هیڤیا ده‌را خوه‌لیا سه‌را

د. شه‌عبان مزوری
گه‌له‌ك جاران ئه‌م دبێژین مه‌زنا چبو زاروكا نه‌هشتیه‌ مه‌رام بڤێ چه‌ندێ ئه‌و به‌رهه‌مێ گه‌لێری یه‌ كو كومبوی وه‌ك سه‌رئه‌نجامه‌ك ژ سه‌ربور و سه‌رهاتیێن ژیانێ و پێشبینیا پاشه‌رۆژێ. ئه‌ڤ به‌رهه‌مه‌ هنده‌ك جاران تێ بناڤكرن وه‌ك گوتنێن پێشیا كو مه‌به‌ست ژێ نفشێن به‌ری نفشێ سه‌رده‌مێ، هنده‌ك جاران ژی تێ ناڤكرن وه‌ك گوتنێن مه‌زنا مه‌به‌ست ژێ دیسان هێڤێنێ سه‌ربور و ژیانا تاكه‌ كه‌سی یه‌. به‌شه‌ك مه‌زن ژڤی به‌رهه‌می دبیته‌ ره‌وشه‌نبیریه‌ك گلۆبال ئانكو سنورێن نه‌ته‌وی و گه‌لێری ده‌رباس دكه‌ت. پرانیا جاران مروڤ بوچونێن هه‌ڤبه‌ش دبینیت لناڤ گه‌ل و نه‌ته‌وێن جودادا، ئه‌ڤه‌ژی وێ یه‌كێ رادگه‌هینه‌ كو سه‌ره‌رای هنده‌ك جودابونا كو ناسنامه‌ك تایبه‌ت بو هه‌ر نه‌ته‌وه‌ك یان گه‌له‌ك پێكتینه‌ لێ دیسان وه‌ك ئه‌نه‌تۆمیا له‌شێ مروڤی كو لژێر پیستی پرانیا مروڤا وه‌ك هه‌ڤن وه‌سا ئه‌ڤ یه‌كه‌ بو گه‌لان ڤه‌دگه‌ره‌.
ئه‌و گوتن و سه‌ربورێن جاربجار تێن بیرانین مه‌ره‌م ئه‌وه‌ مروڤ یان گه‌ل و جڤاك سوده‌كی بو خوه‌ ژێ وه‌رگره‌. بباوه‌ریا من ‌ كوردان ته‌نها بیر لڤان گوتنا كریه‌ ده‌ما كار بدوماهی هاتیه‌. سود وه‌رنه‌گرتن ژ سه‌ربور و سه‌رهاتیان دبیته‌ ئه‌گه‌را كاره‌ساتا چبو تاكه‌سه‌كی یانژی بو گه‌له‌كی و نه‌ته‌وه‌كێ. ڤه‌گه‌ریانه‌ك چدور یان نێزیك به‌ره‌ف پاشڤه‌ دێ بزه‌لالی بینین كو ئه‌م پشتی ده‌رباسبونا رویدانا تازه‌ تێدگه‌هین و چه‌ندین هه‌مان رویدان دوباره‌بن مه‌ وه‌ك كورد هه‌مان سه‌ره‌ده‌ریا پێشین لگه‌ل كریه یانی مه‌ گرفتاری لگه‌ل فێربونێژی هه‌یه‌.
من بخوه‌ بهه‌زاران جاران گوتیه‌ كو سه‌رنه‌كه‌فتنا گه‌لێ كورد دخه‌باتا خوه‌یا نه‌ته‌وی و گه‌لێری ئه‌گه‌را وێ كورد بخوه‌ بویه‌ به‌ری كه‌سێن ئاسته‌نگه‌ر. كورد نه‌ ژ مێژو، سه‌رهاتی و سه‌ربورێن خوه‌ و نه‌ ژیێن گه‌لێن دن سود وه‌رگرتیه‌. هه‌ر سه‌رده‌مه‌كێ زلهێز و ئیدیولوژیێن خوه‌ هه‌نه‌، دهه‌ر سه‌رده‌مه‌كێدا هنده‌ك گه‌لان ئه‌ڤ زلهێز و ئیدیولوژی دبه‌رژه‌وه‌ندیا خوه‌دا بكارئانینه‌ و گه‌هشتینه‌ گه‌له‌ك ئارمانجا، لێ لهه‌می سه‌رده‌ما كورد كاركه‌ره‌ك باش بویه‌ بو خه‌لكێ دن و وێرانكه‌ر بویه‌ بو ناڤمالا خوه‌.
عه‌بدوللا ئوجه‌لان یه‌كه‌مین بیر مه‌ندێ كورده‌ كو هزركری لسه‌ر دامه‌زراندنا رێكخستنه‌ك كوردی كو هه‌مو پالپشتیا وێ ته‌نها بگه‌لێ كورد بیت، رزكرنا كرنا كوردی ژ مه‌ژیێ كوله‌تیێ برامانا كو كه‌سێ كورد نابه‌ خوه‌ ژ خه‌لكه‌ك دن بچوكتر ناسبكه‌، رزگاركرنا ره‌گه‌زا مێ و دوروستكرنا باوه‌ریا وه‌كهه‌ڤیێ دناڤ جڤاكا كورد دا. بباوه‌ریا من ئه‌ڤ هه‌رسێ خاله‌ وه‌ك خه‌تێن پان دڤێت بێن ناسكرن كو هه‌ر یه‌ك ژوان ب سه‌دا لایه‌نا بخوه‌ڤه‌ دگره‌.
