پاشخستنا رێفێرندومێ سه‌ركه‌فتنه‌ نه‌ شكه‌ستنه‌

بێگومان زۆر بوچون هه‌نه‌ لسه‌ر بریارا رێفێرندومێ، چه‌ند دجهێ خوه‌دایه‌، یانژی ده‌مێ هه‌لبژارتی چه‌ند گونجایه‌. ئه‌ڤه‌ هه‌یامه‌كه‌ پر گه‌نگه‌شه‌ لسه‌ر ڤێ پرسێ‌ تێن كرن . وه‌ك هه‌ر پرسه‌ك رۆژه‌ڤێ ئاساییه‌ هزرێن جودا هه‌بن. ئه‌ز ناخوازم لڤێ بوچونا خوه‌ لسه‌ر هنده‌ راوه‌ستێم كانێ چه‌وانیا سه‌ره‌ده‌ریێ لگه‌ل ڤێ پرسێ دوروسته‌ یان شاشه‌. بدیتنا من گرنگ ئه‌وه‌ ئه‌م بڤێ قوناغا گه‌هشتیێ بره‌نگه‌كێ ته‌ندوروست سه‌ره‌ده‌ریێ لگه‌ل بكه‌ین. ئه‌م چه‌ند باس لدوهی بكه‌ی دڤێت ئه‌م بزانین دوهی ده‌رباس بو، گرنگ ئه‌وه‌ چه‌وا سوبا سه‌ره‌ده‌ریێ بكه‌ین لگه‌ل پرسا ئه‌ڤرو.
ژبو كه‌سه‌ك خوه‌ شكه‌ستی نه‌بینیت و هه‌روه‌سا كه‌سه‌ك خوه‌ سه‌ركه‌فتی نه‌بینیت دڤێت بهه‌ڤرا هه‌مو لایه‌ك هه‌ولبده‌ن ڤێ پروسێسێ بخنه‌ به‌رژه‌وه‌ندیا گشتی و مه‌ بڤێت نه‌ڤێت قازانج و شه‌رێ وێ دێ هه‌میا گریت. رۆژ بو رۆژێ ده‌مێ‌ لبه‌رده‌ست دمینیت كورت دبیت و ده‌رفه‌تا مانێورا ته‌نگ دبیت. هاتنا سه‌ر خه‌تێ ژ نه‌ته‌وێن یه‌كگرتی تا ئه‌مریكا، بریتانیا، فره‌نسا و ئه‌لمانیا نیشانا سه‌ركه‌فتنێیه‌ و بدیتنا من دڤێت ئه‌م هه‌لویستێ وان به‌رچاڤ بگرین ئه‌گه‌ر ئه‌م دخوازین مافێن گه‌لێ خوه‌ و گه‌لێن لباشورێ كوردستانێ دژین بده‌ستبینین.
دڤێت ئه‌م بپه‌ژرینین كو د سیاسه‌تێدا ته‌نها ره‌ش و سپی نینه‌، سوز و پێچێبون دو تشت ژهه‌ڤ جودانه. پرانیا جاران ئاساییه‌ كو مروڤ ده‌ست بكاره‌ك مه‌زن بكه‌ت ژبو ئارمانجه‌ك بچوكتر بده‌ست بینیت.‌ ئاگاهداریا من زۆرتر نینه‌ ژ تشتێ هاتی به‌لاڤكرن لسه‌ر پێشنیارێن هاتین پێشكێشكرن ژلایێ نه‌ته‌وێن یه‌كگرتی، ئه‌مریكا، بریتانیا، فره‌نسا و ئه‌لمانیا بو سه‌ركردایه‌تیا باشورێ وه‌لات له‌وما‌ بباوه‌ریا من دڤێت ئه‌ڤ پێشنیاره‌ بجدی بێن شروڤه‌كرن و بئارامی به‌رسڤ بێ دان.
