وه‌ك جڤاكه‌ك به‌ره‌ڤ مه‌ده‌نیه‌تێ، ژیانا سه‌رده‌م و زانینا رێك و رێبازێن ژیانێ، به‌رى چه‌ندین سالان ب كوم گه‌نجان ده‌ست دانه ئاڤكرنا رێكخراێن جڤاكێ سڤیل و سه‌نته‌رێن ره‌وشه‌نبیرى، وان دخاست موهرا خۆ ل گوهرینێن د ناڤا جڤاكى دا بده‌ن و ب گشتى خه‌لكى لدوور ئه‌رك ومافێن وان یێن یاسایى و خۆزه‌ایى هشیاربكه‌ن، سمیناران جهـ ددا وركشوپان و وان ژى جهـ ددا گه‌ریانێن زانستى یێن نافخۆیى و ده‌ڤه‌ره، و دگه‌ل كو رێژه‌كا كێم یا ژنان ژى دناڤدا بوون لێ ئه‌ڤ گه‌نجه لگوره هزرا خۆ یێ كاره‌كى به‌ره‌ڤ گوهرینا جڤاكى دكه‌ن و وان هه‌یڤانه دراڤه‌كێ باش ژ حكومه‌تا هه‌رێمێ و رێكخراوێن بیانى و كه‌سێن خێرخازێن نافخۆیى و دبیت ژى هنده‌ك كه‌سێن ژ ده‌رڤه‌ى وه‌لاتى ژى وه‌رگرتبن، لێ دگه‌ل داعش ئه‌و نه‌مان و دگه‌ل نه‌مانا داعش ئه‌و زێده‌تر به‌ره‌ڤ نه‌مانێ چوون وه‌سا دیاربی كو ئه‌و یێن ژ جڤاكى د سلن. ل ده‌ڤه‌را به‌هدینان زێده‌ترى 480 ژ ڤان رێكخراو و سه‌نته‌ران هه‌نه و بێ ڤه‌برى دشێم بێژن زێده‌ترینا وان یێن د خه‌وا گران دا، یان چ ڤێ نه‌مایه، یان خۆ یێ فروتى و یان ژى بێ پاره چ گوهرین د هزرا وان دا نینه و یێن بوینه بارگرانى ل سه‌ر دلێ جڤاكى، ئه‌وێن كو دهى دخاستن جڤاكى بگوهرن ئه‌ڤرۆ یێن ژ جڤاكى دره‌ڤن. دپرسم: ئه‌رێ ئه‌ڤ كه‌سێن هه‌نه (واته ده‌سته‌كا كارێ ڤان رێكخراوان) چ ڤێنه‌بوو؟ ژ چنه‌یێ هاتبوون؟ نزانن چ بكه‌ن؟ ب پاره هاتینه كرین؟ یان ژى شه‌رمێ ژ هه‌بوونا خۆ دكه‌ن كو نه‌شێن چ بكه‌ن؟ ئه‌ڤ هژمارا مه‌زن یا لسه‌رى مه گوتى ئه‌گه‌ر دابه‌شى سه‌ر سه‌نته‌رێ پارێزگه‌هێ و گشت ده‌ڤه‌رێن سه‌ر ب به‌هدینان بكه‌ین ل هه‌ر گوند و كومه‌لگه‌هان ژى دێ رێكخراوه‌ك ب به‌ر وان كه‌ڤیت لێ سلبوونا وان یا ئه‌ڤرۆ ل گوره‌ى من ژ وێ چه‌ندێ یه كو چ ڤێ نه‌بوو و چ ڤێ نینه ژى.
