سه‌ردار هێتوتى
په‌یڤا ڤایروسێ چینێ ژ گۆتنه‌كا دونالد تره‌مپ سه‌روكێ ئه‌مریكا هاتیه ده‌ما كو كوڤید19 ب ڤایروسێ چینێ ل قه‌له‌م دده‌ت له‌ورا من ژى هه‌مان ناڤ هه‌لبژارت و ئه‌ڤ ڤایروسه ده‌مه‌كێ نه‌گه‌له‌ك درێژه ل وه‌لاتێ چینێ سه‌رهه‌لدای، ئه‌و وه‌لاتێ كو هه‌ڤركیا سه‌ركێشیا ئابوورا جیهانێ دگه‌ل ئه‌مریكا دكه‌ت و حكومه‌تا چینێ ب رێك و رێبازێن خۆ دشێت كۆنترولێ تا راده‌كێ زیده مه‌زن ل سه‌ر به‌لاڤبوونا ڤایروسێ كوڤید19 بكه‌ت دگه‌ل كو خه‌لكێ وى وه‌لاتى ژ نه‌چارى دڤێت كار بكه‌ن و به‌رهه‌مێ روژانه ژى ل مال بمه‌زێخن لێ حكومه‌ت شیا وان راوه‌ستینیت و نه‌چار بكه‌ت كو پێگیریێ ب یاسایێن وه‌لاتى بكه‌ت و باژێره‌كێ مه‌زن یێ وه‌ك ووهان ب گشتى دهێته كه‌ره‌نتین كرن.
دا گه‌له‌ك به‌حسێ چینێ نه‌كه‌ین چونكى وان شیا سه‌ركه‌ڤن و مه دڤێت باس ل به‌رهنگاریا ڤى ڤایروسى ل كوردستانێ بكه‌ین، ڤایروس ل مه‌ها ئادارێ ب ئاوایه‌كێ به‌رفره‌هـ ل وه‌لاتى به‌لاڤبوو، حكومه‌تێ ژ نه‌چارى رێك گرتن، هه‌رێم ب گشتى كه‌ره‌نتینكر، نوژدار شه‌ڤ و رۆژ دكارى دا بوون، پولیس، پێشمه‌رگه و ئاسایش ل سه‌ر ئه‌ركێن خۆ بین، لێ حكومه‌ت نه‌شیا سه‌ركه‌ڤیت ل سه‌ر ڤایروسێ چینێ ل كوردستانێ، چونكى ڤایروسێ مه گه‌له‌ك بهێزتره ژ ڤایروسێ چینێ، ڤایروسێ چینێ دێ ب ڤه‌دیتنا ده‌رمانه‌كى دیماهى ب زیانێن وێ هێت لێ ب ڤه‌دیتنا ده‌هان ده‌رمان و رێك و رێباز و هزر و ئایدولوژیا ڤایروسێ مه چ جاران ب دیماهى ناهێت چونكى ڤایروسێ مه ژ كیراتیا دلێ عه‌شیره‌تێ هاتیه و ب ده‌ستێن حكومه‌تا هه‌رێمێ ژى هاتیه ئاڤدان و نوكه ژى سه‌ركاروانێن وان ئاغا و ده‌ره‌به‌گن له‌ورا خه‌لك چ به‌هایه‌كى ناده‌ته ساخله‌میا خۆ و ژ ڤایروسێ چینێ ناترسیت.
