نێرین

پشتی 29 سالا پەرێ وەکی بەرێ

بۆچوونەک دجادێدایە دبێژیت: مللەتێ کورد راپەرین دژی دەستهەلاتا بەعسیا ژناڤچووی نەکریە، بەلکو زلهێزێن جیهانێ(ئەمریکا و بریتانیا) ل سالا 1991ێ دڤیا دەڤەرەکا ئارام بۆ بەرژەوەندیێن خۆ دروستکەن و بنگەهێن NATO ناتۆ لێ بدانن، وان رژێما بەعسی لادا و مللەتێ کوردا ئەڤ چەندە ب دەرفەت دیت و ناڤێ وێ ریدانێ کرە راپەرین. هەرسال دڤێ رۆژێدا ئانکو ل 05.03 شەرێ موزایدا دەستپێدکەت و هەر حزبەک بناڤ سەرکردێت خۆ ب گیڤارایێ راپەرینێ لقەلەم ددەت و هوسا دروشما دفروشنە ئێکودوو. ئەگەر ئەم ب چەمکێ راپەرینێ تەماشەی بەرهەمێت ڤێ ریدانێ بکەین، گومان تێدا نینە پشتی 29 سالێن حوکمرانیا کوردی و ژدایکبوونا کیانەکێ نیمچە سەربەخۆ ئەوێ ناڤ لێ هاتیەکرن هەرێما کوردستانا عێراقێ، ئیرۆ دەڤەر ژهەمی دەمەکی پتر پێدڤی ب راپەرینەکا نویە، چونکی ریدانا راپەرین(راپەراندن) یان گوهرینا نەخشێ باکورێ عێراقێ هێشتا نەبوویە زەمینەسازیەک بۆ ژیانەکا تژی سیستەم و پری ئازادی و خزمەتگوزاری، ل پرانیا وان جهێن پشتی شورش و راپەرین لێ هاتینە ئەنجامدان لهەر جهێ جیهانێ بیت چ زی و چ ژی درەنگ چار بەرهەم پەیدابووینە؛- ئێک: سیستەمێ دەستهەلاتەکا دیموکراسی. دوو: سیستەمەکێ ئابوری یێ بهێز. سێ: ئازادیەکا راستەقینە. ئەرێ ل هەرێما کوردستانێ پشتی ماوێ سەرهلدانێ چ بەرهەم پەیدابوویه؟ خەلکی خینا خۆ رشت دسەرهلدانێدا داکو باشتر بژین، لێ بەرهەمێ قوربانیدانێ 180 پلا بەروڤاژی پێشبینیان دەرکەت (ژبەر بای چوونە بەر باروڤێ)، چونکی پشتی سەرهلدانێ پارتی و یەکێتی ژچیا هاتنە خار و خۆ بسەر ڤی مللەتیدا سەپاند و هەرێم پرکر ژ قەیرانێن ئابوری و سیاسی و شکەستنێن ئیداری ژبلی دزی و تالانکرن و تیرور و چەتەیی و شەرێن ناڤخۆ و غیانەتێن نیشتیمانی و… تەماشەی باژێری بکەن کور و کچێن شەهیدا نەشیاینە بەرهەمێ خوینا دایک و بابێن خۆ بخۆن، باژێر پربووینە ژ بێ سیستەمی و ناعەدالەتی و نایەکسانی و ناقانونیێ، کوردستان ب دروستاهی وەکی وەلاتەکێ بێ حاکم خۆیا دبیت، ئیرۆ دبینین پشتی لادانا دەستهەلاتا رژێما بەعسیان، رژێما دوو بنەمالێن دیتر پەیدابوون (ئالبارزانی و ئالتالەبانی) دزۆر ساڤا و موبوکراسیانە سیاسەتێ دکەن و دزۆر بواراندا بهەمان عەقل و هەمان کریار و ئەجندایێ بەعسیان سەرەدەریێ دگەل خەلکێ خۆ دکەن، دشێین ڤێ یەکێ ببەلگەڤە بسەلمینین؛ /صدامی لسەر کورسیا دەستهەلاتێ ب تمامی خۆ پیرۆز دکر و خۆ دسەپاند بسەر ئیرادا مللەتیدا و بۆ خۆ دخەیالێدا وێنەکێ خودایی نەخشاندبوو و ژیانا خەلکێ قورخکربوو و عێراق بۆ وی و مالباتا وی بەحەشتبوو و بۆ هەژار و دەنگێن نەرازی جەهنەم، ئەرێ نوکە چەوایه؟ ژێرخانا ئابوری(بازار و مەلەفێ نەفتێ) و سێکتەرێ کشتولی و کەرتێ پەروەردێ و فولدەرێ پیشەسازی و سەربازی و وەبەرهێنان و مەیدانا سیاسی (دادگەهـ) و… هەرتشت هاتینەقورخکرن ژلایێ جوت بنەمالانڤە، ئەوان خۆ کریە خۆدا و خەلک کریە کویل-عبد، وان ژی بۆ خۆ بەحەشتەکا لسەر کیستێ مە چێکری و خۆ پیروزکریە، کور و نەڤیێن وان ملیاردێرن و چەوا دژین و ئەم چەوا؟ ئایا مە چ هەیە و وان چ هەیە؟ ئانکو چ جیاوازیەکا وسا پەیدابوویە ببەراورد دگەل رەوشا بەری 1991ێ؟ رەنگە خاندەڤان جورە رەشبینیەکێ دڤێ نڤێسینێدا ببینیت، لێ جارێ چەند پرسیارەکا ژخۆ بکەین و دواقعی بین دگەل خۆ ئێدی درەوا لخۆ نەکەین و خۆ رازی کەین. پرسیار؛- ئێک: پشتی لادانا دەستهەلاتا دیکتاتور صدامی ل هەرێما کوردستانێ چ تشتە بەرەڤ باشتربوونێ چوویە وەک پێشکەفتنا سیستەمێ ئابوری و کشتوکالی و سەرەدەریا دام و دەزگەهێن ئێمناهیێ دگەل خەلکی؟ دوو: رەخنەگرتن ل صدامی و گەندەلیێن وی و بەعسیا هێلا سوربوون، رەخنەگر ب سیناریویەکێ دهاتنە تیرورکرن زیندانکرن ونان برین و…ئەرێ نها لژێر دەسهەلاتا کوردیدا چەوایە بتایبەت بەهدینان(کوریا باکور)؟ سێ: ئەرێ ئەم شیاینە ئازادیەکا راستەقینه(ئازادیا رۆژنامەڤانی و ئازادیا رادەربرینێ) وەربگرین کو دەما رەخنەکێ بگرین باجێ نەدەین و نەهێینە تیرورکرن؟ چار: ئەرێ دادوەر و یاسا و دامودەزگایێن میری هەتا دادگەهـ ژی دبێ لایەنن یان کاریکاتێر و کارتونن و ب فیتکا حزبی کاردکەن؟ پێنج: ئەرێ تیرورا هزری (ٳرهاب الفکریة) ل هەرێما کوردستانێ هەیە یان نە؟ هەر تشت یێ دیارە و پێدڤی ناکەت بەرسڤا پرسیارێن سەری بدەین چونکی چ گوهرینەکا مەزن بسەردا نەهاتیە. تشتێ گرنگ ئەوە هێدی هێدی مللەت یێ هشیار دبیت و رەنگێ رەش و سپی ژێک جودا دکەت و یێ تورەیە، دبیت ئەڤ تورەبوونە ڕۆژەکێ ژ ڕۆژان ببیتە ڤولکانەک و ئێدی جاردن راپەرینەکا نوی ژدایک ببیت، چونکی خەلک یێ ماندیە و دڤێت ببیتە خودان حکومەتەکا بەرپرسیار و تاکەکێ ئاڤا و جڤاکەکێ هشیار و ئازادیەکا درست. پشتی 29 سالا پەرێ وەکی بەرێ، حکومەتەک نەشیا بیت سیستەمەکێ ئابوری و خزمەتگوزاریێن وەک ئاڤ و کارەبێ دابین بکەت، بێ گومان ژهەژی وێ یەکێ یە بکەڤیتە بەر راپەرینەکا دیتر، چونکی پروسا دیموکراسی و میتودێ ئوپوزیسیونکرنا سڤیل ل باشوور شکەستن ئینایە، بەلگە ژی پروسا هەلبژارتنا بێ قانونیەکا تمام پێڤە دیارە، ب پشت راستیڤە دبێژم دەنگدان ل هەرێمێ نەپیڤەرن بۆ وەرگرتنا دەسهەلاتێ و بالانسا سیاسی پێ ناهێتە گوهرین. رایەدارێن هەرێمێ ژی دیموکراسیەکا میکیاجکری نیشا جیهانێ ددەن و ب دیماگوگێ و مژیلکرنێ وەلاتی برێڤە دبەن و قەیرانێ ب قەیرانێ چارەسەر دکەن، ئەگەر هێزەکا نوی دەرکەڤیت ژی و بهەلبژارتنەکا بێ تەزویر ژی هەتا ببیتە یا ئێکێ ژی هەردوو حزب کورسیا دەسهەلاتێ ب ئاشتیانە رادەستی هیچ لایەنەکێ دی ناکەن پێشێلکاریێن پولیتیکی و ناقانونی لدەف وان بوویە کەلتور. عباس حسن بریفکی

پتر به‌رچاڤ بكه‌

وەڵامێک بنووسە

Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close