هه‌لویست قوربانیه،‌ له‌وما هه‌می كه‌سی نابیت

د. شه‌عبان مزوری
لێدانا باره‌گه‌هێن هنده‌ك ژ رێكخستنێن كوردێن رۆژهه‌لات بموشه‌كا لناڤا خاكا هه‌رێما كوردستانا عیراقێ و سێداره‌دانا سێ خۆرتێن كوردێن روژهه‌لات ژ لایێ كومارا ئیسلامیا ئیرانێ ڤه‌ دوباره‌ شوینا كوردا بكه‌ت یه‌ك، كورد پتر پارچه‌بون ژ به‌رێ. هه‌رچه‌نده‌ ئه‌ڤ جوره‌ كاره‌ نه‌ یه‌كه‌مین جاره‌ كۆمارا ئیسلامیا ئیرانێ دكه‌ت لێ دیسان مه‌ بو خوه‌ په‌ند ژێ نه‌گرتن.
بو من جهێ سه‌رسورمانێ یه‌ كو هه‌ر بله‌ز خه‌لكه‌كی بێ دوف چون ده‌ست كرن بتومه‌تباركرنا هنده‌ك لایه‌نا و ئه‌ڤه‌ژی بو ئه‌گه‌را هێرشێن توندێن ئه‌ندام، لایه‌نگر و دوستێن رێكخستنێن جودایێن كوردی لسه‌ر هه‌ڤدو. لگۆر شوپاندنا من ڤان رۆژا بو راگه‌هاندنا كوردی بره‌نگه‌كێ گشتی زۆر زۆرتر یه‌كدو شه‌رمزار، روشه‌ش، كرێت و پیس كرینه‌ پتر ژ كومارا ئیسلامیا ئیرانێ. هه‌ر ئه‌ڤه‌ژی یه‌ك ژ ئارمانجێن سه‌ره‌كیێن ڤی كاری بویه‌. لڤێره‌ لایه‌نێ هه‌مبه‌ر ته‌ سه‌ركه‌فتنه‌ك مه‌زن بده‌ست ئانی كو ئه‌وژی به‌رێ مه‌ ژخوه‌ وه‌رگێرا‌ هه‌ڤدو و ئه‌ڤ شیانا مه‌ مایژی هه‌مبه‌ر هه‌ڤ خه‌رجكین.
پر ئاسانه‌ هه‌ر كه‌س ژمه‌ بێژیت بوچی كورد بێ هه‌لویستن، بوچی كورد سه‌رهه‌لنادن هه‌مبه‌ر ڤان كارا؟ ئانكو بكورتی بێ كاردانه‌وه‌ین، یانژی كارڤه‌دانا مه‌ نه‌ دئاستێ داخوازێ دایه‌. لێ ئه‌م هه‌می ژخوه‌را زۆر دبینین كو هه‌ر كه‌س ژخوه‌ بپرسه‌ كانێ وی بخوه‌ چكریه‌؟ ئایا هه‌لویست ئه‌وه‌ ژ خه‌لكی هه‌لویستی بخوازی؟ ئایا هه‌لویست ئه‌وه‌ خوه‌ لژێر په‌ردا بێ هه‌لویستیا هنده‌كا ڤه‌شێرین؟ كه‌سێن هه‌لویستی ژ خه‌لكه‌كی دخوازن بلا به‌ری هه‌مو كه‌سه‌كی ئه‌و خوه‌دی هه‌لویست و كاردانه‌وه‌ بن.
باش تێ بیرا من ده‌ما پاهیزا ١٩٩٨ سه‌روكێ په‌كه‌كێ عه‌بدوللا ئوجه‌لان هاتی ئیتالیا بو داخوازكرنا په‌نابه‌ریێ، خه‌لكێ تورك بێ دو دلانه‌ رژیان سه‌رجادا و ئالایێن ئیتالی سوتن، پێلاڤ و جلكێن ئیتالی دراندن، بایكوتا هه‌می به‌رهه‌مێن ئیتالی كرن. من لسه‌ر كرانێن