گرنگه‌ په‌رله‌مان ده‌ست بكاربیت یانژی گرنگه‌ هه‌می به‌شدار ئاماده‌بن؟

د.شه‌عبان مزوری
پشتی پتر ژ چوار هه‌یڤا ده‌رباسبوین بسه‌ر جڤینا یه‌كه‌مینا په‌رله‌مانێ هه‌رێما كوردستانا عیراقێ، ئه‌ڤرو دویه‌مین دانیشتن هات ئه‌نجامدان و به‌شه‌ك ژ ده‌سته‌یا سه‌روكاتیێ هات هه‌لبژارتن و بڤی ره‌نگی په‌رله‌مان وێ بكه‌ڤیت كار، چونكه‌ نابیت به‌رێزان په‌رله‌مێنتار موچێن خوه‌ بێ پاشكه‌فت وه‌رگرن و لمالێن خوه‌ رونشتیبن، هه‌رچه‌نده‌ ئه‌ز بخوه‌ دوزانم كو چه‌ند كاره‌ك بمن تێ كرن هنده‌ژی ئه‌ندامێن په‌رله‌مانی دكارن كاره‌كی بكه‌ن ژ ده‌رڤه‌ی نه‌خشا ئاغایێن خوه‌، لێ پرس ئه‌ڤه‌ نینه‌ بو من و باوه‌ر دكه‌م به‌شه‌ك مه‌زن ژوه‌ژی ئه‌ڤرو.
گه‌له‌ك كه‌س نه‌ئاماده‌بونا یه‌نه‌كێ ل جڤینا ئه‌ڤرودا وه‌ك كێماسیه‌ك مه‌زن دبینن، لێ ئه‌ز بخوه‌ ژدل ده‌ست خوه‌شیێ لپه‌ده‌كێ دكه‌م كو كاری پتر ژ دو سێكێن ئه‌ندامێن په‌رله‌مانی كومكه‌ت و بڤی ره‌نگی په‌رله‌مانی ئه‌گه‌ر نه‌بیت بناڤ كاراكه‌ت كو ئه‌ڤه‌ژی فاكته‌ره‌كێ ئارامیێ یه‌ ژبو خه‌لكێ و بازارێ. پتر ژ چوار مه‌ها ده‌رباس بون تازه‌ یه‌نه‌كه‌ داخواز دكه‌ت دانیشتنا په‌رله‌مانی بو ٢٤ كاتژمێرا بێته‌ پاشخستن. لڤێره‌ پرسه‌ك ساده‌ ئه‌ڤ دانوستاندنێن بچوار مانگا سه‌رنه‌گرتین دێ بشه‌ڤه‌ك و روژه‌كا بدوماهیك ئێن؟؟؟؟؟؟
ئه‌ڤ دیمه‌نه‌ بو مه‌ نه‌تازه‌یه‌، ئه‌م ڤه‌گه‌رین هه‌لبژارتنێن ٢٠١٣ ل ده‌ستپێكا دوروسبونا حوكمه‌تێ یه‌نه‌كێ بایكوت كر، لێ پشتی ئه‌و ده‌نگێن هه‌ما كی بیت په‌ده‌كه‌ نه‌بیت بو خوه‌ ڤه‌كێشاین ل هه‌لبژارتنێن په‌رله‌مانێ عیراقێ نیسانا ٢٠١٤ جاردن ڤه‌گه‌را ناڤ حوكمه‌تێ و هه‌یا روژا ئه‌ڤرو به‌رده‌وامه‌. لێ لوه‌ ناڤه‌شێرم كو ڤێ جارێ نوزانم بوچی به‌شدار نه‌بون، ئه‌گه‌ر هه‌لبژارتنێن پارێزگه‌ها د روژه‌ڤێدا بان دا بێژم هه‌مان ترار و هه‌مان گه‌رماڤه‌.
گه‌له‌ك كه‌س باسا دو رێڤه‌به‌ریا دكه‌ن، ژ خوه‌ دو رێڤه‌به‌رینه‌ و یه‌ك په‌رله‌مانه‌، ئه‌ڤێ ئه‌م هه‌می دوزانین، دابدرینا زۆنا كه‌سك نه‌ پر ئاسانه‌ ژبو یه‌نه‌كێ چونكی ببوچونا من ره‌نگه‌ك زه‌لال كه‌سك نه‌مایه‌ ئه‌ڤرو وه‌ك ره‌نگێ كه‌ڤزا ناڤ چه‌ما لێهاتیه‌، گه‌له‌ك جارا ده‌ما تاڤ لێدده‌ت به‌شه‌ك بسه‌ر زه‌ریڤه‌ دچیت و به‌ره‌ڤ ئێڤاره‌ك دره‌نگ به‌شه‌ك ره‌نگێ بنه‌فشی دگریت. راسته‌ یه‌نه‌كه‌ خوه‌دی هێزه‌ك چه‌كداره‌ لێ بریارا وی چه‌كی نه‌ دده‌ستێ كه‌سه‌كی یان بنه‌ماله‌كێ دایه‌ له‌وما ئه‌ڤ چه‌كه‌ دبیت بو مالا تاله‌بانی نه‌ بباشی ته‌مام بیت وه‌ك چه‌وا بو مالا بارزان. ئه‌م دوكتور پر ده‌ما دبێژین هه‌می ده‌رمانه‌ك یێ باشه‌ لێ نه‌بو هه‌ركه‌سی، چه‌كژی یێ باشه‌ لێ نه‌دهه‌می ده‌سته‌كیدا.
لدوماهیێ دبێژم بو من گرنگه‌ په‌رله‌مان كومبیت، بهیچ ره‌نگه‌كی گرنگ نینه‌ كی بایكوت دكه‌ت یان نه‌، ئه‌و كێشا وی كه‌سی یه‌ یان لایه‌نی لگه‌ل ده‌نگده‌رێ وی. هیڤیدارم لده‌مێن پێش ئه‌ڤ ره‌وشه‌ دوباره‌ نه‌بن و هه‌می كار لده‌مێن خوه‌یێن یاسایی بێن ئه‌نجام دان.
په‌رله‌مان پێویسته‌ بزوترین ده‌م فشارێ بخته‌ سه‌ر هه‌مو لایه‌نا ژبو پێكئانینا حوكمه‌تێ و هه‌لبژارتنا سه‌روكێ هه‌رێمێ كو هیڤیدارم ئه‌ڤه‌ دوماهیك سه‌روكێ هه‌رێمێ بیت و بفه‌رمی په‌رله‌مان راگه‌هینیت كو بو هه‌لبژارتنێن تازه‌ سه‌روكاتیا هه‌رێمێ بێت هه‌لوه‌شاندن چونكی خه‌رجه‌ك بێ واتایه‌ لڤی دامه‌زراوه‌ی تێ كرن و هیچ سوده‌كا وی نینه‌..

‎لدور مالا مه‌

Check Also

ئەڤرو ژ سبە باشترە

د.شه‌عبان مزوری ٢٦\٠٩\٢٠١١ هەرچەندە ئەڤە بسالانە گەلەک رەوشەنبیر، زانا، بسپور و نڤیسکار ددەلیڤێن جودادا ئاگاداری …


هه‌ر بابه‌ته‌كێ به‌لاڤكری ده‌ربڕینێ ژ بۆچونا نڤێسه‌رێ بابه‌تی دكه‌ت و ماڵامه‌ ئینفو ژێ به‌رپرسیار نینه‌.