هه‌لبژارتن

رێفێرندوم گه‌هشت ئارمانجێن خوه‌

به‌ری بچم ناڤبابه‌تی من دڤێت لسه‌ر هنده‌ك خالا راوه‌ستم بو كه‌سه‌ك نه‌بێژیت من بوچونێن خوه‌ لسه‌ر ڤێ پرسێ گوهارتینه‌. ژ رۆژا بریارا رێفێرندومێ ده‌ركه‌فتی هه‌یا ئه‌ڤرۆ من هه‌مان بوچون هه‌نه‌ یێن من بنڤیسكی یانژی بگوتن ده‌ربرین، یه‌ك تێگه‌هشتنا من بو ڤێ پروسێسێ نه‌هاتیه‌ گوهارتن لێ به‌رامبه‌ر هندێ دڤێت بدیتنا من مروڤ وه‌ك هه‌ر ده‌م من گوتی و دوباره‌ دكه‌م، هه‌ر كارێ هه‌بیت دڤێت ته‌نها لایه‌نێن خراب باس نه‌كه‌ت هه‌رده‌م. وه‌ك من ئاماژه‌ كری ئه‌ز بهیچ ره‌نگه‌كی لگه‌ل ڤی شێوێ ره‌فتارێ هاتی كرن لگه‌ل پرسه‌ك هوسا چاره‌نوساز نینم.
مه‌سعود بارزانی سه‌ركه‌فتیێ یه‌كه‌مینه‌ ژ ڤێ پروسێسێ
گه‌له‌ك كه‌س و لایه‌ن دبێژن رێفێرندوم نه‌ بریارا تاكه‌ كه‌سه‌كیه‌ یانژی لایه‌نه‌كیه‌. ئه‌م هه‌می دزانین كو ئه‌ڤه‌ گه‌له‌ك ژراستیێ دوره‌. بریارا رێفێرندومێ بریارا به‌رێز مه‌سعود بارزانی یه‌. بڤێ بریارێ مه‌سعود بارزانی دیاركر بو هه‌ڤركێن ناڤ خوه‌ پێشی نه‌یارێن ده‌رڤه‌ كو ئه‌و ته‌نها كه‌سه‌ دكاریت بریارا بده‌ت و هه‌می ئالیا ملكه‌چی بریارا خوه‌ بكه‌ت. راسته‌ دڤان سێ مه‌هادا هنده‌ك نه‌رمی نیشادا هه‌مبه‌ر هه‌ڤركێن خوه‌، لێ دیسان ئه‌و نه‌رمیژی هه‌می خسته‌ خزمه‌تا بریارا خوه‌ بره‌نگه‌ك سه‌ركه‌فتی. بریار و ده‌مێ ئه‌نجام دانا رێفێرندومێ هه‌می ئاشكراكرن و پشتی سێ مه‌ها په‌رله‌مان كاراكر و په‌رله‌مانی بریارا بارزانی بێ دوو دلی په‌سه‌ندكر. بارزانی سه‌لماند كو كه‌سه‌ك بێی ره‌زامه‌ندیا وی نكاریت كاره‌كی بكه‌ت و كه‌س نكاریت ژ لایێ خوه‌ لسه‌ر ڤێ پرسێ باخڤیت بێی ئاگاهداریا وی و ته‌نها ئه‌وبریار ده‌ره‌. ده‌ما لسحێلا رونشتی بنونه‌رێ ئه‌مریكا، نه‌ته‌وێن یه‌كگرتی، بریتانیا، فره‌نسا و ئه‌لمانیا كری گوت ئه‌زێ ڤان پێشنیارێن وه‌ بئالیێن كوردیرا گفتوگو بكه‌م و پاشان به‌رسڤا وه‌ده‌م. چونكی بارزانی دزانیت كو لایه‌ك بریاده‌ر نینه‌ لگه‌ل لسه‌ر بابه‌تی گه‌نگه‌شێ بكه‌ت پشتی چه‌ند ده‌مژمێرا ل زاخو ئه‌و پێشنیار په‌سه‌ند نه‌كرن و گوت تشته‌ك وه‌سا دناڤدا نینه‌ كو جهێ رێفێرندومێ بگریت. رێفێرندوم ته‌نها