مه‌ گه‌له‌ك جاران گولێ بویه‌ هیڤیا ده‌را خوه‌لیا سه‌را، ره‌شو بده‌ستێ خوه‌ ئه‌گه‌ر دێ ئاڤته‌به‌ت، له‌ دپراكتیكێ دا هه‌رده‌م مه‌ شكه‌ستنا خوه‌ یا گرێدای بپشتدانا لایه‌نێن مه‌ بخوه‌ وه‌ك دوست دیتین. مه‌یێ گوتی ئه‌گه‌ر روسا لموهابادێ پشت لمه‌ نه‌كربا نوكه‌ ئه‌م یه‌ك ژ ده‌وله‌تێن مه‌زن بوین ل هه‌رێمێ، ئه‌گه‌ر په‌یمانا جه‌زائیر نه‌با نوكه‌ ده‌ستهه‌لاتداریا مه‌ كه‌ندئاڤا فارسی هه‌می گرتبو و به‌لكی ناڤێ وێ ئه‌ڤرۆ كه‌ندئاڤا كوردی با، ئه‌گه‌ر خواسته‌كا ئه‌مریكا هه‌با دا ١٩٩١ مه‌ كه‌ته‌ ده‌وله‌ت و سنورێن وێ ل زنجیرا چیایێ حه‌مرین ته‌مام ببا. نوكه‌ژی بریاربده‌ستێن مه‌ ل باشور دبێژن ئه‌مریكا خیانه‌ت لمه‌كر، چونكی ئه‌مریكا دكاریت مه‌ بكه‌ت ده‌وله‌ت، دكاریت نه‌هێلیت عیراق هێرشێ بكه‌ت سه‌ر باشور. وه‌ك ئه‌م دزانین نهێزیكترین دوست بو ئه‌مریكا و ئه‌وروپا ئیسرائیله‌، باشه‌ گه‌لو كه‌سێ بو ئوسرائیل شه‌ركریه‌ یانژی خه‌لكێ وێ بخوه‌ به‌رامبه‌ر هه‌مو عه‌ره‌با و جیهانا ئیسلامێ به‌رخوه‌دانكریه‌.
عه‌بدوللا ئوجه‌لان گوت دڤێت كورد بئابوریا خوه‌ خوه‌ ئاڤاكه‌ و بهیڤیا خه‌لكه‌ خوه‌ سه‌رهه‌لدانا بكه‌ وێ ده‌مێ تو دێ خه‌لكێ دنژی نه‌چاركی لكێله‌كا ته‌ راوه‌ستێن. په‌كه‌كێ هه‌ر لده‌ستپێكا رێكخستنا خوه‌ پشتا خوه‌ بگه‌لێ خوه‌ گه‌رم كر، پاره‌ ژ كوردان كومدكر چونكه‌ باش دزانی كه‌سێ نانێ وی دده‌ستێ خه‌لكه‌كیدا بیت دێ بریارا ویژی دهه‌مان ده‌ستدا بیت. ره‌وش و مه‌رجێن خه‌بات و تێكوشینێ تێن گوهارتن، وه‌ك ئه‌م هه‌می دزانین نه‌ دوست و نه‌ نه‌یارێ به‌رده‌وام هه‌نه‌ لێ به‌رژه‌وه‌ندیێن به‌رده‌وام هه‌نه. دبه‌ لهنده‌ك قوناغا به‌رژه‌وه‌ندیێن مروڤی و نه‌یارێ دوهی بگه‌هن هه‌ڤ لێ نابه‌ تو ژبو وی كاركی، دڤێت هه‌ركه‌س بو خوه‌ كاركه‌ت. یه‌ك ژ ئه‌گه‌رێن هه‌رێن وێرانكه‌ر د ئه‌وا ژێرا دبێژن خه‌باتا نه‌ته‌ویا كوردی ئه‌وه‌ كو هه‌رده‌م كاركه‌ره‌ك باش بویه‌ بو هه‌ڤالبه‌ندێن خوه‌ و خوه‌ ژبیركریه‌‌. به‌ره‌ڤاژی ڤێ چه‌ندێ ئه‌م دبینین بفه‌لسه‌فا ئوجه‌لان یه‌كه‌مین هێز هاتدوروست كرن كو دبێژیت خه‌باتا من ته‌نها بو گه‌لێ كورده‌ و گه‌لێن لكودستانێ دژین. ئه‌م هه‌ڤكاریێ بهه‌ركه‌سی را دكارین بكه‌ین لێ كار ته‌نها ژبو خوه‌دكه‌ین.

‎لدور مالا مه‌

Check Also

سه‌رشوری یان مروڤاتی

د. شه‌عبان مزوری سه‌ره‌رای ره‌وشا دژوارا خه‌لكێ مه‌ بگشتی تێدا ده‌رباس دبه‌ و بتایبه‌تی ل …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.