نێرین

گوهارتنا خوه‌دانی نه‌ ئازادیه‌

پرسا ئازادیا لگور باوه‌ر‌یا من پرسه‌ك سه‌ره‌كی‌ بویه‌ ژبو هه‌ر تاكه‌كه‌سه‌كی هه‌یا دگه‌هیته‌ هه‌می چه‌مكێم جڤاكێ هه‌ر ژ جێگیربونا یه‌كه‌مین خێزانا هه‌یا دگه‌هیته‌ رۆژا مه‌یا ئه‌ڤرو و دوروست بونا ده‌وله‌تا و سنورا. لێ ته‌ماشه‌كرنا ئانكو تێگه‌ها ڤێ په‌یڤێ د پراكتیكێ دا لكومه‌لگه‌هێن جودا جودا بویه‌،

له‌وما سه‌رئه‌نجاما ئازادیێ گه‌له‌ك جاران ژ كوله‌تیا پێشین وێرانتر بویه‌. ئازادی بباوه‌ریا من نابیت بێت پارچه‌كرن، ئانكو بو نمونه‌ ده‌ما هنده‌ك ده‌ستهه‌لاتدار دبێژن مه‌ گه‌له‌ك ئازادی هه‌یه‌، ئه‌ڤ رسته‌ بخوه‌ به‌رسڤه‌ كو ئازادی نینه‌ و ئه‌و ئازادیا ده‌ستهه‌لاتدار باس دكه‌ن ئه‌وه‌ یا وان ده‌ستنیشان كری نه‌كو تاكه‌كه‌سی بو خوه‌ هه‌لبژارتی. بسه‌دان ساله‌ بسه‌دان سه‌رهه‌لدان و به‌رخوه‌دان هاتینه‌ كرن،

بملیونا خه‌لك بوینه‌ قوربانی هه‌می ژی لژێر ناڤێ گه‌هشتنا ئازادیێ، لێ لێكولینێن پێویست ئه‌م ناكین ژبو ئه‌م بزانین كانێ سه‌رئه‌نجاما ڤان به‌رخوه‌دانا ئازادیه‌ك ئافراندیه‌ یان نه‌، بباوه‌ریا من پرانیا مه‌ هه‌ر ژ زاروكاتیا مه‌ هه‌یا ئه‌ڤرو دوزانیت خه‌لكێ مه‌ به‌رده‌وام دبێژیت خوه‌زیكێن دوهی،

ئه‌ڤه‌ بخوه‌ باشترین دانپێدانانه‌ بوێرانیا بسه‌رێ ڤی خه‌لكی هاتی ژ به‌رهه‌مێ ڤان سه‌رهه‌لدان و قوربانیا. له‌وما بباوه‌ریا من خه‌لك وه‌ك هه‌رده‌م كوله‌یه‌ و ئارمانجا وی ژ ئازادیێ‌ گوهارتنا خوه‌دانیه‌ بهیڤیا په‌یداكرنا خوه‌دانه‌ك دلوڤان و بره‌وشتر ژ خوه‌دانێ هه‌ی. سه‌رئه‌نجاما گوهارتنا ڤان خوه‌دانا خوه‌دانه‌ك بێ ره‌وشتر و سته‌مكارتر ئانیه‌ ئورتێ، ئه‌گه‌ر ته‌ماشه‌ی هه‌ر خوه‌دانه‌ك ژ ڤان خوه‌دانا بكه‌ین دێ بینین هه‌ر یه‌كی هه‌ولدایه‌ سود ژ بێ ره‌وشتی و سته‌مكاریا خوه‌دانێ پێشیا خوه‌ وه‌رگریت و هنده‌ك چه‌په‌لی و بێ ره‌و‌شتیا خوه‌ لێ زێده‌كه‌ت، زیندان ماستر دبن، شێّوێن تازه‌یێن ئه‌شكه‌نجه‌دانێ په‌یدا دبن، خوه‌دان كالفامتر دبیت،

كوله‌ هه‌ر كوله‌ دمینیت لێ شێوازێن كوله‌تیێ تێن گوهارتن. پشتی هه‌ر خوه‌دانه‌كی پتر و پتر مه‌ژیێ خه‌لكی ژكار دكه‌ڤیت، پرانی دبنه‌ بونه‌وه‌ره‌ك بێ به‌رهه‌م، چونكه‌ مروڤێ ئازاد مروڤه‌ك هزركه‌ره‌، هزركرن كاركرنه‌، كار به‌رهه‌مه‌، به‌رهه‌م جڤاكه‌ك ساخله‌م و خوه‌شبه‌خته‌. رولێ تاكه‌ كه‌سی زۆر به‌رچاڤبویه‌ لمێژویا مروڤایه‌تیێ، لێ ئه‌ڤ روله‌ ژ لایێ هنده‌ك كه‌سان ڤه‌ وێرانكه‌ر بویه‌ و ژ لایێ به‌شه‌ك دن ئاڤادانكه‌ر بویه‌،

لێ بمن هه‌یا كه‌سێن روله‌ك پێشه‌نگ هه‌ی یان هه‌بیت نابیت بگه‌هیته‌ پلا ژ كارخستنا مێژیێ مروڤێن وێ جڤاكێ. جڤاك نابیت كه‌سه‌ك ببینیت وه‌ك كه‌ساتیه‌ك بێ به‌ڤل، یانژی ژده‌ستدانا وی وێ ڤالاتیه‌ك لپشت خوه‌ بهێلیت. د جڤاكه‌ك ساخله‌م دا دڤێت به‌رده‌وام بون هه‌بیت بهاتنا كه‌سێن نوی، خوه‌دی دونیابینیه‌ك تازه‌، لسه‌ر بنه‌مایێ پێشخستن و بهێزكرنا خالێن چاك و چاره‌سه‌ركرنا ئاسته‌نگ و خالێن لاواز.

