوەراگریا جەماوەری، بەلکو ل دەستپێکێ گەلەک هەلویستەکێ شەرمزار هەبون، نەک تەنها خوەدی ل خەلکی دەرنەکەفتن بەلکو بێشەرمانە گۆتن کاری مە بڤی خەلکی نینە، لەوما ئەڤە دەستپێکەک خراب بو کو دەستهەلاتێ بەرامبەر جەماوەری هەمی توند و تیژی بکار ئینا.

ژ هەمیێ خرابتر دەما بزاڤا گۆران وەک ماسترین هێزا ئوپوزسیونێ ب رەنگەکێ فەرمی ئەڤ خوەپێشاندانە وەک کارەک تێکدەر بناڤ کر. هێزێن دی بێ دەنگ مان، خەلک ل جادێ بتنێ ما لبن گورزێ میلیشیاتێن دەستهەلاتا سلێمانیێ و سەرکردا ئوپوزسیونەکا ترسونەک و بێ هەلویست، ٦٣ روژا گەل ل سەر پیا بو و سەرکردا ئوپوزسیونێ هند مێرانی ل دەف نەبو روژەکی بتەنێ ئەگەر نە سەرکێشیێ بەلکو بەشدارێی بکەت.

مەزنا یا گۆتی ئەگەر توی نەزانی چاڤدە جیرانی، لهەمی جیهانێ ئوپوزسیونە سەرکێشیا خەلکی دکەت و سەرکردێن ئوپوزسیونێنە ل پێشیا خەلکی دکەڤن، لێ موخابن ئوپوزسیونامە نەگەلەک دویرە ژ دەست هەلاتامە. قۆربانی پارا خەلکینە و دەستکەفتی بو وانە.

دڤێت من ئەڤ بابەتە شڤێدی نڤیسیبا لێ من بزانین ئەڤرو نڤیسی. هەلبەت من دزانی سەرکردا ئوپوزسیونێ هەلویستێ وێ جودا نابیت ژیێ پارسال، من پێشبینی دکر کو دیسان دێ بێ هەلویست بن و بەشداری د چ چالاکیادا ناکەن د یەکەمین سالڤەگەرا ١٧ شوباتێ، هندەک هەڤالا دگوت لەزنەکە ئەڤ سالە پار نینە.

ئەگەر باشورێ کوردستانێ ئوپوزسیونەک وێرەک هەبا دڤێت بەرپرسێن وێ ژ ئاستێ هەرێ بلند هەیا ئاستێ هەرێ نزم، هەرکەس ل جهێ دژیت ئەڤرو بەشدار ببا دبیرەوەریا قوربانیێن سالا دەرباسبویدا و ل جادەو مەیدانا بانە، نە وەک نامەک تەنها بو دەستهەلاتا ئەڤرو، بەلکو وەک سەربورەک بو پێشەروژێ، بو نفشێن بێن، چونکی دەستهەلات بو کەسێ نامینیت ، دەستهەلادارین ئەڤرو دێ بنە ئوپوزسیونا سوبەهی.

هزار سلاڤ ل گیانێ شەهیدێن هەڤدەی شوباتێ بیت

 

 

 

‎لدور مالا مه‌

Check Also

نە ناوشێروان دشێت گۆرانکاری یا بکەت و نە دەستهەلاتەک گەندەل دشێت چاکسازی یا بکەت

د. شه‌عبان مزوری ئه‌ڤ وتاره‌ به‌ریا ٨ سالا هاتیه‌ نڤیسین لێ هه‌مان رۆژه‌ڤه‌ بەیان ناما …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.