هه‌ڤپه‌یمانا ته‌ڤگه‌را ئازاد و جولانه‌وه‌ی نه‌وه‌ی نوێ

د. شه‌عبان مزوری
ده‌مه‌ك زۆره‌ سه‌روكێ جولانه‌وه‌ی نه‌وه‌ی نوێ شاسوار عه‌بدلواحد باسا دوروستكرنا هه‌ڤپه‌یمانیه‌كا تازه‌ لناڤبه‌را رێكخستنا خوه‌ و هنده‌ك لایه‌نێن دن لباشورێ كوردستانێ بو هه‌لبژارتنێن پێشمه‌. بتایبه‌تی پشتی راگه‌هاندنا هه‌ڤكاریا گۆران، كۆمه‌له‌ و ره‌وتی به‌رهه‌م سالح پتر دیمه‌ن زه‌لال بو كو ئه‌لترناتیڤه‌ك ده‌رڤه‌ی ته‌ڤگه‌را ئازاد كه‌سه‌ك دن وه‌سا به‌رچاڤ نامینه‌ ژ جولانه‌وه‌ی نوێ را. هه‌رچه‌نده‌ ئه‌ڤ هه‌ڤپه‌یمانیه بو گه‌له‌ك كه‌سان ژمه‌ دبیت جهێ سه‌رسومانێ بیت.‌ لێ خوه‌ندنه‌ك نێزیك بو ته‌ڤگه‌را ئازادی كو نایێت ڤه‌شارتن ره‌وته‌ك ئاپوچیه‌ و ژێر ناڤێن جودا بسالان خه‌باتێ دكه‌ لباشورێ كوردستانێ ده‌ ئاسانكاریه‌كێ باش كه‌ت كانێ بوچی ئه‌ڤ هه‌ڤپه‌یمانه‌ لگه‌ل جولانه‌وه‌ی نه‌وه‌ی نوێ كریه‌.
ئه‌م پرانیا جاران ژ خالان جودا لناڤبه‌را تشتان، كه‌سان، بزاڤان، هزران…هتد ده‌ست پێدكه‌ین له‌وما هیڤیا نه‌زیك بونێ نامینه‌، لێ به‌ره‌ڤاژی ڤێ چه‌ندێ ئه‌گه‌ر ئه‌م ژ خالێن هه‌ڤپشك ده‌ست پێبكه‌ین دێ‌ بینین ژ یه‌ك نه‌ نه‌زیك بون كاره‌ك نامویه‌. ته‌ڤگه‌را ئازاد وه‌ك مه‌ گوت تێ ناسكرن بته‌ڤگه‌ره‌ك ئاپوچی و چه‌پره‌و و لگۆر تێگه‌هشتنا من نه‌وه‌ی نوێ وه‌ك پتر ته‌ڤگه‌ره‌ك لیبرال و سه‌نتریست تێناسكرن لێ ژبو ڤێ سه‌رده‌ما ئه‌ڤرۆ هه‌مان ئارمانج هه‌نه‌ یێن ته‌ڤگه‌رێ.
جولانه‌وه‌ی نه‌وه‌ی نوێ براستی پر زانینێن من لسه‌ر نینن ژده‌رڤه‌ی هنده‌ك گۆتنێن سه‌روكێ وێ و هنده‌ك ئه‌ندامێن ده‌سته‌كا رێڤه‌به‌ریا وان، لێ بو من براستی پرانیا ئه‌ڤ كه‌سێن تێن پێش دناڤ جولانا نه‌وه‌ی نوێ تا رادده‌ك باش كه‌سێن خوه‌دی دیتنن و بوێرن. جودا ژ گه‌له‌ك رێكخستنێن ڤان سالا هاتین دوروستكرن نه‌وه‌ی نوێ جولانه‌وه‌یه‌ك پر ببزاڤه‌، هه‌ولدده‌ت لهه‌رێمێن جودایێن كوردستانێ كاربكه‌ت، ئاراستێ ره‌خنا یانژی هێرشكرن بو سه‌ر لایه‌نێن سیاسی ل باشورێ كوردستانێ هه‌ڤسه‌نگیه‌ك هه‌یه‌. وه‌ك ئه‌م دوزانین پرانیا لایه‌نێن سیاسی لباشورێ وه‌لات خوه‌دی هێزێن له‌شكه‌رینه‌، هنده‌ك ئاشكرا و هنده‌ك وه‌ك شانێن ڤه‌شارتی. نه‌وه‌ی نوێ هێزا له‌شكه‌ری نینه‌ و هه‌بونا ته‌ڤگه‌ڕه‌ لكێله‌كا وان تێ رامانا هه‌بونا په‌كه‌كێ لپشتا وان، ئه‌ڤ چه‌نده‌ژی وا دكه‌ت كو هێزێن دن یێن خوه‌دی چه‌كدار زوبزو خوه‌ توشی نه‌وه‌ی نوێ نه‌كه‌ن.
ته‌ڤگه‌را ئازاد دبه‌ هنده‌ك بێژن چما به‌ره‌ك یان هه‌ڤپه‌یمانه‌ك لگه‌ل هێزه‌ك دن دوروست نه‌كرن. پرانیا هێزێن ئه‌ڤرۆ ل باشورێ كوردستانێ بهه‌می شیانا خوه‌ شه‌رێ ته‌ڤگه‌رێ كرینه‌، ئاسته‌نگ ژێرا دوروستكرینه‌، ژ هه‌مو چالاكیان بێپاركرینه‌، هیچ ده‌ما یه‌ك ژڤان بزاڤا ته‌ڤگه‌ر بو چالاكیه‌ك خوه‌ بانگ نه‌كریه‌. دهه‌مو هرلبژارتناندا ژده‌رڤه‌ی ٢٠١٣ ته‌ڤگه‌ر ده‌ستهه‌لاتدارێن بریارده‌ر لژێر بوهانه‌یێن جودا جودا ژ به‌شداریا پروسێسا سیاسیا باشور و عیراقێ دورخستیه، پارتێن دن یێن به‌شداری ده‌ستهه‌لاتێ یانژی پرۆسێسا سیاسی هه‌رده‌م یان پشته‌ڤانی بو ده‌ستهه‌لاتدارا نیشان دایه‌ یانژی بێ ده‌نگی هه‌لبژارتیه‌. تشته‌ك بلا ئه‌شكه‌ره‌ ژبو وه‌ هه‌میا كو هیچ‌ هێزه‌ك نینه‌ ل باشور ژ ترسێن توركا هه‌ڤپه‌یمانه‌كێ بكه‌ لگه‌ل ته‌ڤگه‌را ئازاد.

 

‎لدور مالا مه‌

Check Also

قه‌نجی لكرمانجی نابیت؟؟؟؟؟؟؟؟

د.شه‌عبان مزوری بسالانه‌ من لگه‌ل زۆر هه‌ڤال و تێكه‌لێن خوه‌ باسی ڤێ گوتنا هه‌نێ كریه. …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.