كورد و عه‌بادی

د. شه‌عبان مزوری

ل میدیا كوردی پر باسا هندێ تێ كرن كو عه‌بادی كورد پشت گوهخستینه‌ و بێی ره‌زامه‌ندیا وان بریار دایه‌، هه‌روه‌سا ژمارا وه‌زیرێن كورد یا كێمه‌ و نه‌ لدویف سه‌نگا كوردی یه‌. دبیت ئه‌ڤه‌ هه‌می راست بیت و كه‌ش ژمه‌ بو وی جهێ پرسێ نه‌بیت كو دڤێت كوردا پێیه‌كێ بهێز هه‌بیت ل به‌غدا.

 پشتی چه‌ند روژدن ١٣ سال ده‌رباس دبن لسه‌ر نه‌مانا رژێما سه‌ددام حوسه‌ین، هه‌یا ئه‌ڤرو كوردێن مه‌ بنوینه‌راتیا په‌ده‌كێ و یه‌نه‌كێ هه‌رده‌م په‌سنێن ده‌سكه‌فتیێن خوه‌داینه‌ ل به‌غدا. دگوتن عیراق نه‌مابو مه‌ دوروست كر، عیراقێ له‌شكه‌ر نه‌مابو پێشمه‌رگه‌ی پاراستنا زونا كه‌س دكر، بده‌ها جارا دوهول و زرنا لێدان و دگوتن فێدرالی مه‌ چه‌سپاند، شاباش به‌لاڤ دكرن مادێ ١٤٠ هه‌می جێبه‌جێ كر.‌ گه‌له‌ك شانازی دكرن كو ئه‌كته‌رێن سه‌ره‌كینه‌ بو پێكئانینا هه‌ر حوكمه‌ته‌كێ ل به‌غدا، لێ وان ژی دزانی و مه‌ژی دزانی هه‌می نه‌وه‌نه‌.

كێمبونا وه‌زیرێن كورد یانژی نه‌بونا وان چه‌ند گرنگه‌ بو هاولاتیه‌ك ئاسایی ل باشورێ كوردستانێ، ئه‌ڤه‌ هنده‌ ساله‌ به‌رهه‌مێ ڤان وه‌زیرا چبویه‌ بو خه‌لكێ هه‌رێمێ. وه‌ك هێزێن كوردی گه‌له‌ك پوستێن به‌ركه‌فتی وه‌رگرتن و پوستێن جهێ بریارێ، گه‌له‌ك تێكه‌لی و هه‌ڤدیتنێن گرنگ ل گه‌ل كه‌ساتی و بریارده‌رێن وارێن جودا هاتنه‌ ئه‌نجام دان، دیسان بومه‌ چ مفا هه‌بو. لخوارێ ئه‌زدێ هه‌ولده‌م لسه‌ر هنده‌ك ژوان پۆستێن گرنگ باخڤم ئه‌وێن ڤان سالا بو ده‌مه‌كێ دده‌ستێ كوردادا بوینه‌.

سه‌روك كومار ئه‌ڤه‌ ٣ ده‌ورا لسه‌ر هه‌ڤ كورده‌، باشه‌ مه‌ وه‌ك كورده‌ك شانازی ب چكریه‌ كو سه‌روك كوماری ئه‌نجام دابیت د به‌رژه‌وه‌ندیا هه‌رێمێ، كوردستانێ یانژی نه‌ته‌وێ دابیت، بباوه‌ریا من چ نه‌بویه‌ ژده‌رڤه‌ی هندێ كو عیراقچاتیا خوه‌ نیشانبده‌ن. باشه‌ ئه‌گه‌ر سه‌روك كومار كورد نه‌بیت دێ چژده‌ست ده‌ین؟

چێگرێ سه‌روك وه‌زیری. هندی به‌رهه‌م سالح بو جامێری یه‌ك گوتنا خوه‌ گه‌له‌ك جارا كریه‌ ( نحن عراقیون و بئمتیاز ). باشه‌ ما عیراق بونێ تاقیكرن پێدڤێت، به‌ره‌ڤاژی گوتنا به‌رهه‌م سالح پرانیا خه‌لكێ مه‌ عیراقیه‌ك مزه‌وه‌ره‌. ژخوه‌ جێگرێ دن هه‌ژی باسێ نینه‌، چونكی هات و چو من نه‌دیت یه‌ك جار باخڤیت، هه‌ما جامێری پاركه‌ خوه‌ وه‌ردگرت و ده‌ستێ خوه‌ بسه‌رێ خوه‌ڤه‌نابو.

