سه‌ردار هێتوتى
گرۆپێن فشارێ وه‌ك ئامرازه‌كێ پاراستنا هه‌ڤسه‌نگیا ده‌ستهه‌لاتا یاسادانان و ده‌ستهه‌لاتا بجهئینانێ د چارچوڤێ ره‌واییا ده‌ستوورى دا دهێنه قه‌بیلكرن، هه‌روه‌سا ڤان گرۆپان كارتێكرن و كاریگه‌رى ل سه‌ر ده‌ستهه‌لاتا بجهئینانێ ژى هه‌یه چونكى ب ره‌نگه‌كێ یاسایى رێ ب وان هاتیه دان.
ژ به‌ر كو تاك ب ته‌نێ د ناڤا كوما مه‌زن یا جڤاكى دا نه‌شێت مافێن خۆ بپارێزیت و به‌ره‌ڤانیێ ژ هه‌بینا وان بكه‌ت، له‌ورا هه‌ر گرۆپه‌ك ژ كومه‌كا كه‌سێن خۆدان ئێك ئارمانج و ئێك هزر و ئێك به‌رژه‌وه‌ندا ل هه‌ڤ نێزیك پێك دهێت، و ب ڤێ ئێكێ دشێن كاریگه‌ریێ ل سه‌ر رایا گشتى و ده‌ستهه‌لاتا رێڤه‌به‌را وه‌لاتى و جڤاتا نیشتیمانى و په‌رله‌مانى بكه‌ن.
ل وه‌لاتێن رۆژئاڤا تا ئاسته‌كێ باش ئه‌ڤ گرۆپه شیانه سه‌ربخویا خۆ بپارێزن و تێكه‌لى ناڤا كارێن سیاسى یێن پارتێن ده‌ستهلاتدار و ئوپوزسیونێ نه‌بن، له‌ورا دشێن ب شێوه‌كێ راستگویانه ڤه‌لڤینێن خۆ یێن كو د چارچوڤێ مافێن وان دانه ژ بۆ گۆهرینا یاسایێن بنگه‌هین یێن وه‌لاتى بكه‌ن، هه‌ر چه‌نده ئه‌ڤ گرۆپه پشكه‌كن ژ پروسا سیاسى لێ ئارمانجا وان گه‌هشتنا ده‌ستهه‌لاتێ نینه و ناخازن جهێ حكومه‌تا وه‌لاتێ خۆ بگرن.
گروپێن فشارێ كو ژ كومین مروڤان پێك دهێن دناڤا سه‌ندیكا و ئێكه‌تیێن كرێكارا و نوژدارا و ئه‌ندازیاران دا خۆ رێكخست كرنه و ئه‌ڤرۆ ل سه‌ر ئاستێ كوردستانێ گه‌له‌ك ژ ڤان گروپێن فشارێ ناڤه‌كێ مه‌زن یێ هه‌ى دگه‌ل ناڤه‌روكه‌كا ڤالا.
سه‌ندیكا و ئێكه‌تیێن كارى، هه‌ر ژ ئێكه‌تیێن قوتابى و خویندكارا هه‌تا سه‌ندیكایێن نوژدارى و ئه‌ندازیارى و یاسادانانێ و رۆژنامه‌ڤانیێ تێكه‌لى ناڤا هزر و ئایدولوژیا حزبێن كوردستانى بوینه و نه‌شیانه خۆ ژ ڤان قه‌یدان ده‌رباس بكه‌ن، له‌ورا ب تنێ وه‌ك ناڤ مانه بێى كو بشێن بێى سه‌روكانیا خۆ پێنگاڤه‌كێ بهاڤێژن.
