نە ناوشێروان دشێت گۆرانکاری یا بکەت و نە دەستهەلاتەک گەندەل دشێت چاکسازی یا بکەت

د. شه‌عبان مزوری
ئه‌ڤ وتاره‌ به‌ریا ٨ سالا هاتیه‌ نڤیسین لێ هه‌مان رۆژه‌ڤه‌
بەیان ناما بزاڤا گۆران لسەر هەلوەشاندنا حوکمەت و پەرلەمانێ باشورێ کوردستانێ جارەک دی ل باشورێ کوردستانێ جاددە ڤالاکر و هەر هندەکا ل لایەکێ جاددێ جهێ خوەکر. ژخوە جاددامەژی نە گەلەک جودایە ژ یا مسرێ،تونس، یەمەن و وەلاتێن دی یێن هەرێمێ، ل هەردوو رەخا خەلک هەیە بێ بولیل درەقسیت، ئەڤجا نەخاسمە ئەگەر هندەک جارا بو وان بولیلەک بێتە لێدان.
بگشتی رەخێ گۆران دبێژیت هەلوەشاندنا حوکمەت و پەرلەمانی تەنیا رێکە بو چارەسەرکرنا کریسا(ئالۆزیا) کوردستان ئەڤرۆ گەهشتی یێ، رەخێ دەستهەلاتێ دبێژیت پشتی گۆران شکەستن لدویف شکەستنێ خواری و ئیفلاس بوی گۆران دخوازیت تێکدانێ ل کوردستانێ بکەت. ب باوەری یا من پرانی یا هەڤالێن گۆرانێ نوزانن کریس چی یە، چونکی گۆران بخوە دناڤ کریسێ دایە. هەروەسا هەڤالێن دەستهەلاتێ ژی نوزانن تێکدان چی یە، چونکی ئەڤە ٢٠ سالە ما چ مایە پ د ک و ی ن ک تێکنەدای.
بێ گۆمان ل دەستپێکا دروست بونا بزاڤا گۆران و پشتی سەرکەفتنا مەزن ئینای د هەلبژارتنێن پەرلەمانێ کوردستانێ ل ٢٥ تیرمەها ٢٠٠٩ ئومێدەک مەزن چێبو بو گەلەک کەسێن مە ل باشورێ کوردستانێ، هەیا ژمارەک بەرچاڤ ژ ئەندام و لایەنگرێن پارتێن دەستهەلاتێ. بدیتنا هەمی یا هەبونا ئۆپوزسیونێ بۆ جارا ئێکێ ب ڤێ رێژا مەزن دێ شێت تا راددەکێ مەزن دزی و گەندەلی یێ کێمکەت ل کوردستانێ و دەستهەلاتێ مەجبورکەت پتر خەمێ ژ گازندێن خەلکی بخوت. تا راددەک مەزن بزاڤا گۆران سەرکەفتی بو د نەهێلانا دزی و گەندەلی یا ئآشکرادا، ڵێ گەندەلی یا یاسایی و لبن ناڤێن جودا و دزیا لپشت پەردێ بەردەوامە.
گۆران بوچی گەهشتە ڤێ کریسێ. هەرچەندە د گوتن ئەم نە بزاڤەک کلاسیکی کوردینە، ئەم دێ رەنگێن مودەرنێن رێکخستنا ئێخینە دناڤ ژیانا پولیتیکا کوردی دا، لێ د خالێن ڤەبردا سەرکردایەتی یا گۆران چ جودابون ل گەل سەرکردایە تی یا پارتێن دی یێن باشورێ کوردستانێ نینە و ئەڤەنە ئەگەرێن سەرەکیێن کریسا گۆران لدویف بوچونا من:
١/ بزاڤا گۆران وەک هەر هێزەک کوردی بابێ روحی یێ خوەیێ هەی، کو ئەوژی ناوشێروان مصطفی یە، شاشنابیت، هەمی تشتەکی دزانیت و دڤێت هەمی ب گۆتنا وی بکەن و بەرەڤانی یێ ژێبکەن هەیا ئەگەر نەدروست ژیک بیت. هەیا ئەڤرۆ مە گوهلێ نەبویە کەسەکێ بەرچاڤ ژ بزاڤا گۆران رەخنەک یان تێبینیەک لسەر هەلویستەکێ ناوشێروان مصطفی هەبیت، لێ وەک بکوردی د بێژن بەس خوەدێ بێ کێماسی یە. لێ وەسا دیارە بزاڤا گۆران ژی یەک هزرە یەک هەلویستە ل پشت بابێ روحی یێ خوە، ئەڤەژی بێگومان دویرە ژ گۆرانکاری یا خەلکێ مە دخوازیت.
