بوچی دڤێت ئه‌م جیاواز بین

د. شه‌عبان مزوری

وه‌سا دیاره‌ په‌ده‌كێ لباشور بریارا خوه‌دا بو حوكمه‌تا نوی و پرسا سه‌روكاتیا هه‌رێمێ. په‌ده‌كێ كه‌ندیدێن خوه‌ بو سه‌روكێ حوكمه‌تێ و سه‌روكێ هه‌رێمێ ئاشكراكرن كو بدیتنا من ئه‌ڤه‌ بژارده‌ك چاڤه‌رێكری بو. مافێ په‌ده‌كێ و هه‌رهێزه‌ك دناڤا په‌رله‌مانیدا هه‌به‌ كه‌ندیدێن خوه‌ ژبو لایه‌نێن دن ئاشكرا كه‌ن. لدووف شوپاندنا من بو راگه‌یاندنا باشور و تورێن كۆمه‌لایه‌تی پر بئاشكرایی خه‌لكێ نه‌ پارتی پرانیا وان ڤی كاری بكاره‌ك نه‌ ته‌ندوروست دبینن. ده‌ما لڤان كه‌سێن دژ ته‌ماشا دكی دبینی پرانیا وان خوه‌ بدیموكراتخواز، گورانخواز مافپه‌روه‌ر ….. هتد ژ خسله‌تێن باش لده‌ف خوه‌ دبینن لێ كێشا مه‌زن بباوه‌ریا من ئه‌ڤ كه‌سانه‌ نه‌ ژدور نه‌ ژنێزیك نیاسبونه‌ك ل گه‌ل ڤان باوه‌ریا نینه‌.
په‌ده‌كێ مه‌سرور بارزانی و نێچیرڤان بارزانی بو دو سه‌روكاتیا كاندیدكرن و لڤێره‌ ئاشكراكر كو پوستێ سه‌روكێ په‌رله‌مانی نه‌ڤێت. پرس لڤێره‌ كێشا ڤان كه‌سان چیه‌؟ ئایا بپێویست دزانن په‌ده‌كه‌ پرسا خوه‌ بوان بكه‌ت بو كه‌ندیدێن خوه‌. ڤه‌كری دبێژم هه‌ركه‌سه‌ك بڤی ره‌نگی سه‌ره‌ده‌ریێ لگه‌ل ڤی كاری بكه‌ت دوره‌ ژ هه‌ر بنه‌مایه‌ك مروڤاتی و دیموكراتی. لژێر ده‌ستهه‌لاداریه‌ك ته‌ندوروست هه‌مو هێز و لایه‌ن ئازادن بو به‌ربژێر كرنا كه‌ندیدێن خوه‌ بو پوستێن جودا لهه‌رێمێ و لداوی كه‌سێ پرانیا ده‌نگا بینیت دڤێت هه‌ڤركێن وی پیروزبایێ لێ بكه‌ن.
نها به‌لكو تێگه‌هشتنه‌ك من هه‌با بو بوچونا هنده‌ك رێزدارا ئه‌گه‌ر په‌ده‌كێ گوتبا ته‌نها نێچیرڤان بارزانی مافێ خوه‌ كاندیدكرنێ بو سه‌روكێ هه‌رێمێ هه‌یه‌ و ته‌نها مه‌سرور بارزانی مافێ كه‌‌ندیدكرنێ بو سه‌روكێ حوكمه‌تێ هه‌یه، لێ په‌ده‌كێ ئه‌ڤ یه‌كه‌ نه‌گوتیه‌. بو وان كه‌سێن دبێژن مادبیت هه‌ردو پوست بو یه‌ك بنه‌مال بن؟ به‌رسڤ به‌لێ دبیت و هه‌یا نوكه‌ وابو بوچی چوار سالێن بێت نابیت. به‌رێزان په‌ده‌كێ و هه‌ر هێزه‌ك دن ئازاده‌ هه‌مو پوستێن خوه‌ بیه‌ك بنه‌مال، بیه‌ك گوند…هتد پركه‌ت، چونكی ئه‌ڤه‌ نه‌كێشا ركابه‌رێن وێ هێزێ یه‌ ئه‌ڤه‌ كێشا ئه‌ندام، ده‌نگده‌ر و ده‌نگدزیكه‌رێن وێ هێزێ یه‌‌ بلا ئه‌و ده‌نگی ژخوه‌ بینن و ئه‌گه‌ر نه‌رازیبن بلا نه‌رازیبونا خوه‌ نیشان بده‌ن.
