مروڤێ ده‌وله‌تێ یان ده‌وله‌تا مروڤی؟

د.شه‌عبان مزوری
ئه‌ز نڤیسینا خوه‌ لسه‌ر ناڤه‌ بابه‌تی دێ ده‌ستپێكه‌م پاشان دێ چمه‌ دناڤ بابه‌تیدا. هه‌لبه‌ت بو من ژی وه‌ك هه‌وه‌ زانایه‌ كو مروڤ دبێژیت فلان كه‌س زه‌لامێ ده‌وله‌تێ یه‌ برامانا كه‌سه‌ك دوروستكه‌رێ ده‌وله‌تێ یان ژی بهێز و پێشخستنكه‌رێ ده‌وله‌تێ تێ ناڤكرن. ئه‌ز دخوازم ژ ته‌ڤایا خوانده‌ڤانا را بێژم كو بمن په‌یڤا زه‌لام زۆر كرێته‌، ئه‌ڤ ره‌نگێ ناڤكرنێ براستی من بخوه‌ لناڤ تو نڤیسینێن كه‌سێن ناڤدار ل ئه‌وروپا و ئه‌مریكا نه‌دیتیه‌ ل ێ دبه‌ هه‌به، تشتێ بالكێش ئه‌ڤ رسته‌ ته‌نها بپلا یه‌كه‌مین عه‌ره‌ب و تێكه‌لێن عه‌ره‌با بكار دبه‌ن. من په‌یڤا مروڤ بكار بر، چونكه‌ مروڤ هه‌ردو ره‌گه‌زا دگریت. دمێژویه‌ك نه‌ پر كه‌ڤن دا مه‌ گه‌له‌ك خانمێن رێزدار هه‌نه‌ كو براستی مروڤێن ده‌وله‌تێ بوینه‌ وه‌ك غاندی، تاتشه‌ر، میركل….هتد. بانگا من بو نڤیسه‌رێن كورد هه‌یه‌ ل هه‌ر ده‌را لێبن پر كویری هزرا خوه‌ دهه‌لبژارتنا په‌یڤادا بكه‌ن چونكی پر په‌یڤ و رسته‌ هه‌نه‌ لناڤ مه‌دا بسالان جهێ خوه‌ گرتیه‌ لێ دڤێت نه‌مینن.
دا ڤه‌گه‌رین سه‌ر بابه‌تێ خوه‌ و مروڤێ ده‌وله‌تێ. ئه‌ڤ رسته‌ وه‌ك زۆر تێگه‌هشتنێن دی بتایبه‌تی سه‌د سالا بیست و بیست و یه‌كا لڤان وه‌لاتێن مروڤ په‌رست هاتیه‌ گوهارتن، دبنه‌ره‌تدا د فه‌لسه‌فا كه‌ڤندا سیاسه‌تمه‌دار وه‌ك مروڤێ ده‌وله‌تێ هاتیه‌ بناڤكرن، چونكه‌ سیاسه‌تمه‌دار هاتیه‌ پێناس كرن بكورتی ئه‌و كه‌سه‌ یێ زانینێن تایبه‌ت هه‌بن كو بكاریت بهاریكاریا وان زانینا ده‌ستهه‌لاتداریه‌ك دادپه‌روه‌ری و خوه‌شگوزه‌رانی ژبو هه‌ڤ نیشتیمانێن خوه‌ دابین بكه‌ت. بباوه‌ریا من ئه‌گه‌ر مروڤ هزرا خوه‌ دڤێ پێناسا من لسه‌ری نڤیسی بكه‌ت دێ بو بێ دودلی ئاشكرا بیت كانێ مه‌ كوردا و ته‌ڤایا كه‌سێن په‌سنێن هنده‌كا دده‌ن و بناڤ دكه‌ن كو مروڤێ ده‌وله‌تداریێ راسته‌‌ یان دره‌وه‌.
