نادیا موراد، نوبل، كورد، یه‌زیدی و عیراقی

د. شه‌عبان مزوری

ئه‌ز بخوه‌ هه‌رده‌م لگه‌ل بیركرن و تێروانینێن جودامه‌ و هه‌رده‌م دبێژم هزرێن جودا سه‌رئه‌نجاما وان گه‌له‌ك یا باشه‌، لێ بباوه‌ریا من كومه‌لگه‌ها مه‌یا كوردی بره‌نگه‌ك گشتی و بتایبه‌تی لباشور ئه‌ڤ پر ره‌نگیه‌ژی بشێوازه‌ك ته‌ندوروست بكارنائینیت. هه‌ركه‌س دڤێت لگه‌ل هه‌ڤركێ خوه‌ جودابیت بێی هزرا هندێ بكه‌ت كو ئه‌ڤ جودایه‌ چه‌ند وی بخوه‌ باوه‌ری پێ یه‌. جودابون ژبونا جودایێ هه‌ر هه‌مان كاره‌ساته‌ لگه‌ل یه‌ك هزری و هه‌لویستیێ.
لدوف بوچونا من یا ڤان چه‌ند رۆژێن ده‌رباسبوی لسه‌ر میدیا كوردی و تورێن كۆمه‌لایه‌تی من دیتی جاره‌ك دن دسه‌لمینیت كو كوردێن مه‌ به‌رده‌وامن لسه‌ر تێكه‌ل كرنا كودانه‌، نكارن كه‌س، ئول، نیشتیمان و نه‌ته‌وه‌ ژ هه‌ڤ جودا كه‌ن، له‌وما دبینین هه‌ركه‌س شكه‌ستنا خوه‌ دخوازه‌ لپشت په‌ردا ڤێ خانمێ ڤه‌شێره‌. كوردێن كو بو وان كوردایه‌تی نه‌ پتره‌ ژ گوڤه‌ند و سه‌مایه‌كێ دخوازن نادیا موراد بشكێنن لبن گوتنێن چه‌وتێن جودا وه‌ك ( نادیا دبێژیت ئه‌ز یه‌زیدیمه‌… ژبیر دكه‌ت كو وه‌ك موسلمان رۆژانه‌ چه‌ند جارا ئه‌و بخوه‌ دبێژیت یاره‌بی هزار جار الحمدلله‌ ته‌ ئه‌ز موسلمان دام، به‌شه‌ك دبێژن نادیا پتر خوه‌ عیراقی ناسدكه‌ت وه‌ك كورد… هه‌مان له‌وچه‌ ژبیر دكه‌ن كو ژبو هه‌ر پوسته‌كێ ده‌وله‌تا عیراقی گلیز ژ ده‌ڤێ وان دباریت).
هنده‌ك سیاسه‌تمه‌دارێن عیراقێ دبێژن ( ئه‌ڤ خه‌لاته‌ نه‌بو نادیا موراد بته‌نێ یه‌ به‌لكو بو هه‌مو گه‌لێ عیراقێ یه‌ و یێن كورد دبێژن ئه‌ڤ خه‌لاته‌ بو هه‌می كوردایه‌….. ئه‌گه‌ر ڤان كه‌سێن خوه‌ بسیاسه‌تمه‌دار ناسدكه‌ن پیچه‌ك شه‌رم هه‌با دڤیابا خوه خوه‌ بێده‌نگ كربانه‌ چونكه‌ ئه‌وبون و به‌رده‌وامن د بێرومه‌تكرنا گه‌لێ عیراقێ ب هه‌مو پێكهاتێن خوه‌ڤه‌).
به‌شه‌ك ژ یه‌زیدیا ڤێ خه‌لاتێ بئولێ خوه‌ڤه‌ گرێدده‌ت ( پرانیا وانژی ماسترین بازرگانیێ بڤی ئولی دكه‌ن .. ژبه‌ر ده‌رێ ڤی ئاغای دچن به‌ر ده‌ریێ ئاغای دن ژبو چه‌ند دولارا ئه‌ڤ كه‌سه‌ هه‌ر ژ میرا هه‌یا مریدا هه‌نه‌)‌.
پرانیا خه‌لكێ هومبانكا خوه‌ دادقوتیت لسه‌ر ڤی بابه‌تی نه‌ژ دویر نه‌ ژ نێزیك نوزانیت كانێ ئه‌ڤ خه‌لاته‌ بوچی داینه‌ ڤان دو كه‌سا، چونكه‌ ئه‌گه‌ر تێگه‌هشتبان وانا بڤی ره‌نگی سه‌ره‌ده‌ری لگه‌ل بابه‌تی نه‌دكر. نادیا موراد نه‌هاتیه‌ خه‌لات كرن ژبو یه‌زیدیه‌، كورده‌، عیراقیه‌ یانژی ژنه‌. نادیا خه‌لاتا ئاشتیێ هه‌ڤپار كریه‌ لگه‌ل دوكتور دێنیس موكوێگێ ژبه‌ر رولێ وان لدژی ده‌ستدرێژیا سێكسی لسه‌ر ره‌گه‌زێ مێ ل هه‌رێمێن جه‌نگ تێدا. تشته‌ك زانایه‌ كو ژكه‌ڤن هه‌یا سه‌رده‌ما ئه‌ڤرۆ یه‌ك ژ كرێتترین سه‌رئه‌نجامێن جه‌نگا ده‌ستدرێژیا سێكسیه‌ لسه‌ر ره‌گه‌زێ مێ، هه‌لبه‌ت ره‌گه‌زێ نێر ژڤێ تاوانێ بێپار نینه‌.