هه‌یا نوكه‌ نه‌ته‌وێن یه‌كگرتی، زلهێزێن رۆژئاڤا و پرانیا وه‌لاتێن دوست داخوازا پاشخستنا رێفێرندومێ كرینه‌، داخوازا پاشخستنێ تێ رامانا دانپێدان بڤی مافی. راسته‌ دبه‌ گه‌له‌ك باشبا ئه‌گه‌ر ده‌مه‌ك هاتبا دیاركرن، لێ نه‌دیاركرنا ده‌می دبه‌ كورد بكارن ئه‌گه‌ر سه‌ره‌ده‌ریه‌ك دوروست بكه‌ن لگه‌ل ڤێ پرسێ بخنه‌ به‌رژه‌وه‌ندیا خوه‌، ئانكو هه‌رده‌ما بخوازن دكارن رێفێرندومێ بكه‌ن.
وه‌ك ئه‌م هه‌می ئاگادارین گه‌له‌ك ژێده‌را باسا وان پێشنیارا كرن یێن كو نونه‌رێ نه‌ته‌و‌ێن یه‌كگرتی، ئه‌مریكا، بریتانیا، فره‌نسا و ئه‌لمانیا جودا بو هه‌رسێ هێزێن باشور ( گۆران، یه‌نه‌كه‌ و په‌ده‌كه‌)، پاشخستنا رێفێرندومێ به‌رامبه‌ر برنا پرسێن هه‌لاویستی لناڤبه‌را هه‌ولێر و به‌غدابو جڤاتا ئه‌وله‌كاریا نه‌ته‌وێن یه‌كگرتی، چاڤدێریا دانوستاندنا لناڤبه‌را هه‌ولێر و به‌غدا، بدیتنا من ئه‌ڤه‌ و داخوازا پاشخستنێ هه‌می دكه‌ڤیته‌ د به‌رژه‌وه‌ندیا مه‌ كوردادا. هه‌رده‌ما دانوستاندن گه‌هشتن بنبه‌ستێ وێ ده‌مێ ئه‌م بئاسانی دكارین ڤی چه‌كێ رێفێرندومێ لدژی دوست و نه‌یارا بسه‌ركه‌فتی بكار بینین.
بریارا رێفێرندومێ وه‌ك ئه‌م دزانین كوده‌نگیه‌ك لسه‌ر نینه‌ و ئه‌م دكارین بێژین یا هاتی سه‌پاندن. ئه‌ڤ بریاره‌ دده‌مه‌كیدا ده‌رچو كو په‌رله‌مان ژ كارخستی بو، كاراكرنا په‌رله‌مانی بدو هه‌فتیا كێمتر به‌ری رۆژا ده‌نگدانێ و په‌سندكرنا بریارا رێفێرندومێ برێژه‌ك كێم شكویا ڤی كارێ پیروز لاواز دكه‌ت. پاشخستنا رێفێرندومێ دێ بیته‌ ده‌رفه‌ته‌ك باش كو هه‌می لایه‌ن راشكاوانه‌ گه‌نگه‌شه‌ك به‌رفره لسه‌ر ڤی بابه‌تی بكه‌ن و ببیته‌ بریاره‌ك نیشتیمانی. هیڤیێن مه‌ هه‌نه‌ كو دمه‌ك نێزیكدا ناڤمالا كوردی رێكخستیتر لێبێت و كوده‌نگیه‌ك هه‌بیت لسه‌ر پرسێن چاره‌نوساز دا كه‌سه‌ك نه‌بێژیت كوردان بخوه‌ یه‌ك هه‌لویست نینه‌.

‎لدور مالا مه‌

Check Also

بلفور و تیلرسون – جوهی و كورد

د. شه‌عبان مزوری ئه‌ڤرو ١٠٠ سال ده‌رباس دبن لسه‌ر ناما ریتشارد ئه‌رتور بلفور نڤیسی بو …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.