جه‌نگا مه‌ كوردا لگه‌ل ئه‌ردوگان و پانئه‌ردوگانا

د. شه‌عبان مزوری
كێمتر ژ سێ مه‌ها ماینه‌ ژ بو كریسا سوری و لدویفدا شه‌رێ وێ بكه‌ڤیته‌ سالا نه‌هان دا. كورد وه‌ك پێكهاته‌ك سه‌ره‌كی بێی خواسته‌كا خوه‌ به‌شه‌ك مه‌زن ژ كوردان دڤان هه‌شت سالێن ده‌رباسبوی دا كه‌فتنه‌‌ پر سه‌رنشیڤی و سه‌رئه‌ڤرازیا، لێ تشتا ئه‌م هه‌مو دوزانین وه‌ك هه‌ر پارچه‌ك دن كوردێن رۆژئاڤا خوه‌دی یه‌ك هه‌لویست نه‌بون. پر ژ مێژه‌ من گوتیه‌ گه‌لێن دن پشتی دگه‌هن ئارمانجێن خوه‌ ژهه‌ڤ جودادبن لێ كورد ژهه‌ڤ جودایه‌ دخه‌باتا گه‌هشتنا ئارمانجا خوه‌ دا، له‌وما گه‌هشتنا ئارمانجێ بویه‌ ئه‌سته‌م ئه‌ڤه‌ سه‌دان ساله‌ ئه‌گه‌ر هه‌زاران سال نه‌بیت.
ئه‌زدێ هه‌ولده‌م هه‌رتشته‌ك لگور دیتنا من وه‌ك هه‌ی بناڤكه‌م لڤان سالێن ده‌رباسبوی، كو دیسان مه‌به‌ستا من نه‌ تاوان باركرنا لایه‌نه‌كی و پشتگیریا لایه‌نه‌ك دن لێ بگشتی ژبو ئه‌م ژ سه‌ربورا خوه‌ هنده‌ك سودی وه‌رگرین، یا ده‌ربوی ده‌رباس بو و ئێدی ناڤه‌گه‌ریت لێ گرنگه‌ ئه‌م هه‌ر ده‌م رێ لدوباره‌ بونێ بگرین. جاره‌ك دنژی دبێژم مروڤاتی هه‌ردو جوره‌ بیرهاتنێن خراب و باش ببیرتینیت، ژبو خرابی بن بربن و باشی دوباره‌ بن.
هه‌ر ژ ده‌ستپێكا ئالوزیا سوریێ به‌شه‌ك ژ پارت و رێكخستنێن كوردی سواری پێلا سوننیا عه‌ره‌بی بون و ناڤێن وان لخوه‌كرین ژ عه‌ره‌بی كرن كوردی وه‌ك ئه‌نیا نیشتیمانیا كوردی كو ژ الجبهه‌ الوتنیه‌ السوریه‌ و ….. هتد ژ كوپیا عه‌ره‌بی. ئه‌ڤ لایه‌ هه‌یا رۆژا ئه‌ڤرو بویه‌ پارچه‌ك ژ پرۆژا توركی و بباوه‌ریا ڤی لایه‌نی دوژمنداریا توركا بو رۆژئاڤا ژ دوژمنداریا په‌كه‌كێ تێ و په‌یه‌دێ وه‌ك هه‌لگرا ئیدولۆژیا ئاپوچی ل رۆژئاڤا. لایه‌نگرێن ڤێ بوچونێ بئالیكاریا توركی و په‌ده‌كا عیراقێ له‌شكه‌ره‌ك كو ژمارا وان دبێژن پتره‌ ژ ١٠٠٠٠ كه‌سان پێك ئانیه‌ لبن ناڤێ پێشمه‌رگێن رۆژ ژ هه‌ڤركیا چه‌كدارێن په‌یه‌دێ بكه‌ن ل رۆژئاڤا. راسته‌ زۆر رونشتن و دانوستاندن چێبون لناڤبه‌را هه‌ردولایه‌نا ژ بگه‌هن چاره‌سه‌ریه‌كێ و رێڤه‌به‌ریه‌كا هه‌ڤپشك ل رۆژئاڤا بتایبه‌تی لژێر چاڤدێریا سه‌روكێ هه‌رێما كوردستانا عیراقێ مه‌سعود بارزانی لێ هه‌می بێ ئه‌نجام بون. بوچی بێ ئه‌نجام بون بابه‌تێ من ئه‌ڤرو نه‌ئه‌وه‌. ئاشكرایه‌ بو هه‌میا كو ڤان لایه‌نا هه‌میا لگه‌ل په‌ده‌كا عیراقێ و توركی هه‌می پێچێبونێن خوه‌ كرن، هنده‌ك جاران نه ‌راسته‌وخوه‌ و هنده‌ك جاران راسته‌وخوه‌ ژبو فێشارێ بینن سه‌ر په‌یه‌دێ لێ سه‌رنه‌گرتن. یه‌ك ژهه‌ولدانا ئه‌نه‌كه‌سێ ره‌وشێ لناڤخوه‌ بئازرینیت، توركیا هه‌ڤسارێ دوروندێن خوه‌یێن ئیسلامی به‌رده‌ت و په‌ده‌كا باشور ئابلوقێ دانیت سه‌ر رێڤه‌به‌ریا رۆژئاڤا و برێكا تێكه‌لیێن خوه‌یێن هه‌رێمی و نێڤنه‌ته‌وی په‌یه‌دێ روره‌ش كه‌ت، هه‌یا گه‌هشته‌ لێدانا خه‌نده‌كێ بده‌مه‌ك پر كورت لگه‌ل ڕۆژئاڤا، پاشی هاتنا داعش بو موسل و دژواربونا هێرشا لسه‌ر رۆژئاڤا.
به‌ره‌ڤاژی هه‌لاتنا شنگارێ به‌رخوه‌دانا قه‌هره‌مانانه‌یا كوبانێ براستی پرانیا دونیایێ هه‌ژاند و تازه‌ پرسا كوردی ژ یاپان هه‌یا مه‌كسیكو بو رۆژه‌ڤ، سه‌ردێرێن كه‌نالێن ته‌لڤزیونی و روژناما ده‌نگوباس و وێنێن شه‌رڤانا بون، گه‌له‌ك كه‌سێن نه‌كورد ناڤێ كوبانی ل زاروكێن خوه‌ كرن. هه‌لبه‌ستڤان شه‌عبان سلێمان ب ئاشكرا د هه‌لبه‌سته‌كا خوه‌دا بانگ دكه‌ت دبێژیت ( به‌ختێ ته‌مه‌ كوبانی نه‌ره‌ڤی نه‌كه‌ ڤی ما هه‌تا كه‌نگی دێ كارێ مه‌ ره‌ڤبیت؟؟؟؟؟؟؟؟). ئه‌ز بخوه‌ نوزانم كانێ مه‌به‌ستا ڤی جامێری چیه‌ لێ بومن رامانا وێ هه‌یا جه‌نگا كوبانی كورد ته‌نها ره‌ڤینه‌؟؟؟؟؟؟؟. كوبانی نه‌كه‌ت و ژ به‌رخوه‌دانا كوبانی قادا سوریێ پر گوهه‌رتن ب خوه‌را ئانین. هه‌ر ژ بوهارا ٢٠١٥ بره‌نگكه‌ك راسته‌و خوه‌ هێزێن روژئاڤا ب سه‌روكاتیا ئه‌مریكا و فره‌نسا كه‌فتن ناڤا سوریێ. هه‌رچه‌ند ئه‌ڤ كاره‌ بومن وه‌ك كورده‌ك دلخوه‌شكه‌ربویه‌، ده‌یانا جاران هند بو لایه‌نێ توركی و ئه‌نه‌كه‌سێ دلنه‌خوه‌شكه‌ر بویه‌ و شوێن نه‌ماینه‌ نه‌گوتیه‌ ئه‌مریكا هه‌ڤكاریێ بته‌روریستارا دكه‌ت كو مه‌به‌ستا وان په‌یه‌ده‌ یه‌. ببه‌رفره‌هبونا بیڤا ده‌ستهه‌لاتداریا په‌یه‌دێ ل رۆژئاڤا هه‌ستیریا لایه‌نێن دن پتر دژوار دكر هه‌یا هنده‌ك جاران جامێر هه‌بون دگوتن ئه‌سه‌د باشتره‌ و هنده‌ك كه‌سێن دن دگوتن رێڤه‌به‌ریه‌ك ته‌كره‌وه‌، هه‌رچه‌نده‌ ئه‌گه‌ر هه‌ڤژینێن وان بجێمكا دو گیان بن دێ كوژن چونكی تاقه‌تا شه‌ریكا نینه‌؟؟؟؟؟؟.
ژ تێكه‌لیێن نێزیك ب هنده‌ك سه‌ركردێن په‌یه‌دێرا من زانی كو یه‌كه‌مین ئارمانجا په‌یه‌دێ كورد ژ ڤێ جه‌هنه‌ما شه‌ر و ململانا سوریێ ده‌ركه‌ڤن بكێمترین زیان و باشترین ده‌ستكه‌فتی، بكورتی به‌رنامه‌ك دن كورخایه‌ن ژ ده‌رڤه‌ی ڤێ نه‌بویه‌ بباوه‌ریا من، له‌وما په‌یه‌دێ نه‌دخواست وه‌ك ئه‌م كورد دبێژین دارێ دبینیرا ببریت لگه‌ل رژێما ئه‌سه‌د. لێ ئه‌و كه‌سێن دبێژن كو په‌یه‌ده‌ و ئه‌سه‌د دیه‌ك به‌ره‌دا بونه‌ بلا بسه‌لمینن. په‌یه‌دێ یه‌ك شه‌رڤانێ خوه‌ ملبملێ له‌شكه‌رێ ئه‌سه‌د نه‌داینه‌ كوشتنێ، په‌یه‌دێ ژ زۆرئاڤا سامێ هه‌یا شێخ مه‌قسود و ئه‌شره‌فیا حه‌له‌بێ به‌ره‌ڤانی ژ هه‌بونا كوردێ خوه‌ كریه‌ كو نه‌بنه‌ كوله‌یێ ئه‌سه‌د یانژی هێزێن پانئه‌ردوگانیزمێ. باشه‌ ئه‌م هه‌می دوزانین ئه‌سه‌د، شیعه‌یێن وی و لگه‌ل روسیا بوچی د جه‌نگا كوبانیدا پشتگیریا په‌یه‌دێ نه‌دكرن؟؟؟؟؟