تلڤزیونا دیت چه‌وا هنده‌ك خوه‌دی دوكانێن جلك و پێلاڤێن ئیتالی مالێ خوه‌ بده‌ستێ خوه‌ دراندن یانژی ئاگر به‌ردانێ، یه‌ك ژ وان توركا وه‌ك به‌رسڤ ژ ته‌لڤزیونه‌كێ گوت ( ده‌ما من وه‌لات نه‌ما پاره‌ بوچی یه‌). پرس لڤێره‌ چه‌ند ژمه‌ وه‌ك هاولاتیێن ئاسایێ تشته‌ك ئیرانی كو لناڤ مالا خوه‌ هه‌بیت گرنگ نینه‌ خوارن بیت یان كه‌لوپه‌له‌ك دن یێ ناڤمالێ بیت ئاگر به‌ردایێ یانژی دراندی یه‌؟ هه‌رده‌ما كه‌سه‌ك ژمه‌ كاره‌ك بڤی ره‌نگی ڤیدیوكری به‌لاڤ كر، وێ ده‌مێ وی ماف هه‌یه‌ داخوازێ ژ كه‌سه‌ك دنژی بكه‌ت، به‌ره‌ڤاژی ڤێ چه‌ندێ ئه‌ز بخوه‌ ڤان جوره‌ گوتنا ببێ ره‌وشتی دبینم.
گه‌له‌ك جاران ده‌ما مروڤ گوهداریا كوردا یانژی نڤیسینه‌ك پرانیا كوردا دخوینیت گومان ژ بو مروڤی دوروست دبه‌ گه‌لو ئه‌ڤ كه‌سه‌ بخوه‌ كورده‌ یانژی بیانی یه‌ شیره‌تا ل كوردا دكه‌. هه‌ر كه‌س ژمه‌ خوه‌ وه‌ك شێوردمه‌ند دبینه‌ بو كوردا، له‌وما پرانیا مه‌ دبێژین دڤێت هوبیت، ڤی كاری بكه‌ن ….. هتد، لێ دهه‌مان ده‌مدا خوه‌ به‌رپرسیار نابینه‌ و ناخوازه‌ وه‌ك كه‌س خوه‌دی هه‌لویسته‌ك ئاشكرا بیت ژ بو زیان ڤێ نه‌كه‌ڤیت. بێگومان ئه‌م هه‌می دكارین مه‌ هه‌لویسته‌ك لگۆری پێچێبونا خوه‌ هه‌بیت، بو نمونه‌ وه‌ك كارڤه‌دانه‌ك هه‌مبه‌ر تاوانا كومارا ئیسلامیا ئیرانێ ئه‌م دكارین هه‌فتیه‌ك نه‌ ساله‌ك بایكوتا كه‌ل و په‌لێن خوارنا ئیرانی بكه‌ین، یه‌ك مه‌حفیر (فه‌رش) كه‌ڤن ئه‌گه‌ر كه‌سه‌كی هه‌بیت بلا ئیرانی ژی نه‌بیت لێ چونكی مه‌حفیر سیمبوله‌ك ئیرانیه‌ ئاگر تێ به‌رده‌ت، هنده‌ك كه‌ل و په‌لێن ئاڤاهی وه‌ك موزایك لسه‌ر جاده‌كێ بشكێنیت، ئه‌ڤه‌ و چه‌ندین كارێن دن ئه‌م هه‌می دكارین بكه‌ین لێ پرس ئه‌وه‌ چما ناكه‌ین.
لایه‌نه‌ك دن هه‌یه‌ پر گرنگه‌ ئه‌م لسه‌ر راوه‌ستین ئه‌وژی پشتگیریا خوه‌دان هه‌لویستایه‌ ده‌ما داگیركه‌رێن كورد و نوكه‌رێن وان هه‌ولدده‌ن كه‌سانه‌كی، گروپه‌كی یانژی هه‌رێمه‌كێ سزا بده‌ن ژبه‌ر هه‌لویسته‌ك كوردایه‌تی. وه‌ك ئه‌م هه‌می دوزانین ده‌وله‌تا تورك ب پێشه‌نگیا