هه‌ركه‌س لجڤاكێ خوه‌دی دیتنه‌ك ‌، پرۆژه‌ك و ستراتیجیه‌ك تایبه‌ته‌ بو پرسه‌ك یان چه‌ند پرسێن رۆژه‌ڤێ لێ هیچ كه‌س نینه‌ بمن به‌رسڤ بو هه‌می پرسا هه‌بیت بدرێژیا ته‌مه‌نێ خوه‌ و ده‌ستهه‌لاتداریا خوه‌، له‌وما سه‌ربور بومه‌ دسه‌لمینن كو گه‌له‌ك مروڤ نیازپاك بوینه‌ لسه‌رده‌مه‌كی،

لێ درێژبونا ماوێ وان لسه‌ر ده‌ستهه‌لاتێ خوه‌ و خه‌لكێ خوه‌ توشی كاره‌ساتا كرینه‌، چونكه‌ بمن ده‌ما مروڤ لكولانایه‌ و تێكه‌له‌ لگه‌ل خه‌لكێ ئاسایی باش بئێش و ژانێن وان دوزانه‌، بدویركه‌فتن ژ كولانێ بچه‌ندا سالان وادكه‌ت ڤالاتیه‌ك په‌یدابیت. دبه‌ ده‌ستهه‌لاتدار هزر بكه‌ت پرانیا گرفتێن وی دوزانین چاره‌سه‌ر بوینه‌ له‌وما شانازیێ بخوه‌ دكه‌ت، لێ دهه‌مان ده‌مدا نوزانیت یانژی دخوازیت خوه‌ تێنه‌گه‌هینیت،

كو پرانیا جاران هنده‌ك چاره‌سه‌ری كێشێ دن بدویف خوه‌دا تینن، بپێشڤه‌چونا ژیانێ هیڤی و داخوازێن دن لجه‌م خه‌لكێ په‌یدا دكه‌ن و ژبه‌ر ڤا‌لاتیا دناڤبه‌را كولانێ و ته‌لارا ده‌ستهه‌لاتداری هه‌رچه‌ند نیازپاك ژی بیت دابرینه‌ك دوروست دبیت، سه‌ر ئه‌نجاما هه‌می دابرینه‌كێ تێنه‌گه‌هشتنه‌ك په‌یدا دبیت، له‌وما بمن نابیت كه‌سه‌ك هه‌ری زۆر پتر ژ ١٠ سالان لجهه‌كی ده‌ستهه‌لاتداربیت، چونكه‌ چه‌ندی زانا بیت، دێ كالفامبیت.

ئاوازێ هه‌رێ به‌رنیاسێ گوهێن مه‌ داگرتی كو كوله‌یێن ته‌لارا ده‌ستهه‌لاتداری لناڤا كوله‌یێن لكولانا به‌لاڤ دكه‌ن، ئه‌وه‌ ده‌ما دبێژن ئه‌گه‌ر ئه‌ڤ جامێره‌ نه‌مینه‌ وێ خوین برژیت، وێ وه‌لات دابه‌ش بیت، وێ وه‌لات وه‌رانبیت، وه‌لات هه‌می وه‌ك زه‌ڤیه‌ك مینا یه‌كلدوی یه‌ك وێ بپه‌قیت. ئه‌گه‌ر راست بیت، كی یه‌ ئه‌ڤ كه‌ربه و نه‌ڤیانه‌ لناڤا خه‌لكێ به‌لاڤكری؟ كیه‌ وه‌لات هه‌می مینكری؟ ئه‌ڤ پرسه‌ و گه‌له‌ك پرسێن دن كوله‌یێن

ته‌لارا به‌رسڤ ناده‌ن، چونكه‌ باس دوزانن كو هه‌می به‌رهه‌مێ ده‌ستهه‌لاتدارێ كا‌لفام و بێ ره‌وشته‌. بكورتی و بكوردی هه‌یا تاكه‌ كه‌سێ كورد خه‌باتا به‌رخوه‌دانا وی شوینا ئازادیا مروڤی په‌یداكرنا خوه‌دانه‌ك دلوڤان بیت وێ ژ كوچكی بكه‌ڤیته‌ ته‌نیرێ

پتر به‌رچاڤ بكه‌
Back to top button

ئه‌ڤ مالپه‌ره‌ cookies بكارتینه‌ . ژ بو به‌رده‌وام بونا ب كارئینانا ڤى مالپه‌ری . پێویسته‌ تو بكارئینانا مه‌ بو cookies ب په‌ژرینی 

Close