ئه‌م بو كه‌ڕا دئاخڤین، لدویف كورا دچین، لبه‌ندا په‌یڤا ڵاڵاینه‌ و په‌رتوكا نه‌ خوێنده‌ڤانا

د. شه‌عبان مزوری
ده‌وله‌تسه‌رێ پێشڤه‌چونا زانستی و په‌یدانابونا ئاسانكاریا بو جورێن جودایێن گه‌هاندنا رامان، هزروبیر، بوچون و هه‌لویستێ هه‌ر تاكه‌ كه‌سی كو بخوازیت بویه‌ بنگه‌هه‌ك بو گۆرانكاریا لسه‌رتاسه‌ری جیهانێ، لسه‌ر پرسگرێكێن هه‌مه‌ ره‌نگ و لسه‌ر ئاستێن جودا. لێ بو من بخوه‌ لجاڤاكا مه‌ هه‌می ره‌نگێن راگه‌هاندنێ و تورێن كۆمه‌ڵایه‌تی ژبو ئارام كرنا بارێ ده‌رونیێ هه‌ركه‌س ژمه‌یه‌ پتر ژبو ئارمانجه‌كا پاشه‌رۆژێ بیت. هه‌لبه‌ت دلته‌نگی و بێزاری مروڤی دخیته‌ پوسیده‌بونێدا، گه‌له‌ك جاران ئه‌گه‌ر ده‌رفه‌ت هه‌بیت مرۆڤ به‌ركا خوه‌ داقوتیت بو كه‌سه‌كی كو مروڤ بخوه‌ دزانیت كو نكاریت چبكه‌ت دیسان مروڤ هه‌ست بئارامیه‌كێ دكه‌. ئه‌ڤ چه‌نده‌ دێرا تینه‌ بیرا من، ده‌ما كه‌سانێن باوه‌ریا فه‌له‌تی (مه‌سیحی ) هه‌ین دچن دێرێ و دخوازن خوه‌ ژ گوننه‌هێن خوه‌ داقوتن، لژوره‌كا تاری رادوه‌ستن‌، لئالیێ دن ژی قه‌شه‌ گوهداریێ دكه‌، هه‌رچه‌ند ئه‌و باوه‌رمه‌ند باسا گوننه‌هێن خوه‌ دكه‌، قه‌شا ژێرا دبێژه‌ كورێ من خوه‌ ڤالا كه‌، دلوڤانیا عیسا پر مه‌زنه‌ و وێ لته‌ ببوره‌. تراجیدیا ڤێ ئه‌وه‌ هه‌ردو ئالای دزانن كو دره‌وه‌، لێ باوه‌رمه‌ند ئارامیا ده‌رونی په‌یدادكه‌ بڤالاكرنا خوه‌ ژ هنده‌ك كارێن ئه‌نجامداین و قه‌شه‌ژی بڤێ یه‌كه‌كێ رولێ خوه‌ ماستر دبینه‌ و به‌رده‌وام نانێ خوه‌ پێدخوه‌.
په‌یدانا بونا ڤێ ته‌كنولوجیا هوسا پێشكه‌فتی و بنرخه‌ك پر ئه‌رزان كو ئه‌ڤ‌ دونیا هنده‌ مه‌زن كره‌ گونده‌ك بچوك دیسان نكاری مه‌ بگه‌هینه‌ ئاراستێ تێگه‌هشتنا په‌یاما خوه‌. بدیتنا من پر گرنگه‌ مروڤ بزانیت په‌یاما مروڤی بو كێیه‌ لناڤ جڤاكێ، ئاستێ وه‌رگرتنا وان چه‌نده‌ چبه‌رژه‌وه‌ندیا وان هه‌یه‌ دناڤا په‌یامێ دا. به‌شه‌ك هه‌رێ بچوك ژ په‌یاما تورێن كۆمه‌ڵایه‌تی و سایتێن ئینترنێتێ په‌یامێن خوه‌دی هزر و رامانێن رادیكالێن جودانه ژ هه‌لسوكه‌فتێ بریاربده‌ستێن باشور، لێ موخابن پرانیا بوچونا‌ دكه‌ڤیته‌ درولێ شێورمه‌ندیه‌كا شه‌رمانه‌ بو كوچكێن قه‌یسه‌ری.
