ئەحمەد بالایی
ئەگەر کوردان هندک مفا ژسەربۆرێن دیرۆکێ وەرگرتبایە، هەست ب ئێش وئازارێن گەلێ کورد کربایە، دا هندک رێز و روومەتێ ل خوین وخەباتا گەلێ کوردگرن و بەژنا خوە لهەمبەرکاروانێن شەهیدان وکۆمکوژیێن (ئەنفال، حەلەبچە، گەرمیان، بەهدینان، بانێ، شنگال، رۆبوسکێ، کۆبان، عفڕینێ، پرسوسێ و…) تەوینن وهێزێن خوە کەنە ئێک دەستێ براینیێ تێکگرن و دەست ژ دژیەتیا ئێک بەردەن. چما ب درێژیا ژیانێ کورد دکارن ب ئاسانی لهەمبەرهێزێن داگیرکەر کێماسیێ بکەن و دەست ژ دەستکەفتێن نەتەوەیی بەردەن، لێ نکارن لهەمبەر ئئێکدو بچوکترین کێماسیێ لسەر خوە قەبول بکەن، چما هەرتم هێز و پارت ولایەنێن سیاسی یێن کوردان شەرت و مەرجێن خوە لسەر ئێکدو دسەپینن، مینا میرگەهـ وئەشیرێن کوردان هەرتم بسەر وستویێ ئێک ڤەنە وسیاسەتا تولهلدانێ ل دژی ئێکدو بکاردئینن؟. ئیرۆ خوینا لاوێن مە ل هەموو پارچێن کوردستانێ تێکەلبوویە، هێزێن (پێشمەرگە، گەریلا، شەرڤان و…) دئێک سەنگەردا بەرهنگاری هێزێن تاریێ دبن وخاکا کوردستانێ ب خوین وخەباتا خوە دپارێزن. ئەوسنورێن دەستکارێن پێش سەد سالان بدەست هێزێن داگیرکەر وکەڤنەپەرستا جیهانێ هاتینە دانان دناڤبەرا چارپارچێن کوردستانێ دا، ئیرۆ گەلێ کورد ب هێز و هەیبەتا خوە ئەو سنورهەلوەشاندنە وداستانێن ئەفسانەیی د دیرۆکا هەڤچەرخ دا توماردکەن. دوژمنێن کوردان و نەیارێن مرۆڤایەتیێ ب درێژیا دیرۆکێ کۆمکوژی وکارەساتێن بێ وێنە لسەر ناڤێ ئیسلامێ، مەزهەبی، نەتەوەیی و…) لدژی گەلێ کورد ئەنجامدانە وپلانێن ژناڤبرنێ لهەمبەر گەلێ کورد گێرانە هەیا گەهەشتیە تاوانا جینوسایدێ، کو گەلێ کورد قربکەن، چاند و کولتۆرێ وان ژناڤ ب بەن و دیرۆکا وان بن ئاخ بکەن. بلا بەسبیت ئێدی گەلێ کورد ئەو قاس ئێش وئازاران دکێشیت وچاڤەریێ قەدەرێ دبیت، ئیدی دیرۆک دلۆڤانیێ ب وە نابەتن، دەما گەل نەچاردبیت مینا ڤولکانەک ئاگری دێ پەقیتن ئێدی چ هێز پارت و ئەشیرخوە لبەر پێلێن گەل ناگریتن. ڤێجار هیڤیدارین ژهەموو هێز ولایەنێن کوردی بلا بەس باوەریا خوە ب هێزێن داگیرکەربینن، بلا بیر و باوەریەک مۆکوم ب هێزاگەل هەبیت، بلا دەست ژ بەرژوەندیێن خوە یێن کەسایەتی وحیزابەتی بەردەن و ئاورویەکێ ل هەژارێن کوردستانێ بدەن. بلا بەس چارەنڤێسێ خوە بێخین دەست قەدەرێ و بوویەرێن دلتەزین لبامە دوبارە ب بن.ئەگەر قوناغێن رەش و تاری دێ پێشوازیێ لەکەن.
