هه‌كه‌ مه‌ دیكل په‌یداكر، هه‌سپ بخوه‌ دێهێت مال!

د.شه‌عبان مزوری
نڤیسینا خوه‌ ئه‌ز بسه‌رهاتیه‌ك كوردی ده‌ستپێدكه‌م كو من بخوه‌ گومان تێدا نینه‌ پرانیا وه‌ بهیستیه‌. دبێژن ئێڤاره‌ك دره‌نگ مالخێ مالێ هات مال و كابانیا وی گوتێ فلانكه‌س ئه‌ڤه‌ بو دره‌نگ و هێژا دیكلێ مه‌ نه‌هاتیه‌ لیسی. مالخێ مالا ژ زاروكێن خوه‌ خاست لدویف دیكلێ خوه‌ بچن و ڤه‌نه‌گرن بێ دیكل، زاروكێن وی بیه‌ك ده‌نگ گوتن : ما دیكل چمالێ دونیایێ یه‌ كو ئه‌م لدوف كه‌ڤین. ده‌م ده‌رباس بون به‌رخ چو، گولك چو، بابێ هه‌ر دگوت هه‌رن لدوف دیكلێ خوه‌، هه‌یا هه‌سپ ژی چوی بابێ هه‌ر دگوت لدوف دیكلی بگه‌رن. زاروكا گوتن بابێ مه‌ دین بویه‌، دبێژین به‌رخ.. دبێژیت دیكل، دبێژین گولك… دبێژیت دیكل، دبێژین هه‌سپ دبێژیت دیكل، بابێ گوت زاروكێن من ئه‌گه‌ر هوین خوه‌دان لدیكلێ خوه‌ ده‌ركه‌تبان ئه‌ڤێن لدوفداژی به‌رزه‌ نه‌دبون .
دڤان ٢٦ سالێن ده‌ستهه‌لاتا دره‌وین و تالانكه‌رێن باشورێ كوردستانێدا بده‌ها جاران ئه‌ڤ سه‌رهاتیه‌ و گه‌له‌كێن دن من یێن گوتین ژبو خه‌لكێ مه‌ لخوه‌ خوه‌دان ده‌ركه‌ڤه‌، مافێ خوه‌ بپارێزه‌ و لسه‌ر بنگه‌هه‌ك ته‌ندوروست وه‌لاتێ خوه‌ ئاڤاكه‌ت. من لڤێره‌ نه‌ڤێت هیچ كرێتیه‌ك ببریارده‌ستێن ئه‌ڤرۆ ل باشورێ وه‌لات بكه‌م چونكی ژ دایكبونا خوه‌ رویره‌ش، شه‌رمزار و چاڤشور بوینه‌، ‌هه‌می ته‌مه‌نێ وان نوكه‌رێن داگیركه‌را بوینه‌، وه‌لاتفروش و سه‌ربرێن خه‌لكێ مه‌ بوینه‌.
ئه‌گه‌ر ده‌ما ئه‌ڤ سه‌ركرده‌ وه‌ك پیرهه‌ڤیا ڤه‌گه‌رین باشور و گوتن مه‌ ڤێره‌ رزگاركریه‌، ئه‌ڤه‌ به‌رهه‌مێ خوینا شه‌هیدانه، دڤیابا خه‌لكێ مه‌ ژوانرا گوتبا ده‌وله‌ت سه‌رێ نه‌ته‌وێن یه‌كگرتی هونژی ڤه‌گه‌ریان، دڤێت ئاشبه‌تالێن وان ئانیبان بیرا وان و قه‌ده‌را خوه‌ ده‌هجاركی نه‌خستبا ده‌ستێ‌ ڤێ تاقما كو هه‌می ده‌ما دروشمێ وێ ئاخفتنا مێرخاسا بكه‌ و رۆژا شه‌ری لمالا خوه‌ نه‌به‌. پێداچونه‌ك كورت بسه‌ر مێژویا خوه‌دا بكه‌ین دێ‌ بینین ته‌نها و ته‌نها به‌رهه‌مێ ڤان لڤان ٧٠ سالێن ده‌رباسبوی، ئه‌م ژ كوچكی هاڤێتینه‌ ته‌نورێ، هه‌رده‌ما خه‌لكێ مه‌ بو ده‌مه‌ك كورتژی هه‌ناسه‌ك هه‌لكێشایه‌ و ده‌ست بژیانه‌ك ئاسوده‌كریه‌، ئه‌ڤێن خوه‌ برێبه‌ر دزانن كێرا خوه‌ یان یا داگیركه‌ران خستیه‌ سه‌ر گه‌رده‌نامه ژبو سامان و جانێ خوه‌‌. هه‌رده‌ما ده‌ستهه‌لات كه‌فتی ده‌ستێ وان پتر ژ داگیركه‌را ئه‌م تالانكرینه‌، ملكێ مه‌ زه‌فكریه‌، خه‌لكێ مه‌ لنیڤا رۆژێ تروركریه‌. ده‌ما ته‌نگاڤیاژی ره‌ڤین كارێ وان بویه‌ و هه‌می سامانێ كومكری لگه‌ل خوه‌ بریه‌، مرن و وێرانی ژی به‌هرا مه‌ بویه‌.
