ژ یه‌ك داگیركه‌ر بون سێ و هه‌ربژی سه‌روك

د. شه‌عبان مزوری ستوكهۆلم
له‌شكه‌ركێشیا ده‌وله‌تا داگیركه‌را تورك بو ناڤ هینده‌ك ده‌ڤه‌رێن دن ژ باشورێ كوردستان موخابن بویه‌ جهێ گه‌نگه‌شه‌ك مه‌زن لناڤ گه‌له‌ك كه‌سێن مه‌یێن خوه‌ بوه‌لاتپارێز و بسپور ناس دكه‌ن. ده‌ما نڤیسینێن ڤان كه‌سان دخوینی دبێژی قه‌ی دوهی تازه‌ له‌شكه‌رێ توركی ده‌رباس بویه‌ ناڤ خاكا باشور، دڤێت مروڤ بپرسیت ئه‌ڤه‌ چ وه‌لاته‌ خه‌لكێ ره‌وشه‌نبیرێ وی خوه‌دان هزر و به‌رهه‌مێن بازارا بالانه‌، بیركرنا وان كێماسی سێ بابا پاشڤه‌دگه‌ریت، رۆژا گه‌شا وان پتر نینه‌ ژ تاڤه‌هه‌یڤه‌كا كه‌و چه‌رین و په‌لا زستانا وان بته‌نێ عه‌وره‌كێ دره‌وینێ بوهارێیه‌ و هه‌می ئاڤسبونا وی نابیته‌ پتر ژ بارانه‌كا گورگی. ملله‌ت چه‌وا دێ بیته‌ خوه‌دی هه‌بون ئه‌ڤه‌ خه‌تیرێت وی بن.
تورێن كۆمه‌لایه‌تی، مالپه‌ر، گۆڤار، رادیو و ته‌له‌ڤزیون، بكورتی هه‌می ره‌نگێن راگه‌هاندنێ پلوس چایخانه‌، شه‌ڤبێری، دیوانخانێت شینی و شادی مژویلی هندێنه‌ كانێ چه‌ند كیلومه‌تر ماینه‌ له‌شكه‌رێ تورك بگه‌هیته‌ پایته‌ختا هه‌رێما كوردستانا عیراقێ. باشه‌ گه‌لو هه‌ر ژ پایزا ١٩٩٦ هه‌یا ئه‌ڤرۆ كه‌نگی هه‌ولێر یا ڤالا بو ژ له‌شكه‌ر و میتا توركا. وه‌ك ئه‌م هه‌می دزانین ئه‌ڤه‌ ٢٦ ساله‌ توركیا ل پرترین هه‌رێمێن ژێر ده‌ستێ په‌ده‌كێ له‌شكه‌رێ خوه‌ بجهكرییه‌ و لگور پێویستیا خوه‌ به‌لاڤ و كێمكرن و زێده‌كرنا له‌شكه‌ری كریه‌، له‌وما پرسا من بوچی هه‌رده‌ما توركا هنده‌ك له‌شكه‌رێن دن به‌لاڤكرن ل هه‌رێما په‌ده‌كێ دێ وه‌ك كاره‌ك تازه‌ ته‌ماشه‌كه‌ن، هه‌روه‌سا ئه‌ڤ چه‌نده‌ ڤه‌دگه‌ریت بهه‌مان شێوه‌ بو هاتن و به‌لاڤبونا پاسدارا و ده‌سگه‌هێن سیخوریێن ئیرانێ ل هه‌رێمێن ژێر ده‌ستهه‌لاتداریا یه‌نه‌كێ.
تشتێ هه‌رێ بالكێش ده‌ما هنده‌ك بێ ره‌وشت لسه‌ر میدیایێن هنده‌ك لایه‌ن و دیڤه‌لانكێن وان دبێژن ئه‌م نكارین رێگریێ لێ بكه‌ین چونكی ئه‌ڤه‌ ده‌رڤه‌ی ده‌ستهه‌لاتداریا مه‌یه‌ و ئه‌ڤه‌ سه‌رئه‌نجاما هنده‌ك رێكه‌فتنێن ناڤبه‌را حوكمه‌تا ناوه‌ندی و توركیانه‌، كه‌سێ ڤانا ناسنه‌كه‌ت دێ بێژیت ئه‌ڤه‌ دا له‌شكه‌رێ توركیا ته‌فر و ته‌ناكه‌ن ئه‌گه‌ر رێ دابان لدژی له‌شكه‌رێ تورك شه‌ربكه‌ن، لێ وه‌سا دیاره‌ براده‌رێن مه‌ ژبیر كرن كو دوهی ریڤیێن ده‌شتا شنگالێ و كه‌ركوك بون.