بابێ روحیێ ئیخوانێن جیهانێ ئه‌ردوگان پشتی راكرنا قه‌ده‌غه‌كرنا هاتنا فروكێن سڤیل بو هه‌رێما كوردستانێ بریار دا باله‌فرێن سڤیلێن هێلێن توركی به‌رده‌وام بن لسه‌ر بایكوت كرنا باله‌فرخانا باژێرێ سوله‌یمانیێ چونكی رێڤه‌به‌ریا سوله‌یمانیێ یانژی خه‌لكێ سوله‌یمانیێ خوه‌دی هه‌لویست بون هه‌مبه‌ر سیاسه‌تا توركا ل پارجێن جودایێن كوردستانێ.
هه‌مبه‌ر ڤێ كارڤه‌دانا توركا لسه‌ر هه‌لویستێ خه‌لكێ سوله‌یمانیێ بێژه‌ هه‌ما هه‌می كورد بێ ده‌نگ بون، گه‌له‌ك كه‌سان و لایه‌نان بێ شه‌رمانه‌ خوه‌شحالیا خوه‌ نیشاندا و دگوتن ئه‌ڤه‌ دێ بیته‌ ده‌رسه‌ك بو خه‌لكێ سوله‌یمانیێ داكو دپێشه‌رۆژێدا پێ خوه‌ لدویف به‌ركا خوه‌ درێژ كه‌ن. حوكمه‌تا هه‌ولێر ئه‌ڤ كاره‌ وه‌ل سه‌رئه‌نجاما سیاسه‌تا حه‌كیمانه‌یا پارتی و به‌ره‌للایا یه‌نه‌كێ بناڤ دكر. موخابن من نه‌دیت كه‌سه‌ك ژ هه‌رێما زه‌ر وه‌ك پالپشتی بو هه‌رێما كه‌سك داخوازا بایكوتا هه‌می جوره‌ هێلێن فروكێن توركی بكه‌ت، ئه‌گه‌ر كه‌سه‌ك بێ هه‌لویست بیت و بكێماسی پشتگیریا خه‌لكێ خوه‌دان هه‌لویست نه‌كه‌ت گه‌لو چه‌وانی ئه‌م دێ كارین به‌ره‌ف ئاسویه‌ك ئارام تر و گه‌شتر بچین؟ هه‌ر كه‌س ژمه‌ دڤێت لومه‌ لخوه‌ بكه‌ت ژبو بلێته‌ك توركی ١٠ تا ٢٠ دولارا ئه‌رزانتره‌ یانژی ٢ تا ٤ ده‌مژمێرا زوتر دگه‌هه‌ ئه‌م ئاماده‌ینه‌ ژبیر بكه‌ین كو خوه‌دانێن ڤێ هێلا فروكڤانیێ برا و هه‌ڤخوینێن مه‌ سزا دده‌ن ژبه‌ر پالپشتیا وان بو مه‌ به‌ری كوردێن پارچێن دن. له‌وما لدوماهیێ دبێژم هه‌لویست قوربانیه‌ و وه‌ك هه‌رده‌م پرانیا هه‌را زۆر ژخه‌لكێ مه‌ ئاماده‌ نینه‌ هه‌یا رۆژا ئه‌ڤرۆ خوه‌دی هه‌لویست بیت.

هه‌لویست بێ قوربانی نابه‌ ….. فروكخانا سلێمانیێ؟؟؟؟؟؟؟؟

‎لدور مالا مه‌

Check Also

كاره‌با هه‌رێما كوردستانا عیراقێ لناڤبه‌را چاره‌سه‌ری و نه‌خواستنا چاره‌سه‌ریێ

د.شه‌عبان مزوری ڤان رۆژان دیسان بئه‌گه‌را بوها بونا نرخێ كاره‌با ماتورا جاره‌ك دن بابه‌تێ كاره‌با …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.