File0175

كوبانێ ددوه‌مین سالڤه‌گه‌را ڤه‌ژیاندنا نه‌ته‌وا كورد

د. شه‌عبان مزوری

٢٦\٠١\٢٠١٧
هه‌رێما كوبانێ ژ دوماهیا هاڤینا ٢٠١٤ هه‌یا ناڤه‌راستا زڤستانا ٢٠١٥ بو سیمبولا به‌رخوه‌دانا گه‌لێ كورد. نه‌یارێن كوردا ئه‌ڤ جهه‌ نه‌ ژڤالاتی هه‌لبژارت ل روژئاڤایێ وه‌لات به‌لكو بزانین، نه‌ڤه‌شارتیه‌ ئه‌ڤ به‌رخوه‌دانا ل روژئاڤا به‌رهه‌مێ په‌روه‌ردا پارتیا كاركه‌رێن كوردستانه‌ و رێبه‌رێ وێ به‌رێز عه‌بدوللا ئوجه‌لان. ده‌ستهه‌لات دارێن توركیا و وه‌ك هه‌رده‌م ب پشته‌ڤانیا كوردێن ساویلك هه‌ر ژ ٢٠١٢ هه‌یا هاڤینا ٢٠١٤ زور هه‌ولدان ژبو ناڤبرنا كوردێن روژئاڤا، هه‌ر ژ رێخوه‌شكرنێ ژبو تروریستێن ئیسلامیێن ئاكه‌پێ و ئه‌ردوغان و پرچه‌ك كرنا وان هه‌یا خه‌نده‌كا لناڤبه‌را باشور و روژئاڤا. دڤان ٢ سالان دا گه‌له‌ك پلان هاتن كێشان ژبو خستنا روژئاڤا وه‌ك باشور دبه‌رژه‌وه‌ندیا توركادا.
پشتی ڤان كارا هه‌میا سه‌رنه‌گرتی نه‌یارێن كورد چاڤ به‌ردان سه‌ر هه‌رێما كوبانێ و پلانێ قركرنا گه‌لێ وێ بگشتی ده‌رڤه‌ی هه‌مو بوچونه‌ك هات دان ژ كوچكا ڤامپیرێ ( خوینمێژێ ) سه‌دا بیست و یه‌كێ ئه‌ردوغان. بوچی كوبانێ ئاسانه‌ به‌رسڤ، كوبانێ لاندكا شه‌رڤان و قه‌هره‌مانێن شوره‌شا په‌كه‌كێ یه‌ ل باكورێ كوردستانێ ئه‌گه‌ر وه‌ك بیڤ و هه‌ژمارا دانشتیان به‌راورد بكه‌ی لگه‌ل هه‌ژمارا گریللا و شه‌هیدان ژ كوبانێ، دێ وی ده‌می زه‌لال بینین جهێ كوبانێ دناڤ شوره‌شا باكور ده‌. كوبانێ ته‌نها رێكا نزیك كرنا هه‌رسێ پارچێن روژئاڤایه‌، كوبانێ كه‌له‌مێ هه‌رێ مه‌زنه‌ دچاڤێ ده‌وله‌تا داعشا ئه‌ردوغان و هه‌ڤالبه‌ندێن وی، كوبانێ ئاسته‌نگ بو ژبو داعش سنوره‌ك یه‌كگرتی هه‌بیت لگه‌ل ده‌وله‌تا رێبه‌رێن خوه‌ توركیا. خالا هه‌را ئه‌حمه‌قیا ئه‌ردوغان و داعشا وی حه‌جمێ كوبانی، كوبانێ هه‌رێما هه‌را بچوكه‌ ژ هه‌رسێ هه‌رێمێن روژئاڤا.
داعش و هه‌ڤالبه‌ندێن خوه‌ هزر دكر بئاسانی وه‌ك شه‌نگار و مه‌خمور، چه‌كدارێن كورد دێ ره‌ڤن و ژن و زاروكا لپشت خوه‌ بهێلن و داعش سنوره‌ك نه‌ پارچه‌كری لگه‌ل وه‌لاتێ مامۆستایێ خوه‌ ئه‌ردوغان هه‌بیت. هه‌ر سالا ٢٠١٣ داعش و گرۆپێن دن یێن ته‌روریست گه‌له‌ك هه‌ولدان بو سه‌ر كوبانێ لێ سه‌رنه‌گرتن پلانێن وان. پشتی كه‌فتنا موسل ل نه‌هی خزیرانا ٢٠١٤ بدیتنا من نه‌ ژبه‌ر چه‌كێ كه‌فتی ده‌ستێ داعش له‌وما خوه‌ مه‌غرور دیتن به‌لكو بهاتنا هه‌زاران ته‌روریستێن ئیسلامی ژ وه‌لاتێن جودایێن جیهانێ داعش بو هێزه‌كا هه‌را مه‌رترسیدار ل هه‌رێمێ. بخوینه‌ك تازه‌ و ئومێد ب سه‌ركه‌فتنه‌ك سه‌رتاسه‌ری ل شه‌رێ دژی ئه‌سه‌د و مالكی، بكورتی دژی جیهانا شیعه‌تی بسه‌روكاتیا ویلایه‌تا فه‌قیه.

