شەکر شکاندنا رۆژناما الصباح نەهەوانتیە،”کەرب برا کوژە”
محمەد چەلکی
ل ١٩-٢-٢٠٢٣ رۆژناما الصباح یا نێزیکی حوکمەتا عێراقێ ئاماژەی ڕاپۆرتەکێ کر کو دەزگەهێ ( ڕاپرسی و شیکاری) ل هەرێما کوردستانێ کربوو ، ل گۆڕەی وێ ڕاپرسیێ(ئەگەر هاتبتە کرن) پڕانیا خەلکێ هەرێمێ خازیارن بڤەگەرنەڤە سەر عێراقێ!!
ڕاپرسی ب تایبەت ئەگەر پرسیارێن دهێنە کرن گەلەک ڕامان و دیدا بخوەڤە بهەلگرن، وەڵاتی دبەرسڤدانێدا حێەبەتی دمینت و نەشێت ب درستی بەرسڤێ بدەت یان ژی بەرسڤ ب خوە دکەڤتە د خانا گومانێ دا. ڕاپرسی ل وەڵاتێن رۆژهەڵاتا ناڤین نە جهێ باوەرێنە چونکو وەڵاتی نەشێت ڕاستییا بۆچوون و دیدێن خوە دیار بکەت، ژ ترسا دەستهەڵاتێ و هێزاکەڤنەشۆپی. ئەڤ ڕاپرسییا رۆژناما الصباح ئاماژە پێدای ژی دچیتە دڤێ خانێ دا، ئەڤە ژ لایەکیڤە و ژ لایێ دیڤە ژی دبت هاتبتە کرن و ئەنجام ژی دڕاست بن. ل ڤێرە دڤێت ئەم سەردەریێ دگەل هەر دوو لایەنان بکەین. گریمان ڕاستە خەلکێ هەرێمێ ئێدی ناخازن د چارچۆڤێ حوکمەتا هەرێما کوردستانێ دا بژین. ل جهێ ئەم داخوییانیێن ئاگرین و ب رۆمانسییەتا ئەنجامێن ریفڕاندۆمێ(٢٠١٧) بکەڤینە گەنگەشەکا بیزەنتی و پەلەندارێن خیانەتێ دڤی و وێ هە وەر بکەین، فەرە ب تایبەت حوکمەت و پارتیێن د دەستهەڵاتێ دا ڤەخاندنا رەوشا وەڵاتیان بکەن و ل کێش و بێشێن وی ببتە خودان. ل چ دەرا ڤێ جیهانێ چ مللەت و نەتەوە ناخازن دبن دەست بن و دبێ دەولەت بن. بەلێ بۆچی خەلکێ هەرێما کوردستانێ سەرەڕای وان قۆربانیێن داین بۆ گەهەشتنا ڤێ رۆژێ، ئەڤرۆ هەر ئەو وەڵاتی بخازت بڤەگەریتە سەر بەغدا و چارچۆڤێ هەرێمێ نەمینت!!
بەرسڤا ڤێ پرسیارێ گەلەکا ب ساناهییە و ڤەکری دبێژم، ئەڤە ئەنجامێن سیاسەتا ففتی ففتی، قۆرخکرنا هەمی سکتەرێن ژیانێ د لەپێ پارتێن د دەستهەڵاتێ دا، بەڵاڤەبوونا گەندەلیێ ب شێوەیەکێ مەترسیدار، نە رۆهنییا بادەکێن پەترۆلێ و گرێبەستێن وێ، داکەتنا کەرتێ ساخلەمیێ و پەروەردێ، نەبانا حوکمەتێ ل تەڤایا کێش و بێشێن ئێکسەر پەیوەندی هەی ب ژایارا خەلکیڤە، دەستهەڵاتا کوردی گەهەشتیە قۆناغا هیبۆکراسیێ و ب مافیابوونا ئابوورێ کوردستانێ.
چارەسەریا بادەکێن مە ل ژوور دیارکرین و چەندێن دی ب ئەزموون بۆ وەڵاتیێن کوردستانێ دیار بوویە، کو ئنییەتا چارەسەریێ د ئەجندا دەستهەڵاتا کوردی دا نینن، و ژ هەموو سۆزێن چارەسەریێ بێ هیڤی بوویە. دیسا فەرە ئامەژی وێ یەکێ بکەین کو درێژبوونا قەیرانا ئابووری(٢٠١٤) و کەلەکەبوونا قەرێن حوکمەتێ چ یێن کۆمپانیا( حەتا نوکە حوکمەتێ چ داخویانی ل سەر چەوانیا وان قەران نەداینە کو ئەڤە ب خوە بێ متمانەیێ ل دەف وەڵاتیان پەیدا دکەت) و چ پاشکەفتێن مۆچێن وەڵاتیان ل سەر حوکمەتێ، هەتا حوکمەت مۆچەی پەیدا دکەت، سەد دەرد و جەفا دکێشت.
وەڵاتی ئەڤان کێشان و نەبانییا حوکمەتێ دبینت، ئەڤجا لۆمە ژ وەڵاتی ناهێتە کرن ئەگەر ئەنجامێن وێ ڕاپرسییا ناڤهاتی دڕاست بن. ب دیتنا من وەڵاتیان خاستییە هۆشداریێ بدەن حوکمەتێ کو ل کێشێن وی ببتە خودان، ڕاست هاتیە گۆتن:” کەرب برا کوژە “.