سه‌ركرده‌ك نابیت بهه‌ژمارا شه‌هیدا، گوندێن وێران و قوربانیێن جوراوجورێن گه‌لێ خوه‌ شانازیێ بكه‌ت ئه‌ڤه‌ ته‌نها بوچونه‌ك مافیایی یه‌، چونكه‌ ئه‌گه‌ر بڤی ئاوای هزر بكه‌ین تێ رامانێ هندێ كو كورد ته‌نها بو مرنێ یێت په‌یدابوین، لێ باوه‌ر دكه‌م به‌ره‌ڤاژی ڤێ چه‌ندێ ئه‌م دخوازین بژین، ئازادبین نه‌ كوێلێن داگیركه‌را یانژی كوێلێن كه‌سانه‌ك خومالی بین. به‌رپرسێن كێمترین هه‌ستا مروڤایه‌تیێ لده‌ف هه‌بیت، دڤێت كه‌سێن ژێ به‌رپرس بپارێزیت، ژینگه‌هه‌ك شاد و كامه‌ران بو په‌یداكه‌ت. سه‌ركرده‌ نابیت شانازیێ بكه‌ت بخوه‌، دڤێت خه‌لك وی هه‌لسه‌نگینیت.
بو كه‌سێن نڤیسینێ دكه‌ن چونكی هه‌ركه‌سێ نڤیسینكر نابه‌ نڤیسكار، پرسه‌ك دكه‌م هون ژخوه‌ شه‌رم ناكه‌ن هون هنده‌ په‌سن بسه‌ركردێن خوه‌دكه‌ن، ما به‌رهه‌مێ وان چیه‌؟ لدورا خوه‌ ته‌ماشاكه‌ن ئه‌گه‌ر وه‌ لوه‌لاته‌كی رێبه‌ره‌ك دیت ژ رێبه‌رێن وه‌ ساویلكه‌تر دێ داخوازا لێبورینێ ژوه‌كم. بو هوزانڤا دبێژم، هه‌بونا ژماره‌ك زۆر ژ هوزانڤانا دناڤ نه‌ته‌وه‌كێدا تێ‌ رامانا نه‌هوشیاریێ، هوزان خه‌ونه‌ و بنڤستنێ وه‌لات ئاڤانابن. بو سترانبێژا، ئه‌گه‌ر وه‌لات بسترانێن نیشتیمانی، نه‌ته‌وی و سترانێت به‌ژن و بالێت رێبه‌را با نوكه‌ ئه‌م ببوینه‌ ئمبراتوریه‌تا هه‌را مه‌زن لجیهانێ.
ئه‌ڤه‌ من دخواست وه‌ك سه‌راتایه‌ك بو هنده‌ك بابه‌تا كو دخوازم لڤی ده‌مێ پێشمه‌دا و خواندنا خوه‌ بو ڤێ ره‌وشا ئه‌م گه‌هشتینێ به‌لاڤكم.

تێبینی: وێنێ بابه‌تی من ژگوگلێ وه‌رگرتیه‌ ناڤێ خوه‌دانی لسه‌ر نه‌بو، هیڤیدارم ئه‌گه‌ر خوه‌دانێ ڤی وێنه‌ی ببینیت په‌یوه‌ندیێ لگه‌ل من بكه‌ت، ژبو ناڤێ وی لژێر دانم و ئه‌گه‌ر بدلی نه‌بیت ژبو وێنه‌ی راكم.

‎لدور مالا مه‌

Check Also

بلفور و تیلرسون – جوهی و كورد

د. شه‌عبان مزوری ئه‌ڤرو ١٠٠ سال ده‌رباس دبن لسه‌ر ناما ریتشارد ئه‌رتور بلفور نڤیسی بو …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.