نه‌ بو بریارا دادگه‌ها ده‌ستوریا وه‌لاتێ بێ ده‌ستور

د.شه‌عبان مزوری
بێگومان هه‌ركه‌سێ نڤیسینێن من خوه‌ندین یانژی هنده‌ك پروگرامێت تیڤی كو به‌شداربوینه‌ لڤان سالێن داوی بو زه‌لاله‌ هه‌لویستا من لسه‌ر ڤی كاری و ده‌رئه‌نجامێن وی. ژبه‌ر ڤێ چه‌ندێ ئه‌ز ناخوازم كانێ رێفێرندوم كاره‌ك دوروست؟ دده‌مه‌ك گونجایدا بو؟ ئاماده‌كاری دئاستێ ڤێ پرسێ دابون یان نه‌؟ ئه‌ڤ پرسه‌ و گه‌له‌ك پرسێن دن بوهایێ خوه‌ ژده‌ست دده‌ن ده‌ما كاره‌ك هات ئه‌نجام دان.
دڤێت بێژین كو خوه‌دان و هه‌لگرێ په‌یاما رێفێڕندومێ سه‌روكێ پارتی دیموكراتی كوردستانه‌ مه‌سعود بارزانی. هه‌مو لایه‌نێن سیاسی و هه‌یا سه‌ركردێن پارتا بارزانی كه‌سه‌ك ناكه‌ڤیت به‌رچاڤێن من كو وه‌ك بارزانی هه‌لمه‌ت یانژی پروپاگاندا كربیت بو رێفێرندومێ. هه‌ر ده‌ڤه‌ره‌كا بارزانی كاریبیت بچیتێ‌، سه‌ره‌دانكریه‌ و میتینگ لدارخستینه‌ ژ بو رێفێرندوما سه‌رخوه‌بونا كوردستانێ. نه‌ك بو مه‌سعود نه‌ بو هیچ كورده‌كی دبیت بێژیت ئه‌گه‌ر مه‌ رێفێرندوم نه‌ كربا، رێفرێندوم هات ئه‌نجام دان و دڤێت ئه‌م هه‌می هه‌ركه‌س ژلایێ خوه‌ڤه‌ لگه‌ل بگونجینت.

