پرۆسه‌يا هه‌ڤژينى وسازيا مالباتبوونا كلاسيك كه‌له‌ك كێمانى ونه‌رێنى هه‌نه دبنگه‌هـ دا ئه‌ڤ ره‌نگێ تێكه‌ليێ هاتيه دروستكرن
دچاخێ بابكسالارى دا، كو ژئاليێ مێرێن ده‌ستهه‌لادار هاتيه ڤه‌ديتن پشتى چاخێ دايكسالارى كو ژن ژ ته‌ختێ خوداوه‌نديێ هاتينه ئێخستن ب مه‌به‌ستا ملكدارى و زالبوونێ ل سه‌ر ژنان ژبۆ ڤێ هه‌ڤژينى و مالباتێن ب سه‌رده‌ستكرنا مێران وه‌كى رێبازه‌ك هاته په‌يره‌وكرن وژيانكرن.. _ ته‌ڤى كو ئه‌ڤ ره‌نكى ژيانێ وه‌ك رێكخستنه‌ك جڤاكى شكه‌ستن خوارى يه كو دبنه بنگه‌هێ ئێش وژان و ده‌رده‌سه‌ريێ، لێ ديسان ژى پێداگيرى سه‌ر هه‌يه وه‌ك تاكه رێيه‌ك ژبو ئه‌ندامبوونێ دناڤ جڤاكه‌كێن كلاسيك دا كو رێكه‌كا ديتر ناده‌نه تێكه‌ليێن دناڤ به‌را ژن ومێران دا ژبو تێركرن و ئارامكرنا ئاژوويێن خويێن زايندى ب فشار و سه‌رده‌ستيا ئۆلى، كو پرۆسه‌يا هه‌ڤژينيێ دكه‌ن مه‌رج ژبۆ گه‌هشتن ومه‌زنبوون وته‌واوبوونا مرۆڤان.. _ هه‌لبه‌ت ژبۆ ئه‌نجامدانا پرۆسه‌يا هه‌ڤژينيێ هه‌ر كه‌سى ده‌رفه‌ت وبه‌رهه‌ڤيا ڤێ چه‌ندێ نينه ژبه‌ر ئه‌گه‌رێن هه‌ژارى وبێ كارى كو هه‌ر كه‌س نكاره خو بده‌ته به‌ر به‌رپرسياريا دروستكرنا مالباته‌كى، وژبو تێركرنا ئاژوويێن زايندى گه‌له‌ك كێشه وپرسگرێك ده‌ردكه‌ڤن بتايبه‌تى دناڤ جڤاكێن ستاتوكوپارێز و گرتى دا وه‌ك جڤاكێ مه. _ جڤاكێن رۆژئاڤا ل ئه‌ورپا وئه‌مريكا ئالترناتيف ئانكو پێگهوره‌ك ژبۆ هه‌ڤژينيێ ديتن و پرسگرێكا گرانيا به‌رپرسيارى و تێركرنا ئاژوويێن زايندى چاره‌سه‌ركرن ب ڤه‌كرنا تێكه‌ليێن گوهنێليێ ژ ده‌رڤه‌ى سازيا هه‌ڤژينيێ بناڤێ هه‌ڤالينى، هه‌ر وه‌سا جڤاكێن ئيسلامى ژى چاره‌سه‌رى ديتن وه‌كى سيخكرن ئانكو هه‌ڤژينيا زه‌وقى (زه‌واجا موتعه) دجڤاكێن شيعى دا و هه‌ڤژينيا مسيار ئانكو هه‌ڤژينيه‌كا ده‌مكى و رێكه‌فتن هه‌يه سه‌ر ژێكڤه‌بوون و هه‌ڤدووبه‌ردانێ بێى كو به‌رپرسياريه‌كا گران هه‌بيت دناڤ جڤاكێن سونى ل وه‌لاتێن كه‌نداڤى دا وهه‌ڤزينيا عورفى ئانكو روخسارى بێى كو به‌رپرسيارى ڤه‌كرنا ماله‌كى وژيانكرنا بهه‌ڤرا هه‌بيت ل وه‌لاتێ مسرێ و گه‌له‌ك وه‌لاتێن ديترێن ئيسلامى. – به‌لێ دناڤ جڤاكا مه دا ژبلى هه‌ڤژينيا كلاسيك رێيه‌كا ديتر نينه ته‌ڤى كو كرفتاريێن ئابوورى و بلندبوونا رێژا بێ كاريێ وگه‌له‌ك هوكارێن ديتر ژى هه‌نه ژبو ئه‌نجامدانا هه‌ڤژينيێ، به‌لێ ديسان ژى هيچ ره‌نگه ئالترناتيفێن جوداتر كو ئاماژه پێكرى ناهێنه په‌ژراندن و جهێ نه‌فره‌تكرنێ نه، ژبه‌ر كو جڤاكێ مه هزر وبيرێن هوزى وخێله‌كى وئولداريه‌كا گرتى هه‌يه، پشتى ژ راستيا خو دويركه‌فتن و ژيانا خوه‌زايا گونده‌وارى ده‌ست ژێ به‌ردان وچاند وكولتورێ داگيركه‌ران باوايه‌كێ شێواندى وده‌مارگيرى دمه‌ژى و ژين وژيارا وان دا هاتيه سه‌پاندن، ئه‌نجام كێشه وپرسگرێكا هه‌ڤناسين وتێكه‌لى دناڤبه‌را كه‌چ و كوران دا گه‌له‌ك گرانه و رويدانێن توندوتويژى وبويه‌رێن تراژيديك هه‌ر كو ده‌م دچه رێژه‌يا وان بلندتر دبن وژبه‌ر كو جڤاكه‌ك نێرسالارى يه مێر ژى بهه‌ر ئاوايه‌كى دكارن خو تێر بكه‌ن وه‌كى تێكه‌ليێن دگه‌ل جهێن له‌شفروشان و چوينا ده‌رڤه‌ى وه‌لاتى، به‌لێ بتنێ ژن دمينن باجه‌يا هه‌ر ره‌نگه تێكه‌ليه‌كێ دده‌ن، وه‌كى ديار ژى هيچ چاره‌سه‌رى نينن چۆنكى هه‌ر ئاليه‌ك وه‌كى ده‌ستهه‌لات يان سازييێن ئولدارى وجڤاكناسى وره‌وشه‌نبيرى خو لێ ناكه‌ن خودان ووه‌كى به‌رپسياريا خو نابينن. سەگڤان بارەمون، دهوک