پێشڤه‌چونا كوردا د شه‌رێ داعشدا ئه‌ردوگان خسته‌ تایێدا. بو وان كه‌سێن دبێژن توركیا پێخوه‌شه‌ پێشمه‌رگێن رۆژ لگه‌ل چه‌تێن جه‌ربه‌ ل سنورێ رۆژئاڤا بێن به‌لاڤكرن، ببیتینم كو ده‌ما داعش هێرش كری سه‌ر زۆنا زه‌ر ٣ تیرمه‌ها ٢٠١٤ توركیا بهه‌زارا له‌شكه‌ر ل زۆنا زه‌ر هه‌بو له‌ یه‌ك فیشه‌ك نه‌ ته‌قاند هه‌مبه‌ر داعش. مه‌سعود بارزانی سه‌روكێ په‌ده‌كا عیراقێ گوتییه‌كه‌مین وه‌لات دهه‌وارا مه‌هاتی ئیران بو، باشه‌ ئه‌ردوگانێ خوه‌شتڤیێ وه‌ بوچی بێده‌نگ ما، ژ لایه‌ك دن راسته‌ عیراق. ئیران و سوریا دژاتیا رێفێره‌ندومێ كرن ل هه‌رێما كوردستانا عیراقێ لێ كه‌سه‌كی وه‌ك ئه‌ردوگان و راگه‌یاندنا وی بێرێزی بكوردا كرن؟؟؟؟؟؟؟؟؟. له‌وما تێكه‌لی بدیتنا من لگه‌ل هه‌ر وه‌لاته‌كی هه‌یا سێ داگیكه‌رێن كوردستانێ رێ دچیتێ، لێ هه‌می ره‌نگه‌ك تێكه‌لی لگه‌ل توركی هه‌یا رۆژا ئه‌ڤرو بدیتنا من خیانه‌ته‌، راسته‌ عه‌ره‌با بكیمیایێ شه‌رێ مه‌كریه‌ لێ نه‌گوتیه‌ كوردنینن، فارسا نه‌بیت ناڤێ یه‌ك پارێزگه‌ها خوه‌ كرینه‌ كوردستان، سوریا دده‌ستوریدا كورد نینن لێ باوه‌ر ناكه‌م هه‌می رژێمێن سوری ته‌مه‌ت یه‌ك سالا هه‌را باشا توركا كورد كوشتبن.
چه‌ند ده‌مژمێر ماینه‌ كو ٢٠١٨ بدوماهی بێت و بكه‌ڤینه‌ سالا ٢٠١٩ ده‌. مین بخوه‌ نایێت هزرا كو جاره‌ك من ژدل باوه‌ری هه‌بیت كو سالابێت دێ باشتربیت هه‌یا سه‌رسالا ٢٠١٤\٢٠١٥ . به‌رخوه‌دانا عه‌فرینێ سه‌لماند بو یه‌كه‌مین جار كور بهوست ب بوهوست لسه‌ر ئاخا خوه‌ شه‌ر دكه‌ت. توركو بهندێ مر كو ئێدی پسیكۆلژیا به‌شه‌ك ژ كوردا سه‌هما وان لێ نه‌مایه، سه‌رده‌ما سترانا ئه‌رده‌وان كچك زابتا تیركا دڤێت بچیت ناڤ گیفكیدا. بكوردی و بكورتی كی تێ و كی دچه،‌ دڤێت بێژم كو سه‌رده‌ما كوردستان یان نه‌مان چو، شوینا هندێ كوردو بامه‌رنی دبێژیت دێ ژین كورد و دێمینیت كوردستان‌.

‎لدور Malame

Check Also

خێركرن ( به‌خشین ) و خوه‌دی ده‌ركه‌فتن، كوله‌تی و ئازادیه‌

د. شه‌عبان مزوری هه‌ر ژ زاروكاتیا خوه‌ هه‌یا رۆژا ئه‌ڤرو تێ گوهێ من ده‌نگێ خه‌لكێن …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.