سەرۆکێ حکومەتا هەرێمێ دەربارەی ئالۆزیێن زینێ وەرتێ ڕاگەهاند، “ب چ ئاوایان قەبوول ناکەین ب ڕوالەت حکومەتا یەکگرتوو هەبیت، ل بەشەکا هەرێمێ دەستهەلاتدارێن دی هەبن و دژایەتیا حکومەتێ بکەن”.
مەسرور بارزانی سەرۆکێ حکومەتا هەرێمێ د زەلالکرنەکێ دا دیارکر، “ژ دەستپێکا ڕێکارێن کۆنترۆلکرنا دەڤەرێن سنوری ژبەر ڤایرۆسێ کۆرۆنایێ، هەژمارەک قاچاخچیان بزاڤا ئینان و برنا چەند کەسان دایە ل وی سنوری، کو بەرڤاژی ڕێنمایێن ساخلەمیێ یێن حکومەتێ بوو”.
دازانین ژی، “بۆ ڕێگریکرن ژ سەرپێچیان، وەک گەلەک دەڤەرێن سنوریێن دی، وەزارەتا پێشمەرگە هێزکە یەکگرتی و هەڤبەش بۆ زینێ وەرتێ شاند، لێ جهێ داخێیە دەمەکێ دا کو چاڤەڕێی پشتەڤانیا هەموو ئالیان بووین ژ حکومەتێ، تاقمەکێ دیارکری ب مەرەم و نەفەسا حزبیانە، هێزا حزبی لهەمبەر هێزا حکومەتێ لڤاند و ب ئاشکرا لدژی حکومەتێ ڕاوەستیان، ب هێجەتا وێ یەکێ کو دهات گوت ئەڤ سنورە یێ حزبەکا دیارکریە و حکومەتا هەرێمێ نکاریت هێزێن هەڤبەش تێدا بنەجهـ بکەت، بۆ وێ مەرەمێ ژی کەفتنە تۆهمەت دروستکرنێ و تێکەلکرنا بابەتێن نەدجهـ و نەپەیوەندیدار”.
ئەو یەک ژی گوتیە، “ئەو هێزێن هەڤبەش بێ چ هەستیاریەک د هەموو پارێزگەهێن هەرێمێ دا هاتنە بەلاڤکرن، لەورا لڤێرە ڤێ پسیارێ ل پێشیا ڕایا گشتیا کوردستانێ ددانین، کو بۆچی و ب چ مەرەم تنێ دژایەتیا چوونا هێزا حکومەتێ بۆ زینێ وەرتێ دهێتە کرن؟”.
د بەشەکێ دی دا دبێژیت، “تەکەز دکەم کو ژبلی هێزا پێشمەرگە یا سەر ب وەزارەتا پشێمەرگە، چ هێزەکا دی ل زینێ وەرتێ نەهاتیە بنەجهـ کرن”.
داخواز ژی ژ ئالیێن سیاسی کریە، “بڕیارێن حکومەتێ ب بڕیارێن حزبی نەزانن و سەپاندنا یاسایێ ب هەڤڕکیێن حزبی حساب نەکەن”.
ڕاگەهاندیە ژی، “ئەوا نها ڕووددەت یاخیبوونا تاقمەکێ دیارکریە لهەمبەر حکومەتێ، نەک هەڤڕکیێن حزبی، هیڤیخوازین ئەو ئالی ب هۆشیاری سەرەدەریێ دگەل ڤێ ئالۆزیێ بکەن و ڕوولێ خێر و باندۆرێ وان ب وی ئاوای دەرکەڤیت، کو هەمبەر ناحەقی و بنپێکاریان ڕاوەستن، نەک باش و خرابان ب یەک چاڤ تەماشە بکەن
