وەحشیگەرییا بێ سنۆر!

جاسم محمد شرنەخى

ئەڤ تاوانا بەریا سێ ڕۆژان ل باکۆرێ کوردستانێ ل نێزیک نسێبینێ هاتیە ئەنجامدان، ب ئاوایەکێ دەهبایەتیێ مرۆڤ نکارت ساویر و خەیال ژى بکت، چەوان ب دلێن ژ بەرى ڕەقتر هەر پێنج هاوڵاتیێن هەرێمێ د ئێک دەمدا کۆمکۆژ کرن، گونەهباران نە ئەو ژنا دانەعمرا بێ چارە هشتن، نەک ژى کچا جحێلا دەلال یا هێشتا چاڤێن خوە باش ل جیهانێ ڤە نەکرین دەست ژ خوین رژتنا وێ بەردان!

ئەوان هۆڤێن ئادەمیزاد هەر پێنج قوربانی ل غەریبییان ئێخستنە بەر لێدانا گولەیێن ئاگرى، هەمى ژى ل کلۆخێ سەرێن وان دان، ئەو دایکا نەشیاى دبن گەف و ترساندنا چەکێ وان چەپەڵان ژ بەر ئێش و ژانێن نەخۆشیێن خوە بهێتە خوار، ئەو دەهبە بخوە چوونە سەر سەرێ وێ، د تڕۆمپێلێدا مشتى سەرێ بەلەنگازا نەسۆچدار فیشەکێن دەمانجێ کرن، وەى هەوار ئەڤە ڕاستیە یان ژى كابۆسەک ب سەهمە و خەونەک ترسناکە؟!

ئەڤێ بۆیەرا خویناوییا جەرگبڕ بيرا من ل شرۆڤەکرنەکا درۆستا ڕەوشەنبیرەکێ هەرێما کوردستانێ بەریا دەهان ساڵان ئینا، ئەو ژى هەمبەر پەردەڕاکرنا ل سەر هندەک دیمەنێن وەحشیگەریێن مافیاوى و تیرۆرستى ل باشۆرێ کوردستانێ بوو، دەمێ د نڤێسنێنەکێ گۆتنەکا هۆسان من خواندی: یەک ژ وانەیێن ڤان کریارێن هۆڤانە ئەڤەیە: (ئەم کورد مینا هەمى جڤاکێن دیتر ژ پەیدابوویێن دبێژنێ مرۆڤ پێکهاتینە)! واتە: هەر وەکى ئەو سەیدایێ نڤێسەر دبێژتە مە: دڤێت خوە تێبگەهینن، ئەم ژى – وەکى هەمى مللەتێن جیهانێ – نە ژ ئەسمانێ جوامێریێ هاتینە خوار، نەک ژ تۆڤەکێ پاکێ جودا چێبووینە، نە ژى د کانیا پیرۆزیێدا هاتینە تاهر کرن و شویشتن!

نەخێر ئەم ژى چەوابین هەر مرۆڤین، یێن ژ وان هندەک وەسا بلند دبن، ب چاکى و پاکیا ڕەوشت و ڕەفتارێن بەرز و جوان دگەهنە ئاستێ فریشتەیان، لێ کتەکا کێما مرۆڤان ژى هەنە گەر دەلیڤە بۆ چێبوون دێ چەپەڵی و دڕندایەتییەک ژ وان خوەیا بتن، دێ نە ژ جەنگیزخان و هێتلەر و ساتلینى دلۆڤانتر دەرکەڤن! دناڤبەرا هەر دوو جوینێن بووریدا پڕانییا مە و هەمى گەلان مڕۆڤێن ئاسایینە، نە گەلەک جوامێر و چاکن، نەک ژى چەپەڵ و پڕى خرابن؛ ئەڤجا ئەڤ تاوسییا ئەم خوە ب پەڕێن خوە پش دکن و پیێن خوەیێن کرێت نابینن، ئەڤ خوەخاپاندنە ما نە بەسە؟! ئەو نەخۆشیا نێرگزی دەم هات فەرە دەست ژێ بەردین، چونکى هەم درەو ل خوە و بەربابان کرنە، هەم ژى بێ مفایە!

خوەزى هندەک ڕۆناکبیرێن مە ژى وێری دابایە خوە مینا نڤێسەرێ بەربانگێ تۆرک عەزیز نەسینى چەوا گۆتبوو ڕەوشەنبیرێن مللەتێ خوەیێ تورک: بەس درەوا ل گەلێ خوە بکن، ڕاستیێ بێژنە وان، ئاشکەرا بکن تورک ئەحمەقن، خوەزى مە ژى ڕەخنەیەکا دلسۆز گۆتبا و گوهداریەک ئاقلانە ژى هەبایە! ڤێ کریارا هۆڤایەتییا نسێبینێ ئاشکەرا کر کو مومکنە لبەکا زۆر کێم ژ کوردان – وەکى هەمى توخمێن دیتر- ببنە جۆرەکێ ترسناکێ خوینخواران، خرابکاریێن وان چ دەهبە نەگهنێ. نڤێسەرێ ئوردنیێ مەزن ئیبراهیم نەسرۆ الله د ڕۆمانا خوەیا ناڤبانگدا (جەنگا سەى یا دووەمین – حرب الکلب الثانية) گونەهەکا مرۆڤان وێنە دکت؛ دەمێ ئەم خرابی و ڕەفتارێن پیسە مرۆڤان ب کریارێن کویچکان وەسف دکن، ما ئەڤ ميناندانە (تەشبیهکرنە) خوە ب خوە نە ستەمە؟!

باوەرییا من موکومە نەک تەنها کویچک ژ تاوانێن مرۆڤى دەمێ دبیتە دەهبە بلندترە، بەلکى دڕەندەترین کێلبەخوینێن گیانەوەر قەت نەشێن هەڤڕکیێ ل گەل خوینخوارێن مرۆڤ بکن، بێ گومان هۆڤایەتییا نفشێ هەمى جانداران ئەگەر ل سەر هەڤ کووم ببیت ناگەهیتە هەمبەرى مرۆڤ دەهبەیەکێ ب تنێ، ڤێجا ئەو کەسێ دەهبە چ کورد بت یان ژ کیژ نەتەوەیەکا دن بت، مادەم مرۆڤە بلا تە باوەریەکا تەمام نەبت ل رۆژەکێ نابتە وەحشەکێ بترس و سەهم!

Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close