٣١ ئاب بیره‌وه‌ریه‌ك تاله‌ یان برینه‌ك ڤه‌كریه‌

د. شه‌عبان مزوری
پشتی ده‌رباس بونا ٢٢ سالا لسه‌ر ئانینا له‌شكه‌رێ سه‌ددام حوسه‌ین بو سه‌ر پایته‌ختا هه‌رێما كوردستانا عیراقێ ل ٣١ ئاب ١٩٩٦ ئه‌ڤرۆ هه‌مان سه‌ره‌ده‌ری لگه‌ل ڤی بابه‌تی تێكرن وه‌ك رۆژا یه‌كه‌مین، ئه‌ڤه‌ بخوه‌ ئه‌گه‌ر هیچ رامانه‌ك نه‌گه‌هینیت یه‌ك تشت بو من بخوه‌ لبه‌ر چاڤه‌ كو هه‌ردو ئالی بهه‌مان بوچونا به‌ری ٢٢ سالا ته‌ماشه‌ی ڤێ رویدانێ دكن. هویچ خواندنه‌ك دور ژ كه‌رب و كینێ نه‌هاتیه‌ كرن.
لایه‌نێ سه‌ددام گازی كری كو په‌ده‌كه‌یه‌ هه‌یا ئه‌ڤرۆ وه‌ك به‌ری ٢٢ سالان ڤی كاری بكریاره‌ك مێژویێ و ستراتیژی دزانیت بو یه‌كگرتنا گه‌لێ كورد لوێ پارچا باشور، وه‌ك فاكته‌ره‌ك سه‌ره‌كی دبینیت بو پێشخستنا هه‌رێمێ ژ هه‌مو لایه‌كی و دابین كرنا ئه‌وله‌كاریا خه‌لكێ هه‌رێمێ. بدیتنا ڤی لایه‌نی ئه‌گه‌ر ٣١ ئاب بره‌نگه‌ك گشتی سه‌رگرتبا و لایه‌نێ هه‌ڤرك كو یه‌نه‌كه‌یه‌ ژباشور هاتبا ده‌رخستن بته‌مامی وێ ئاسانكاریه‌ك مه‌زن گربا ژبو چاره‌سه‌ریا پرسگرێكا كورد ل باشورێ وه‌لات چونكی وه‌ك بكوردی دبێژن دو سه‌ر دقازانه‌كێدا نایێن كه‌لاندن، وێ ده‌مێ ناڤه‌ندا بریارێ وێ یه‌ك لایه‌ن با. هه‌بونا دو لایه‌نا كو دره‌وشه‌ك خورستیدا دبه‌ فاكته‌ره‌ك بهێزكرنا كوردا لێ لباشور ببو و مایه‌ و دێ بیته‌ مه‌سترین ئاسته‌نگ لرێكا چاره‌سه‌ركرنا پرسێن كوردا لگه‌ل به‌غدا. هه‌ر هێزه‌ك ژترسێن هێزا دن ئاماده‌یه‌ ده‌ستبه‌رداری هه‌می تشته‌كی بیت بو به‌غدا ژبو هه‌بونا خوه‌ بپارێزیت هه‌مبر لایه‌نێ دن و ئه‌ڤه‌ بو په‌ده‌كێ و یه‌نه‌كێ هه‌ردویان ڤه‌دگه‌ره‌.
ئه‌ز بخوه‌ نوزانم كانێ په‌ده‌كه‌ وه‌ك من هزردكه‌ت یان نه‌، لێ بدیتنا من ته‌نها هوكار كو كه‌سه‌ك شانازی بكاره‌ك وه‌ك ٣١ ئاب بكه‌ت ئه‌ڤه‌بو ئه‌ڤا من لسه‌ری باسكری. لێ وه‌ك ئه‌م هه‌می دزانین ٣١ ئاب سه‌رنه‌گرت ب وی ره‌نگێ دلێ په‌ده‌كێ دخواست و پشتی ده‌مه‌ك كورت یه‌نه‌كه‌ بپالپشتیا ئیرانێ ڤه‌گه‌ریا پرانیا ده‌ڤه‌رێن ژێر كونترولا وێ ژده‌رڤه‌ی باژارێ هه‌ولێر و هنده‌ك ده‌ور و به‌رێن هه‌ولێر. سه‌رئه‌نجام په‌ده‌كێ ته‌نها هنده‌ك هه‌رێما ده‌ستهه‌لاتداریا خوه‌ به‌رفره‌كر.