مروڤێ ده‌وله‌تێ دڤێت كه‌سه‌ك ده‌ست پاك و ده‌همه‌ن پاك بیت، دڤێت خوه‌دی دیتنه‌ك سیاسی ڤه‌كی دور ژ ناڤچه‌گیریێ و ئولی، خوه‌دان كه‌ساتیه‌ك ( كاریزمه‌ك ) ئاماده‌بیت د هه‌مو رویدانادا، دڤێت خوه‌دی شوین پێبیت د پرسێن كومه‌لایه‌تیدا، پێچێبونا سه‌رده‌ریێ لگه‌ل ره‌وشێن ئاوارته‌ و بله‌ز، پێچێبونا دارشتنا هزرێن تازه‌ و بره‌نگه‌كێ زانستی، خوه‌دی ستراتیجییه‌ته‌كا تایبه‌ت و به‌ردوام بونا ئانینا هزرێن نوژه‌ن ژبو پرسێن رۆژه‌ڤێ، كه‌ساتیه‌ك ڤه‌كری به‌ لگه‌ل هه‌مو چوین، توێژێن جڤاكێ، خوه‌دی هزرێن جودا، رێكخستن، پارتا و كه‌ساتیێن جودا و گه‌له‌ك نیشانێن دن.
باشه‌ كه‌سه‌ك زۆردار، مروڤ كوژ، تالانكه‌ر، بده‌یان سالان لسه‌ر دلێ خه‌لكێ بمینه‌، ساویلك ….هتد ژ نیشانێن بێ ره‌وشتیێ چه‌وان دكاره‌ ببه‌ مروڤێ ده‌وله‌تداریێ؟ كه‌سه‌ك ئاماده‌به‌ ژبو ناڤێ خوه‌ خه‌لكێ خوه‌ ملكه‌چی هه‌زاران دره‌وا بكه‌ت. ژترسا بو بره‌قسن، هوزانا لسه‌ر بنڤیسن، سترانا پێ بێژن، لمال هوڤبه‌‌ و لده‌رڤه‌ سه‌رشور، هوستی خوار كویله‌به. كه‌سانه‌ك یه‌ك كار دوروست ئه‌نجام نه‌ده‌ت لێ وه‌سا بو خه‌لكێ خویا بكه‌ت كو هه‌ر كارێ ئه‌نجام دای كارێ هه‌رێ دوروست بویه‌ و ژوی زاناتر كه‌س نینه‌، كه‌سانه‌ك دویتنا وی یا هه‌را دویر ژ ده‌رازینكا ژورا وی ده‌رباس نه‌به‌ و خه‌ما هه‌را مه‌زن زك و بن زك بیت… ئه‌ڤ كه‌سه‌ چه‌وا دێ ده‌وله‌تێ ئاڤاكه‌ت یانژی ده‌وله‌تا هه‌ی دێ پێشخت، خوه‌شكت و بهێزكت؟‌
سه‌رده‌ما بابه‌تێن درێژ نه‌مایه‌ له‌وما ئه‌زێ كورت بكه‌م و بێژم ئه‌و كه‌سێن ل وه‌لاتێن مروڤ په‌رست وه‌ك مروڤێ ده‌وله‌تێ بناڤ دكه‌ن بلا باش بزانن كو وان كه‌سان داخوازیا وان ده‌وله‌تا مروڤیه‌ بمه‌به‌ستا كه‌سێ وی یه‌، له‌وما ئاماده‌یه‌ هه‌مو كه‌سه‌كی و تشته‌كی لوه‌لاتێ خوه‌ قوربانی هه‌بونا خوه‌ و ده‌ستهه‌لاتداریا خوه‌ بكه‌ت. بێ ڤه‌شارتن دبێژم من هه‌یا رۆژا ئه‌ڤرو مروڤێ ده‌وله‌تێ لناڤا كوردا دا نه‌دیتیه‌ و باوه‌رناكه‌م لسه‌دا بیست و یه‌كێ په‌یدابیت. ژبو كه‌سه‌ك شاش تێنه‌گه‌هیت مه‌به‌ستا من لڤێره‌ كوردێن خوه‌دی ده‌ستهه‌لاتن، دبه‌ بهه‌زارا مه‌ كه‌سێن ده‌و‌له‌تداریێ هه‌بن و بملیونا مربن لێ گرنگه‌ بزانین كه‌سێن سه‌رنڤشتێ هه‌مو تشته‌كی دگهورن ده‌ستهه‌لاتدارن.

‎لدور مالا مه‌

Check Also

مه‌حمود عوسمان ئاریشه‌یه‌ نه‌ چاره‌سه‌ریه‌

  د. شه‌عبان مزوری گرێدای ڤێ داخویانیا داوی یا دوكتور مه‌حمود عوسمان وه‌ك من سوزدای …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.