دوكتور دێنیس موكوێگێ كو بسپورێ نه‌خوه‌شیێن ژنایه‌، بسالانه‌ ل نه‌خوشخانه‌یا پانزی ل رۆژهه‌لاتا كومارا كونگو كاردكه‌ت ب ژنێن ده‌ستدرێژیا سێكسی لگه‌ل هاتی ئه‌نجام دان. دجه‌نگا ناڤخوه‌یا كونگو بده‌ها هه‌زار ژن بون قوربانی ڤێ بێره‌وشتیێ كو نێزیك ٦٠% ژوان ده‌ستدرێژیا كومه‌كی لسه‌ر هاتیه‌ ئه‌نجام دان. دوكتور دێنیس بسالانه‌ هه‌ولدده‌ت كو كۆمه‌لگه‌ها نێڤنه‌ته‌وی بئه‌ركێ خوه‌ رابیت ژ لایه‌ك هاریكاریا قوربانیا بكه‌ت و ژلایه‌كێ دن تاوانباران دادگه‌ بكه‌ت. دوكتور دێنیس خوه‌دیێ چه‌ندین خه‌لاتێن دیه‌، لپرانیا ده‌ستگه‌هێن نێڤنه‌ته‌وی ئاخفتن كریه‌، گه‌فا كوشتنێ لسه‌ر وی و زاروكێن وی هه‌بویه‌ و هه‌یه‌ هه‌یا رۆژا ئه‌ڤرۆ.
وه‌ك ئه‌م دزانین داعش بهه‌زاران یه‌زیدی ژ ره‌گه‌زێ مێ ده‌ستدرێژیا سێكسی لسه‌ركر و لبازان وه‌ك كاله‌ كرین و فروتن پێ دكر. دبه‌ هنده‌ك پرس بكه‌ن بوچی ژنێن ئولا یه‌زیدی هنده‌ بایه‌خ پێدان چونكه‌ ژنێن موسلمانژی لگه‌له‌ك ده‌ڤه‌ران بونه‌ قوربانێ هه‌مان كریاری؟ پرسه‌ك دبه‌ دجهێ خوه‌دابیت بو كه‌سه‌كی شاره‌زایێ لسه‌ر ئولا ئیسلامێ نه‌بیت. بو هه‌می موسلمانا یه‌ك لا كریه‌ كو ده‌ستدرێژیا سێكسی لسه‌ر ئافره‌تا موسلمان زنایه‌ كو دكه‌فته‌ چارچه‌وه‌یا تاوانێن مه‌زن لگوری ئولێ ئیسلامێ، دهه‌مان ده‌مدا لگور ئولێ ئیسلامێ ژنێن نه‌ موسلمان د جه‌نگدا وه‌ك كالایه‌ك ده‌ستكه‌فتی تێ ژماردن و ئاسایێ یه‌ كرین و فروتن پێ بێ كرن. نادیا موراد یه‌ك ژوان قوربانیا بو یێن كه‌فتین ده‌ستێ داعش، ده‌ستدرێژیا سێكسی لسه‌ر هاتیه‌ كرن ، كرین و فروتن پێ هاتیه‌ ئه‌نجامدان.
پشتی نادیا كاری خوه‌ ژده‌ستێ داعش قورتالكه‌ بئاشكرا ئاخفت لسه‌ر ده‌ستدرێژیا سێكسیا لسه‌ر هاتی كرن، بدیتنا من نادیایێ خواست نامه‌یه‌ك بگهینه‌ جڤاكا رۆژهه‌لاتا ناڤین كو سه‌ره‌ده‌ریا وێ لگه‌ل ڤێ پرسێ بێژه‌ هه‌ما یه‌ك ره‌نگه‌ لگه‌ل جودا بونا ئولا یه‌زیدی، فه‌له‌ و موسلمان هه‌می نه‌ته‌وه‌ بچاڤه‌ك نه‌باش ته‌ماشه‌ی ڤان كه‌سا دكه‌ن، نادیا بو ئه‌گه‌را كێمكرنا خوه‌كوژیێ دناڤا قوربانیادا ژ لایه‌كیڤه‌ و ژ لایه‌كێ دنڤه‌ كومه‌لگا خسته‌ هه‌مبه‌ر ئه‌ركێ به‌رپرسیاره‌تیێ. نادیا به‌ره‌ڤانی ژڤان قوربانیا بو خوه‌ كره‌ ئارمانج، مه‌به‌ست لڤێره‌ قوربانی ژ كویژان ئول، نه‌ته‌وه‌، وه‌لات و ره‌نگ بیت نه‌ گرنگه‌ یا گرنگه‌ ئه‌وه‌ دوماهیه‌ك بو ڤان تاوانان بێت دانین و تاوانبار بێن سزادان.
خه‌لاتكرنا نادیا موراد بخه‌لاتا نوبل چه‌ند جهێ دلخوشیێ بیت بو وێ لێ دڤێت بزانیت دهه‌مان ده‌مدا ئه‌ركێ وێ مه‌ستر دكه‌ و بارێ وێ قورستر دكه‌. پیروزبیت خه‌لاتا نوبل ل نادیا موراد و دوكتور دێنیس موكوێگێ هیڤیدارم سه‌ركه‌فتی بن د په‌یام و كارێ خوه‌دا.

‎لدور مالا مه‌

Check Also

كاره‌با هه‌رێما كوردستانا عیراقێ لناڤبه‌را چاره‌سه‌ری و نه‌خواستنا چاره‌سه‌ریێ

د.شه‌عبان مزوری ڤان رۆژان دیسان بئه‌گه‌را بوها بونا نرخێ كاره‌با ماتورا جاره‌ك دن بابه‌تێ كاره‌با …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.