سوپاس كو چوار مه‌لیون بون نه‌ چل؟

د. شه‌عبان مزوری
هه‌می تشته‌ك بویه‌ سه‌یر ل باشورێ كوردستانێ بو گه‌له‌ك ژ خه‌لكێ مه‌، هه‌ر چه‌نده‌ پرانیا كارێن هاتین كرن ئاسایی نه‌. ڤان رۆژان پرسا خانه‌نشینیا په‌رله‌مێنتارێن مه بویه‌ جهێ گه‌نگه‌شێ و هنده‌ك جاران رویه‌ك ره‌خنه‌ و نه‌رازیبون بخوه‌ڤه‌ گرتیه‌. بو خه‌لكێ پرسا خانه‌نشینیا ١١١ په‌رله‌مێنتارێن ئه‌ڤرۆ بویه‌ كێشه‌ هوین‌ لكویرێ بون ڤان خولێن ده‌رباس بوی؟ هه‌ركه‌سێ لدور و به‌را خوه‌ ته‌ماشه‌كه‌ت دێ بینیت بده‌یان بێ ره‌وشت و سه‌رسه‌ری لژێر ناڤێن جودا و ب پلێن جودا هاتینه‌ خانه‌نشین كرن، بهه‌زارا زه‌ڤی هاتینه‌ ته‌خشان و په‌خشان كرن. بسه‌دا خوێری لژێر ناڤێ پاسه‌وانێن كه‌سایه‌تی ژمارێن جودایێن موچا وه‌ردگرن. باشه‌ گه‌لو په‌رله‌مێنتارێن خولێن ده‌رباسبوی موچێ خانه‌نشینیا وان چه‌نده‌؟ چه‌ند زه‌ڤی وه‌رگرتبون؟ چه‌ند پاسه‌وان هه‌یا ئه‌ڤرۆ هه‌نه‌؟
هنده‌ك دبێژن مانێ ئه‌ڤێ خولێ په‌رله‌مانی ته‌نیا نیڤ ده‌وام یاكری چونكی دو سالان ده‌رگه‌هێ په‌رله‌مانی یێ گرتی بو، به‌ری ده‌ست خوه‌شیێ لوی كه‌سیبكه‌م یێ په‌رله‌مان داخستی، ئه‌ز ژ خوه‌ و هه‌وه‌ دپرسم باشه‌ گه‌لو ده‌ما په‌رله‌مان لكار چكار دكر ژبلی هاریكاریا كه‌س و كارێن خوه‌، زۆرنا لێدان بو پارتێن خوه‌ و په‌یداكرنا بژێوا ژیانا خوه‌. باشه‌ په‌رله‌مێنته‌رێن پێشی شوققه‌ وه‌ردگرتن بموفت، لێ نوزانم یێن ئه‌ڤرۆ وه‌رگرتینه‌ یان نه‌. ئه‌م باسا دادپه‌روه‌ریێ دكین و نابیت غه‌در لڤان په‌رله‌مێنتاران بێت كرن ژبه‌ر هه‌ر هویه‌كا هه‌ی. دڤێت خوه‌دان لده‌نگێن خوه‌ ده‌ركه‌ڤن و نه‌هێلن نونه‌رێن وه‌ وه‌ك هه‌وه‌ ده‌ست ڤالا و برسی بن، ناڤمالا وان جوان راخستی نه‌به‌، چونكی ئه‌ڤه‌ هه‌می دێبیته جهێ شه‌رمزاریێ بو وه‌.
١١١ په‌رله‌مێنتار هه‌می خوه‌دی ده‌نگێ ملله‌تینه‌، خه‌لكێ ده‌نگدایه‌ ژ بو تێرخواری بن، مه‌ترسی لسه‌ر پاشه‌رۆژا زاروكێن وان نه‌بیت. باشه‌ ئه‌م بێ ده‌نگ دبین هه‌مبه‌ر سه‌ركرده‌یێن بێ موچه‌ و ملیاردێر و ملیونێر لێ گه‌ریا خوه‌ ددرینین ژبه‌ر كو نونه‌رێ مه‌ ل په‌رله‌مانی ٤ ملیون دیانار وه‌رگریت. ئه‌م بێ ده‌نگ دبین كو سه‌ركردێن مه‌ ژبو ددان ئێشه‌كێ، پرسكه‌كێ، قه‌پس بونه‌كێ یانژی زكچونه‌كێ بفروكێن تایبه‌ت بچن نه‌خوه‌شخانێن ئه‌وروپا و مه‌ چاڤ بموچا په‌رله‌مێنتارێ خوه‌ رانه‌بیت كو هه‌ما نه‌بیت بپاسێ بكاریت بچیت توركی یان ئیرانێ ژ بو پرچا خوه‌ بچینیت.
باشه‌ من نه‌دیت كه‌سه‌ك خرڤه‌بونه‌كێ، خوه‌پیشاندانه‌كێ یان هنده‌ك ئیمزا كومكه‌ت ل دژی ده‌زگه‌هێ سه‌روكاتیا هه‌رێمێ. باشه‌ ده‌ما مه‌ سه‌روك نه‌بیت سه‌روك دیوانێ سه‌روكاتیا هه‌رێمێ بونا وی بوچیه‌، له‌شكه‌ره‌كێ راوێژكاران بوچیه‌، بهه‌زارا پاسه‌وان زێره‌ڤانێن كێنه‌ كو بناڤێ سه‌روكێ هه‌رێمێ هه‌نه‌ و سه‌روك بخوه‌ نینه‌. ئه‌رێ گه‌لو وه‌ پرس ژخوه‌ كریه‌ كو دده‌مه‌كیدا مه‌ قه‌یران هه‌یه‌ ئیمپراتوریا راگه‌یاندنا ڤان پارتا یا به‌رده‌وام و خه‌رجێ وان بسه‌دا ملیون دۆلاره‌ سالانه‌.
نمونه‌ زۆرن و تازه‌ بو چوار ملیون دیناركێن خانه‌نشینیا په‌رله‌مێنتاران خوه‌ نه‌كه‌ مێرخاس و مافپه‌روه‌ر. ژلایێ منڤه‌ گه‌رده‌نا وان ئازا ما هه‌كه‌ ٤٠ ملیون بان دا چكه‌ین؟
‌ ‌

‎لدور مالا مه‌

Check Also

یه‌په‌ژه‌ ل ژنێن جیهانێ پیروزبیت

د. شه‌عبان مزوری ٨ ئاڤدارێ لگور كه‌له‌نده‌را دایكبونا عیسای تێ ناسكرن وه‌ك رۆژا جیهانیا ژنێ …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.