پیلا پیلای دبریت، مرن مرنێ دكوژیت!
داعش گومان نینه‌ ترسه‌ك مزن خستبو‌ دلێ پرانیا خه‌لكێ هه‌رێمێ ب ره‌وشتێن خوه‌یێن هوڤانه‌، وه‌ك مه‌دیت موسل چه‌وا كه‌فت و ژ شه‌نگار هه‌یا مه‌خمور ب چه‌ند كاتژمێرا وه‌ك پولێن دومینێ هه‌رفت و ب سه‌دان هزار كه‌س نه‌چار كوچبه‌ر بون هه‌ر وه‌سا ب هه‌زارا كه‌سێن مه‌ وه‌ك دیل كه‌تن ده‌ستان، ژن و كه‌چێن مه‌ ل بازارێن موسل و ره‌ققه‌ هاتن كرین و فروتن. داعش و هه‌ڤالبه‌ندێن وێ هزر نه‌دكر كو ئه‌ڤه‌هه‌می دێ بیته‌ به‌ره‌ڤاژی هزرا وان ئه‌گه‌را به‌رخوه‌دان و تولستاندنێ.
داعش هێرشێن خوه‌ ب كه‌سانه‌كا دكر كو خواسته‌كا وان هه‌ر زوتر بێن توپاندن باشتره‌، دا زوتر بگه‌هن پێغه‌مبه‌رێ خوه‌ موحممه‌د ل به‌هه‌شتێ، لهه‌مبه‌ر ڤێ دیسان ئه‌ردوغان ل گه‌ل داعشا خوه‌ خواندنه‌ك شاش هه‌بو بو چه‌كدارێن ل كوبانێ، ئه‌ردوغان باوه‌ر نه‌دكر كو ئیدیولوژیا ئوجه‌لان دكاره‌ نفشه‌ك به‌رخوێده‌ر په‌روه‌رده‌ بكه‌ت لڤی ئاستێ وان پشتی هێرشێ دیتی. داعش و هه‌ڤالبه‌ندێن خوه‌ نه‌دزانی كو ل هه‌مبه‌ر وان له‌شكه‌ره‌ك هه‌یه‌ كو ڤیانا وی بو ژیانه‌ك ئازاد و بروممه‌ت وا دكه‌ت كو هه‌یا هه‌ناسا دوماهیكێ به‌رخوه‌دان بكه‌ت. له‌وما هه‌ردو ئالی مرن بو وان شادی بو، تروریست داعش مرن لكوبانێ وه‌ك نێزیكترین رێ ددیتن ژبو گه‌هشتنا به‌هه‌شتێ و موحه‌ممه‌دێ خوه‌، هه‌مبه‌ر ڤێ هه‌می شه‌رڤانێن ل كوبانێ ژ هه‌ر چوارپارچێن كوردستانێ مرن ل كوبانێ بو وان ڤه‌ژیاندنا نه‌ته‌وا كورد بو و بتایبه‌تی پشتی شنگارێ.

