كه‌نگی گه‌لێ باشور دێ هه‌لویست هه‌بیت؟

د.شه‌عبان مزوری
هه‌ر ئه‌ڤرۆ ده‌ما من هزر دكر تشتك بنڤیسن لسه‌ر توركێن دورونده‌، هوڤ و هێرشا وان یا داوی لسه‌ر باشورێ وه‌لات، ڤه‌مراندنا چوار خه‌تیرێن بالاكایه‌تی لگه‌ل زمان درێژ و سه‌رسه‌ریه‌كێ ئه‌فسه‌رێ توركمه‌نێ عیراقێ، چاڤێ من بنڤیسینا به‌رێزه‌كی كه‌فت لفه‌یسبوكێ كو دبێژیت دڤێت مروڤ نڤیسین و ئاخفتنێ ژێك جوداكه‌، ئه‌گه‌ر ئه‌ز شاش د رێزداری نه‌گه‌هشتبم مه‌به‌ستا وی بگشتی مروڤ ده‌ما دئاخڤه‌ دبه‌ هنده‌ك په‌یڤ یان رسته‌ بێی حه‌زا مروڤی ده‌ركه‌ڤن، لێ ده‌ما مروڤ نڤیسینێ دكه‌ دڤێت پتر خوه‌ كونترۆل بكه‌. من گومان لسه‌ر گوتنا ڤی جامێری نینه و دجهێ خوه‌دایه‌ له‌ براستی بو من گه‌له‌ك جاران وه‌ك من گوتیه‌ وی ده‌می نه‌ته‌وه‌ پێش دچه‌ ده‌ما هه‌میا بهه‌ڤرا رێز هه‌به‌ و دههه‌مان ده‌مده‌ هه‌می بێ رێزبن. گه‌له‌ك جاران ئازرین و توندره‌وی‌ ل هه‌مبه‌ر تاكه‌كه‌سی یان جڤاكێ نیشانا هوشیاربونێ یه‌.ئه‌ڤ پێشه‌كی یه‌ من بو خوه‌ به‌لكی وه‌ك بوهانه‌ دیتبیت كانێ بوچی گه‌له‌ك جاران توندی و دژواری د نڤیسینێن من دا هه‌بیت، ئه‌ز بخوه‌ نكارم لگه‌ل دورویا بم. ئه‌ز نه‌شێم لگه‌ل نێزیكترین كه‌سێ خوه‌ چاڤپوشیێ بكه‌م.
ببلند بونا ده‌نگێ باله‌فرێن توركا لسه‌ر خاكا باشورێ وه‌لات، سوتنا وارگه‌ و كوشتنا خه‌لكێ مه‌ گورێن ده‌ڤگلیزێن توركمه‌ن ره‌وینا وان بلند دبه‌، ئه‌فسه‌ره‌ك بێ ره‌وشت سه‌ر ب به‌ره‌یا توركمه‌ن گه‌فان ل نه‌ته‌وا كورد دكه‌ ل كه‌ركوكا دلێ په‌ده‌كێ و قودسا یه‌نه‌كێ و باسا كوردێ جوامێر و كوردێ خوێری دكه‌، ئه‌ڤه‌ بو به‌رهه‌مێ ڤان هه‌ردو هێزان، بوینه‌ پێترانكێن توركمه‌نا. باش ته‌ماشه‌ی ڤی سه‌رسه‌ری بكه‌ن لملێ راستێ ئالا عیراقێ هه‌یه‌ و لملێ چه‌پێ ئالا خوێریا به‌ره‌ی توركمه‌ن هه‌یه‌. لڤێره‌ چه‌ند پرس بخوه‌ ده‌ردكه‌ڤن هولێ. ئه‌گه‌ر ئه‌ڤ سه‌رسه‌ریه‌ یه‌نه‌كه‌با و گه‌ف ل په‌ده‌كێ كربان، گه‌لو یه‌نه‌كه‌ بسه‌ر و بنڤه‌ نه‌دهاته‌ سۆتن ل هه‌رێما زه‌ر؟ به‌ره‌ڤاژی هندێ ئه‌گه‌ر ئه‌ڤ كه‌سه‌ په‌ده‌كه‌ با. باشه‌ بوچی په‌ده‌كه‌ و یه‌نه‌كا ….. بێ ده‌نگن هه‌مبه‌ر ڤی سه‌رسه‌ری؟
لڤێره‌ بخوه‌ پرسه‌ك دن تێ پێش باشه‌ گه‌لو مه‌ كوردا هه‌ر ژ سه‌روك كومار، جێگرێ سه‌روك په‌رله‌مان، جێگرێ سه‌روك وه‌زیران، سه‌ر له‌شكه‌ر یانژی وه‌ك هنده‌كا پێخوه‌ش بێژنێ سوپا سالار، بده‌یان ئه‌فسه‌‌ر و وه‌زیر لسه‌ر ئاستێ حوكمه‌تا عیراقێ بوچی كه‌سێ ژڤان كوردان جه‌ساره‌تا هندێ نه‌بو ئالا هه‌رێما وه‌ك ئه‌و دبێژن كوردستانا عیراقێ بملێ خوه‌ ڤه‌كه‌ن، بوچی ته‌نها هزرا ئاڤاكرنا كوچك و ته‌لارا دكر، فره‌ ژنیێ پێشبێخن. بو نمونه‌ من بخوه‌ هه‌می سه‌رده‌ما هوشیار زێباری وه‌زیرێ ده‌رڤه‌ی عیراقێ په‌یڤا هه‌رێما كوردستانێ ژ وی نه‌بهیستیه‌، هه‌رده‌م ته‌نها په‌یڤا هه‌رێم من بهیستیه‌ له‌وما جاره‌كێ ل راگه‌هاندنێ من گوت پێویسته‌ هوشیار هه‌رێمێ دوروست بناڤكه‌ت چونكی هیچ نه‌بیت هه‌رێما دارفور ژی هه‌یه‌ بو خه‌لك بزانیت مه‌به‌ستا وی كویژان هه‌رێمه‌. من یه‌ك به‌رپرسێ كورد لبه‌غدا نه‌دیتیه‌ ئالا هه‌رێمێ لسه‌ر مێزا خوه ‌دانابیت.
بلا به‌سبیت ئه‌ڤ ملپانیه‌ بو نه‌یارا و مێرخاسی بو جانێ خوه‌، چه‌كدارێن په‌ده‌كێ و یه‌نه‌كێ مێرخاسن بو كوشتنا گه‌نجێن كورد ژبه‌ر ده‌نگێ خوه‌ بلندكن دژی تالانیا په‌ده‌كێ و یه‌نه‌كێ، یانژی چه‌ند به‌ره‌ك وه‌شاندبن باره‌گایێن وان یانژی وه‌ك په‌ده‌كه‌ و یه‌نه‌كه‌ دبێژن بێرێزی بپیروزبایێن وان كرینه‌…هتد ژ بوهانێن بێ نرخ. ژبو گوتنه‌كا خانمه‌كا كورد زونا زه‌ر هه‌می له‌رزی، بده‌یان هه‌زارا خه‌لك و چه‌كدارێن خوه‌ داخستن سه‌ر جادان و كرێتی نه‌ما پێ نه‌كری، لێ هه‌مبه‌ر ئه‌فسه‌ره‌ك تورك هه‌میا بهه‌ڤرا خوه‌ گوهشور كر.

