حەجی رێکانی
پەندەکا کوردی هەیە دبێژت:”
ئاقلێ کورمانجی پاش دهێت” باب وباپیرێن مە دێر زەمان ل گەلەک هەلکەفت وبوونان ئینایە زمان،باوەرناکەم ژی ئەڤ دەستەواژەیە ب هەروە هاتبیتە گوتن،بەلکو پاش دەرئەنجامێن کرن یان نەکرنا کارەکی هاتیەدەست،یان دهاتەگوتن پاش ژدەستدانا دەلیڤەک زێرین کو ئەگەر بدروستی دەستەبەرکربایە،پەشیمانی وپوسیدەی لدویف خودا نەدهێلا. سروشتێ ژیانێ،بەنیمرۆڤ وەها فێرکریە کوهەمی گاڤ ودەمان دەلیڤە بو هەلناکەڤن،هەر وەکو چەوا فەلەک هەمی دەمان بو نا گڕنژیت!
دیارە دژیانا کوردەواریێ دا چ وەک تاک،چ وەک گەل وچ وەک پارتێن سیاسی وسەرکردە ورێبەرێن وەڵات،دبارێن جوداجودا دا،چەندین جاران دەلیڤە وهەلکەفت ژدەست چوونە، ورەوش ژتاقەت وکونترولا وان دەرکەفتیە،ئێدی نەشیانە هەلومەرجان دبەرژەوەندیا خو وخەلک ووەڵاتێ خودا پاوان بکەن،لداویێ ژبلی پەشیمانیێ وگرفت ودەردەسەریان
هیچ تشتەک دیتر بو خو وبو گەل ونشتیمانێ خو بدەست نەئینایە.دپاشخانا بیردانکا گەلێ مەدا نمونە زۆرن،پێدڤی ناکەت چ ژ وان ب ئینمە زمان،جارەک دی دەرد وکۆلێن کەڤن نوی کەمەڤە. ماوەیەکە لوەلاتێ چینێ وپاشی زوربەیا وەڵاتێن جیهانێ،ڤایروسەکێ کوژەک بەڵاڤبوویە دبێژنێ”کورونا”.مخابن دڤان سێ چوار حەفتیێن بوریدا،ژنکەکێڤە ژئیرانێ هاتیە وهەرێما کوردستانێ ژی ڤەگرتیە
دئەنجامدا ئێک یان دوو وەلاتیان گیانێ خو ژدەستدایە،وچەندەکێن دیترژی کرەنتینەبوونە. ئەڤە ودهەڤدەمدا دگەل راگەهاندنا رێکخراوا ساخلەمیا جیهانی”WHO”،ئێشا کۆڤیدـ19 ب”پەژیەکا جیهانی”دایەنیاسین،ئەڤێ ژی وەکر تڕس ونیگەرانی ددلێ خەلکێ مەدا بنهشیت. لێ خوشبەختانە زوربەیا زور ژخەلکێ مە بخەلکەکێ هشیاردەرکەفت،هەرزوی شیان تاراددەکێ بەرچاڤ خوپارێزن وگۆهداریا شیرەت ورێنمایێن وەزارەتا ساخلەمیێ وپسپور ونوژداران بکەن،دیسان پەیرەوی وپێگریێ ب وان رێنمایی وپێرابوونێن حکومەتا هەرێما کوردستانێ بورێگریکرنێ ل بەڵاڤبوونا ڤایروسی بکەن،ونهو رەوشا هەرێمێ ژهەمی لایەکێڤە ژرەوشا گەلەک دەولەتان باشترە. ئەڤرۆ هەرێما کوردستانێ دقوناغەکا هەرە مەترسیداردا دبوریت
ئەرکەکێ نشتیمانی وئەخلاقیە لسەرملێن هەمی حزب ولایەنێن سیاسی،ب پەرلەمان وحکومەت وبریاربدەستێن خوڤە، ئارامیێ وسەقامگیریا ئابووری وجڤاکی وسیاسی دەستەبەرکەن،وبهەررێکەکا هەی،دڤێتن هەمی شیانان تەرخان بکەن،پێخەمەت ترس ونیگەرانیێ دهەست ودەرونا تاکێ کوردستانیدا نەهێلن وڤێ پەژیا کۆژەک ژناڤببەن.دیسان ئێکبوون ورێکخستنا نافماڵا کوردی دڤێ رؤژەڤێدا، مەرجەکێ دیترە دڤێتن کورد داکوکیێ لسەربکەن تا بکارن کێشێن هەرێمێ دگەل بەغداد چارە بکەن.
لێ مخابن پارتی وئێکەتی وەک دوو دەستهلاتدارێن ڤێ هەرێمێ،جارەک دی دوپاتکرن کو ئەو دئاستێ بەرپرساتیێدا نین،باتی هەردوو حزب وەک پێدڤی ب رولێ خو راببن وڤی کاودانی بدەلیڤە وەرگرن وئومێدەکێ بوخەلکی بەخشن وشیرازێ جڤاکی وسیاسی بو بەرژەوەندیا گەل ونشتیمان پاوان بکەن،مخابن دبینین دوو روژە هەڤرویشی هەڤدوو بووینەڤە وپیڤازێن هەڤدوو سپیدکەن
ژهەمیانژی بکەنیتر،پاش چەند روژەکێن دیترە دێ بینین”پەرێ وەکو بەرێ” دێ زڤڕنەڤە،وجارەک دی لسەر ئێک مێز دێ روینن وبیتە حیلحیلا وان،هەر وەکو نە با دیتی ونەباران. ئەرێ گەلو،ئەگەر ئەڤە یاریکرن ب چارەنڤیسێ مللەتەکی وب ژیان وکەرامەتا خەلکەکی نەبیت
ئەرێ هوین نابێژنە من چ دبێژنە ڤێ؟!!. روژەڤ هەستیارە،گەلێ مە دقوناغەکا مەترسیداردا دبووریت،وئەم هەمی یێ دکەشتەکێدا، وکەس نزانیت کا بەرەف کیڤە دچین وقەدەرێ چ بومە ڤەشارتیە ل ئایندەی؟! کۆنەک یان دەرزەک بتنێ دکەشتیێ بکەڤیت،هەمی پێکڤە دێ نقومبین وخەندقین. لەوما پێدڤییە لسەر مە هەمیان ڤێ دەرفەتێ وهەلکەفتا خەتەرناک دبەرژەوەندیا گەل ووەڵاتێ خودا پاوان بکەین!!،نەکە پاشی پەشیمان بین وتلێن خو بگەزین
