پێچا خوه‌ هه‌لده‌

ئارمانج گوهه‌رزی

خێرە تە هەستێن عەشقا خوە ریس بەردانە ڤان کولانا ، هەیا پیرە و کالێن مە ژی ل گوفکۆ بانکا ل سەر ب شەڕ چوونە ، دێ بێژی بەر دەرگەهێ خانیکێ وە مەیدانا جەنگێ یە مروڤ ژ بەر ماکێن تەخمێن ددان و گوپالێن وان دهەلنگڤید ،چەند بێ ئوولی تو ، وێ روژێ ل بەر دیتنا جلێن تە یێن ژێرین ل سەر رستکا بانی . دابێژی ل سەر بانکێن گوندی روژا ئاگر هەلکرنێ یە ،

بابێ تە چەند ئەردێ دێهمی و ئاڤی کێلایە ، وەکی گایێن جووتی پشت ل ڤان گەنج و سنێلا کۆل کرییە ، ئیڤاری ب رێکا مالڤە قونێن هەمیا وەک بەتکێن د جوکادا ژبوو ڤیلا و لایێ دن دچن .هەیلا بێ ئوولا بێ ئوول . زەرەکا ویژدانێ ، هەما بلا ل سەر بەختێ شێخ و مەلێ بیت ، ل ڤان گوندیێن هەژار بگەرە .
ژ خەیالا دیتنا تە هەر شەڤ لیلەت و قەدرە . ل سپێدێ ژی وەک مروڤێن مەی ڤەخور هەر ئیک ژ دەف خوە بەحس ل هاتنە خارا تە ، بوو دەف خوەدکەت . هەمی یێن بوویە پەیامبەر .

وێ روژێ ل سەر خارنێ داپیرا من بو ئیکەمین جار بوو ژ دل کەنی و بەروڤاژی کەتی وەکی زاروکا پێن خوە ژی دگەل کەنی را دهاڤێتن دا بێژی مریشکا سەر ژێکرییە .چمکو مەلا ل دەمێ بانگی سەردا چوو و گوت حەیە علا مالا گولێ .

ئەڤه‌ تە چ ب سەرێ گوندی ئانی ، شەڤا دن ل بەر دەرگەهێ مزگەفتێ شەرنیخا صوفیا بوو ، مە گوت ب حال چوونە د زکری دا لەورا هاتنە بەر دەرگەهی ، لێ دیار بوو صوفی مەلێ سەرا گولێ و بانگی ل هەڤ نەکربوو بەربوونە هەڤ.
ما خودێ تو ژ چ ئافراندی ؟ مەتکا منا پێنجی سالی ژی ژ مێرێ خوە دترسیت ، پشتی خارنێ دەرگەهی هەشت دادئیخیت دبێژیت دز مشەبوونە ، لێ وێ شەڤا دن ل پال پەنجەرێ من گوهـ ل جرێ مەتکا خوو بو دگەل خالێ خوە . کۆ دگوتێ گولێ چاڤێن ل تە تاری کری ئەو تیتنا هەر سال مە دفروت و تێرا کێشانا تەژی دکر . لێ پشتی گولێ هاتی هەرشەڤ تویێ گونیەکێ بو بابێ وی دبەی ب هەجەتا دیتنا گولێ ، تە مال ل مە خرابکر . ئەژی وەکۆ پیرا خوە ل پشت پەنجەرێ ژ کەنیا دا بەروڤاژی بووم .
وەیلا دین سز گولێ تە چ ب سەرێ خەلکێ ڤی گوندی کر. گولێ تو دزانی من کەرب ژ تە ڤەنەدبوون ، لێ مە تەنها تەنەکا برنجی مابوو بابێ من ب دزیڤە بوو وە ئانی بوو ، ل وێ روژێ وەرە هەیا نها تە و جانیا تە نفرەت دکەم ، ژبەر قیبلێ رادوەستم ، هەرچەند دزانم دعایێن من ل بانی سەرناکەڤن ، لێ منێ گوتیە پیرا خوە دوعا ل جوانیا تە بکەت ، بەس ژ بەختێ خراب گوتی گونهە ئەز وەناکەم ، گەنجە ، لێ ئەز شێم دوعا بابێ تە بکەم ، من ژی نەهێلا دزانم بخودێ ئەم بەر ئافاتین دوعایەکێ لێ بکەت بخودێ سپێدێ ئەمێ ل سەر گورستانێ . ژبلێ چوونا تەنەکا برنجی دێ بابێ من ژی کەیە قوربانێ خوە .
گولێ بێ ئوولا بێ ئوول . هەی دین سز ، بخودێ هوسا بچیت بابێ تە دێ بیتە خودانێ ملکێ گوندی هەمیێ ، چمکو ئیدی یا وەلێ هاتی خەلکێ زەڤیا ددەتە بابێ تە ، ترسم مامێ من ژی دەوسا بابێ من گرتبیت چمکو هینا مەلکێ بابینیێ ژێکڤەنەکرییە ، هەمیێ ژبابێ تەرا پێشکێش بکەت ، چمکو روژادن من دیت دەستەکێ بەرگیزا کربوویێ و چەند بێهنێن هەی ل خوەکربوو و بەر ب مالا وەڤە دهات …

 

‎لدور مالا مه‌

Check Also

عه‌فرین

  ببوچونا من لسه‌ر وان پێزانینن من هه‌ی ل سه‌ر دیروكا كوردی عه‌فرین یه‌كه‌مین شكه‌ستنا …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.