بو من كوشتنا وان چوار خورتان بده‌ستێ توركێن چه‌په‌ل نیشانا به‌رخوه‌دانا چوار پارچانه‌ و هه‌ولدانا ڤه‌مراندنا چوار شه‌مالانه‌، گه‌لێ باشور بگشتی دڤێت خوه‌ ئازاد كه‌ت ژ كوتانا په‌ده‌كێ و یه‌نه‌كێ، ببیت خوه‌دان هه‌لویست و رێنه‌ده‌ت كارێن ده‌وله‌تا تورك یانژی ده‌وله‌ته‌ك دن بێ كارڤه‌دان ده‌رباسبه‌. ببه‌لاڤ بونا نوچێ كوشتنا وان چوار خورتان پێویست بو بسه‌دان هه‌زارا كوردێن باشور رژیابان سه‌ر جادا، ئه‌گه‌ر هون بێ ده‌نگ و بێ هه‌لویست بمینن دڤێ ره‌وشا رۆژهه‌لاتا ناڤین تێدا ده‌رباس دبه‌، هه‌ركه‌سێ رێكا وی بناڤوه‌كه‌فت وێ شه‌ققا خوه‌ لوه‌ بوه‌شینه‌.

‎لدور مالا مه‌

Check Also

هه‌یا ته‌ پێغه‌مبه‌ر هه‌بیت ئازاد نابی

د.شه‌عبان مزوری پرسا كوله‌تی و ئازادی یه‌كه‌ ژ پرسێن هه‌ره‌ زۆر ئاخفتن و نڤیسین لسه‌ر …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.