به‌ردوامبونا هه‌بون و نویكرنا ڤان جوره‌ په‌یمانا لناڤبه‌را به‌غدا و داگیكه‌رێن دن یێن كوردستانێ جهێ سه‌رسورمانێ یه‌. ئه‌ڤه‌ بخوه‌ به‌سه‌ كو ئه‌م بزانین ئه‌ڤه‌ هنده‌ ساله‌ كارێ ڤان نه‌جامێرا چیه‌ ل به‌غدا و پرسێن وان یێن رۆژه‌ڤێ چبون. وه‌ك ئه‌م دزانین كێم زێده‌ هه‌می ئه‌كته‌رێن سه‌ره‌كی ل بیڤا سیاسیا باشورێ وه‌لات لژێر ناڤێ هێزه‌ك كه‌ڤن یان تازه‌ به‌شداربویه‌ د ده‌ستهه‌لاتداریا عیراقێ دا، هه‌میا بهه‌ڤرا ئه‌ندام و لایه‌نگرێن خوه‌ هه‌بونه‌ د حوكمه‌تا به‌غدادا و په‌رله‌مانێ عیراقێ دا، باشه‌ گه‌لو كه‌سه‌ك ژڤان بوچی رۆژه‌كێ نه‌گوتن بلا پێداجونه‌ك بێته‌ كرن لسه‌ر ڤان په‌یمانێن حوكمه‌تا ناڤه‌ند و هه‌ر په‌یمانا لسه‌ر بنگه‌هێ دوژمنیا گه‌لێ كورد هاتبیت كرن دڤێت بێ دودل بێت هه‌لوه‌شاندن. ژبو مێژو ئه‌ڤ گوتنه‌ من لگه‌له‌ك جهان گوتیه‌ و ل میدیا ژی چه‌ند جار من باسكریه‌ هه‌ر پشتی هه‌لوه‌شاندنا رژێما سه‌ددام حوسه‌ین لێ گوهدار نه‌بو. گه‌لو چ ژ رۆژه‌ڤا كوردا هات گوهارتن ده‌ما جه‌لال تاله‌بانی سه‌روك كومار بو ژبلی كو بڤی پوسته‌ی چه‌ند ملیارد دولاره‌ك دن لخوه‌ زێده‌كرن، هه‌روه‌سا جێگرێ سه‌روكێ په‌رله‌مانی. ده‌ما هوشیار زێباری وه‌زیرێ ده‌رڤه‌ جودابونه‌ك لگه‌ل ئه‌ڤرو هه‌یه‌ ژبلی ده‌ركرنا خزم و كه‌سێن وی كو بگه‌نده‌لی ل وه‌زاره‌تا ده‌رڤه‌ دامه‌زراندین هه‌روه‌سا ژ ده‌ستا دانا چه‌ند سه‌د ملیون دۆلاره‌كا.
سه‌یره‌ هه‌ر لایه‌نێ لباشورێ وه‌لات به‌رێ خوه‌ دده‌یێ دبینی یێ په‌سن و سترانا ببه‌ژن و بالا سه‌روكێ خوه‌ دبێژیت، لدیوانخانا په‌یڤێن ویێن فه‌لسه‌فی شروڤه‌دكه‌ن و دبێژن هه‌ر بژی سه‌روك. ما ژڤی گه‌لی ساویلكه‌تر هه‌نه‌ لدره‌ك دن ل جیهانێ كو سه‌روكێن سوینا رزگاكرنێ ژیه‌ك داگیركر بكه‌ته‌ سێ داگیركه‌ر و دیسان بێژن هه‌ربژی سه‌روك.

‎لدور مالا مه‌

Check Also

خوه‌دێ لته‌‌ بده‌ت یان لوانا؟

د.شه‌عبان مزوری گه‌له‌ك جاران من گوتیه‌ بموخابنیڤه‌ كو بریارده‌رێن كورد لباشورێ وه‌لات نه‌ ئارمانج نه‌ …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.