بمن دڤێت ئاراستێ په‌یاما پرانیا جڤاكێ ١٦٠ پلا بهێت گوهارتن. په‌یام بو خوه‌دان گوهێن ساخله‌م بیت، گوهێن بكارن گوهداریا ده‌نگێ ته‌ بكه‌ن. نابیت دپه‌یڤا ته‌دا ئه‌گه‌ر هوسا با دا هوسابیت، ئه‌گه‌ر ئه‌ڤه‌ كربان دا ئه‌ڤه‌بیت‌، ئه‌ڤه‌ژی وه‌ك مه‌سه‌لا كوردیه‌ ئه‌گه‌ر خویشكا من نێر با دا بێژمێ برا. چوجارا ئه‌گه‌ر و ئه‌گه‌ر نكارن چه‌رخا ژیانێ پاشڤه‌ بینن له‌وما هه‌ركه‌س ژمه‌ ده‌رفه‌ت هه‌نه‌ دژیانێدا و هه‌ركه‌س به‌رپرسه‌ ژسه‌ره‌ده‌ریا خوه‌ لگه‌ل وێ ده‌رفه‌تێ. په‌نابرن بو بریارده‌ران ژبو گوهارتنا شێوێ سه‌ره‌ده‌ریێ لگه‌ل چونه‌تیا رێڤه‌ربه‌ریێ وه‌ك تو بو كه‌سه‌ك كه‌ڕ باخڤی.
سه‌ره‌رای هندێ كو مرۆڤ دبینیت، گوهلێدبیت و دخوینیت كو رێبه‌رێن مه‌ ئه‌م گه‌هاندین ره‌وشه‌ك خراب، به‌رێ مه‌ دانه‌ جه‌هنه‌مێ و هندی بێژی خه‌لكێ مه‌ گازندا دكه‌ن، لێ دیسان پرانیا خه‌لكێ مه‌ هه‌یا ئه‌ڤرۆژی دبێژن باشه‌ مامه‌ كی هه‌یه‌ ژڤان باشتر، لهیڤیا هندێ نه‌ كو ئه‌ڤ بریارده‌ره‌ به‌رده‌وام بن د رێبه‌ریا وان دا. ئانكو وه‌ك بێژی ل شه‌ڤه‌ك زستانا تاری كو مروڤ پێتڤی رێبه‌ره‌ك خوه‌دی دیتنه‌ك ( چاڤێن ) پر دژواربیت دیسان به‌رده‌وامبیت لدوف كه‌سێن كوره‌ بچیت.
جهێ سه‌رسورمانێ یه‌ پرانیا هه‌را زۆرا خه‌لكێ مه‌ چاڤه‌رێی گوتارا رێبه‌رێن خوه‌نه‌ ژبو ئاگاداریه‌ك بده‌ن لسه‌ر هه‌ر كاره‌ك یان كاردانه‌وك، پلانه‌ك، دیتنه‌ك و …هتد لسه‌ر ژیانا هاولاتی یانژی ره‌وشا وه‌لاتی بگشتی ژ كه‌سانه‌ك كو بسالانه‌ دزانن كو ئه‌ڤ سه‌ركرد و رێبه‌ره‌ ڵاڵن. له‌وما دڤێت ئه‌م ڵاڵا لاده‌ین و كه‌سێن ئاخفتنكه‌ر بینین سه‌ر ده‌ستهه‌لاتێ.
خه‌لكێ مه‌ بده‌هان ساله‌‌ رۆژناما دكریت نه‌ ژبو ناڤێ رێبه‌رێت خوه‌ دناڤدا ببینیت به‌لكو بابه‌ته‌كێ رێبه‌رێن خوه‌یێن خوه‌دان ئه‌زمون، خێڤزانك و بیرمه‌ند بخوینیت، هزاران جاران سه‌ره‌دانا په‌رتوك فروشا كرینه‌، نه‌كه‌ رێبه‌ره‌كێ وی به‌ر‌هه‌مه‌ك تازه‌ چاپكربیت و ئه‌و پێ ئاگادار نه‌بیت. ئه‌ڤه‌ هه‌می وه‌ك مه‌سه‌لا دێرێ و قه‌شه‌ی یا من باسكری، خه‌لكێ مه‌ دزانه‌ كو رێبه‌رێن وی نه‌خوه‌نده‌ڤانه‌ لێ دیسان خوه‌ بهیڤیا ده‌ركه‌فتنا په‌رتوكا نه‌خشا‌ چاره‌سه‌ریا رێبه‌رێن نه‌ خوه‌نده‌ڤا ئارام دكه‌ن و ژیانا خوه‌ لگه‌ل دره‌وا خوه‌ دبه‌نه‌ سه‌ری.

‎لدور مالا مه‌

Check Also

ئه‌ڤرۆ ده‌ر ئه‌نجاما هه‌مان عه‌قلیه‌تا سیاسیا دوهیه‌ به‌شێ دووێ

١٩٩٢- ١٩٩٤ باشورێ كوردستانێ ژ یه‌كین هه‌لبژارتن بو وێرانترین شه‌رێ ناڤخوه‌یێ د. شه‌عبان مزوری سه‌ره‌رای …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.