و ته‌نها بریارا بارزانی مه‌سعوده‌ و له‌وما ته‌نها وی پروپاگانده‌ ژدل بو دكر، هه‌یا سه‌ركردێن په‌ده‌كێ ژی هه‌ڤكار نه‌بون لگه‌ل مه‌سعود بارزانی، ئه‌گه‌ر ئه‌م ڤه‌گه‌رن بو هه‌لمه‌تێن هه‌لبژارتنا ئه‌ڤ راستیه‌ دێ بومه‌ ده‌ركه‌ڤیت. ئه‌ز ژدل پیزوربایێ ل به‌رێز مه‌سعود بارزانی دكه‌م و دبێژم ته‌ سه‌ركه‌فتن وه‌ك تاكه‌ كه‌س پیروزبیت.
ته‌ڤایا گه‌لێ كورد سه‌ركه‌فت
هه‌ر ژ رۆژا رێفێرندوم كه‌تی رۆژه‌ڤێ هه‌یا ئه‌ڤرۆ، رۆژ بو رۆژێ پرسا گه‌لێ كورد بره‌نگه‌ك به‌رفره‌ كه‌فتیه‌ رۆژه‌ڤا پرانیا وه‌لاتێن رۆژهه‌لاتا ناڤین و جیهانێ، ژ جیهانێ ژی تایبه‌تی جیهانا رۆژئاڤا. ڤێ مه‌ها داوی هه‌ر هه‌می وه‌لاتێن زلهێز كه‌تینه‌ سه‌ر خه‌تی لگه‌ل مه‌سعود بارزانی، هه‌ر ژ په‌یوه‌ندیێن ته‌له‌فونی هه‌یا سه‌ره‌دانێن فه‌رمی، هه‌ر ژ كۆمكارا عه‌ره‌بی هه‌یا نه‌ته‌وێن یه‌كگرتی. هه‌می بهه‌ڤرا داخوازا پاشخشتنا رێفێرندومێ دكه‌ن و هنده‌ك دبێژن بلا هه‌ما ئه‌ڤ بریاره‌ بێته‌ هه‌لوه‌شاندن لێ خوه‌دیێن هزرا داوی كه‌من. راسته‌ پرسا بارزانی ته‌نها باشورێ كوردستانێ یه‌ لێ پرسا كوردی وه‌ك نه‌ته‌وه‌ بابه‌‌تێ هه‌رێ دژواره‌ ل میدیا جیهانی. هه‌مو بریاره‌ك یانژی هه‌لویسته‌ك، گوتنه‌ك یان ره‌فتاره‌ك، ژ لایه‌نه‌كی، وه‌لاته‌كی، رێكخراوه‌كێ یانژی كه‌سانه‌كی بدلێ مه‌نه‌بیت وه‌ك كورد لێ بره‌نگه‌ك گشتی ئه‌ڤ بریارا به‌رێز مه‌سعود بارزانی مافێ ده‌وله‌تێ بو نه‌ته‌وا كورد پشتی جه‌نگێ جیهانیێ یه‌كه‌مین، یه‌كه‌مین جاره‌ هوسا ده‌نگ ڤه‌دای. هه‌یا داخویانیا جڤاتا ئاسایشا نه‌ته‌وێن یه‌كگرتی لسه‌ر خرابیا وێرا و كوده‌نگیا هه‌میان لدژی رێفێرندومێ سه‌ركه‌فتنه‌ بو گه‌لێ كورد چونكی بو یه‌كه‌مین جار بده‌ستێ خوه‌ مه‌ پرسا كوردی بره‌ جڤاتا ئاسایشا نه‌ته‌وێن یه‌كگرتی. جاردن وه‌ك به‌ری چه‌ند رۆژا من نڤیسی پاشخستنا رێفێرندومێ سه‌ركه‌فتنه‌.

‎لدور مالا مه‌

Check Also

پاشخستنا رێفێرندومێ سه‌ركه‌فتنه‌ نه‌ شكه‌ستنه‌

بێگومان زۆر بوچون هه‌نه‌ لسه‌ر بریارا رێفێرندومێ، چه‌ند دجهێ خوه‌دایه‌، یانژی ده‌مێ هه‌لبژارتی چه‌ند گونجایه‌. …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.