وه‌زیرێ ده‌رڤه‌ بو ١٠ سالا كورد بو و هه‌ر یه‌ك كه‌س بو، دیسان پرس ئه‌وه‌ پشتی لاداناوی چ زه‌ره‌ر بمه‌كه‌فت. ده‌مه‌كێ مه‌ دگوت ئه‌گه‌ر مه‌كه‌سه‌ك هه‌با كورد په‌روه‌ر ده‌ستێ وی گه‌هشتبا نه‌ته‌وێن یه‌كگرتی ژبو ده‌ما تاوانه‌ك دهات ئه‌نجامدان هه‌مبه‌ر گه‌لێ كورد ل هه‌ر جهێ دونیایێ بیت و ژهه‌ر پارچه‌ بیت ئه‌ڤ كاره‌ كربا پرسا روژه‌ڤێ لدویف پێچێبونا خوه‌ ل هه‌مو دام و ده‌زگه‌هێن نێڤنه‌ته‌وی. به‌ره‌ڤاژی هندێ كه‌سه‌كێ وه‌ك هوشیار زێباری به‌ره‌ڤانی ژ داگیكه‌رێن وه‌لاتێ مه‌ نه‌كریه‌ ل هه‌ر چوار پارچا، پرانیا جارا هه‌یا به‌ره‌ڤاژی سه‌روكێ پارتا خوه‌ دئاخفت. بهزارا تاوان هاتن ئه‌نجام دان وان ١٠ سالا به‌رامبه‌ر گه‌لێ كورد وه‌ك سه‌لهلدانا روژئاڤا ئادارا ٢٠٠٤، كوشتن وده‌رخستانا بده‌ها هزار كوردا ژ موسل، قه‌تلئاما روبوسكێ، سه‌دا جارا ده‌وله‌تا تورك گوندێن مه‌ ل باشورێ كورساتنێ ب توپ و فروكا بومبه‌بارانكرنه‌……هتد. من دڤێت كه‌سه‌ك یه‌ك نمونه‌ بینیت كو ته‌نها یه‌ك جار هوشیار زێباری هه‌لویسته‌ك هه‌بویه‌ بێهنا كوردی نه‌ كوردایه‌تی ژێ هاتبیت.

سوپا سالارێ عراقێ كورد بو و ئه‌ندامێ سه‌ركردایه‌تیا وه‌ك ئه‌و دبێژن ماسترین پارتا باشورێ وه‌لات بو و مروڤه‌ك خوه‌دی ئه‌زمونه‌ك هه‌م له‌شكه‌ری و هه‌م سیاسی بو، ژ كه‌سێن نێزیكێن سه‌روكاتیا پارتا خوه‌بو و تا رادده‌كێ جودا ژ گه‌له‌ك ئه‌ندامێن سه‌ركردایه‌تیا پارتا خوه‌ مافێ گه‌له‌ك بریارێن سه‌ربخوه‌ هه‌بو. سه‌ره‌رای ڤێ هه‌میێ هه‌ر ژ دوروسكرنا له‌شكه‌رێ نوی ی عیراقێ هه‌یا ئه‌ڤ جامێره‌ سوپا سالار مه‌ گازنده‌ ژ به‌غدا هه‌بوینه‌، ژوان گازندا: ژمارا ئه‌فسه‌رێن كورد كێمه‌، كورد ژناڤ له‌شكه‌ر تێن دورخستن، چه‌كێن گران ناده‌ن یه‌كینه‌یێن كوردی، ژده‌ورێن فێربونێ كورد بێ پارن، له‌شكه‌رێ عیراقێ به‌رێ توپێن خوه‌ ی دایه‌ كوردستانێ، عیراق هێزا دیجله‌ پێكئانی یه‌ ژبو ناڤبرنا مه‌، هێزا دیجلا ڤان روژا دێ هێرشێ كه‌ته‌ سه‌ر كه‌ركوك، سه‌روكێ هه‌رێمێ و پێشمه‌رگه‌ د ئاماده‌باشیێ دایه‌ بو هه‌ر جولاندنه‌ك له‌شكه‌رێ عیراقێ. ئه‌ڤه‌ هه‌می و هزارا نمونێن دی، دیسان سوپا سالارێ عیراقێ كورد بو. باشه‌ ما دێ خرابتر بیت ئه‌گه‌ر سوپا سالار خه‌لكێ سه‌ر بانێ هه‌یڤێ بیت؟؟؟؟؟؟؟

یا ژ‌ هه‌میهێ خوه‌شتر كابینا مالكی پاره‌ ژ هه‌رێمێ بری، پشتی كابینا عه‌بادی چێبوی كوردا وه‌زاره‌تا مالی وه‌رگرت. ئه‌گه‌ر گوتنێن وه‌زیرێ به‌رێ یێ مالی و یێ تازه‌ كو كورده‌ به‌راورد بكه‌ین ، پارا خوه‌ ئه‌و تشتێ من گوهداری كری یان خوه‌ندی هه‌لویستێ وه‌زیرێ عه‌ره‌ب گه‌له‌ك باشتر بو، باشه‌ چه‌وا وه‌زیر لخوه‌داتینه‌ كو وه‌زاره‌تا وی قوتێ خه‌لكه‌كێ ببره‌ كو ئه‌و وه‌زیر لسه‌ر ناڤێ وان بویه‌ وه‌زیر و كارێ خوه‌ به‌رده‌وام بكه‌ت؟

نمونه‌ گه‌له‌كن لهه‌می وه‌زاره‌تا و هه‌می بیاڤا، بو من یه‌ك روژ خه‌منینه‌ كو كوردا یه‌ك وه‌زیر نه‌بیت ل به‌غدا، ئه‌گه‌ر كارێ وان ئه‌ڤه‌بیت.

‎لدور Malame

Check Also

كێشه‌ نه‌ كورده‌، كوردبونه

شه‌عبان مزوری هه‌ر مروڤه‌ك لسه‌ر رویێ زه‌مینی هه‌لگرێ هنده‌ك ناسنامایه‌، واته‌ مروڤ تێ ناسین لناڤا …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.