ڤان سالێن ده‌رباسبوی پر ئاشكرا كر كو به‌شه‌ك ژ هێز و له‌یه‌نێن خوه‌ ب ئوپوزیسیون دزانی شوینا لسه‌ر خوه‌ كاركه‌ن و خوه‌دی كه‌ندید بن بو پوستێن جودا، كارێ وان ته‌نها دگوتن بوچی هێزا ئا یان بێ ئه‌ڤ كه‌سه‌ كه‌ندیدكر بو فلان پوستی، یانژی بوچی فلان كه‌سێ خوه‌ ژفلان پوستی ده‌رخست و وان بخوه‌ هیچ وێره‌كیه‌ك نه‌بویه‌ بێژیت من دڤێت حوكمی بێخم ده‌ستێ خوه‌، كه‌ندیدێن خوه‌یێن ئاشكرا هه‌بن بو هه‌می پوستا. هندی سه‌ركردێن ڤان هێزێن ژده‌رڤه‌ی په‌ده‌كێ و یه‌نه‌كێ من دیتینه‌ دبێژن هندی دونیا هه‌بیت ئه‌ڤ هه‌ردو پارته‌ دێ ڤێ هه‌رێمێ برێڤه‌ به‌ن و مه‌ هیڤی بگورانكاریا نه‌مایه‌، من ژی هه‌رده‌م گوتیه‌ وان ئه‌گه‌ر هون خودانێن ڤێ په‌یامێ نه‌ بوچی لمالێن خوه‌ نا رونن و بلا به‌سبیت كه‌رب و كینێ لناڤ مه‌ به‌لاڤكن.
خاله‌ك دن گرنگ بدیتنا من هه‌یه‌ كو چه‌ند جارێن دنژی من باسكریه‌ لێ بپێویست دبینم جاره‌ك دن لسه‌ر راوه‌ستێن ئه‌وژی تێگه‌هشتنا ته‌ڤایا هێزێن رۆژهه‌لاتا ناڤینه‌ ژبو په‌یڤا پرانیا كورسیكێن په‌رله‌مانی. راسته‌ لدویف ره‌وشتێن ده‌ستهه‌لاتداریا دیموكراتی پشتی په‌رله‌مان كومدبیت، سه‌روكێ په‌رله‌مانی تێ هه‌لبژارتن، سه‌روكێ په‌رله‌مانی پێكئانینا حوكمه‌تێ راسپارده‌ی سه‌روك لیستا هێزا خوه‌دی پرانیا كورسیا هه‌ین دكه‌ت، لێ زۆر جاران هێزا خوه‌دی پرانیا كورسیا دزانیت كو ده‌نگێن پێویست بو پێكئانینا حوكمه‌تێ نكاریت بده‌ست بخیت له‌وما دبێژن بلا هێزه‌ك دن حوكمه‌تێ پێك بینه‌ و بده‌یان جارا لگه‌له‌ك وه‌لا من دیتیه‌ چه‌ند هێزێن بچوكتر هه‌ڤپه‌یمانیه‌ك دوروستكریه‌ و هێزا هه‌را مه‌زن كه‌فتی یه‌ به‌رێ ئوپوزسیونێ.
دوباره‌ دبێژم كه‌سێن مه‌سرور و نێچیرڤان بدلی نه‌بن بلا بێنه‌ پێش و خوه‌ كه‌ندیدبكه‌ن شوینا شیره‌تا لپه‌ده‌كێ بكه‌ن كانێ كویژان مروڤ بو كویژان پوستی كه‌ندیدكه‌ن یانژی بو كویژان پۆستا خوه‌ كه‌ندیدكه‌ن چونكی مافێ وان نینه‌.

‎لدور مالا مه‌

Check Also

مه‌حمود عوسمان ئاریشه‌یه‌ نه‌ چاره‌سه‌ریه‌

  د. شه‌عبان مزوری گرێدای ڤێ داخویانیا داوی یا دوكتور مه‌حمود عوسمان وه‌ك من سوزدای …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.