٢/ ناوشێروان مصطفی بۆ خوە وەک هەمی سەرۆکێن پارتی و بزاڤێن کوردی ب کێماسی دبینیت بونا ئەندامێ پەرلەمانێ کوردستانێ. ژبو چارەسەرکرنا ڤێ پرسێ دڤێت مە سێ حوکمەت هەبن شوینا دووا، دا ناوشێروان مصطفی ژی ببیتە سەرۆکەک.
٣/ سەرکردا بزاڤا گۆران وەک پولیتبیرویا پارتێن دی کاردکەت، بخوە نەوێریت ئەرکێ بەرپرسیاری یێ وەرگریت لەوما کەسێن ل پلێن نزم دکەتە ئەندام پەرلەمان، ئەگەر باش و سەرکەفتی بون ، کارێ وان بو سەرکردایەتی یا گۆران ڤەدگەریت، ئەگەر ژی کارێ وان خراب بو، سەرکردایەتی یا گۆران بەرپرس نینە. بکوردی دبێژن ئەگەر تو نەزانی چاڤدە جیرانی. بۆ نمونە ئەگەر ئەم تەماشەی عیراقا عەرەبی بکەین دێ بینین کۆ هەمی هێزێن سیاسی ب هەمی گرانیا خوە راستەو خوە بەشداری یێ د پەرلەمان و حوکمەتێ دا دکەن ژبلی عمار حکیم و بابێ وی کو ئەوژی خوە ببابێ روحی یێ شیعا دزانن و ب دیتنا من ئەڤە ئەگەرا سەرەکی بو د پاشڤەچونا مجلس الاعلی د هەلبژارتنێن دوماهی یێ دا.
ئەم ڤەگەرین سەر بەیان ناما بزاڤا گۆران، ب باوەری یا من پرانیا خلکێ باشورێ کوردستانێ ب وان خالارایە ئەوێن د بەیان ناما گۆران دا هاتین، بەلێ ل ڤێرە من دڤێت ل گۆر دیتنا خوە شرۆڤەک بدەمە سەر شێوێ دەرکرنا ڤێ بەیان نامێ. بزاڤا گۆران هەردەم د بێژیت پارتێن دەستهەلاتێ دەست خوە خستی یە ناڤ هەمی کارێ دەولەتێ و دڤێت ئەڤ تشتە نەمینیت. لێ بزاڤا گۆران بڤێ بەیان نامێ ئاشکەراکر کو نە جودایە ژ پارتێن دەستهەلاتێ.
وەک ئەم هەمی دزانین بزاڤا گۆران ٢٥ ئەندام ل پەرلەمانێ کوردستانێ هەنە، ئەگەرسەرکردایەتی یا بزاڤا گۆران هندەک رێز نەبو خەلکی بەلکو بو هەڤالێن خوەیێن پەرلەمانتەر هەبا نە دبو بەیان نامەک بڤی رەنگی بناڤێ بزاڤا گۆران دەرکربا، بەلکو دڤێت هەڤالێن وێ ئەندامێن پەرلەمانی ب ناڤێ فراکسیونا گۆران ئەڤ بەیان نامە دابا دەستێ سەرۆکێ پەرلەمانێ باشورێ کوردستانێ و پاشی ئەشکرا کربا د کونگرەک رۆژنامەڤانی دا.