خوه‌دانێ رێفێرندومێ، رێفێرندوم هه‌لوشاند به‌ری نه‌یار و نه‌حه‌زا؟

مه‌سعود بارزانی وه‌ك مه‌ هه‌میا ددیت لهه‌لمه‌تا پروپاگه‌ندێ بو به‌لێ بو سه‌رخوه‌بونا كوردستانێ هه‌ر ده‌م دچو پتر یێ سور بو لسه‌ر ئه‌نجامدانا رێفێرندومێ. هه‌ر رۆژه‌ك ده‌رباس دبو مه‌سعود بارزانی پلان و دیتنا خوه‌ بو ده‌وله‌تا كوردی زه‌لالتر دكر، ئه‌ز یه‌ك ژوان كه‌سان بوم كو من هزرنه‌دكر كو مه‌سعود بارزانی بێژیت ئه‌ڤ رێفێرندومه‌ ژبو راگه‌هاندنا ده‌وله‌تا كوردیه‌، لێ بارزانی ل هه‌فتیا دوماهیێ ژ پروپاگاندێ بده‌هان جارا راگه‌هاند كو ئه‌گه‌ر ده‌نگێ به‌لێ بو سه‌رخوه‌بونا كوردستانێ سه‌ركه‌فتنێ بینیت، دێ ده‌وله‌تا كوردی ده‌ملده‌ست ئێت راگه‌هاندن و ئه‌ڤ یه‌كه‌ بزه‌لالی ل ئێڤارا ده‌نگدانێ راگه‌هاند( ده‌ما گوتی ئه‌گه‌ر سوبه‌ پرانیا ده‌نگا به‌لێ بیت تێ رامانا راگه‌هاندنا ده‌وله‌تێ و دێ ده‌وله‌تێ راگه‌هینین ).
ببوچونا من مه‌سعود بارزانی رێفێرندوم هه‌لوه‌شاند ده‌ما پشتی راگه‌هاندنا سه‌رئه‌نجاما ده‌نگدانێ ل یه‌كه‌مین ده‌ركه‌فتنا خوه‌ بو میدیا گوتی ( ئه‌ڤ رێفێرندومه‌ نه‌ ژبو ده‌وله‌تێ یه‌ و نه‌ ژبو دانانا سنورایه‌، داخوازا دیالوگێ ژ به‌غدا كر ). من ئاگاداری لسه‌ر ره‌وشا مه‌سعود بارزانی نه‌بون و دبیت لژێر فشاره‌ك دژوار دابیت لێ ببوچونا من نه‌دبو په‌یامه‌ك لڤی ئاستی به‌لاڤ كربا. بو من ئه‌ڤه‌ په‌یاما خوه‌ ته‌سلیمكرن بو بو به‌غدا.
جاردی دبێژم یابوری بوری، لێ نابیت بێده‌نگ بین لهه‌مبه‌ر بریارا دادگه‌ها ده‌ستوریا عیراقا بێ ده‌ستور. دڤێت به‌غدا بزانیت كو ده‌ستور نه‌ ته‌نها بومه‌یه‌ و دادگه‌ نه‌ ته‌نها بو كوردا دوروست بویه‌، دڤێت به‌غدا بزانیت دادگه‌ مه‌ ناترسینن و بریارێن وێ وه‌ك به‌فرا چیایێ مه‌قلیبیه‌ ده‌ما رۆژدهه‌لێت لگه‌ل وندا دبیت. ما لكویژان ده‌ڤه‌را عیراقێ ده‌ستور به‌رقه‌راره‌. بێده‌نگبون به‌رامبه‌ر به‌غدا لژێر هه‌ر به‌هانه‌ك كوشتنا كه‌سایه‌تیا ته‌ڤایا خه‌لكێ باشوره‌.
بو هه‌می لایه‌ن و سه‌ركردێن باشور دبێژم ببوهانا مه‌سعود بارزانی سه‌ركێشیا پرۆسێسا رێفێرندومێ كریه‌ هوین ژ به‌رپرسیایه‌تیێ قورتال نابن، دڤێت په‌نجا وه‌یا مور رۆژا ده‌نگدانێ بشادی و سه‌ربلندیڤه‌ ژبیرا وه‌ نه‌چیت. لپێشیا هه‌مو كه‌سه‌كی دڤێت مه‌سعود بارزانی بێده‌نگیێ بشكێنیت و بێ دوودل بێژیت ٢٥ ئه‌یلولێ ٢٠١٧ پیروزترین رۆژه‌ د مێژویا كوردیدا، بو یه‌كه‌مین جار كه‌سێ كورد حه‌ز و ئاره‌زویا خوه‌ لسه‌ر سه‌رنڤشتێ خوه‌ ئاشكرا كر. مه‌ دڤێت رێز هه‌بیت بو ئه‌مریكا لێ نابیت ئه‌مریكا وه‌ك بوهارا ٢٠٠٣ دوباره‌ گوینیكا بكه‌ته‌ سه‌رێ مه‌، وی ده‌می لپێشچاڤێ كه‌ڤنه‌ به‌عسیا و ئه‌ڤرۆ لبه‌ر چاڤێ كراس ره‌شێن ده‌وله‌تا فه‌قیهڤه‌. دڤێت مه‌سعود بارزانی په‌یامه‌ك بڤی ره‌نگی بگه‌هینیت ئه‌مریكا. موخابن بو بێده‌نگیا خه‌لكێ مه‌، نوزانم ژ ساویلكیه‌ یانژی ژ كوله‌تیه‌، گه‌له‌ك خوه‌دی ماف دڤێت لسه‌ر جادا با ئه‌ڤرۆ، دڤێت دونیا هه‌ژاند با.
گوتنا منا داوی بو مه‌سعود بارزانی یان دڤێت مروڤ خوه‌ بكاره‌كیڤه‌ نه‌كت ژ خوه‌ مه‌ستر یانژی ده‌ما مروڤ خوه‌ بكاره‌كیڤه‌ دكه‌ت دڤێت ببه‌ته‌ سه‌ری هه‌یا ئه‌گه‌ر مرن تێدا بیت چونكی بپاشكه‌شیێ مروڤ دبیته‌ ساخێ مری و ببه‌رخوه‌دان مروڤ دبیته‌ مریێ ساخ.

‎لدور مالا مه‌

Check Also

ئه‌ڤرۆ ده‌ر ئه‌نجاما هه‌مان عه‌قلیه‌تا سیاسیا دوهیه‌ به‌شێ دووێ

١٩٩٢- ١٩٩٤ باشورێ كوردستانێ ژ یه‌كین هه‌لبژارتن بو وێرانترین شه‌رێ ناڤخوه‌یێ د. شه‌عبان مزوری سه‌ره‌رای …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.