لایه‌نێ دن كو یه‌نه‌كه‌ و هاوسوزێن وێ هه‌یا رۆژا ئه‌ڤرو هه‌مان خوه‌ندن هه‌یه‌ و ٣١ ئاب بماسترین خیانه‌ت ل مێژویێ دبینن، لێ وه‌ك ئه‌م دبینین نێزیك دێ بیته‌ بیست سال باشور لگه‌ل په‌ده‌كێ دو پارچه‌كریه‌ لبن ناڤێ هه‌ڤپه‌یمانا ستراتیژی. بمن دڤێت مرۆڤ پر هوشیاربیت دكار ئانینا هنده‌ك په‌یڤاندا، زو بزو ناڤێ خیانه‌تێ لهه‌ڤدو نه‌كه‌ن. ئه‌ز بخوه‌ لژێر هیچ ئارمانجه‌ك یان داخوازه‌ك بو یه‌ك ده‌قیقه‌ژی ئاماده‌نینم لگه‌ل كه‌سه‌كی كاره‌كی بكه‌م بهه‌ڤرا ئه‌گه‌ر من ئه‌و یه‌ك جارژی بخائین بناڤكربیت، تشتێ په‌ره‌دوكس بومن ئه‌وه‌ كو یه‌نه‌كه‌ پشتی بیست سال هه‌ڤكاری لگه‌ل په‌ده‌كێ دیسان ڤه‌دگه‌ره‌ دبێژه‌ په‌ده‌كه‌ خوه‌دانا ماسترین خیانه‌تا نه‌ته‌وییه‌ كو ئه‌وژی ٣١ ئابه‌ ١٩٩٦، لێ یه‌نه‌كه‌ بو خوه‌ بخیانه‌ت نابیت ڤه‌گه‌را خوه‌ بو باشورێ وه‌لات بپالپشتیا ئیرانێ.
بباوه‌ریا من دڤێت ٣١ ئاب په‌ده‌كه‌ گه‌هاندبا راده‌ك هه‌ری كێم ژ تێگه‌هشتنا باشورێ وه‌لات كو ئه‌و ژی ئێدی په‌ده‌كه‌ نه‌ ته‌نها هێزا بریارده‌ره‌ و هێزێن دنژی په‌یدا بونه‌ دبه‌ بچوكتر بن لێ نابه‌ لسه‌را ده‌رباس به‌ و خوه‌ بته‌نێ خوه‌دانێ باشور ناسكه‌. هه‌روه‌سا یه‌نه‌كێ دڤیابا ژ ٣١ ئاب بكێماسی هند فێرببا كو گه‌فا نه‌مانێ لسه‌ر لایه‌نێ هه‌مبه‌ر هه‌می ده‌ما دكاره‌ چه‌نده‌ها ٣١ ئابا ژمه‌را بینه‌ ، باشترین نمونه‌ ١٦ ئوكتوبه‌ر ٢٠١٧ مه‌دیت چه‌وا هه‌ردو لایه‌نا به‌شه‌ك مه‌زن ژ باشورێ كوردستانێ چول دكر ژ بو ده‌ستهه‌لاتا ناڤه‌ندی لبه‌غدا چونكی هه‌رلایه‌نه‌كی دترسیا ئه‌ڤه‌ كومپلویا ( موئامه‌را) لایه‌نێ دن بیت.
من گه‌له‌ك جارا گوتیه‌ و نڤیسیه‌ و بڤێ گوتنێ بابه‌تێ خوه‌ بدوماهی تینم : ئه‌م بیره‌وه‌ریێن خوه‌ش و دلخواز دڤێ بكین ژبو دوباره‌ و زۆر بن، هه‌روه‌سا ئه‌م دڤێت بیره‌وه‌ریێن نه‌ خوه‌ش و نه‌دلخواز بكین ژبو دوباره‌ نه‌بن و بنبر بن.

‎لدور مالا مه‌

Check Also

ژن ھەیا ھێلا ھشیاریێ نەگەھینیت نکاریت ژیوارێ ژنێ دەستنیشان بکەت

    هێلانا چیا ھەیا کو مروڤ دانپێدانێ ب وێ یەکێ نەکەت؛کو ھشیاری دکاریت خەونێن …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.