سه‌ردار هێتوتى
بۆ ئێك هه‌ڤركین، نه‌یارێن هه‌ڤین، تێكدانا ئێك و دوو كارێ مه‌یێ سه‌ره‌كیه، نابیت كه‌س ژ مه بگه‌هیته ئاسته‌كێ باشێ چاڤه‌رێكرنێ، دێ تێكده‌ین، دێ خراب كه‌ین، دێ هه‌لوه‌شینین.
ئه‌ڤه كارێ مه یێ ب ده‌هان و سه‌دان سالانه، تاكه ئارمانجا مه ئه‌ڤه‌یه، دلێ مه ب هه‌لوه‌شیانا برایێ مه گه‌ش دبیت و دشێن تێر تێر بنڤین و سپێده‌هیا رۆژا پاشتر ده‌ما ژ خه‌و رادبین گه‌له‌ك د ئارامین هه‌ر وه‌كى مه وه‌لاتێ فرسا هه‌مى گرتى و مه ئه‌و هندى هه‌بینا وان یا راستى لێكرى، یان ژى هه‌ر وه‌كى مه وه‌لاتێ تركا یێ نوكه گرتى و مه ئه‌و هنارتیه جهێ بابكالكێن وان.
ب بریاره‌كا موكم و بهێز یا سالا 1991 كو ژ لایێ جڤاتا ئه‌وله‌كاریا نیڤ ده‌وله‌تى ڤه هاتیه ده‌رئێخستن بۆ پاراستنا توخیبێن هه‌رێما كوردستانێ ژ هه‌ر داگیركه‌ریه‌كێ و ژ به‌ر گرانیا وێ بریارێ هه‌تا نوكه ئه‌م نه‌شیاینه چ بكه‌ین و ئه‌ڤا هه‌ى ژ ناڤ ببه‌ین ئه‌گه‌ر ژ مێژه وه‌ره هنده‌ك به‌رهه‌ڤن كولاڤێ خۆ بفروشن داكو ڤێ پارچێ ژى ژناڤ ببه‌ن و ئه‌وا ب زه‌حمه‌ت ب ده‌ست ڤه‌هاتى ژ به‌ر كێم مێشكیا خۆ و ژ بۆ كاره‌كێ بازرگانى ته‌رابه‌را بكه‌ن و ناڤێ كوردستانێ د گوهـ و مه‌ژیێ گه‌لێ كوردا نه‌هێلن.
ده‌مه‌كه ل ڤێره و وێراهه مه گوهـ ژ قوتانا ده‌هۆلا شه‌رى و لێككه‌فتنێ و تێكدانێ یه، ده‌هولقوتێن ڤى كارى ئه‌و كرمن یێن كو بۆ چه‌ندین سالانه ل سه‌ر له‌شێ ڤى گه‌لى و هه‌ر دخۆن و دخۆن و هێشتا ژى لبه‌ره یا ماى ژى بخۆن.
كوردێن هه‌رێما كوردستانێ دڤێت ب ئاگه‌هـ بن و ل دیڤ وان ده‌هولقوتان نه‌چن و لبه‌ر ده‌نگێ ده‌هولا وان گوڤه‌ندێ گرێنه‌ده‌ن و به‌س بلا ئارمانجا ڤى گه‌لى ئاڤه‌دانى و خوشگوزه‌رانى و نه‌هیلانا نه دادیێ بیت.