سالح موسلم ئه‌م جاشاتیێ بو كه‌سێ ناكن
هێرش لسه‌ر كوبانیێ روژ بو روژێ دژوارتر لێهات، داعش ب پالپشتیا توركیا و هه‌ڤالبه‌ندێن خوه‌ هه‌می كریارێن هوڤانه‌ خستن پراكتیكێ دا، هه‌می ره‌نگێن چه‌كێن لبه‌ر ده‌ست هه‌ین بكار ئانین، توركیا هه‌مو رێ ژ چه‌كدارێن داعش را ڤه‌كرن نه‌ ته‌نها بو ئالیكاریا لوجستی به‌لكو گه‌له‌ك جارا راسته‌و خوه‌ تروریست ژ ئاخا باكورێ كوردستانێ كو ژێر داگیكرنا توركیدایه‌ دهاته‌ بكار ئینان ژبو هێرش كرنا سه‌ر كوبانێ. به‌رخوه‌دان و قه‌هره‌مانیا چه‌كدارێن كورد و ده‌نگڤه‌دانا ژنێ بو جارا یه‌كه‌مین وه‌ك سه‌ركردا له‌شكه‌ره‌كی ل روژهه‌لاتا ناڤین گه‌له‌ك وه‌لات ته‌نگاڤ كرن كو بێ هه‌لویست نه‌مینن ژبو دیتنا رێیه‌كێ ژبو گه‌هاندنا پێداویستیێن جه‌نگی و ژیانی بو ناڤ كوبانێ. سه‌رئه‌نجاما ڤان هه‌ولدانا بو چونا به‌رێز سالح موسلم هه‌ڤسه‌روكێ په‌یه‌دێ بو ئه‌نقه‌ره‌ ژبو تێكه‌لیێ لگه‌ل ئالیێ توركی، سه‌رچاوه‌كێ نزیك ژ به‌رێز موسلم بو من گوت كو وان باوه‌ری ب توركا نه‌بو لێ نه‌دخواستن هه‌ولدانێن هنده‌ك دوستا رێزێ لێ نه‌گرن. پشتی دیتنا سالح موسلم بهنده‌ك كاربه‌ده‌ستێن ده‌وله‌تا تورك، ئاشكرا بو كو ئه‌ردوغان و هه‌ڤالبه‌ندێن وی دخوازن ته‌نگاڤیا كوبانێ كه‌فتیێ وه‌ك كارته‌ك فشار لسه‌ر په‌یه‌دێ بكار بینن و هه‌مبه‌ری شوره‌شا باكور وه‌ك جاش بكا بینن، لێ سالح موسلم هه‌می پلان و خه‌ونێن وان پوچ كرن ده‌ما گوتی ئه‌م جاشاتیێ بو كه‌سێ ناكین.

هه‌می كه‌فتن لێ كوبانی ما
كوبانێ دناڤا ڤی شه‌ری بو پرسا شكاندا كه‌ساتیا كورد و ئه‌ڤێ چه‌ندێ روژ بو روژێ وا كر كو پرانیا هه‌را زۆر ژگه‌لێ كورد خوه‌دی لێ ده‌ركه‌ڤه‌، له هه‌رده‌را جیهانێ كورد لێ هه‌بن خوپیشاندان روژانه‌ هه‌بون، په‌یڤا كوبانێ، كورد و كوردستان بون یه‌ك. سه‌رتاسه‌ری جیهانێ ئازادیخواز و مروڤ په‌روه‌ر كه‌تن خه‌باتێ ژبو كوبانێ بێ پشت نه‌مینه‌، هه‌یا گه‌هشته‌ هندێ كو سه‌روكێ فره‌نسا فره‌نس ئولان ل كونفرانس فرانكوفونی ل دوماهیا پایزا ٢٠١٤ گوت ( پرسا كوبانێ پرسه‌ك ئه‌خلاقیه‌ و ئه‌و كه‌سێ بێلایه‌ن و ته‌ماشه‌كه‌ر بمینیت بێ ئه‌خلاقه‌ ). پشتی ڤێ گوتنێ ئه‌مریكا و فره‌نسا راسته‌و خوه‌ چه‌ك و ته‌قه‌مه‌نی بباله‌فرا به‌ردان ناڤ كوبانێ بو شه‌رڤانا.
هوزان شه‌عبان سلێمان ژ باشورێ‌ كوردستان پر بدله‌ك داگرتی ژ خه‌مان بان دكر ( كوبانێ نه‌كه‌ڤه‌، نه‌ره‌ڤه‌، ما هه‌یا كه‌نگی دێ ره‌ڤین ). ئه‌ردوغان و جاشێن خوه‌ دگوت ( كوبانێ نه‌ما، هه‌مو ئێڤاریه‌كێ دگوتن سوبا دێ كه‌ڤیت ). لێ كوبانێ نه‌كه‌ت و بو سه‌ره‌تا مرنا داعش و ئه‌ردوغان. وه‌ك چه‌وا زڤستانا ١٩٤٢ ل ساتالینگراد‌ بو سه‌ره‌تا مرنا هێتله‌ر و هه‌ڤپه‌یمانێن وی.

‎لدور مالا مه‌

Check Also

svart-tavla

پیروزی چیه‌؟

د. شه‌عبان مزوری گه‌له‌ك جارا هه‌ر ژ زوراكاتی هاتیه‌ گوهێ مه‌ په‌یڤا پیروزی، ڤێ په‌یڤێ‌ …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.