خالەک دی پر گرنگ ئەوە کو بزاڤا گۆران ئەڤ بەیان نامە ب چ لایەنێن دی یێن باشورێ کوردستانێ را دان و ستاندن لسەر نەکری یە. ئەڤەژی ڤەدگەریت هندێ ب دیتنا من گۆران وەک ماسترین هێز دناف ئۆپۆزسیۆنێدا بپێویست نوزانیت لگەل لایەنێن دی باخڤیت چنکی حسابێ بو وان ناکەت. لڤێرە ئەم ڤەگەریاین سەر رەوشا هەیا ئەڤرۆ مەهەی، ئانکو فلان هێز مەزنە و فلان بچیکە لەوما پێویست ناکەت لگەل هێزێن بچویک دان و ستاندنێ بکەی چونکی گۆتنا وان ب چناچیت.
ئەڤ کارێ بزاڤا گۆران کری بڤێ بەیان نامێ زارۆکا تینە بیرا من دەما تایەکا دژوار زارۆکا دگریت ژبەرخەو د ئاخڤن ( ئانکو کێمک دگریت). بێگومان پارتێن دەستهەلاتێ رەفتارەک گەلەک دور ژ کێمترین پیڤانێن باژێرڤانی و مرۆڤاتی ل گەل ئەندام و لایەنگرێن بزاڤا گۆران دکەت، هەر ژ نان برینێ هەیا تاوانا خیانەتێ، ئەم دشێین گەلەک پتر بنڤیسین لسەر رەفتارا بێ وژدانانەیا دەستهەلاتێ، لێ ئەڤەهەمی نەدبو ببا ئەگەرا هەلویستەکێ بڤی شێوەی ژلایێ بزاڤا گۆران. بباوەری یا من بزاڤا گۆران نەشێت وان گۆران کاری یا بکەت ئەوێن لسەر دئاخڤیت چونکی سەرکرداوێ بەشەک بویە ژ نفشی کوردی ئەوێ کەسێ لهەمبەر خوە نابینیت و خوە لسەر هەمی کەسی را دبینیت. بکورتی مەزنا یێ گۆتی فەلێ پیر بوسورمان نابیت.
ئەڤ بەیان ناما گۆران خوەدێ بو دەستهەلاتێ ئینا دڤێ دەرفەتێدا ژ بۆ بەرێ خەلکی بو دەمەک کورت بیت ژیک بدەتە گۆران و ب کەیفا خوە گەندەلی یێ بەردوامکەت. دەستهەلاتێ طەب ئینا خوە، ژ لایەکی جارەک دن بەس خوە کورد پەروەر دبینن و هەرکەسێ نە بیاوانکر دێ مورا خیانەتێ و تێکدەری یێ لێدەن. لێ تشتێ هەرێ کرێت گازیکرنا هەمی پێشمەرگەی بو، وەسا نیشاندان کو کوردستان هەمی دێ بیتە ئاگر. ی ن کێ ل سولەیمانی یێ ل گۆر هندەک ژێدەرا تانگ بەرامبەر گرێ ناوشێروان مصطفی دانابون، لێ گەلو مە ئەڤ تانکە چجارا نە دیتن ی ن کێ بو کەرکوک ب کار ئینابن هەیا وەک گەف.
دەتسهەلات د بێژیت ئەم رێنادەی کەس حوکمەتا مە هەلوەشینیت، ئەڤە دەست کەفتیەک نەتەوی یە، لێ پرسا من ژ دەستهەلاتێ، کیژان حوکمەت دەستکەفتا نەتەوەیی یە، یا هەڤلێرێ یانژی یا سولەیمانی یێ. دەستهەلاتەک کو بخوە دبێژیت گەندەلی یێ هەمی جهەک دناڤ کۆمەڵگەهێدا گرتی یە ئانکۆ ژ زاهیرێ ( فێنومێن) بو بوچون. پرس ل ڤێرەیە چەوا مروڤی باوەری هەبیت ب دەستهەلاتەک ژ نینوکا تبلا پی هەیا کڤاندکا سەری دناڤ گەندەلی یێ دا بیت و سوزێن چاکسازی یێ بدەت.

‎لدور مالا مه‌

Check Also

شولكه‌رێ خوه‌به‌ خوه‌شتڤیێ خه‌لكێ… رۆژئاڤا

د. شه‌عبان مزوری من دڤێت ژ هندێ ده‌ست پێبكه‌م كو رۆژئاڤا نه‌ ئوتوپیایه‌ و بڤی …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.